ਇੰਟਰਨੈਸ਼ਨਲ ਡੈਸਕ : ਆਸਟ੍ਰੇਲੀਆ ਦੀ ਰਾਸ਼ਟਰੀ ਏਅਰਲਾਈਨ ਕਾਂਟਾਸ ਆਪਣੇ ਖਰਚਿਆਂ 'ਚ ਕਟੌਤੀ ਕਰਨ ਅਤੇ ਕੰਮਕਾਜ ਨੂੰ ਆਧੁਨਿਕ ਬਣਾਉਣ ਲਈ ਇੱਕ ਵੱਡੀ ਯੋਜਨਾ 'ਤੇ ਵਿਚਾਰ ਕਰ ਰਹੀ ਹੈ। ਇਸ ਯੋਜਨਾ ਤਹਿਤ ਲਗਭਗ 1,000 ਕਾਰਪੋਰੇਟ ਨੌਕਰੀਆਂ ਭਾਰਤ 'ਚ ਆਊਟਸੋਰਸ ਕੀਤੀਆਂ ਜਾ ਸਕਦੀਆਂ ਹਨ। ਕੰਪਨੀ ਦੇ ਅੰਦਰੂਨੀ ਸੂਤਰਾਂ ਮੁਤਾਬਕ ਇਸ ਮੁਹਿੰਮ ਨੂੰ 'ਪ੍ਰੋਜੈਕਟ iQ' ਦਾ ਨਾਮ ਦਿੱਤਾ ਗਿਆ ਹੈ। ਇਸ ਤਹਿਤ ਕਾਂਟਾਸ ਗਲੋਬਲ ਸਲਾਹਕਾਰ ਫਰਮ ਐਕਸੈਂਚਰ ਨਾਲ ਗੱਲਬਾਤ ਕਰ ਰਹੀ ਹੈ। ਜੇਕਰ ਇਹ ਯੋਜਨਾ ਸਿਰੇ ਚੜ੍ਹਦੀ ਹੈ, ਤਾਂ ਮਾਰਕੀਟਿੰਗ, ਵਿੱਤ, ਮਨੁੱਖੀ ਸਰੋਤ ਅਤੇ ਹੋਰ ਬੈਕ-ਆਫਿਸ ਦੇ ਕੰਮ ਭਾਰਤ ਵਿੱਚ ਤਬਦੀਲ ਕੀਤੇ ਜਾ ਸਕਦੇ ਹਨ।
ਕਾਂਟਾਸ ਦਾ ਕਹਿਣਾ ਹੈ ਕਿ ਉਹ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਅਤੇ ਤਕਨਾਲੋਜੀ ਦੀ ਵਰਤੋਂ ਰਾਹੀਂ ਆਪਣੇ ਕੰਮ ਕਰਨ ਦੇ ਤਰੀਕੇ ਨੂੰ ਬਿਹਤਰ ਬਣਾਉਣਾ ਚਾਹੁੰਦੀ ਹੈ। ਕੰਪਨੀ ਦੀ ਮੁੱਖ ਤਕਨਾਲੋਜੀ, AI ਅਤੇ ਟ੍ਰਾਂਸਫਾਰਮੇਸ਼ਨ ਅਫਸਰ ਰਾਚੇਲ ਯਾਂਗੋਯਾਨ ਇਸ ਪ੍ਰੋਜੈਕਟ ਦੀ ਅਗਵਾਈ ਕਰ ਰਹੇ ਹਨ। ਏਅਰਲਾਈਨ ਦੀ ਸੀਈਓ ਵੈਨੇਸਾ ਹਡਸਨ ਮੁਤਾਬਕ, AI ਦੀ ਵਰਤੋਂ ਸਿਰਫ ਨੌਕਰੀਆਂ ਘਟਾਉਣ ਲਈ ਨਹੀਂ, ਸਗੋਂ ਗਾਹਕਾਂ ਦੇ ਅਨੁਭਵ ਅਤੇ ਸੰਚਾਲਨ ਪ੍ਰਦਰਸ਼ਨ ਨੂੰ ਸੁਧਾਰਨ ਲਈ ਕੀਤੀ ਜਾਵੇਗੀ।
ਦੂਜੇ ਪਾਸੇ, ਆਸਟ੍ਰੇਲੀਅਨ ਸਰਵਿਸਿਜ਼ ਯੂਨੀਅਨ ਨੇ ਇਸ ਸੰਭਾਵੀ ਕਦਮ 'ਤੇ ਗੰਭੀਰ ਚਿੰਤਾ ਪ੍ਰਗਟਾਈ ਹੈ। ਯੂਨੀਅਨ ਦੇ ਸਹਾਇਕ ਰਾਸ਼ਟਰੀ ਸਕੱਤਰ ਸਕਾਟ ਕੋਵਨ ਨੇ ਕਿਹਾ ਕਿ ਕਾਂਟਾਸ ਨੂੰ ਸਥਾਨਕ ਨੌਕਰੀਆਂ ਬਚਾਉਣ ਦੇ ਆਪਣੇ ਵਾਅਦੇ 'ਤੇ ਕਾਇਮ ਰਹਿਣਾ ਚਾਹੀਦਾ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਮਾਹਰ ਕਰਮਚਾਰੀਆਂ ਦੀ ਥਾਂ AI ਅਤੇ ਆਫਸ਼ੋਰ ਪ੍ਰਬੰਧਾਂ ਨੂੰ ਲਿਆਉਣ ਨਾਲ ਸੇਵਾ ਦੀ ਗੁਣਵੱਤਾ ਪ੍ਰਭਾਵਿਤ ਹੋ ਸਕਦੀ ਹੈ।
ਕਾਂਟਾਸ ਨੇ ਸਪੱਸ਼ਟ ਕੀਤਾ ਹੈ ਕਿ ਅਜੇ ਗੱਲਬਾਤ ਸ਼ੁਰੂਆਤੀ ਦੌਰ ਵਿੱਚ ਹੈ ਅਤੇ ਕੋਈ ਅੰਤਿਮ ਫੈਸਲਾ ਨਹੀਂ ਲਿਆ ਗਿਆ। 'ਪ੍ਰੋਜੈਕਟ iQ' ਬਾਰੇ ਅੰਤਿਮ ਫੈਸਲਾ ਅਤੇ ਪ੍ਰਭਾਵਿਤ ਹੋਣ ਵਾਲੀਆਂ ਨੌਕਰੀਆਂ ਦੀ ਸਹੀ ਗਿਣਤੀ ਇਸ ਸਾਲ ਦੇ ਅੰਤ ਤੱਕ ਸਾਹਮਣੇ ਆਉਣ ਦੀ ਉਮੀਦ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਉਹ ਆਸਟ੍ਰੇਲੀਆ ਵਿੱਚ ਪਾਇਲਟਾਂ ਅਤੇ ਇੰਜੀਨੀਅਰਾਂ ਵਰਗੀਆਂ ਭੂਮਿਕਾਵਾਂ ਵਿੱਚ ਨਿਵੇਸ਼ ਅਤੇ ਭਰਤੀ ਜਾਰੀ ਰੱਖੇਗੀ। ਇਹ ਕਦਮ ਆਸਟ੍ਰੇਲੀਆ ਦੀਆਂ ਹੋਰ ਵੱਡੀਆਂ ਕੰਪਨੀਆਂ ਜਿਵੇਂ ਕਿ ਵੂਲਵਰਥਸ, ਆਫਿਸਵਰਕਸ ਅਤੇ ਟੇਲਸਟਰਾ ਵੱਲੋਂ ਚੁੱਕੇ ਗਏ ਅਜਿਹੇ ਹੀ ਕਦਮਾਂ ਦੀ ਪਾਲਣਾ ਕਰਦਾ ਪ੍ਰਤੀਤ ਹੁੰਦਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਸਿੱਖ ਕਾਰਕੁਨ ਨੂੰ ਧਮਕੀਆਂ ਦੇਣ ਪਿੱਛੇ ਭਾਰਤ ਦਾ ਹੱਥ ! UN ਮਾਹਰਾਂ ਨੇ ਜਤਾਈ ਚਿੰਤਾ
NEXT STORY 
