ਹਿਮਾਚਲ ਪ੍ਰਦੇਸ਼ ’ਚ ਮੌਸਮ ਅਜੇ ਵੀ ਠੰਢਾ ਬਣਿਆ ਹੋਇਆ ਹੈ ਪਰ ਸਿਆਸੀ ਗਰਮੀ ਜ਼ਿਆਦਾ ਹੈ। ਇਸ ਵਾਰ ਲੋਕ ਸਭਾ ਦੇ ਨਾਲ-ਨਾਲ 6 ਵਿਧਾਨ ਸਭਾ ਦੀਆਂ ਸੀਟਾਂ ਲਈ ਹੋ ਰਹੀਆਂ ਜ਼ਿਮਨੀ ਚੋਣਾਂ ਨੇ ਪੂਰੀ ਸਿਆਸੀ ਤਸਵੀਰ ਬਦਲ ਕੇ ਰੱਖ ਦਿੱਤੀ ਹੈ। ਲੋਕ ਸਭਾ ਨਾਲੋਂ ਵਿਧਾਨ ਸਭਾ ਦੀਆਂ ਸੀਟਾਂ ਦੇ ਨਤੀਜਿਆਂ ਨੂੰ ਲੈ ਕੇ ਲੋਕ ਜ਼ਿਆਦਾ ਉਤਸੁਕ ਹਨ। ਸੱਤਾਧਾਰੀ ਪਾਰਟੀ ਕਾਂਗਰਸ ਲੋਕ ਸਭਾ ਚੋਣਾਂ ਦੇ ਨਾਲ-ਨਾਲ ਸੂਬੇ ਦੀ ਸੱਤਾ ਬਚਾਉਣ ਲਈ ਵੀ ਲੜ ਰਹੀ ਹੈ। ਅਜਿਹੀ ਹਾਲਤ ’ਚ ਭਾਜਪਾ ਦੇ ਵੱਡੇ ਚਿਹਰਿਆਂ ਨੂੰ ਲੋਕ ਸਭਾ ਦੀਆਂ ਚੋਣਾਂ ’ਚ ਭਾਵੇਂ ਕੋਈ ਦਿੱਕਤ ਨਾ ਆਏ ਪਰ ਉਨ੍ਹਾਂ ਦੀਆਂ ਆਪਣੀਆਂ ਸੀਟਾਂ ਤੋਂ ਇਲਾਵਾ ਹੋਰ ਥਾਵਾਂ ’ਤੇ ਉਨ੍ਹਾਂ ਦੀ ਭੂਮਿਕਾ ਅਹਿਮ ਹੋ ਗਈ ਹੈ। ਇਸ ਨੂੰ ਧਿਆਨ ’ਚ ਰਖਦਿਆਂ ਕੇਂਦਰੀ ਮੰਤਰੀ ਅਨੁਰਾਗ ਠਾਕੁਰ ਵੱਲੋਂ ਦੇਸ਼ ਦੇ ਨਾਲ-ਨਾਲ ਹਿਮਾਚਲ ’ਚ ਵੀ ਲਗਾਤਾਰ ਵਿਆਪਕ ਪ੍ਰਚਾਰ ਮੁਹਿੰਮ ਚਲਾਈ ਜਾ ਰਹੀ ਹੈ। ਆਪਣੀ ਰੁਝੇਵਿਆਂ ਭਰੀ ਮੁਹਿੰਮ ਦੌਰਾਨ ‘ਜਗ ਬਾਣੀ’ ਦੇ ਪੱਤਰਕਾਰ ਸੰਜੀਵ ਸ਼ਰਮਾ ਨੇ ਉਨ੍ਹਾਂ ਨਾਲ ਦੇਸ਼ ਤੇ ਸੂਬੇ ਦੇ ਸਿਆਸੀ ਸਮੀਕਰਨਾਂ ’ਤੇ ਵਿਸਥਾਰ ਨਾਲ ਗੱਲਬਾਤ ਕੀਤੀ। ਇਸ ਦੇ ਸੰਪਾਦਿਤ ਅੰਸ਼ ਪੇਸ਼ ਹਨ:-
ਸਵਾਲ : ਤੁਸੀਂ ਪੂਰੇ ਦੇਸ਼ ’ਚ ਯਾਤਰਾ ਕਰ ਰਹੇ ਹੋ ਤੇ ਪ੍ਰਚਾਰ ਕਰ ਰਹੇ ਹੋ। ਕੀ 400 ਤੋਂ ਪਾਰ ਕਿਤੇ ਦਿਖਾਈ ਦਿੰਦਾ ਹੈ ਜਾਂ ਇਹ ਸਿਰਫ਼ ਦਾਅਵਾ ਹੀ ਹੈ?
ਜਵਾਬ : ਮੋਦੀ ਜੀ ਲਈ ਲੋਕਾਂ ’ਚ ਅਥਾਹ ਪਿਆਰ ਹੈ। ਤੀਹਰਾ ਤਲਾਕ, ਧਾਰਾ 370 ਨੂੰ ਹਟਾਉਣਾ, ਵਿਸ਼ਾਲ ਰਾਮ ਮੰਦਰ ਦਾ ਨਿਰਮਾਣ, ਭਾਰਤ ਦੇ ਵਿਸ਼ਵ ਪੱਧਰੀ ਅਕਸ ਨੂੰ ਮਜ਼ਬੂਤ ਕਰਨਾ ਇਹ ਸਭ ਕੁਝ ਲੋਕਾਂ ਵਲੋਂ ਮਹਿਸੂਸ ਕੀਤਾ ਜਾ ਰਿਹਾ ਹੈ। ਅੱਜ ਦੇਸ਼ ਦਾ ਹਰ ਵਰਗ, ਨੌਜਵਾਨ, ਮੁਲਾਜ਼ਮ, ਕਿਸਾਨ, ਔਰਤਾਂ, ਬਜ਼ੁਰਗ ਸੁਰੱਖਿਅਤ ਮਹਿਸੂਸ ਕਰ ਰਹੇ ਹਨ। ਹਰ ਕਿਸੇ ਦੇ ਮਨ ’ਚ ਇਕ ਹੀ ਸੰਕਲਪ ਹੈ ਕਿ ਮੋਦੀ ਜੀ ਦੀ ਸਰਕਾਰ ਨੇ ਹੈਟ੍ਰਿਕ ਬਣਾਉਣੀ ਹੈ। ਤੁਸੀਂ 400 ਤੋਂ ਪਾਰ ਦੀ ਗੱਲ ਕਰ ਰਹੇ ਹੋ। ਮੈਂ ਇਸ ਦੇ ਨਾਲ ਇਕ ਹੋਰ ਚੀਜ਼ ਵੇਖ ਰਿਹਾ ਹਾਂ। ਭਾਜਪਾ 400 ਤੋਂ ਉੱਪਰ ਹੈ ਅਤੇ ਕਾਂਗਰਸ 40 ਤੋਂ ਹੇਠਾਂ ਹੈ।
ਸਵਾਲ : ਕਾਂਗਰਸ ਨੂੰ ਕੀ ਸਮੱਸਿਆ ਹੈ... ਜੋ ਇੰਨੇ ਘੱਟ ਦਾ ਤੁਸੀਂ ਅੰਦਾਜ਼ਾ ਲਾ ਰਹੇ ਹੋ?
ਜਵਾਬ : ਅਸਲ ’ਚ ਕਾਂਗਰਸ ਕੋਲ ਨਾ ਤਾਂ ਕੋਈ ਵਿਜ਼ਨ ਹੈ ਅਤੇ ਨਾ ਹੀ ਕੋਈ ਪ੍ਰੋਵਿਜ਼ਨ। ਰਾਹੁਲ ਗਾਂਧੀ ਦੀਆਂ ਰਟੀਆਂ-ਰਟਾਈਆਂ ਗੱਲਾਂ ਤੋਂ ਦੇਸ਼ ਅੱਕ ਚੁੱਕਾ ਹੈ। ਇਹੀ ਕਾਰਨ ਹੈ ਕਿ ਦੇਸ਼ ਨੂੰ ਡਰੋ ਨਹੀਂ, ਡਰੋ ਨਹੀਂ ਕਹਿਣ ਵਾਲੇ ਹੁਣ ਖੁਦ ਹੀ ਡਰੇ ਹੋਏ ਹਨ। ਇਕ ਪਾਸੇ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਵਾਇਨਾਡ ਤੋਂ ਹਾਰ ਕੇ ਬਾਹਰ ਹੋ ਜਾਵਾਂਗਾ, ਇਸ ਲਈ ਉਹ ਕਿਸੇ ਹੋਰ ਥਾਂ ਤੋਂ ਲੜਦੇ ਹਨ। ਉਹ ਉੱਥੇ ਵੀ ਡਰੇ ਹੋਏ ਹਨ। ਕਾਂਗਰਸ ਕੋਲ ਮੁੱਦਿਆਂ ਦੀ ਇੰਨੀ ਕਮੀ ਹੈ ਕਿ ਉਸ ਨੇ ਹੁਣ ਸਾਡੇ ਵੱਡੇ ਨੇਤਾਵਾਂ ਦੀਆਂ ਫਰਜ਼ੀ ਵੀਡੀਓ ਬਣਾਈਆਂ ਹੋਈਆਂ ਹਨ। ‘ਡੀਪ ਫੇਕ’ ਦਾ ਸਹਾਰਾ ਲਿਆ ਜਾ ਰਿਹਾ ਹੈ।
ਸਵਾਲ : ਜੇ ਭਾਜਪਾ ਨੂੰ ਆਪਣੇ ’ਤੇ ਏਨਾ ਹੀ ਭਰੋਸਾ ਹੈ ਤਾਂ ਪਾਰਟੀ ’ਚ ਬਾਹਰਲੇ ਨੇਤਾਵਾਂ ਨੂੰ ਕਿਉਂ ਲਿਆਂਦਾ ਜਾ ਰਿਹਾ ਹੈ ? ਜਿਸ ਤਰ੍ਹਾਂ ਤੁਸੀਂ ਕੰਗਨਾ ਨੂੰ ਵੀ ਉਤਾਰਿਆ ਹੈ। ਕੀ ਪਾਰਟੀ ’ਚ ਕੋਈ ਹੋਰ ਨੇਤਾ ਨਹੀਂ ਹੈ?
ਜਵਾਬ : ਸਥਿਤੀ ਉਲਟ ਹੈ। ਕਾਂਗਰਸ ਕੋਲ ਨੇਤਾ ਨਹੀਂ ਹਨ ਪਰ ਸਾਡੇ ਕੋਲ ਨੇਤਾਵਾਂ ਦੀ ਬਹੁਤਾਤ ਹੈ। ਕਾਂਗਰਸ ਦੇ ਲੋਕ ਚੋਣ ਲੜਨ ਤੋਂ ਵੀ ਡਰਦੇ ਹਨ। ਹਾਂ, ਜਿੱਥੇ ਵੀ ਪਾਰਟੀ ਨੂੰ ਲੱਗਦਾ ਹੈ ਕਿ ਵੱਖ-ਵੱਖ ਵਿਸ਼ਿਆਂ ਦੇ ਮਾਹਿਰਾਂ ਨੂੰ ਮੌਕਾ ਦਿੱਤਾ ਜਾਣਾ ਚਾਹੀਦਾ ਹੈ, ਅਜਿਹੇ ਲੋਕਾਂ ਨੂੰ ਟਿਕਟਾਂ ਦਿੱਤੀਆਂ ਗਈਆਂ ਹਨ। ਚਾਹੇ ਉਹ ਕੰਗਨਾ ਹੋਵੇ ਜਾਂ ਕੋਈ ਹੋਰ।
ਸਵਾਲ : ਪਰ ਇਸ ਬਹਾਨੇ ਆਈ. ਪੀ. ਐੱਲ ਵਰਗੀ ਸਥਿਤੀ ਬਣ ਗਈ ਹੈ। ਇਹ ਸਪੱਸ਼ਟ ਨਹੀਂ ਹੈ ਕਿ ਕੌਣ ਕਿਸ ਪਾਰਟੀ ਨਾਲ ਸਬੰਧਤ ਹੈ ਅਤੇ ਕਿੱਥੇ ਹੈ। ਹਿਮਾਚਲ ’ਚ ਹੀ ਵੇਖੋ। ਕਾਂਗਰਸ ਦੇ ਵਿਧਾਇਕ ਹੁਣ ਭਾਜਪਾ ਦੀ ਟਿਕਟ 'ਤੇ 6 ਵਿਧਾਨ ਸਭਾ ਸੀਟਾਂ ’ਤੇ ਲੜ ਰਹੇ ਹਨ।
ਜਵਾਬ : ਕੁਝ ਲੋਕ ਆਪਣੀ ਹੀ ਪਾਰਟੀ ਤੋਂ ਅਸੰਤੁਸ਼ਟ ਸਨ। ਆਪਣੀ ਹੀ ਸਰਕਾਰ ’ਚ ਧੱਕੇਸ਼ਾਹੀਆਂ ਦਾ ਸ਼ਿਕਾਰ ਹੋਏ ਸਨ, ਜਦੋਂ ਕਿ ਉਹ ਲੋਕਾਂ ਦੇ ਆਗੂ ਸਨ ਪਰ ਉਨ੍ਹਾਂ ਦੇ ਆਗੂ ਉਨ੍ਹਾਂ ਨੂੰ ਬਰਦਾਸ਼ਤ ਨਹੀਂ ਕਰਦੇ ਸਨ। ਉਨ੍ਹਾਂ ਮਹਿਸੂਸ ਕੀਤਾ ਕਿ ਕਾਂਗਰਸ ਦੀ ਕਥਣੀ ਤੇ ਕਰਨੀ ’ਚ ਫਰਕ ਹੈ । ਕੋਈ ਵੀ ਚੋਣ ਵਾਅਦਾ ਪੂਰਾ ਨਹੀਂ ਹੋ ਰਿਹਾ, ਇਸ ਲਈ ਉਨ੍ਹਾਂ ਪਾਰਟੀ ਛੱਡਣ ਦਾ ਫੈਸਲਾ ਕੀਤਾ। ਸਾਡੀ ਪਾਰਟੀ ਨੇ ਉਨ੍ਹਾਂ ਨੂੰ ਮੌਕਾ ਦੇਣ ਦਾ ਫੈਸਲਾ ਕੀਤਾ। ਹੁਣ ਉਹ ਇੱਥੇ ਰਹਿ ਕੇ ਲੋਕਾਂ ਦੀ ਸੇਵਾ ਕਰਨਗੇ।
ਸਵਾਲ : ਅਨੁਰਾਗ ਜੀ, ਅਜੋਕੇ ਸਮੀਕਰਣ ਅਜਿਹੇ ਬਣ ਗਏ ਹਨ ਕਿ ਸੁਜਾਨਪੁਰ ’ਚ ਵਿਰੋਧੀ ਰਾਣਾ ਆ ਗਏ ਹਨ ਅਤੇ ਸਮਰਥਕ ਰਾਣਾ ਚਲੇ ਗਏ ਹਨ।
ਜਵਾਬ : ਪਾਰਟੀ ਦੇ ਸਿਧਾਂਤਾਂ ਨੂੰ ਮੰਨਣ ਵਾਲਾ ਹੀ ਪਾਰਟੀ ਦਾ ਹੈ। ਜਿੱਥੋਂ ਤੱਕ ਰਣਜੀਤ ਰਾਣਾ ਦਾ ਸਬੰਧ ਹੈ, ਉਹ ਪਿਛਲੀਆਂ ਚੋਣਾਂ ਬਹੁਤ ਘੱਟ ਫਰਕ ਨਾਲ ਹਾਰ ਗਏ ਸਨ। ਬਦਲੇ ਹੋਏ ਹਾਲਾਤਾਂ ’ਚ ਉਨ੍ਹਾਂ ਦੀ ਥਾਂ ਰਾਜਿੰਦਰ ਰਾਣਾ ਨੂੰ ਟਿਕਟ ਦਿੱਤੀ ਗਈ ਹੈ। ਇਸ ਤੋਂ ਦੁਖੀ ਰਣਜੀਤ ਰਾਣਾ ਨੇ ਪਾਰਟੀ ਛੱਡ ਦਿੱਤੀ। ਅਸੀਂ ਸਮਝਾਇਆ ਸੀ ਕਿ ਪਾਰਟੀ ਦੇ ਫੈਸਲੇ ਨੂੰ ਸਰਵਉੱਚ ਸਮਝ ਕੇ ਅੱਗੇ ਵਧਣਾ ਚਾਹੀਦਾ ਹੈ ਪਰ ਉਹ ਨਹੀਂ ਮੰਨੇ। ਉਸ ਤੋਂ ਬਾਅਦ ਸਾਡੇ ਨਾਲ ਹੋਰ ਕੋਈ ਗੱਲਬਾਤ ਨਹੀਂ ਹੋਈ।
ਸਵਾਲ : ਅੱਛਾ, ਤੁਸੀਂ ਇਨ੍ਹਾਂ ਨੂੰ ਖਰੀਦਣ ਲਈ ਕਿੰਨੇ ਪੈਸੇ ਦਿੱਤੇ ਹਨ? 15-15 ਕਰੋੜ ਰੁਪਏ ਦਿੱਤੇ ਜਾਣ ਦੀ ਚਰਚਾ ਹੈ।
ਜਵਾਬ : ਭਾਜਪਾ ਦੁਨੀਆ ਦੀ ਸਭ ਤੋਂ ਵੱਡੀ ਪਾਰਟੀ ਹੈ। ਸਾਨੂੰ ਕਿਸੇ ਨੂੰ ਪੈਸੇ ਦੇ ਕੇ ਲਿਆਉਣ ਦੀ ਲੋੜ ਨਹੀਂ ਹੈ। ਮੋਦੀ ਜੀ ਦਾ ਵਿਕਾਸ ਬੋਲ ਰਿਹਾ ਹੈ ਜੋ ਲੋਕਾਂ ਨੂੰ ਆਕਰਸ਼ਿਤ ਕਰ ਰਿਹਾ ਹੈ। ਵਿਰੋਧੀ ਧਿਰ ਦੇ ਆਗੂ ਦੇਸ਼ ਦੀਆਂ ਪਾਰਟੀਆਂ ਛੱਡ ਕੇ ਆ ਰਹੇ ਹਨ। ਇੱਥੇ ਵੀ ਅਜਿਹਾ ਹੀ ਹੋਇਆ ਹੈ। ਜਦੋਂ ਇਨ੍ਹਾਂ ਲੋਕਾਂ ਨੇ ਵੇਖਿਆ ਕਿ ਉਨ੍ਹਾਂ ਦੀ ਆਪਣੀ ਸਰਕਾਰ ਲਾਚਾਰ ਹੈ ਤੇ ਭਾਜਪਾ ’ਚ ਵਿਕਾਸ ਦੀ ਬਹਾਰ ਹੈ ਤਾਂ ਉਹ ਇੱਥੇ ਆ ਗਏ।
ਸਵਾਲ :ਜੈਰਾਮ ਠਾਕੁਰ ਕਹਿ ਰਹੇ ਹਨ ਕਿ 4 ਜੂਨ ਨੂੰ ਸੂਬਾ ਸਰਕਾਰ ਬਦਲ ਜਾਵੇਗੀ, ਕੀ ਅਜਿਹਾ ਹੋਵੇਗਾ?
ਜਵਾਬ : ਦੇਖੋ, ਮੌਜੂਦਾ ਗਣਿਤ ਮੁਤਾਬਕ ਕਾਂਗਰਸ ਕੋਲ 34 ਵਿਧਾਇਕ ਹਨ। ਭਾਜਪਾ ਕੋਲ 25 ਹਨ। ਫਿਲਹਾਲ 6 ਸੀਟਾਂ ’ਤੇ ਜ਼ਿਮਨੀ ਚੋਣ ਹੋ ਰਹੀ ਹੈ। ਜੇ ਭਾਜਪਾ ਇਹ ਸਾਰੀਆਂ ਸੀਟਾਂ ਜਿੱਤ ਜਾਂਦੀ ਹੈ ਤਾਂ ਗਿਣਤੀ 31 ਹੋ ਜਾਵੇਗੀ। ਅਜਿਹੀ ਸਥਿਤੀ ਵਿੱਚ ਵੀ ਇਹ ਸੰਭਵ ਨਹੀਂ ਹੈ। ਜੇ ਤਿੰਨ ਆਜ਼ਾਦ ਉਮੀਦਵਾਰਾਂ ਦੀਆਂ ਸੀਟਾਂ ’ਤੇ ਇੱਕੋ ਸਮੇਂ ਚੋਣਾਂ ਹੁੰਦੀਆਂ ਹਨ, ਜਾਂ ਜਦੋਂ ਵੀ ਅਜਿਹਾ ਹੁੰਦਾ ਹੈ, ਤਾਂ ਅਸੀਂ 34 ਬਣ ਜਾਵਾਂਗੇ ਤਾਂ ਸੁੱਖੂ ਦੀ ਸਰਕਾਰ ਚਲੀ ਜਾਵੇਗੀ।
ਮਾਲੇਰਕੋਟਲਾ ਪੁਲਸ ਹੱਥ ਲੱਗੀ ਵੱਡੀ ਸਫਲਤਾ: 20 ਕਿਲੋ ਅਫੀਮ ਤੇ 84.20 ਲੱਖ ਦੀ ਜਾਅਲੀ ਕਰੰਸੀ ਸਣੇ 5 ਕਾਬੂ
NEXT STORY 
