ਕਿਸਾਨਾਂ ਦੀ ਕਰਜ਼ ਮੁਆਫੀ ਨੂੰ ਲੈ ਕੇ ਹੈਰਾਨ ਕਰਦੀ ਗੱਲ ਆਈ ਸਾਹਮਣੇ

ਬਰਨਾਲਾ (ਵੈੱਬ ਡੈਸਕ) : ਪਿੰਡ ਬੜਬਰ ਦੀ ਕੋਆਪਰੇਟਿਵ ਸੋਸਾਇਟੀ 'ਤੇ ਕਰਜ਼ ਮੁਆਫੀ ਦੇ ਯੋਗ 13 ਕਿਸਾਨਾਂ ਨੂੰ ਮ੍ਰਿਤਕ ਦੱਸ ਕੇ ਉਨ੍ਹਾਂ ਦਾ ਨਾਂ ਕਰਜ਼ ਮੁਆਫੀ ਦੀ ਲਿਸਟ ਵਿਚੋਂ ਕੱਟਣ ਦਾ ਦੋਸ਼ ਲੱਗਾ ਹੈ। ਇਨ੍ਹਾਂ 13 ਕਿਸਾਨਾਂ ਦਾ 7 ਲੱਖ 72 ਹਜ਼ਾਰ 92 ਰੁਪਏ ਦਾ ਕਰਜ਼ਾ ਵੀ ਮੁਆਫ ਨਹੀਂ ਹੋਇਆ। ਹੁਣ ਕਿਸਾਨਾਂ ਨੇ ਸੋਸਾਇਟੀ ਦੇ ਖਾਤੇ ਵਿਚ ਖੁਦ ਨੂੰ ਜਿੰਦਾ ਸਾਬਤ ਕਰਨ ਲਈ ਪ੍ਰਸ਼ਾਸਨ ਤੋਂ ਗੁਹਾਰ ਲਗਾਈ ਹੈ। ਨਾਲ ਹੀ ਦੋਸ਼ ਲਗਾਇਆ ਹੈ ਕਿ ਗੋਲਮਾਲ ਕਰਕੇ ਸੋਸਾਇਟੀ ਨੇ ਕਈ ਅਮੀਰ ਕਿਸਾਨਾਂ ਦੇ ਕਰਜ਼ ਮੁਆਫ ਕਰ ਦਿੱਤੇ। ਇਸ ਪੂਰੇ ਮਾਮਲੇ ਦੀ ਸ਼ਿਕਾਇਤ ਕਿਸਾਨਾਂ ਨੇ ਐੱਸ.ਡੀ.ਐੱਮ. ਨੂੰ ਕੀਤੀ ਹੈ। ਕਿਸਾਨਾਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਨਸਾਫ ਨਾ ਮਿਲਿਆ ਤਾਂ ਉਹ ਅਦਾਲਤ ਜਾਣਗੇ। ਦੱਸ ਦੇਈਏ ਕਿ ਪ੍ਰਦੇਸ਼ ਸਰਕਾਰ ਵੱਲੋਂ ਢਾਈ ਏਕੜ ਤੋਂ ਘੱਟ ਜ਼ਮੀਨ ਵਾਲੇ ਕਿਸਾਨਾਂ ਦਾ ਕਰਜ਼ਾ ਮੁਆਫ ਕਰਨ ਦੀ ਸ਼ੁਰੂ ਕੀਤੀ ਗਈ ਸਕੀਮ ਦੇ ਤਹਿਤ ਪਿੰਡ ਬੜਬਰ ਦੇ ਕਈ ਕਿਸਾਨਾਂ ਨੇ ਫਾਰਮ ਭਰੇ ਸਨ। ਇਨ੍ਹਾਂ ਵਿਚੋਂ ਕਈ ਕਿਸਾਨਾਂ ਦਾ ਕਰਜ਼ਾ ਮੁਆਫ ਹੋ ਗਿਆ ਪਰ ਕੁੱਝ ਦਾ ਨਹੀਂ ਹੋਇਆ।

ਢਾਈ ਏਕੜ ਜ਼ਮੀਨ ਮਾਲਕਾਂ ਦਾ ਕਰਜ਼ਾ ਮੁਆਫ ਕੀਤਾ : ਗੁਰਮੁੱਖ
ਕਿਸਾਨ ਗੁਰਮੁੱਖ ਨੇ ਦੱਸਿਆ ਕਿ ਪਹਿਲਾਂ ਤਾਂ ਉਨ੍ਹਾਂ ਨੂੰ ਇਹ ਲੱਗਾ ਕਿ ਕਿਸੇ ਕਾਰਨ ਉਨ੍ਹਾਂ ਦਾ ਨਾਂ ਲਿਸਟ ਵਿਚ ਨਹੀ ਆਇਆ, ਜੋ ਅਗਲੀ ਲਿਸਟ ਵਿਚ ਆ ਜਾਏਗਾ। ਉਨ੍ਹਾਂ ਨੂੰ ਕੁੱਝ ਦਿਨ ਪਹਿਲਾਂ ਪਤਾ ਲੱਗਾ ਕਿ ਸੋਸਾਇਟੀ ਦੇ ਰਿਕਾਰਡ ਵਿਚ ਉਹ ਮਰ ਚੁੱਕੇ ਹਨ। ਕਿਸਾਨ ਗੁਰਮੁੱਖ ਨੇ ਦੋਸ਼ ਲਗਾਇਆ ਕਿ ਉਨ੍ਹਾਂ ਕੋਲ ਕਈ ਅਜਿਹੇ ਸਬੂਤ ਹਨ ਕਿ ਉਨ੍ਹਾਂ ਦੇ ਪਿੰਡ ਦੇ ਕਈ ਅਮੀਰ ਕਿਸਾਨ, ਜਿਨ੍ਹਾਂ ਦੀ ਜ਼ਮੀਨ ਢਾਈ ਏਕੜ ਤੋਂ ਕਿਤੇ ਜ਼ਿਆਦਾ ਹੈ, ਦਾ 2 ਲੱਖ ਤੱਕ ਦਾ ਕਰਜ਼ਾ ਮੁਆਫ ਹੋ ਗਿਆ ਹੈ ਪਰ ਉਨ੍ਹਾਂ ਦਾ ਕਰਜ਼ਾ ਮੁਆਫ ਨਹੀਂ ਹੋ ਸਕਿਆ। ਜੇਕਰ ਉਨ੍ਹਾਂ ਦਾ ਕਰਜ਼ਾ ਮੁਆਫ ਨਾ ਹੋਇਆ ਤਾਂ ਉਹ ਅਦਾਲਤ ਵੀ ਜਾਣਗੇ।

ਜਾਂਚ ਦੇ ਹੁਕਮ : ਸੋਸਾਇਟੀ ਸਕੱਤਰ ਨੇ ਕਿਹਾ-ਦਫਤਰੀ ਗਲਤੀ ਠੀਕ ਕਰ ਦਵਾਂਗੇ
32 ਵਿਚੋਂ 19 ਨਾਂ ਠੀਕ ਕਰ ਦਿੱਤੇ, 13 ਰਹਿ ਗਏ :
ਪਿੰਡ ਬੜਬਰ ਦੇ ਕੋਆਪਰੇਟਿਵ ਸੋਸਾਇਟੀ ਦੇ ਸਕੱਤਰ ਜੀਤ ਸਿੰਘ ਨੇ ਕਿਹਾ ਕਿ ਇਹ ਵਿਭਾਗੀ ਗਲਤੀ ਹੈ। ਇਸ ਨੂੰ ਠੀਕ ਕਰ ਲਿਆ ਜਾਵੇਗਾ। 4 ਮਹੀਨੇ ਪਹਿਲਾਂ ਉਨ੍ਹਾਂ ਨੇ 65 ਕਿਸਾਨਾਂ ਦੀ ਕਰਜ਼ ਮੁਆਫੀ ਦੀ ਲਿਸਟ ਭੇਜੀ ਸੀ, ਜਿਨ੍ਹਾਂ ਵਿਚੋਂ ਗਲਤੀ ਨਾਲ 32 ਨਾਂ ਮ੍ਰਿਤਕ ਐਲਾਨ ਹੋ ਗਏ ਸਨ। ਇਸ ਤੋਂ ਬਾਅਦ ਲਿਸਟ ਫਿਰ ਤੋਂ ਦਰੂਸਤ ਕਰਕੇ ਭੇਜੀ ਗਈ ਪਰ 19 ਨਾਂ ਠੀਕ ਹੋ ਕੇ ਆ ਗਏ ਪਰ 13 ਨਾਂ ਫਿਰ ਤੋਂ ਮ੍ਰਿਤਕ ਹੀ ਰਹਿ ਗਏ, ਇਨ੍ਹਾਂ ਨੂੰ ਜਲਦੀ ਠੀਕ ਕਰ ਲਿਆ ਜਾਵੇਗਾ।

ਅਯੋਗ ਕਿਸਾਨਾਂ ਤੋਂ ਕਰਾਂਗੇ ਰਿਕਵਰੀ : ਐੱਸ.ਡੀ.ਐੱਮ.
ਬਰਨਾਲਾ ਦੇ ਐੱਸ.ਡੀ.ਐੱਮ. ਸੰਦੀਪ ਕੁਮਾਰ ਨੇ ਕਿਹਾ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਹੋਵੇਗੀ। ਇਸ ਲਈ ਅਧਿਕਾਰੀਆਂ ਨੂੰ ਹੁਕਮ ਦੇ ਦਿੱਤੇ ਗਏ ਹਨ। ਜੇਕਰ ਕਿਸੇ ਅਜਿਹੇ ਕਿਸਾਨ ਦਾ ਕਰਜ਼ਾ ਮੁਆਫ ਹੋਇਆ ਹੈ ਜੋ ਯੋਗ ਨਹੀਂ ਹੈ। ਉਨ੍ਹਾਂ ਤੋਂ ਦੁਬਾਰਾ ਰਿਕਵਰੀ ਕਰਵਾ ਲਈ ਜਾਏਗੀ। ਜੋ ਕਿਸਾਨ ਜਿੰਦਾ ਹਨ, ਜੇਕਰ ਉਹ ਰਿਕਾਰਡ ਵਿਚ ਮ੍ਰਿਤਕ ਹਨ ਤਾਂ ਇਸ ਰਿਕਾਰਡ ਨੂੰ ਦਰੂਰਤ ਕਰਵਾ ਦਿੱਤਾ ਜਾਏਗਾ।

ਇਹ ਹਨ ਉਨ੍ਹਾਂ ਕਿਸਾਨਾ ਦੇ ਨਾਂ ਜਿਨ੍ਹਾਂ ਨੂੰ ਸੋਸਾਇਟੀ ਨੇ ਮ੍ਰਿਤਕ ਦਿਖਾ ਕੇ ਕੱਟਿਆ ਹੈ :

ਨਾਂ	ਮੁਆਫ ਹੋਣਾ ਹੈ
ਗੁਰਮੁੱਖ ਸਿੰਘ	46826 ਰੁਪਏ
ਗੁਰਮੁੱਖ ਸਿੰਘ	72667 ਰੁਪਏ
ਸਿਮਰਨਜੀਤ ਕੌਰ	84610 ਰੁਪਏ
ਦਿਲਬਾਗ ਸਿੰਘ	58044 ਰੁਪਏ
ਰਣਜੀਤ ਸਿੰਘ	52000 ਰੁਪਏ
ਤੇਜਾ ਸਿੰਘ	72427 ਰੁਪਏ
ਬਲਵਿੰਦਰ ਸਿੰਘ	50204 ਰੁਪਏ
ਨਿਰਮਲ ਸਿੰਘ	84426 ਰੁਪਏ
ਜਰਨੈਲ ਸਿੰਘ	45811 ਰੁਪਏ
ਜਰਨੈਲ ਸਿੰਘ	52544 ਰੁਪਏ
ਸੁਖਵੰਤ ਸਿੰਘ	29070 ਰੁਪਏ
ਅਰਜੁਨ ਸਿੰਘ	59000 ਰੁਪਏ
ਬੇਅੰਤ ਸਿੰਘ	63463 ਰੁਪਏ
ਕੁੱਲ	771092 ਰੁਪਏ