ਤਰਨ ਤਾਰਨ (ਰਮਨ)— ਹਿਮਾਚਲ ਦੀਆਂ ਵਾਦੀਆਂ 'ਚ ਹੋ ਰਹੀ ਭਾਰੀ ਬਰਸਾਤ ਕਾਰਨ ਭਾਖੜਾ ਡੈਮ 'ਚ ਪਾਣੀ ਦਾ ਪੱਧਰ ਦਿਨ ਪ੍ਰਤੀ ਦਿਨ ਵੱਧਦਾ ਜਾ ਰਿਹਾ ਹੈ। ਜਿਸ ਤੋਂ ਬਅਦ ਕਰੀਬ 53200 ਕਿਉਸਿਕ ਪਾਣੀ ਛੱਡੇ ਜਾਣ ਨਾਲ ਬਿਆਸ ਦਰਿਆ ਦਾ ਸਾਰਾ ਮੰਡ ਇਲਾਕਾ ਪਾਣੀ 'ਚ ਡੁੱਬਣ ਕਾਰਨ ਪਿੰਡ ਚੰਭਾ ਕਲਾਂ ਦੀ ਕਰੀਬ 1500 ਏਕੜ ਬਾਸਮਤੀ ਦੀ ਫਸਲ ਤਬਾਹ ਹੋ ਗਈ ਹੈ। ਇਸ ਬਰਬਾਦੀ ਤੋਂ ਬਾਅਦ ਐਤਵਾਰ ਤਿੰਨ ਦਿਨ ਬੀਤ ਜਾਣ ਤੇ ਕੋਈ ਵੀ ਪ੍ਰਸ਼ਾਸਨਿਕ ਅਧਿਕਾਰੀ ਵਲੋਂ ਸਾਰ ਨਾ ਲੈਣ ਤੇ ਮੁਆਵਜ਼ਾ ਪੂਰਾ ਨਾ ਮਿਲਣ ਕਾਰਨ ਕਿਸਾਨਾਂ 'ਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ।
ਜਾਣਕਾਰੀ ਅਨੁਸਾਰ ਨਜ਼ਦੀਕੀ ਪਿੰਡ ਚੰਭਾ ਕਲਾਂ ਵਾਸੀ ਕਿਸਾਨ ਸੱਤਪਾਲ ਸਿੰਘ ਪੁੱਤਰ ਮੋਹਨ ਸਿੰਘ ਨੇ ਦੱਸਿਆ ਕਿ ਉਹਨਾਂ ਦੀ 50 ਏਕੜ ਬਾਸਮਤੀ ਦੀ ਫਸਲ ਪਾਣੀ 'ਚ ਪੂਰੀ ਤਰਾਂ ਡੁੱਬ ਚੁੱਕੀ ਹੈ। ਜਿਸ ਨਾਲ ਉਹਨਾਂ ਦਾ ਕਰੀਬ 30 ਲੱਖ ਰੁਪਏ ਦਾ ਨੁਕਸਾਨ ਹੋ ਚੁੱਕਾ ਹੈ। ਇਸੇ ਤਰ੍ਹਾਂ ਬਲਕਾਰ ਸਿੰਘ ਦੀ 48 ਏਕੜ, ਗੁਰਬਚਣ ਸਿੰਘ ਦੀ 20 ਏਕੜ, ਤੀਰਥ ਸਿੰਘ ਪੁੱਤਰ ਗੁਰਦੀਪ ਸਿੰਘ ਦੀ 50 ਏਕੜ, ਦਿਲਬਾਗ ਸਿੰਘ ਦੀ ਕਰੀਬ 65 ਏਕੜ, ਦਲਬੀਰ ਸਿੰਘ, ਪਰਮਜੀਤ ਸਿੰਘ, ਸੁਖਦੇਵ ਸਿੰਘ ਦੀ ਕਈ ਏਕੜ ਫਸਲ ਪੂਰੀ ਤਰ੍ਹਾਂ ਨਸ਼ਟ ਹੋ ਚੁੱਕੀ ਹੈ। ਉਹਨਾਂ ਦੱਸਿਆ ਕਿ ਇਸ ਇਲਾਕੇ 'ਚ ਹਰ ਸਾਲ ਪਾਣੀ ਕਾਰਨ ਉਨ੍ਹਾਂ ਦੀ ਕਰੀਬ 1500 ਏਕੜ ਫਸਲ ਖਰਾਬ ਹੋ ਜਾਂਦੀ ਹੈ। ਜਿਸ ਦਾ ਸਰਕਾਰ ਵਲੋਂ ਮੁਆਵਜ਼ਾ ਵੀ ਸਮੇਂ ਤੇ ਨਹੀਂ ਦਿੱਤਾ ਜਾਂਦਾ। ਉਹਨਾਂ ਰੋਸ ਜ਼ਾਹਰ ਕਰਦੇ ਹੋਏ ਕਿਹਾ ਕਿ ਕਈ ਕਿਸਾਨਾਂ ਨੂੰ 2017 ਅਤੇ 2018 ਦਾ ਬਣਦਾ ਮੁਆਵਜ਼ਾ ਹੁਣ ਤੱਕ ਨਹੀਂ ਮਿਲਿਆ। ਉਨਾਂ ਦੱਸਿਆ ਕਿ ਸਰਕਾਰ ਵਲੋਂ ਇਕ ਕਿਸਾਨ ਨੂੰ ਸਿਰਫ ਪੰਜ ਏਕੜ ਫਸਲ ਦਾ ਹੀ ਮੁਆਵਜ਼ਾ ਦਿੱਤਾ ਜਾਂਦਾ ਹੈ ਜਦਕਿ ਕਿ ਇਕ ਕਿਸਾਨ ਦੀ ਕਈ ਏਕੜ ਫਸਲ ਤਬਾਹ ਹੋ ਜਾਂਦੀ ਹੈ। ਉਨਾਂ ਦੱਸਿਆ ਕਿ ਇਕ ਕਿਸਾਨ ਨੂੰ ਸਿਰਫ 12 ਹਜ਼ਾਰ ਰੁਪਏ ਪ੍ਰਤੀ ਏਕੜ ਫਸਲ ਦਾ ਮੁਆਵਜ਼ਾ ਦਿੱਤਾ ਜਾਂਦਾ ਹੈ। ਜਿਸ ਨੂੰ ਵਧਾ ਕੇ 50 ਹਜ਼ਾਰ ਕਰਨਾ ਚਾਹਿਦਾ ਹੈ।
ਜ਼ਿਲ੍ਹਾ ਪ੍ਰਸ਼ਾਸਨ ਵਲੋਂ 34 ਵਿਅਕਤੀਆਂ ਦੀ ਬਚਾਈ ਗਈ ਜਾਨ
ਬਿਆਸ ਤੇ ਸੱਤਲੁਜ ਦਰਿਆ 'ਚ ਪਾਣੀ ਦਾ ਪੱਧਰ ਵੱਧਣ ਕਾਰਨ ਜ਼ਿਲ੍ਹਾ ਦੇ ਡਿਪਟੀ ਕਮਿਸ਼ਨਰ ਪ੍ਰਦੀਪ ਸਭਰਵਾਲ ਵਲੋਂ ਦਿੱਤੇ ਗਏ ਨਿਰਦੇਸ਼ਾਂ ਤਹਿਤ ਪਿੰਡ ਕੁੱਤੀਵਾਲ ਵਿਖੇ ਦਰਿਆ ਕੰਡੇ ਨੀਵੇ ਇਲਾਕੇ ਵਿਚ ਵੱਸਦੇ 9 ਵਿਅਕਤੀਆਂ ਅਤੇ ਪਿੰਡ ਸਭਰਾਂ ਵਿਖੇ 25 ਵਿਅਕਤੀਆਂ ਨੂੰ ਖਤਰੇ ਵਾਲੇ ਹੇਠਲੇ ਇਲਾਕੇ ਤੋਂ ਬਚਾਅ ਕੇ ਉੱਚੇ ਇਲਾਕਿਆਂ 'ਚ ਬਣਾਏ ਗਏ ਕੈਂਪਾਂ 'ਚ ਲਿਆ ਕੇ ਉਹਨਾਂ ਦੀ ਜਾਨ ਬਚਾਈ ਗਈ। ਇਸ ਸਾਰੇ ਬਚਾਅ ਕੰਮ 'ਚ ਡਿਪਟੀ ਕਮਿਸ਼ਨਰ ਪ੍ਰਦੀਪ ਸਭਰਵਾਲ ਵੱਲੋ ਡੀ.ਆਈ.ਜੀ ਬੀ.ਐਸ.ਐਫ ਫਿਰੋਜ਼ਪੁਰ ਡਵੀਜਨ ਨਾਲ ਸੰਪਰਕ ਕਰਕੇ ਮੋਟਰ ਬੋਟ ਦੀ ਮਦਦ ਨਾਲ ਇਨਾਂ ਵਿਅਕਤੀਆਂ ਨੂੰ ਸੁੱਰਖਿਅਤ ਥਾਂਵਾਂ ਤੇ ਪਹੁੰਚਾਉਣ 'ਚ ਜ਼ਿਲ੍ਹਾ ਪ੍ਰਸ਼ਾਸਨ ਪੂਰੀ ਮਿਹਨਤ ਕਰਨ 'ਚ ਲੱਗਾ ਹੋਇਆ ਨਜ਼ਰ ਆ ਰਿਹਾ ਹੈ।
ਲੋਕਾਂ ਦੀ ਹਿਫਾਜ਼ਤ ਲਈ ਕੀਤੇ ਗਏ ਹਨ ਹਰ ਤਰ੍ਹਾਂ ਦੇ ਪ੍ਰਬੰਧ
ਡਿਪਟੀ ਕਮਿਸ਼ਨਰ ਪ੍ਰਦੀਪ ਸਭਰਵਾਲ ਨੇ ਦੱਸਿਆ ਕਿ ਉਹਨਾਂ ਵਲੋਂ ਐਤਵਾਰ ਹਰੀਕੇ ਪੱਤਨ ਹੈਡ ਵਰਕਸ ਤੋਂ ਇਲਾਵਾ ਧੁੱਸੀ ਬੰਨ ਇਲਾਕੇ ਦਾ ਦੌਰਾ ਕੀਤਾ ਗਿਆ ਹੈ। ਜਿਸ ਤਹਿਤ ਜੋ ਲੋਕ ਮੰਡ ਆਦਿ ਦੇ ਨੀਂਵੇ ਇਲਾਕਿਆਂ 'ਚ ਆਪਣੇ ਘਰ ਆਦਿ ਬਣਾ ਕੇ ਰਹਿ ਰਹੇ ਹਨ ਨੂੰ ਸੁੱਰਖਿਅਤ ਥਾਂਵਾਂ ਤੇ ਪਹੁੰਚਾਇਆ ਜਾ ਰਿਹਾ ਹੈ। ਉਹਨਾਂ ਦੱਸਿਆ ਕਿ ਇਸ ਦਰਿਆ ਕੰਡੇ ਵੱਸਦੇ ਲੋਕਾਂ ਦੇ ਬਚਾਅ ਲਈ ਵੱਖ-ਵੱਖ ਥਾਵਾਂ ਤੇ ਕਰੀਬ ਦੋ ਦਰਜਨ ਤੋਂ ਵੱਧ ਬਚਾਅ ਕੈਂਪ ਸਥਾਪਿਤ ਕੀਤੇ ਗਏ ਹਨ। ਜਿਥੇ ਹਰ ਤਰ੍ਹਾਂ ਦੀ ਸੁਵਿਧਾ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਉਹਨਾਂ ਕਿਹਾ ਕਿ ਮੰਡ ਇਲਾਕੇ 'ਚ ਕਿਸਾਨਾਂ ਦੇ ਹੋਏ ਨੁਕਸਾਨ ਸਬੰਧੀ ਰਿਪੋਰਟ ਤਿਆਰ ਕਰਨ ਦੇ ਹੁੱਕਮ ਜਾਰੀ ਕਰ ਦਿੱਤੇ ਗਏ ਹਨ। ਜਿਨ੍ਹਾਂ ਨੂੰ ਬਣਦਾ ਮੁਆਵਜ਼ਾ ਜਲਦ ਦਿੱਤਾ ਜਾਵੇਗਾ।
ਘਰ 'ਚੋਂ 88 ਹਜ਼ਾਰ ਦੀ ਨਕਦੀ ਅਤੇ ਗਹਿਣੇ ਚੋਰੀ
NEXT STORY 
