ਚੇਨਈ- ਟੀਮ ਇੰਡੀਆ ਦੇ ਸਾਬਕਾ ਕਪਤਾਨ ਅਤੇ ਚੇਨਈ ਸੁਪਰ ਕਿੰਗਜ਼ (CSK) ਦੇ ਦਿੱਗਜ ਖਿਡਾਰੀ ਮਹਿੰਦਰ ਸਿੰਘ ਧੋਨੀ ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਹਨ ਪਰ ਇਸ ਵਾਰ ਕਾਰਨ ਕ੍ਰਿਕਟ ਨਹੀਂ ਸਗੋਂ ਇੱਕ ਪੁਰਾਣਾ ਕਾਨੂੰਨੀ ਮਾਮਲਾ ਹੈ। ਮਦਰਾਸ ਹਾਈ ਕੋਰਟ ਨੇ ਧੋਨੀ ਨੂੰ ਆਪਣੇ ਵੱਲੋਂ ਦਾਇਰ ਕੀਤੇ ਗਏ ਇੱਕ ਮਾਨਹਾਨੀ ਕੇਸ ਵਿੱਚ 10 ਲੱਖ ਰੁਪਏ ਅਦਾਲਤ ਵਿੱਚ ਜਮ੍ਹਾ ਕਰਵਾਉਣ ਦਾ ਹੁਕਮ ਦਿੱਤਾ ਹੈ।
ਕੀ ਹੈ ਪੂਰਾ ਮਾਮਲਾ?
ਇਹ ਮਾਮਲਾ 2013 ਦੇ IPL ਮੈਚ ਫਿਕਸਿੰਗ ਅਤੇ ਸੱਟੇਬਾਜ਼ੀ ਕਾਂਡ ਨਾਲ ਜੁੜਿਆ ਹੋਇਆ ਹੈ। ਉਸ ਸਮੇਂ ਇਸ ਅਪਰਾਧਿਕ ਗਤੀਵਿਧੀ ਵਿੱਚ ਆਪਣਾ ਨਾਂ ਘਸੀਟੇ ਜਾਣ ਵਿਰੁੱਧ ਧੋਨੀ ਨੇ ਇੱਕ ਮੀਡੀਆ ਕੰਪਨੀ, ਇੱਕ ਆਈਪੀਐੱਸ ਅਧਿਕਾਰੀ ਅਤੇ ਕੁਝ ਹੋਰ ਲੋਕਾਂ ਖਿਲਾਫ ਮਾਨਹਾਨੀ ਦਾ ਕੇਸ ਦਰਜ ਕਰਵਾਇਆ ਸੀ। ਇਸ ਮਾਮਲੇ ਦੀ ਸੁਣਵਾਈ ਪਿਛਲੇ ਕਈ ਸਾਲਾਂ ਤੋਂ ਚੱਲ ਰਹੀ ਹੈ।
ਇਹ ਵੀ ਪੜ੍ਹੋ- ਖੇਡਣ ਪੁੱਜੀ ਪਾਕਿ ਟੀਮ ਨਾਲ ਹੋਈ ਮਾੜੀ! ਹੋਟਲ 'ਚ ਨਹੀਂ ਮਿਲੇ ਕਮਰੇ, ਸੜਕ 'ਤੇ ਖੱਜਲ ਹੋਏ ਖਿਡਾਰੀ
ਧੋਨੀ ਨੇ ਆਪਣੇ ਕੇਸ ਵਿੱਚ ਸਬੂਤ ਵਜੋਂ ਕਈ ਨਿਊਜ਼ ਸ਼ੋਅ ਦੀਆਂ ਸੀਡੀ (CDs) ਉਪਲਬਧ ਕਰਵਾਈਆਂ ਸਨ। ਹਾਈ ਕੋਰਟ ਦੀ ਜਸਟਿਸ ਆਰਐਨ ਮੰਜੁਲਾ ਨੇ ਦੱਸਿਆ ਕਿ ਇਨ੍ਹਾਂ ਸੀਡੀਜ਼ ਵਿੱਚ ਮੌਜੂਦ ਹਿੰਦੀ ਨਿਊਜ਼ ਰਿਪੋਰਟਾਂ ਦਾ ਅਨੁਵਾਦ ਅਤੇ ਟ੍ਰਾਂਸਕ੍ਰਿਪਸ਼ਨ (ਲਿਖਤੀ ਰੂਪ) ਕਰਨ ਦਾ ਕੰਮ ਕਾਫ਼ੀ ਲੰਬਾ ਅਤੇ ਵੱਡਾ ਹੈ। ਇਸ ਕਾਰਜ ਲਈ ਵੱਖਰੇ ਤੌਰ 'ਤੇ ਇੱਕ ਇੰਟਰਪ੍ਰੇਟਰ ਅਤੇ ਟਾਈਪਿਸਟ ਦੀ ਲੋੜ ਪਵੇਗੀ, ਜਿਸ ਵਿੱਚ ਲਗਭਗ 3-4 ਮਹੀਨੇ ਦਾ ਸਮਾਂ ਲੱਗ ਸਕਦਾ ਹੈ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਇਸ ਸਾਰੀ ਕਾਗਜ਼ੀ ਕਾਰਵਾਈ ਅਤੇ ਪ੍ਰਕਿਰਿਆ ਦਾ ਖਰਚਾ ਸ਼ਿਕਾਇਤਕਰਤਾ (ਧੋਨੀ) ਨੂੰ ਹੀ ਉਠਾਉਣਾ ਹੋਵੇਗਾ।
ਅਦਾਲਤ ਨੇ ਹੁਕਮ ਦਿੱਤਾ ਹੈ ਕਿ ਧੋਨੀ ਨੂੰ 12 ਮਾਰਚ ਤੱਕ ਇਹ 10 ਲੱਖ ਰੁਪਏ ਮਦਰਾਸ ਹਾਈ ਕੋਰਟ ਦੇ ਚੀਫ਼ ਜਸਟਿਸ ਰਿਲੀਫ਼ ਫੰਡ ਵਿੱਚ ਜਮ੍ਹਾ ਕਰਵਾਉਣੇ ਪੈਣਗੇ। ਰਿਪੋਰਟਾਂ ਮੁਤਾਬਕ ਪੂਰਵ ਭਾਰਤੀ ਕਪਤਾਨ ਇਸ ਰਕਮ ਨੂੰ ਜਮ੍ਹਾ ਕਰਵਾਉਣ ਲਈ ਸਹਿਮਤ ਹੋ ਗਏ ਹਨ। ਇਸ ਮਾਮਲੇ ਦੀ ਅਗਲੀ ਸੁਣਵਾਈ ਵੀ 12 ਮਾਰਚ ਨੂੰ ਹੀ ਤੈਅ ਕੀਤੀ ਗਈ ਹੈ।
ਜ਼ਿਕਰਯੋਗ ਹੈ ਕਿ ਜਿੱਥੇ ਧੋਨੀ ਆਈਪੀਐਲ 2026 ਦੇ ਸੀਜ਼ਨ ਲਈ ਮੈਦਾਨ 'ਤੇ ਵਾਪਸੀ ਦੀਆਂ ਤਿਆਰੀਆਂ ਵਿੱਚ ਜੁਟੇ ਹੋਏ ਹਨ, ਉੱਥੇ ਹੀ ਇਸ ਪੁਰਾਣੇ ਕਾਨੂੰਨੀ ਮਾਮਲੇ ਨੇ ਉਨ੍ਹਾਂ ਦੀਆਂ ਮੁਸ਼ਕਲਾਂ ਵਿੱਚ ਕੁਝ ਵਾਧਾ ਕਰ ਦਿੱਤਾ ਹੈ।
ਇਹ ਵੀ ਪੜ੍ਹੋ- 24 ਘੰਟਿਆਂ 'ਚ 4 ਸਟਾਰ ਖਿਡਾਰੀ T20 ਵਿਸ਼ਵ ਕੱਪ 'ਚੋਂ ਬਾਹਰ, ਹੁਣ ਇਸ ਟੀਮ ਨੂੰ ਲੱਗਾ ਝਟਕਾ
27 ਫਰਵਰੀ ਨੂੰ ਫ਼ੈਸਲਾ ! ਕੇਜਰੀਵਾਲ, ਸਿਸੋਦੀਆ ਸਣੇ 23 ਖ਼ਿਲਾਫ਼ 100 ਕਰੋੜ ਦੀ ਰਿਸ਼ਵਤ ਦਾ ਇਲਜ਼ਾਮ
NEXT STORY 
