ਤੇਹਰਾਨ : ਅਯਾਤੁੱਲਾ ਅਲੀ ਖਮੇਨੇਈ ਦੀ ਮੌਤ ਤੋਂ ਬਾਅਦ ਈਰਾਨ ਵਿੱਚ ਨਵੇਂ ਸੁਪਰੀਮ ਲੀਡਰ ਦੀ ਚੋਣ ਨੂੰ ਲੈ ਕੇ ਸਰਗਰਮੀਆਂ ਤੇਜ਼ ਹੋ ਗਈਆਂ ਹਨ। ਸੂਤਰਾਂ ਅਨੁਸਾਰ, ਖਮੇਨੇਈ ਦੇ ਪੁੱਤਰ ਮੋਜਤਬਾ ਖਮੇਨੇਈ ਨਵੇਂ ਸੁਪਰੀਮ ਲੀਡਰ ਦੀ ਦੌੜ ਵਿੱਚ ਸਭ ਤੋਂ ਅੱਗੇ ਅਤੇ ਪ੍ਰਭਾਵਸ਼ਾਲੀ ਚਿਹਰੇ ਵਜੋਂ ਉੱਭਰੇ ਹਨ। ਈਰਾਨ ਬਹੁਤ ਜਲਦ ਆਪਣੇ ਨਵੇਂ ਰਹਿਬਰ ਦੇ ਨਾਮ ਦਾ ਐਲਾਨ ਕਰ ਸਕਦਾ ਹੈ।
ਪਰਿਵਾਰਕ ਮੈਂਬਰਾਂ ਦੀ ਮੌਤ ਪਰ ਮੋਜਤਬਾ ਸੁਰੱਖਿਅਤ
ਦੱਸਣਯੋਗ ਹੈ ਕਿ ਈਰਾਨ 'ਤੇ ਹੋਏ ਅਮਰੀਕੀ-ਇਜ਼ਰਾਈਲੀ ਹਮਲਿਆਂ ਵਿੱਚ ਅਲੀ ਖਮੇਨੇਈ ਦੇ ਨਾਲ-ਨਾਲ ਉਨ੍ਹਾਂ ਦੀ ਪਤਨੀ, ਧੀ, ਨੂੰਹ ਅਤੇ ਪੋਤੀ ਦੀ ਵੀ ਮੌਤ ਹੋ ਗਈ ਸੀ। ਹਾਲਾਂਕਿ, ਉਨ੍ਹਾਂ ਦੇ ਪੁੱਤਰ ਮੋਜਤਬਾ ਖਮੇਨੇਈ ਇਨ੍ਹਾਂ ਹਮਲਿਆਂ ਵਿੱਚ ਸੁਰੱਖਿਅਤ ਬਚ ਗਏ ਹਨ।
ਅਸੈਂਬਲੀ ਆਫ ਐਕਸਪਰਟਸ ਨੇ ਦਿੱਤੇ ਸੰਕੇਤ
ਈਰਾਨ ਦਾ ਸੁਪਰੀਮ ਲੀਡਰ ਚੁਣਨ ਵਾਲੀ ਸੰਸਥਾ 'ਅਸੈਂਬਲੀ ਆਫ ਐਕਸਪਰਟਸ' ਨੇ ਸੰਕੇਤ ਦਿੱਤਾ ਹੈ ਕਿ ਚੋਣ ਦੀ ਪ੍ਰਕਿਰਿਆ ਲਗਭਗ ਪੂਰੀ ਹੋ ਚੁੱਕੀ ਹੈ। ਵਰਤਮਾਨ ਵਿੱਚ, ਅਲੀਰੇਜ਼ਾ ਅਰਾਫੀ ਨੂੰ ਈਰਾਨ ਦਾ ਕਾਰਜਕਾਰੀ ਸੁਪਰੀਮ ਲੀਡਰ ਬਣਾਇਆ ਗਿਆ ਹੈ। ਅਸੈਂਬਲੀ ਦੇ ਮੈਂਬਰ ਅਯਾਤੁੱਲਾ ਅਹਿਮਦ ਖਾਤਮੀ ਨੇ ਸਰਕਾਰੀ ਟੀਵੀ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਦੇਸ਼ ਵਿੱਚ ਜੰਗੀ ਹਾਲਾਤ ਹੋਣ ਦੇ ਬਾਵਜੂਦ ਉਹ ਇੱਕ ਨਤੀਜੇ ਦੇ ਬਹੁਤ ਕਰੀਬ ਹਨ ਅਤੇ ਨਵੇਂ ਲੀਡਰ ਦੀ ਪਛਾਣ ਬਹੁਤ ਜਲਦ ਕੀਤੀ ਜਾਵੇਗੀ।
ਕੌਣ ਹਨ ਮੋਜਤਬਾ ਖਮੇਨੇਈ?
ਮੋਜਤਬਾ ਖਮੇਨੇਈ ਨੇ ਈਰਾਨ ਦੇ ਪਵਿੱਤਰ ਸ਼ਹਿਰ 'ਕੋਮ' (Qom) ਦੇ ਮਦਰੱਸਿਆਂ ਵਿੱਚ ਪੜ੍ਹਾਈ ਕੀਤੀ ਹੈ। ਉਨ੍ਹਾਂ ਨੂੰ ਈਰਾਨੀ ਮੌਲਵੀ ਤੰਤਰ ਦੇ ਸਭ ਤੋਂ ਪ੍ਰਭਾਵਸ਼ਾਲੀ ਚਿਹਰਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ। ਸਭ ਤੋਂ ਅਹਿਮ ਗੱਲ ਇਹ ਹੈ ਕਿ ਉਨ੍ਹਾਂ ਦੇ ਈਰਾਨ ਦੀ ਰਿਵੋਲਿਊਸ਼ਨਰੀ ਗਾਰਡਸ (IRGC) ਨਾਲ ਬਹੁਤ ਨਜ਼ਦੀਕੀ ਸਬੰਧ ਹਨ, ਜਿਸ ਕਾਰਨ ਉਨ੍ਹਾਂ ਨੂੰ ਆਪਣੇ ਪਿਤਾ ਦੇ ਉਤਰਾਧਿਕਾਰੀ ਵਜੋਂ ਸਭ ਤੋਂ ਮਜ਼ਬੂਤ ਉਮੀਦਵਾਰ ਦੇਖਿਆ ਜਾ ਰਿਹਾ ਹੈ।
ਦੁਨੀਆ ਭਰ 'ਚ ਊਰਜਾ ਸੰਕਟ: ਕਤਰ 'ਚ LNG ਉਤਪਾਦਨ ਠੱਪ, ਗੈਸ ਦੀਆਂ ਕੀਮਤਾਂ 'ਚ 54% ਦਾ ਵਾਧਾ
NEXT STORY 
