ਇਕ ਵਾਰ ਇਕ ਵਿਅਕਤੀ ਹੇਅਰ ਡ੍ਰੈਸਰ ਕੋਲ ਵਾਲ ਕਟਵਾਉਣ ਗਿਆ। ਹੇਅਰ ਡ੍ਰੈੱਸਰ ਤੇ ਉਸ ਵਿਅਕਤੀ ਦਰਮਿਆਨ ਐਵੇਂ ਹੀ ਗੱਲਾਂ ਸ਼ੁਰੂ ਹੋ ਗਈਆਂ ਅਤੇ ਉਹ ਗੱਲਾਂ ਕਰਦੇ-ਕਰਦੇ 'ਰੱਬ' ਦੇ ਵਿਸ਼ੇ 'ਤੇ ਗੱਲਾਂ ਕਰਨ ਲੱਗੇ।
ਉਸੇ ਵੇਲੇ ਹੇਅਰ ਡ੍ਰੈਸਰ ਨੇ ਕਿਹਾ,''ਮੈਂ ਰੱਬ ਦੀ ਹੋਂਦ ਨੂੰ ਨਹੀਂ ਮੰਨਦਾ ਅਤੇ ਇਸੇ ਲਈ ਤੂੰ ਮੈਨੂੰ ਨਾਸਤਿਕ ਕਹਿ ਸਕਦਾ ਏਂ।''
ਵਿਅਕਤੀ ਨੇ ਪੁੱਛਿਆ,''ਤੂੰ ਅਜਿਹਾ ਕਿਉਂ ਕਹਿ ਰਿਹਾ ਏਂ?''
ਹੇਅਰ ਡ੍ਰੈਸਰ ਬੋਲਿਆ,''ਬਾਹਰ ਜਦੋਂ ਤੂੰ ਸੜਕ 'ਤੇ ਜਾਵੇਂਗਾ ਤਾਂ ਸਮਝ ਜਾਵੇਂਗਾ ਕਿ ਰੱਬ ਦੀ ਹੋਂਦ ਨਹੀਂ ਹੈ। ਜੇ ਰੱਬ ਹੁੰਦਾ ਤਾਂ ਕੀ ਇੰਨੇ ਸਾਰੇ ਲੋਕ ਭੁੱਖੇ ਮਰਦੇ? ਕੀ ਇੰਨੇ ਸਾਰੇ ਲੋਕ ਬੀਮਾਰ ਪੈਂਦੇ? ਕੀ ਦੁਨੀਆ ਵਿਚ ਇੰਨੀ ਜ਼ਿਆਦਾ ਹਿੰਸਾ ਹੁੰਦੀ? ''
ਵਿਅਕਤੀ ਨੇ ਥੋੜ੍ਹਾ ਸੋਚਿਆ ਪਰ ਉਹ ਝਗੜਾ ਨਹੀਂ ਕਰਨਾ ਚਾਹੁੰਦਾ ਸੀ। ਇਸ ਲਈ ਚੁੱਪ ਰਿਹਾ ਅਤੇ ਹੇਅਰ ਡ੍ਰੈਸਰ ਦੀਆਂ ਗੱਲਾਂ ਸੁਣਦਾ ਰਿਹਾ।
ਹੇਅਰ ਡ੍ਰੈਸਰ ਨੇ ਆਪਣਾ ਕੰਮ ਖਤਮ ਕੀਤਾ ਅਤੇ ਉਹ ਵਿਅਕਤੀ ਹੇਅਰ ਡ੍ਰੈਸਰ ਨੂੰ ਪੈਸੇ ਦੇ ਕੇ ਦੁਕਾਨ 'ਚੋਂ ਬਾਹਰ ਆ ਗਿਆ। ਉਹ ਜਿਉਂ ਹੀ ਹੇਅਰ ਡ੍ਰੈਸਰ ਦੀ ਦੁਕਾਨ 'ਚੋਂ ਨਿਕਲਿਆ, ਉਸ ਨੇ ਸੜਕ 'ਤੇ ਲੰਮੇ ਤੇ ਸੰਘਣੇ ਵਾਲਾਂ ਵਾਲਾ ਇਕ ਵਿਅਕਤੀ ਦੇਖਿਆ, ਜਿਸ ਦੀ ਦਾੜ੍ਹੀ ਵੀ ਵਧੀ ਹੋਈ ਸੀ ਅਤੇ ਅਜਿਹਾ ਲਗਦਾ ਸੀ ਜਿਵੇਂ ਉਸ ਨੇ ਕਈ ਮਹੀਨਿਆਂ ਤੋਂ ਆਪਣੇ ਵਾਲ ਨਹੀਂ ਕਟਵਾਏ ਸਨ।
ਉਹ ਵਿਅਕਤੀ ਵਾਪਸ ਮੁੜ ਕੇ ਹੇਅਰ ਡ੍ਰੈਸਰ ਦੀ ਦੁਕਾਨ 'ਚ ਵੜਿਆ ਅਤੇ ਉਸ ਨੂੰ ਕਿਹਾ,''ਕੀ ਤੈਨੂੰ ਪਤਾ ਹੈ ਕਿ ਹੇਅਰ ਡ੍ਰੈਸਰਜ਼ ਦੀ ਹੋਂਦ ਨਹੀਂ ਹੁੰਦੀ?''
ਹੇਅਰ ਡ੍ਰੈਸਰ ਬੋਲਿਆ,''ਤੂੰ ਕਿਹੋ ਜਿਹੀਆਂ ਵਿਅਰਥ ਦੀਆਂ ਗੱਲਾਂ ਕਰ ਰਿਹਾ ਏਂ? ਕੀ ਤੈਨੂੰ ਮੈਂ ਨਜ਼ਰ ਨਹੀਂ ਆਉਂਦਾ? ਮੈਂ ਇਥੇ ਹਾਂ ਅਤੇ ਮੈਂ ਇਕ ਹੇਅਰ ਡ੍ਰੈਸਰ ਹਾਂ। ਮੈਂ ਹੁਣੇ-ਹੁਣੇ ਤੇਰੇ ਵਾਲ ਕੱਟੇ ਹਨ।''
ਵਿਅਕਤੀ ਬੋਲਿਆ,''ਨਹੀਂ, ਹੇਅਰ ਡ੍ਰੈਸਰ ਨਹੀਂ ਹੁੰਦੇ। ਜੇ ਹੁੰਦੇ ਤਾਂ ਕੀ ਬਾਹਰ ਉਸ ਵਿਅਕਤੀ ਦੇ ਵਾਂਗ ਕੋਈ ਲੰਮੇ ਵਾਲਾਂ ਵਾਲਾ ਤੇ ਵਧੀ ਹੋਈ ਦਾੜ੍ਹੀ ਵਾਲਾ ਹੁੰਦਾ?''
ਹੇਅਰ ਡ੍ਰੈਸਰ ਬੋਲਿਆ,''ਜੇ ਉਹ ਵਿਅਕਤੀ ਕਿਸੇ ਹੇਅਰ ਡ੍ਰੈਸਰ ਕੋਲ ਵਾਲ ਕਟਵਾਉਣ ਜਾਵੇਗਾ ਹੀ ਨਹੀਂ ਤਾਂ ਹੇਅਰ ਡ੍ਰੈਸਰ ਕਿਵੇਂ ਉਸ ਦੇ ਵਾਲ ਕੱਟੇਗਾ?''
ਵਿਅਕਤੀ ਬੋਲਿਆ,''ਤੂੰ ਬਿਲਕੁਲ ਸਹੀ ਕਹਿ ਰਿਹਾ ਏਂ, ਇਹੀ ਗੱਲ ਹੈ। ਰੱਬ ਵੀ ਹੁੰਦਾ ਹੈ ਪਰ ਕੁਝ ਲੋਕ ਰੱਬ 'ਤੇ ਵਿਸ਼ਵਾਸ ਹੀ ਨਹੀਂ ਕਰਦੇ ਤਾਂ ਰੱਬ ਉਨ੍ਹਾਂ ਦੀ ਮਦਦ ਕਿਵੇਂ ਕਰੇਗਾ?''
ਆਤਮਵਿਸ਼ਵਾਸ ਤੋਂ ਬਿਨ੍ਹਾਂ ਆਦਮੀ ਕੁਝ ਨਹੀਂ ਕਰ ਸਕਦਾ
NEXT STORY 
