ਚੰਡੀਗੜ੍ਹ, (ਰਸ਼ਮੀ ਹੰਸ)- ਪੰਜਾਬ ਯੂਨੀਵਰਸਟੀ ਦੇ ਸੀ ਕਲਾਸ ਕਰਮਚਾਰੀਆਂ ਨੂੰ ਕੈਂਪਸ ਵਿਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਨੂੰ 6 ਸਾਲ ਬਾਅਦ ਯੂਨੀਫਾਰਮ ਦਿੱਤੀ ਜਾ ਰਹੀ ਹੈ, ਜਦੋਂਕਿ ਕਰਮਚਾਰੀਆਂ ਨੂੰ ਇਹ ਯੂਨੀਫਾਰਮ ਇਸ ਤੋਂ ਪਹਿਲਾਂ 2015-16 ਵਿਚ ਦਿੱਤੀ ਜਾਣੀ ਚਾਹੀਦੀ ਸੀ। ਹੁਣ 2018-19 'ਚ ਸੀ ਕਲਾਸ ਕਰਮਚਾਰੀਆਂ ਨੂੰ ਫਿਰ ਨਵੀਂ ਯੂਨੀਫਾਰਮ ਦਿੱਤੀ ਜਾਣੀ ਚਾਹੀਦੀ ਸੀ। ਪੀ. ਯੂ. ਵਿਚ 800 ਸੀ ਕਲਾਸ ਕਰਮਚਾਰੀ ਹਨ। ਪਹਿਲਾਂ ਕਰਮਚਾਰੀਆਂ ਨੂੰ ਯੂਨੀਫਾਰਮ ਦੇਣ 'ਤੇ ਆਡਿਟ ਦਾ ਇਤਰਾਜ਼ ਲਾਇਆ ਗਿਆ ਸੀ। ਬਾਅਦ ਵਿਚ ਯੂਨੀਫਾਰਮ ਦੇਣ ਲਈ ਟੈਂਡਰ ਦੇਰੀ ਨਾਲ ਕੱਢੇ ਗਏ। ਇਸ ਲਈ ਸੀ ਕਲਾਸ ਦੇ ਜਿਨ੍ਹਾਂ ਕਰਮਚਾਰੀਆਂ ਨੂੰ ਹਰ ਤਿੰਨ ਸਾਲਾਂ 'ਚ ਨਵੀਂ ਯੂਨੀਫਾਰਮ ਦਿੱਤੀ ਜਾਂਦੀ ਹੈ, ਨੂੰ ਇਸ ਵਾਰ 6 ਸਾਲਾਂ ਬਾਅਦ ਯੂਨੀਫਾਰਮ ਮਿਲ ਰਹੀ ਹੈ। ਇਨ੍ਹਾਂ ਕਰਮਚਾਰੀਆਂ ਨੂੰ ਤਿੰਨ ਜੋੜੇ ਯੂਨੀਫਾਰਮ ਗਰਮੀਆਂ ਤੇ ਇਕ ਜੋੜਾ ਸਰਦੀਆਂ ਲਈ ਦਿੱਤਾ ਜਾਂਦਾ ਹੈ।
ਜਾਣਕਾਰੀ ਅਨੁਸਾਰ ਪੀ. ਯੂ. ਦੇ ਕਰਮਚਾਰੀਆਂ ਲਈ ਪਹਿਲਾਂ ਬਜਟ 18 ਲੱਖ ਰੁਪਏ ਤਕ ਦਾ ਰੱਖਿਆ ਜਾਂਦਾ ਸੀ ਪਰ ਹੁਣ ਇਹ ਬਜਟ 24 ਲੱਖ ਰੁਪਏ ਦਾ ਰੱਖਿਆ ਗਿਆ ਹੈ। ਇਨ੍ਹਾਂ ਕਰਮਚਾਰੀਆਂ ਨੂੰ ਹੁਣ ਯੂਨੀਫਾਰਮ ਸਿਵਾਉਣ ਲਈ 992 ਰੁਪਏ ਮਿਲ ਰਹੇ ਹਨ। ਹਾਲਾਂਕਿ ਪਹਿਲਾਂ ਇਨ੍ਹਾਂ ਕਰਮਚਾਰੀਆਂ ਨੂੰ ਯੂਨੀਫਾਰਮ ਦੀ ਸਿਲਾਈ 492 ਰੁਪਏ ਦਿੱਤੀ ਜਾਂਦੀ ਸੀ ਜਿਸਨੂੰ ਹੁਣ ਵਧਾ ਦਿੱਤਾ ਗਿਆ ਹੈ। ਉਥੇ ਹੀ ਕਰਮਚਾਰੀਆਂ ਨੂੰ ਹਰ ਦੋ ਸਾਲਾਂ ਬਾਅਦ ਯੂਨੀਫਾਰਮ ਦੇ ਨਾਲ ਜੁੱਤੀ ਵੀ ਪਾਉਣ ਲਈ ਮਿਲਦੀ ਹੈ।
ਕਰਮਚਾਰੀਆਂ ਦਾ ਕਹਿਣਾ ਹੈ ਕਿ ਯੂਨੀਫਾਰਮ ਸਮੇਂ ਸਿਰ ਮਿਲਣੀ ਚਾਹੀਦੀ ਹੈ। ਤਿੰਨ ਸਾਲਾਂ ਬਾਅਦ ਮਿਲਣ ਵਾਲੀ ਯੂਨੀਫਾਰਮ ਜੇਕਰ 6 ਸਾਲਾਂ ਬਾਅਦ ਮਿਲੇਗੀ ਤਾਂ ਕਰਮਚਾਰੀ ਕਿਵੇਂ ਪੁਰਾਣੀ ਯੂਨੀਫਾਰਮ ਪਾਉਂਦੇ ਰਹਿਣਗੇ।
ਇਹ ਸੀ ਇਤਰਾਜ਼
ਆਡਿਟ ਨੇ ਇਤਰਾਜ਼ ਕੀਤਾ ਸੀ ਕਿ ਜੋ ਪੰਜਾਬ ਸਰਕਾਰ ਦੇ ਨਿਯਮ ਹਨ ਤੇ ਰੇਟ ਯੂਨੀਫਾਰਮ ਲਈ ਤੈਅ ਕੀਤੇ ਗਏ ਹਨ, ਉਸ ਤੋਂ ਕਈ ਜ਼ਿਆਦਾ ਰੇਟ ਦੇ ਹਿਸਾਬ ਨਾਲ ਕਰਮਚਾਰੀਆਂ ਨੂੰ ਮਹਿੰਗੀ ਯੂਨੀਫਾਰਮ ਜਾਂ ਜੁੱਤੀ ਖਰੀਦ ਕੇ ਦਿੱਤੀ ਜਾਂਦੀ ਹੈ, ਜਦੋਂਕਿ ਪੰਜਾਬ ਸਰਕਾਰ ਤੈਅ ਕੀਤੇ ਰੇਟ ਦੇ ਅਨੁਸਾਰ ਹੀ ਕਰਮਚਾਰੀਆਂ ਨੂੰ ਯੂਨੀਫਾਰਮ ਤੇ ਜੁੱਤੀ ਦਿੰਦੀ ਹੈ।
ਸੀ ਕਲਾਸ ਕਰਮਚਾਰੀ ਐਸੋਸੀਏਸ਼ਨ ਦੇ ਪ੍ਰਧਾਨ ਵਿਜੇ ਡੋਗਰਾ ਨੇ ਕਿਹਾ ਕਿ ਪਿਛਲੇ ਸਾਲਾਂ ਤੋਂ ਇਸ ਵਾਰ ਯੂਨੀਫਾਰਮ ਲਈ ਵੱਧ ਬਜਟ ਬਣਾਇਆ ਗਿਆ ਹੈ, ਇਹ ਚੰਗੀ ਗੱਲ ਹੈ ਪਰ ਯੂਨੀਫਾਰਮ ਸਮੇਂ ਸਿਰ ਮਿਲਣੀ ਚਾਹੀਦੀ ਹੈ।
ਸੀ ਕਲਾਸ ਕਰਮਚਾਰੀ ਐਸੋਸੀਏਸ਼ਨ ਦੇ ਸਾਬਕਾ ਸਕੱਤਰ ਰਾਮਾਨੰਦ ਨੇ ਕਿਹਾ ਕਿ ਸਾਨੂੰ ਯੂਨੀਫਾਰਮ ਸਮੇਂ ਸਿਰ ਮਿਲਣੀ ਚਾਹੀਦੀ ਹੈ। ਰਾਮਾਨੰਦ ਨੇ ਕਿਹਾ ਕਿ ਪੀ. ਯੂ. ਮੈਨੇਜਮੈਂਟ ਵਲੋਂ ਟੈਂਡਰ ਆਦਿ ਦਾ ਕੰਮ ਛੇਤੀ ਨਿਬੇੜ ਲੈਣਾ ਚਾਹੀਦਾ ਹੈ।
ਮੋਟਰਸਾਈਕਲ ਤੇ ਘੜੁੱਕੇ ਦੀ ਟੱਕਰ 'ਚ 1 ਦੀ ਮੌਤ
NEXT STORY 
