ਨਵੀਂ ਦਿੱਲੀ : ਫ਼ੁਕੇਤ ਤੋਂ ਦਿੱਲੀ ਆ ਰਹੀ ਏਅਰ ਇੰਡੀਆ ਦੀ ਫ਼ਲਾਈਟ ਵਿੱਚ ਵਾਪਰੇ ਜ਼ਬਰਦਸਤ ਟੱਰਬੂਲੈਂਸ (ਹਵਾ ਦੇ ਝਟਕਿਆਂ) ਦੇ ਮਾਮਲੇ ਵਿੱਚ ਇੱਕ ਬੇਹੱਦ ਗੰਭੀਰ ਖ਼ੁਲਾਸਾ ਹੋਇਆ ਹੈ। ਸੂਤਰਾਂ ਅਨੁਸਾਰ, ਇਸ ਫ਼ਲਾਈਟ ਦੇ ਪਾਇਲਟ-ਇਨ-ਕਮਾਂਡ ਦਾ ਦੂਜਾ ਡੋਪ ਟੈਸਟ (ਕਨਫ਼ਰਮੇਟਰੀ ਟੈਸਟ) ਵੀ ਪਾਜ਼ੀਟਿਵ ਆਇਆ ਹੈ। ਇਸ ਰਿਪੋਰਟ ਤੋਂ ਸਾਫ਼ ਹੋ ਗਿਆ ਹੈ ਕਿ ਪਾਇਲਟ ਪਾਬੰਦੀਸ਼ੁਦਾ ਨਸ਼ੀਲੇ ਪਦਾਰਥ ਦਾ ਸੇਵਨ ਕਰ ਕੇ ਜਹਾਜ਼ ਉਡਾ ਰਿਹਾ ਸੀ।
ਇਹ ਘਟਨਾ ਬੀਤੀ 4 ਅਗਸਤ ਨੂੰ ਵਾਪਰੀ ਸੀ, ਜਦੋਂ ਏਅਰ ਇੰਡੀਆ ਦੀ ਏਅਰਬੱਸ A320 ਫ਼ਲਾਈਟ (AI2379) ਫ਼ੁਕੇਤ ਤੋਂ ਦਿੱਲੀ ਆ ਰਹੀ ਸੀ। ਸਫ਼ਰ ਦੌਰਾਨ ਅਚਾਨਕ ਜਹਾਜ਼ ਹਵਾ ਵਿੱਚ ਲਗਭਗ 300 ਫੁੱਟ ਹੇਠਾਂ ਡਿੱਗ ਗਿਆ ਸੀ. ਉਸ ਸਮੇਂ ਜਹਾਜ਼ ਵਿੱਚ 137 ਯਾਤਰੀ ਅਤੇ 8 ਕਰੂ ਮੈਂਬਰ ਸਵਾਰ ਸਨ। ਦਿੱਲੀ ਵਿੱਚ ਜਹਾਜ਼ ਦੀ ਸੁਰੱਖਿਅਤ ਲੈਂਡਿੰਗ ਤਾਂ ਹੋ ਗਈ, ਪਰ ਹਵਾ ਦੇ ਜ਼ਬਰਦਸਤ ਝਟਕਿਆਂ ਕਾਰਨ ਜ਼ਖ਼ਮੀ ਹੋਏ 13 ਯਾਤਰੀਆਂ ਅਤੇ 4 ਕਰੂ ਮੈਂਬਰਾਂ (ਕੁੱਲ 17 ਲੋਕਾਂ) ਨੂੰ ਹਸਪਤਾਲ ਦਾਖ਼ਲ ਕਰਵਾਉਣਾ ਪਿਆ ਸੀ।
ਘਟਨਾ ਤੋਂ ਬਾਅਦ ਦੋਵਾਂ ਪਾਇਲਟਾਂ ਦਾ ਲਾਜ਼ਮੀ ਸਾਈਕੋਐਕਟਿਵ ਸਬਸਟੈਂਸ (ਡੋਪ) ਟੈਸਟ ਕੀਤਾ ਗਿਆ ਸੀ। ਕੋ-ਪਾਇਲਟ ਦੀ ਰਿਪੋਰਟ ਵਿੱਚ ਕੋਈ ਸਮੱਸਿਆ ਨਹੀਂ ਪਾਈ ਗਈ, ਪਰ ਮੁੱਖ ਪਾਇਲਟ-ਇਨ-ਕਮਾਂਡ ਦਾ ਸ਼ੁਰੂਆਤੀ ਸਕ੍ਰੀਨਿੰਗ ਟੈਸਟ "ਨਾਨ-ਨੈਗੇਟਿਵ" ਆਇਆ ਸੀ। ਇਸ ਤੋਂ ਬਾਅਦ ਸੈਂਪਲ ਨੂੰ ਪੁਸ਼ਟੀ ਲਈ ਅਧਿਕਾਰਤ ਲੈਬ ਵਿੱਚ ਭੇਜਿਆ ਗਿਆ, ਜਿੱਥੇ ਆਈ ਅੰਤਿਮ ਰਿਪੋਰਟ ਵਿੱਚ ਪਾਇਲਟ ਦੇ ਸਰੀਰ ਵਿੱਚ ਮਾਰੀਜੁਆਨਾ (ਗਾਂਜੇ) ਦੀ ਮੌਜੂਦਗੀ ਦੀ ਪੁਸ਼ਟੀ ਹੋਈ ਹੈ।
ਇਸ ਸੰਵੇਦਨਸ਼ੀਲ ਮਾਮਲੇ ਬਾਰੇ ਏਅਰ ਇੰਡੀਆ ਦੇ ਬੁਲਾਰੇ ਨੇ ਕਿਹਾ ਕਿ ਜਹਾਜ਼ ਹਾਦਸਾ ਜਾਂਚ ਬਿਊਰੋ (AAIB) ਵੱਲੋਂ ਆਈਸੀਏਓ (ICAO) ਦੇ ਨਿਯਮਾਂ ਤਹਿਤ ਜਾਂਚ ਕੀਤੀ ਜਾ ਰਹੀ ਹੈ। ਜਾਂਚ ਦੀ ਪ੍ਰਕਿਰਿਆ ਚੱਲ ਰਹੀ ਹੋਣ ਕਾਰਨ ਏਅਰਲਾਈਨ ਫਿਲਹਾਲ ਕਿਸੇ ਨਤੀਜੇ 'ਤੇ ਟਿੱਪਣੀ ਨਹੀਂ ਕਰ ਸਕਦੀ, ਪਰ ਜਾਂਚ ਵਿੱਚ ਪੂਰਾ ਸਹਿਯੋਗ ਦੇ ਰਹੀ ਹੈ। ਦੂਜੇ ਪਾਸੇ, ਜਹਾਜ਼ ਬਣਾਉਣ ਵਾਲੀ ਕੰਪਨੀ 'ਏਅਰਬੱਸ' ਨੇ ਵੀ ਜਾਂਚ ਅਧਿਕਾਰੀਆਂ ਨੂੰ ਤਕਨੀਕੀ ਸਹਾਇਤਾ ਦੇਣ ਲਈ ਆਪਣੇ ਮਾਹਰਾਂ ਦੀ ਟੀਮ ਭੇਜਣ ਦੀ ਗੱਲ ਕਹੀ ਹੈ।
ਇਸ ਘਟਨਾ ਤੋਂ ਬਾਅਦ ਏਅਰ ਇੰਡੀਆ ਦੇ ਸੀਈਓ ਕੈਂਪਬੈਲ ਵਿਲਸਨ ਨੇ ਸ਼ਹਿਰੀ ਹਵਾਬਾਜ਼ੀ ਸਕੱਤਰ ਸਮੀਰ ਕੁਮਾਰ ਸਿਨਹਾ ਅਤੇ ਹੋਰ ਉੱਚ ਅਧਿਕਾਰੀਆਂ ਨਾਲ ਮੁਲਾਕਾਤ ਕੀਤੀ। ਇਸ ਬੈਠਕ ਵਿੱਚ ਟਾਟਾ ਸੰਨਜ਼ ਦੇ ਕਾਰਜਕਾਰੀ ਸਲਾਹਕਾਰ ਪ੍ਰਦੀਪ ਸਿੰਘ ਖਰੋਲਾ, ਏਅਰ ਇੰਡੀਆ ਦੇ ਚੇਅਰਮੈਨ ਐਨ. ਚੰਦਰਸ਼ੇਖਰਨ ਅਤੇ ਫ਼ਲਾਈਟ ਸੇਫਟੀ ਹੈੱਡ ਦੀਪਕ ਜੋਸ਼ੀ ਵੀ ਸ਼ਾਮਲ ਸਨ, ਜਿੱਥੇ ਹਾਦਸੇ ਅਤੇ ਸੁਰੱਖਿਆ ਉਲੰਘਣਾ ਦੇ ਇਸ ਗੰਭੀਰ ਮਾਮਲੇ 'ਤੇ ਚਰਚਾ ਕੀਤੀ ਗਈ।
ਸ਼ਿਵਰਾਤਰੀ ਮੌਕੇ ਪਹਿਲਵਾਨ ਬਬੀਤਾ ਫੋਗਾਟ ਬਣੀ ਮਾਂ, ਘਰ ਆਈ ਨੰਨ੍ਹੀ ਪਰੀ
NEXT STORY 
