ਫਰਿਜ਼ਨੋ, (ਗੁਰਿੰਦਰਜੀਤ ਨੀਟਾ ਮਾਛੀਕੇ)- ਸਰਕਾਰ ਵਲੋਂ ਕੋਰੋਨਾ ਵਾਇਰਸ ਮਹਾਮਾਰੀ ਦੌਰਾਨ ਆਰਥਿਕ ਸੰਕਟ ਦਾ ਸਾਹਮਣਾ ਕਰ ਰਹੇ ਕਾਰੋਬਾਰਾਂ, ਲੋਕਾਂ ਅਤੇ ਹੋਰ ਛੋਟੀਆਂ ਫਰਮਾਂ ਲਈ ਕਈ ਤਰ੍ਹਾਂ ਦੀਆਂ ਵਿੱਤੀ ਯੋਜਨਾਵਾਂ ਪੇਸ਼ ਕੀਤੀਆਂ ਗਈਆਂ ਹਨ ਪਰ ਕਈ ਲੋਕ ਅਜਿਹੇ ਵੀ ਹੁੰਦੇ ਹਨ ਜੋ ਗਲਤ ਤਰੀਕੇ ਅਪਣਾ ਕੇ ਅਜਿਹੇ ਸੰਕਟ ਦੇ ਸਮੇਂ ਵੀ ਜ਼ਿਆਦਾ ਪੈਸਾ ਕਮਾਉਣ ਦੀ ਲਾਲਸਾ ਰੱਖਦੇ ਹਨ।
ਅਜਿਹਾ ਹੀ ਇਕ ਮਾਮਲਾ ਫਲੋਰੀਡਾ ਦੇ ਮਿਆਮੀ ਵਿਚ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਵਿਅਕਤੀ ਜੋ ਕਿ ਪੇਸ਼ੇ ਵਜੋਂ ਇਕ ਨਰਸ ਹੈ, ਨੇ ਕੋਰੋਨਾ ਵਾਇਰਸ ਸਹਾਇਤਾ ਰਾਸ਼ੀ ਵਿਚੋਂ ਧੋਖਾਧੜੀ ਨਾਲ ਤਕਰੀਬਨ 420 ਹਜ਼ਾਰ ਡਾਲਰ ਹਥਿਆਏ ਹਨ। ਸਰਕਾਰੀ ਵਕੀਲਾਂ ਅਨੁਸਾਰ 55 ਸਾਲਾ ਗਿਰਾਲਡੋ ਕਾਰਾਬਾਲੋ ਸ਼ੁੱਕਰਵਾਰ ਨੂੰ ਮਿਆਮੀ ਸੰਘੀ ਅਦਾਲਤ ਵਿਚ ਆਇਆ ਅਤੇ ਇਸ ਵਿਅਕਤੀ 'ਤੇ ਗੈਰ ਕਾਨੂੰਨੀ ਕਮਾਈ ਵਿਚ ਸ਼ਾਮਲ ਹੋਣ ਅਤੇ ਵਿੱਤੀ ਸੰਸਥਾ ਨੂੰ ਝੂਠੇ ਬਿਆਨ ਦੇਣ ਦਾ ਦੋਸ਼ ਲਗਾਇਆ ਗਿਆ ਹੈ। ਇਸ ਮਾਮਲੇ ਵਿਚ ਇਕ ਅਪਰਾਧਿਕ ਸ਼ਿਕਾਇਤ ਅਨੁਸਾਰ ਕਾਰਾਬਾਲੋ ਨੇ ਆਪਣੀ ਕੰਪਨੀ ਪ੍ਰੋਫੈਸ਼ਨਲ ਸਕਿੱਲ ਇੰਕ. ਵੱਲੋਂ ਪੇਚੈਕ ਪ੍ਰੋਟੈਕਸ਼ਨ ਪ੍ਰੋਗਰਾਮ ਲੋਨ ਲਈ ਅਰਜ਼ੀ ਦੇ ਕੇ ਸਹਾਇਤਾ ਵੀ ਪ੍ਰਾਪਤ ਕੀਤੀ ਸੀ। ਉਸ ਨੇ ਦਾਅਵਾ ਕੀਤਾ ਸੀ ਕਿ ਕੰਪਨੀ ਦੇ 28 ਕਰਮਚਾਰੀ ਹਨ ਅਤੇ ਉਨ੍ਹਾਂ ਦੀ ਮਹੀਨੇ ਦੀ ਔਸਤਨ ਤਨਖ਼ਾਹ 1,68,000 ਡਾਲਰ ਹੈ, ਜਿਸਨੂੰ ਕਿ ਜਾਂਚਕਰਤਾਵਾਂ ਨੇ ਝੂਠਾ ਦੱਸਿਆ ਹੈ। ਇਸ ਦੇ ਇਲਾਵਾ ਕਾਰਾਬਾਲੋ ਨੇ ਆਰਥਿਕ ਤਬਾਹੀ ਕਰਜ਼ੇ ਵਜੋਂ ਲਗਭਗ 55,000 ਡਾਲਰ ਦੀ ਸਹਾਇਤਾ ਅਰਜ਼ੀ ਦੇਣ ਤੋਂ ਬਾਅਦ ਪ੍ਰਾਪਤ ਕੀਤੀ ਸੀ।
ਇਸ ਦੌਰਾਨ ਤਨਖ਼ਾਹ ਲਈ ਪੈਸੇ ਦੀ ਵਰਤੋਂ ਕਰਨ ਦੀ ਬਜਾਏ, ਵਕੀਲ ਅਨੁਸਾਰ ਕਾਰਾਬਾਲੋ ਨੇ ਇਸ ਪੈਸੇ ਨੂੰ ਹੋਰ ਖਾਤਿਆਂ ਵਿਚ ਟ੍ਰਾਂਸਫਰ ਕਰਨ ਦੇ ਨਾਲ ਇਸ ਨੂੰ ਨਿੱਜੀ ਖਰਚਿਆਂ ਲਈ ਵਰਤਿਆ। ਪੇਚੈਕ ਪ੍ਰੋਟੈਕਸ਼ਨ ਪ੍ਰੋਗਰਾਮ ਕੋਵਿਡ -19 ਮਹਾਮਾਰੀ ਦੇ ਕਾਰਨ ਸੰਘਰਸ਼ ਕਰ ਰਹੇ ਅਮਰੀਕੀਆਂ ਅਤੇ ਛੋਟੇ ਕਾਰੋਬਾਰੀ ਕਰਜ਼ਿਆਂ ਵਿਚ ਅਰਬਾਂ ਡਾਲਰ ਦੀ ਸਹਾਇਤਾ ਕਰਦਾ ਹੈ।
USA: ਟਰੰਪ ਨੂੰ ਹਟਾਉਣ ਲਈ ਪੇਂਸ ਦਾ 25ਵੀਂ ਸੋਧ ਦੀ ਵਰਤੋਂ ਤੋਂ ਇਨਕਾਰ
NEXT STORY 
