ਇੰਟਰਨੈਸ਼ਨਲ ਡੈਸਕ- ਕੈਨੇਡਾ ਦੇ ਗ੍ਰੇਟਰ ਟੋਰਾਂਟੋ ਏਰੀਆ (GTA) ਵਿੱਚ ਸਾਬਕਾ ਲਿਬਰਲ ਐੱਮ.ਪੀ. ਅਤੇ ਮਿਸੀਸਾਗਾ ਦੇ ਵਕੀਲ ਰਾਜ ਗ੍ਰੇਵਾਲ ਵਿਰੁੱਧ ਦੋ ਪ੍ਰਮੁੱਖ ਗੁਰਦੁਆਰਾ ਸਾਹਿਬਾਨ ਦੀਆਂ ਇਮਾਰਤਾਂ ਨੂੰ ਗਿਰਵੀ ਰੱਖ ਕੇ 1.5 ਕਰੋੜ ਕੈਨੇਡੀਅਨ ਡਾਲਰ (15 ਮਿਲੀਅਨ ਡਾਲਰ) ਦਾ ਕਰਜ਼ਾ ਲੈਣ ਦੇ ਮਾਮਲੇ ਵਿੱਚ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਇਹ ਕਰਜ਼ਾ ਉਸ ਸਮੇਂ ਲਿਆ ਗਿਆ ਸੀ, ਜਦੋਂ ਰਾਜ ਗ੍ਰੇਵਾਲ, ਉਨ੍ਹਾਂ ਦੀ ਫ਼ਰਮ 'RSG ਲਾਅ', ਉਨ੍ਹਾਂ ਦੁਆਰਾ ਨਿਯੰਤਰਿਤ ਕੰਪਨੀਆਂ ਅਤੇ ਪਰਿਵਾਰਕ ਮੈਂਬਰ 20 ਕਰੋੜ ਡਾਲਰ ਤੋਂ ਵੱਧ ਦੇ ਭਾਰੀ ਕਰਜ਼ੇ ਵਿੱਚ ਡੁੱਬੇ ਹੋਏ ਸਨ।
ਹੈਮਿਲਟਨ ਦੀਆਂ ਦੋ ਪ੍ਰਾਈਵੇਟ ਕਰਜ਼ਦਾਤਾ ਕੰਪਨੀਆਂ 'SSMT ਮੈਨੇਜਮੈਂਟ ਇੰਕ.'ਅਤੇ 'ਓਕੁਲਸ ਮੋਰਟਗੇਜ ਜੀ.ਪੀ. ਇੰਕ.' ਦੁਆਰਾ 4 ਸਤੰਬਰ ਨੂੰ ਦਾਇਰ ਕੀਤੇ ਗਏ ਇਸ ਮੁਕੱਦਮੇ ਵਿੱਚ ਰਾਜ ਗ੍ਰੇਵਾਲ ਤੋਂ ਇਲਾਵਾ ਸਿੱਖ ਸਪਿਰਚੁਅਲ ਸੈਂਟਰ ਟੋਰਾਂਟੋ, ਜਿਸਨੂੰ ਆਮ ਤੌਰ 'ਤੇ ਈਟੋਬੀਕੋਕ ਗੁਰਦੁਆਰਾ ਕਿਹਾ ਜਾਂਦਾ ਹੈ, ਅਤੇ ਬਰੈਂਪਟਨ ਦੇ ਨਾਨਕਸਰ ਗੁਰਦੁਆਰੇ ਨੂੰ ਵੀ ਮੁਕੱਦਮੇ ਵਿੱਚ ਬਚਾਓ ਪੱਖ ਵਜੋਂ ਨਾਮਜ਼ਦ ਕੀਤਾ ਗਿਆ ਹੈ, ਨਾਲ ਹੀ ਦੋਵਾਂ ਦੇ ਪ੍ਰਧਾਨ ਅਮਰਜੀਤ ਸਿੰਘ ਦਿਓਲ ਅਤੇ ਗੁਰਮੇਲ ਸਿੰਘ ਨਿਰਮਾਣ ਨਾਮ ਦੇ ਇੱਕ ਵਿਅਕਤੀ ਨੂੰ ਵੀ ਮੁਕੱਦਮੇ ਵਿੱਚ ਨਾਮਜ਼ਦ ਕੀਤਾ ਗਿਆ ਹੈ, ਜੋ ਕਿ ਸਿੱਖ ਸਪਿਰਚੁਅਲ ਸੈਂਟਰ ਟੋਰਾਂਟੋ ਦੇ ਖਜ਼ਾਨਚੀ ਅਤੇ ਡਾਇਰੈਕਟਰ ਵਜੋਂ ਸੂਚੀਬੱਧ ਹੈ।
ਪੜ੍ਹੋ ਇਹ ਅਹਿਮ ਖ਼ਬਰ- 'ਦੇਵਾਂਗੇ ਕਰਾਰਾ ਜਵਾਬ' , ਹੂਤੀਆਂ ਦੀ ਪਾਕਿਸਤਾਨ ਅਤੇ ਤੁਰਕੀ ਨੂੰ ਸਿੱਧੀ ਧਮਕੀ
ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ਦੋਵਾਂ ਪ੍ਰਾਈਵੇਟ ਕੰਪਨੀਆਂ ਨੇ ਪਿਛਲੇ ਸਾਲ 2025 ਦੀ ਬਸੰਤ ਵਿੱਚ 1.5 ਕਰੋੜ ਡਾਲਰ ਦਾ ਕਰਜ਼ਾ ਦਿੱਤਾ ਸੀ, ਜਿਸ ਦੀ ਗਾਰੰਟੀ ਰਾਜ ਗ੍ਰੇਵਾਲ ਦੁਆਰਾ ਦੋਵਾਂ ਗੁਰਦੁਆਰਾ ਸਾਹਿਬਾਨ ਦੀਆਂ ਜਾਇਦਾਦਾਂ 'ਤੇ ਦਿੱਤੀ ਗਈ ਸੀ। ਇਨ੍ਹਾਂ ਕਰਜ਼ਿਆਂ 'ਤੇ ਵਿਆਜ ਦੀ ਦਰ 24 ਫ਼ੀਸਦੀ (300,000 ਡਾਲਰ ਮਹੀਨਾਵਾਰ) ਤੈਅ ਕੀਤੀ ਗਈ ਸੀ। ਮਈ ਮਹੀਨੇ ਤੋਂ ਬਾਅਦ ਕਰਜ਼ੇ ਦੀਆਂ ਕਿਸ਼ਤਾਂ ਨਾ ਭਰੇ ਜਾਣ ਕਾਰਨ ਹੁਣ ਤੱਕ 1.5 ਮਿਲੀਅਨ ਡਾਲਰ (15 ਲੱਖ ਡਾਲਰ) ਤੋਂ ਵੱਧ ਦਾ ਸਿਰਫ਼ ਵਿਆਜ ਹੀ ਪੈਂਡਿੰਗ ਪਿਆ ਹੈ। ਮੁਕੱਦਮੇ ਅਨੁਸਾਰ ਗ੍ਰੇਵਾਲ ਪੂਰੀ ਕਰਜ਼ਾ ਰਕਮ ਅਤੇ ਬਕਾਇਆ ਵਿਆਜ ਲਈ ਜ਼ਿੰਮੇਵਾਰ ਹਨ। ਇਹ ਵੀ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਕਰਜ਼ਦਾਤਾਵਾਂ ਦੁਆਰਾ ਦਿੱਤੀ ਗਈ 1.5 ਕਰੋੜ ਡਾਲਰ ਦੀ ਕੁੱਲ ਰਕਮ ਵਿੱਚੋਂ ਲਗਭਗ 1.25 ਕਰੋੜ ਡਾਲਰ ਕਿੱਥੇ ਵਰਤੇ ਗਏ।
ਇਸ ਤੋਂ ਇਲਾਵਾ ਰਾਜ ਗ੍ਰੇਵਾਲ ਦੀ ਫ਼ਰਮ 'RSG ਲਾਅ' ਨਾਲ ਜੁੜੇ ਇੱਕ ਹੋਰ ਵਕੀਲ ਦੁਆਰਾ 60 ਲੱਖ ਡਾਲਰ ਦੇ ਫ਼ਰਜ਼ੀ ਚੈੱਕ ਜਮ੍ਹਾਂ ਕਰਵਾਉਣ ਦਾ ਮਾਮਲਾ ਵੀ ਸਾਹਮਣੇ ਆਇਆ ਹੈ। ਇਨ੍ਹਾਂ ਧੋਖਾਧੜੀ ਵਾਲੇ ਫੰਡਾਂ ਵਿੱਚੋਂ ਜ਼ਿਆਦਾਤਰ ਰਕਮ RSG ਦੇ ਟਰੱਸਟ ਅਕਾਊਂਟ ਵਿੱਚ ਟਰਾਂਸਫ਼ਰ ਹੋਣ ਤੋਂ ਬਾਅਦ, 14 ਅਪ੍ਰੈਲ ਨੂੰ RSG ਦੇ ਟਰੱਸਟ ਅਕਾਊਂਟ ਤੋਂ 2,50,000 ਡਾਲਰ ਦੀ ਰਕਮ 'ਦਿ ਸਿੱਖ ਸਪਿਰਚੁਅਲ ਸੈਂਟਰ ਟੋਰਾਂਟੋ' ਦੇ RBC ਅਕਾਊਂਟ ਵਿੱਚ ਟਰਾਂਸਫ਼ਰ ਕੀਤੀ ਗਈ ਸੀ। ਰਾਜ ਗ੍ਰੇਵਾਲ ਦੇ ਵਕੀਲ ਸਾਈਮਨ ਬੀਬਰ ਨੇ ਮੁਕੱਦਮੇ ਦੇ ਤੱਥਾਂ 'ਤੇ ਕੋਈ ਸਿੱਧੀ ਟਿੱਪਣੀ ਨਹੀਂ ਕੀਤੀ, ਪਰ 15 ਸਤੰਬਰ ਨੂੰ ਦਾਅਵਾ ਕੀਤਾ ਕਿ ਉਨ੍ਹਾਂ ਦੀ ਸਮਝ ਅਨੁਸਾਰ ਇਹ ਮਾਮਲਾ ਸੁਲਝਾ ਲਿਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਬੀਬਰ ਨੇ ਗ੍ਰੇਵਾਲ ਅਤੇ ਉਨ੍ਹਾਂ ਦੇ ਪਿਤਾ ਨਾਲ ਜੁੜੇ ਇੱਕ ਹੋਰ ਮਾਮਲੇ ਵਿੱਚ ਵੀ ਅਜਿਹਾ ਹੀ ਦਾਅਵਾ ਕੀਤਾ ਸੀ, ਜਦਕਿ ਉਹ ਕੇਸ ਅਜੇ ਵੀ ਅਦਾਲਤ ਵਿੱਚ ਚੱਲ ਰਿਹਾ ਹੈ। 16 ਸਤੰਬਰ ਨੂੰ ਇਟੋਬੀਕੋਕ ਗੁਰਦੁਆਰੇ ਵੱਲੋਂ ਆਏ ਇੱਕ ਬਿਆਨ ਵਿਚ ਵੀ ਮਾਮਲਾ ਨਾ ਸੁਲਝਣ ਦਾ ਦਾਅਵਾ ਕੀਤਾ। ਦੂਜੇ ਪਾਸੇ, ਕਰਜ਼ਦਾਤਾ ਕੰਪਨੀਆਂ ਦੀ ਨੁਮਾਇੰਦਗੀ ਕਰ ਰਹੇ ਫ਼ਰਮ 'Tyr LLP' ਦੇ ਵਕੀਲ ਮਾਰੀਆ ਨੈਮਾਰਕ ਨੇ ਪੁਸ਼ਟੀ ਕੀਤੀ ਹੈ ਕਿ ਇਹ ਮਾਮਲਾ ਅਜੇ ਸੁਲਝਿਆ ਨਹੀਂ ਹੈ ਅਤੇ ਅਦਾਲਤ ਵਿੱਚ ਅਜੇ ਵੀ ਜਾਰੀ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਹੂਤੀਆਂ ਨੇ ਯਮਨ 'ਚ ਸੁੱਟ ਲਿਆ ਸਾਊਦੀ ਅਰਬ ਦਾ F-15 ਲੜਾਕੂ ਜਹਾਜ਼ !
NEXT STORY 
