ਸਾਹਨੇਵਾਲ (ਜਗਰੂਪ) – ਪੰਜਾਬ ਸਰਕਾਰ ਅਤੇ ਆਮ ਆਦਮੀ ਪਾਰਟੀ ਦੀ ਹਲਕਾ ਲੁਧਿਆਣਾ ਦੱਖਣੀ ਤੋਂ ਵਿਧਾਇਕਾ ਰਜਿੰਦਰਪਾਲ ਕੌਰ ਛੀਨਾ ਦੀ ਨੁਕਤਾਚੀਨੀ ਕਰਨ, ਕਥਿਤ ਭ੍ਰਿਸ਼ਟਾਚਾਰ ਉਪਰ ਸਵਾਲ ਚੁੱਕਣ ਅਤੇ ਵਿਧਾਇਕਾ ਉਪਰ ਗੰਭੀਰ ਦੋਸ਼ ਲਗਾਉਣ ਦੇ ਚੱਲਦੇ ਪੁਲਸ ਕੇਸ ਦਾ ਸਾਹਮਣਾ ਕਰਨ ਵਾਲੇ ਸ਼ੋਸ਼ਲ ਮੀਡੀਆ ਇੰਨਫਲੂਐਂਸਰ ਮਨਦੀਪ ਸਿੰਘ ਦੁੱਗਲ ਨੇ ਆਪਣਾ ਪੱਖ ਰੱਖਦਿਆਂ ਹਲਕਾ ਦੱਖਣੀ ਵਿਧਾਇਕਾ ਖਿਲਾਫ ਕਥਿਤ ਭ੍ਰਿਸ਼ਟਾਚਾਰ ਦੇ ਦੋਸ਼ ਲਗਾਉਂਦੇ ਹੋਏ ਸਨਸਨੀਖੇਜ਼ ਖੁਲਾਸੇ ਕੀਤੇ ਹਨ।
ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮਨਦੀਪ ਸਿੰਘ ਦੁੱਗਲ ਨੇ ਦੱਸਿਆ ਕਿ ਉਸ ਵਲੋਂ ਵਿਧਾਇਕਾ ਵਲੋਂ ਕੀਤੇ ਜਾਣ ਵਾਲੇ ਭ੍ਰਿਸ਼ਟਾਚਾਰ ਨੂੰ ਲੈ ਕੇ ਸਾਲ 2023 ’ਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ.ਡੀ.) ਨੂੰ ਇਕ ਸ਼ਿਕਾਇਤ ਕੀਤੀ ਸੀ। ਇਸ ਸ਼ਿਕਾਇਤ ਨੂੰ ਵਾਪਿਸ ਕਰਵਾਉਣ ਲਈ ਹੀ ਉਸ ਖਿਲਾਫ ਝੂਠਾ ਪੁਲਸ ਕੇਸ ਦਰਜ ਕਰਵਾਇਆ ਗਿਆ ਹੈ।
ਦੁੱਗਲ ਨੇ ਕਿਹਾ ਕਿ ਆਪ ਵਿਧਾਇਕਾ ਦੀ ਯੋਜਨਾ ਉਸਨੂੰ ਗ੍ਰਿਫਤਾਰ ਕਰਵਾ ਤਸ਼ੱਦਦ ਕਰਵਾ ਕੇ ਜ਼ਬਰਦਸਤੀ ਹਲਫਨਾਮਾ ਲੈ ਕੇ ਈ.ਡੀ. ਨੂੰ ਦਿੱਤੀ ਸ਼ਿਕਾਇਤ ਵਾਪਿਸ ਕਰਵਾਉਣ ਦੀ ਹੈ। ਪਰ ਉਹ ਕਿਸੇ ਵੀ ਕੀਮਤ ’ਤੇ ਝੁਕੇਗਾ ਅਤੇ ਡਰੇਗਾ ਨਹੀਂ, ਕਿਉਂਕਿ ਆਪ ਦੀ ਸਰਕਾਰ ਬਣਨ ਦੇ ਬਾਅਦ ਵਿਧਾਇਕਾ ਵਲੋਂ ਬਹੁਤ ਸਾਰੀਆਂ ਬੇਨਾਮੀ ਜਾਇਦਾਦਾਂ ਤਾਂ ਖਰੀਦੀਆਂ ਹੀ ਗਈਆਂ ਹਨ, ਨਾਲ ਹੀ ਜਸਪਾਲ ਬਾਂਗਰ ਸਥਿਤ ਪਾਮ ਇਨਕਲੇਵ ’ਚ 2000 ਵਰਗ ਗਜ਼ ਅਤੇ ਕਨਾਲ ਵਿਊ ’ਚ 400 ਵਰਗ ਗਜ਼ ਦੇ ਕਰੋੜਾਂ ਰੁਪਏ ਦੇ ਕਥਿਤ ਪਲਾਟ ਹਨ।
ਪਿੰਡ ਜਰਖੜ ਨੇੜੇ ਕੋਠੀਆਂ ਬਣਾ ਕੇ ਵੇਚੀਆਂ ਜਾ ਰਹੀਆਂ ਹਨ। ਇਸ ਤੋਂ ਬਿਨ੍ਹਾਂ ਹਲਕਾ ਦੱਖਣੀ ’ਚ ਸਭ ਤੋਂ ਵੱਧ ਭ੍ਰਿਸ਼ਟਾਚਾਰ ਹੈ ਅਤੇ ਵਿਧਾਇਕਾ ਰਜਿਸਟਰੀਆਂ, ਸਮਬਰਸੀਬਲ ਬੋਰਾਂ, ਹਲਕੇ ਅੰਦਰ ਉਸਾਰੀਆਂ ਜਾਣ ਵਾਲੀਆਂ ਵਪਾਰਕ ਅਤੇ ਰਿਹਾਇਸੀ ਇਮਾਰਤਾਂ ’ਚ ਮਾਲਕਾਂ ਕੋਲੋਂ ਕਥਿਤ ਹਿੱਸੇਦਾਰੀ ਕੀਤੀ ਜਾਂਦੀ ਹੈ। ਜਿਸਨੂੰ ਲੈ ਕੇ ਆਉਣ ਵਾਲੇ ਦਿਨਾਂ ’ਚ ਉਹ ਮੀਡੀਆ ਸਾਹਮਣੇ ਆ ਕੇ ਸਾਰੀਆਂ ਚੀਜ਼ਾਂ ਸਬੂਤਾਂ ਸਮੇਤ ਪੇਸ਼ ਕਰੇਗਾ।
ਮਨਦੀਪ ਦੁੱਗਲ ਨੇ ਦੋਸ਼ ਲਗਾਇਆ ਕਿ ਵਿਧਾਇਕਾ ਨੇ ਲੱਖਾਂ ਦੀ ਤਨਖਾਹ ’ਚ ਚਾਰ ਸਾਲਾਂ ਦੌਰਾਨ ਕਰੋੜਾਂ ਰੁਪਏ ਦੀਆਂ ਗੱਡੀਆਂ ਅਤੇ ਜਾਇਦਾਦਾਂ ਕਥਿਤ ਰੂਪ ਨਾਲ ਬਣਾਈਆਂ ਹਨ। ਵਿਧਾਇਕਾ ਦੀ 500 ਵਰਗ ਗਜ਼ ’ਚ ਬਣੀ ਹੋਈ ਕੋਠੀ ਦਾ ਬਿਜਲੀ ਦਾ ਬਿੱਲ ਵੀ 300-400 ਯੂਨਿਟ ਤੱਕ ਹੀ ਆਉਂਦਾ ਹੈ ਅਤੇ ਮੀਟਰ ਐਨ-ਕੋਡ ਵਾਲਾ ਹੈ, ਜਿਸਦੀ ਰੀਡਿੰਗ ਤੱਕ ਨਹੀਂ ਲਈ ਜਾਂਦੀ ਅਤੇ ਮੁੱਖ ਦਫਤਰ ਦਾ ਲੱਖਾਂ ਰੁਪਏ ਦਾ ਬਿਜਲੀ ਬਿੱਲ ਬਕਾਇਆ ਹੈ। ਮਨਦੀਪ ਦੁੱਗਲ ਨੇ ਮੁੜ ਦੁਹਰਾਇਆ ਕਿ ਉਹ ਈ.ਡੀ. ਨੂੰ ਕੀਤੀ ਹੋਈ ਸ਼ਿਕਾਇਤ ਵਾਪਿਸ ਨਹੀਂ ਲਵੇਗਾ ਅਤੇ ਹਲਕਾ ਦੱਖਣੀ ’ਚ ਹੋਣ ਵਾਲੇ ਕਥਿਤ ਭ੍ਰਿਸ਼ਟਾਚਾਰ ਨੂੰ ਸਬੂਤਾਂ ਸਮੇਤ ਉਜ਼ਾਗਰ ਕਰਕੇ ਹੀ ਰਹੇਗਾ।
ਤਨਖਾਹ 'ਚੋਂ ਵਸੂਲੀ ਕਰਨ ਵਾਲੀ 'ਆਪ' ਦੀ ਸਰਪੰਚ ਨੂੰ ਝਟਕਾ! ਅਗਾਊਂ ਜ਼ਮਾਨਤ ਅਰਜੀ ਖਾਰਿਜ
NEXT STORY 
