ਲਹਿਰਾਗਾਗਾ: ਕਾਂਗਰਸੀ ਆਗੂ ਦੁਰਲੱਭ ਸਿੰਘ ਨੇ ਲਹਿਰਾਗਾਗਾ ਵਿਚ ਹੋ ਰਹੀ ਗੰਦੇ ਪਾਣੀ ਦੀ ਸਪਲਾਈ ਨੂੰ ਲੈ ਕੇ ਪ੍ਰਸ਼ਾਸਨ ਅਤੇ ਸਰਕਾਰ 'ਤੇ ਤਿੱਖਾ ਹਮਲਾ ਬੋਲਿਆ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੇ 20 ਦਿਨਾਂ ਤੋਂ ਲਹਿਰਾਗਾਗਾ ਦੇ ਲੋਕਾਂ ਨੂੰ ਗੰਦਾ ਤੇ ਦੂਸ਼ਿਤ ਪਾਣੀ ਪੀਣ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ। ਪੀਣ ਵਾਲੇ ਪਾਣੀ ਵਿਚ ਸੀਵਰੇਜ ਦਾ ਪਾਣੀ ਮਿਲ ਰਿਹਾ ਹੈ, ਜਿਸ ਨਾਲ ਹਜ਼ਾਰਾਂ ਪਰਿਵਾਰਾਂ ਦੀ ਸਿਹਤ ਲਈ ਭਾਰੀ ਖ਼ਤਰਾ ਪੈਦਾ ਹੋ ਚੁੱਕਾ ਹੈ। ਬੱਚੇ, ਬਜ਼ੁਰਗ ਅਤੇ ਮਰੀਜ਼ ਸਭ ਤੋਂ ਵੱਧ ਪੀੜਤ ਹਨ।
ਇਹ ਖ਼ਬਰ ਵੀ ਪੜ੍ਹੋ - ਪੰਜਾਬ 'ਚ ਭਲਕੇ ਛੁੱਟੀ ਦਾ ਐਲਾਨ! ਸਕੂਲ-ਕਾਲਜ ਤੇ ਦਫ਼ਤਰ ਰਹਿਣਗੇ ਬੰਦ, ਜਾਣੋ ਵਜ੍ਹਾ
ਦੁਰਲੱਭ ਸਿੰਘ ਨੇ ਕਿਹਾ ਕਿ ਲੋਕਾਂ ਵੱਲੋਂ ਕਈ ਵਾਰ ਸ਼ਿਕਾਇਤ ਕਰਨ ਦੇ ਬਾਵਜੂਦ ਨਾ ਤਾਂ EO, ਨਾ ਕਮੇਟੀ ਪ੍ਰਧਾਨ ਤੇ ਨਾ ਹੀ ਚੁਣੇ ਹੋਏ ਕੌਂਸਲਰਾਂ ਵੱਲੋਂ ਕੋਈ ਢੁੱਕਵਾਂ ਕਦਮ ਚੁੱਕਿਆ ਗਿਆ ਹੈ। ਮਿਊਂਸਿਪਲ ਕਮੇਟੀ ਦਾ ਹਾਊਸ ਲੋਕਾਂ ਦੀ ਮੁਸੀਬਤ ਸੁਲਝਾਉਣ ਦੀ ਥਾਂ ਤੇ ਚੁੱਪ ਬੈਠਾ ਹੈ। ਇਹ ਚੁੱਪੀ ਦਰਅਸਲ ਬੇਪਰਵਾਹੀ ਤੇ ਸਾਥੀਦਾਰੀ ਹੈ। ਸਭ ਤੋਂ ਹੈਰਾਨੀਜਨਕ ਗੱਲ ਹੈ ਕਿ ਲੋਕਲ ਮੰਤਰੀ, ਸ਼੍ਰੀ ਬਰੀਂਦਰ ਗੋਯਲ, ਨੇ ਵੀ ਇਸ ਗੰਭੀਰ ਸਮੱਸਿਆ ਦੇ ਹੱਲ ਲਈ ਅਜੇ ਤੱਕ ਇੱਕ ਵੀ ਕਦਮ ਨਹੀਂ ਚੁੱਕਿਆ। ਮੰਤਰੀ ਤੇ ਪ੍ਰਸ਼ਾਸਨ ਇਸ ਤਰ੍ਹਾਂ ਵਰਤਾਅ ਕਰ ਰਹੇ ਹਨ ਜਿਵੇਂ ਲੋਕਾਂ ਦੀ ਪੀੜ੍ਹਾ ਦਾ ਉਨ੍ਹਾਂ ਲਈ ਕੋਈ ਅਰਥ ਹੀ ਨਹੀਂ।
ਕਾਂਗਰਸੀ ਆਗੂ ਨੇ ਕਿਹਾ ਕਿ ਜਦੋਂ ਲੋਕਾਂ ਨੂੰ ਸਾਫ ਪੀਣ ਵਾਲੇ ਪਾਣੀ ਦੀ ਲੋੜ ਹੈ, ਉਸੇ ਸਮੇਂ ਮਿਊਂਸਿਪਲ ਕਮੇਟੀ ਕਰੋੜਾਂ ਰੁਪਏ ਬੇਕਾਰ ਕੰਮਾਂ ’ਤੇ ਖਰਚ ਰਹੀ ਹੈ। ਪਾਣੀ ਸਪਲਾਈ ਤੇ ਸੀਵਰੇਜ ਠੀਕ ਕਰਨ ਦੀ ਥਾਂ ਤੇ, ਕਰੋੜਾਂ ਰੁਪਏ ਚਾਰਦੀਵਾਰੀ (ਬਾਊਂਡਰੀ ਵਾਲ) ਬਣਾਉਣ ’ਤੇ ਲੁਟਾ ਦਿੱਤੇ ਗਏ। ਸਿਰਫ ਲਹਿਰਾਗਾਗਾ ਵਿੱਚ ਹੀ ਦੋ ਚਾਰਦੀਵਾਰੀਆਂ ਬਣਾਈਆਂ ਗਈਆਂ — ਇੱਕ ਵਾਟਰ ਵਰਕਸ ਵਿੱਚ ਤੇ ਇੱਕ ਗੈਸਟ ਹਾਊਸ ਨੇੜੇ — ਜੋ ਲੋਕਾਂ ਲਈ ਕਿਸੇ ਕੰਮ ਦੀ ਨਹੀਂ। ਇਸੇ ਤਰ੍ਹਾਂ ਘੱਟ ਗੁਣਵੱਤਾ ਵਾਲੇ ਡਸਟਬਿਨਾਂ ’ਤੇ ਵੀ ਲੱਖਾਂ ਰੁਪਏ ਖਰਚੇ ਗਏ, ਜੋ ਕਿ ਕਿਸੇ ਅਮਲ ਵਿੱਚ ਨਹੀਂ ਆ ਰਹੇ। ਲੋਕ ਸਵਾਲ ਪੁੱਛ ਰਹੇ ਹਨ: ਜੇ ਕਰੋੜਾਂ ਰੁਪਏ ਬੇਕਾਰ ਤੇ ਦਿਖਾਵਟੀ ਕੰਮਾਂ ’ਤੇ ਖਰਚ ਹੋ ਸਕਦੇ ਹਨ ਤਾਂ ਇਹੀ ਪੈਸਾ ਸਾਫ ਪਾਣੀ, ਢੰਗ ਦਾ ਸੀਵਰੇਜ, ਸਫਾਈ ਤੇ ਲੋਕਾਂ ਦੀ ਸਿਹਤ ਲਈ ਕਿਉਂ ਨਹੀਂ ਵਰਤਿਆ ਜਾ ਸਕਦਾ?
ਇਹ ਖ਼ਬਰ ਵੀ ਪੜ੍ਹੋ - ਪੰਜਾਬ: ਮੁਲਾਜ਼ਮ 24 ਘੰਟੇ ਰਹਿਣਗੇ On Duty! ਜਾਰੀ ਹੋ ਗਏ ਨਵੇਂ ਨਿਰਦੇਸ਼
ਦੁਰਲੱਭ ਸਿੰਘ ਨੇ ਕਿਹਾ ਕਿ ਪੀਣ ਵਾਲਾ ਪਾਣੀ ਜ਼ਿੰਦਗੀ ਦੀ ਸਭ ਤੋਂ ਮੁੱਖ ਲੋੜ ਹੈ। ਲੋਕਾਂ ਨੂੰ ਇਹ ਨਾ ਦੇਣਾ ਤੇ ਪੈਸਾ ਬੇਕਾਰ ਗਵਾਉਣਾ, ਸਿਰਫ ਲਾਪਰਵਾਹੀ ਨਹੀਂ ਬਲਕਿ ਜਨਤਾ ਦੇ ਭਰੋਸੇ ਨਾਲ ਧੋਖਾਧੜੀ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਤੁਰੰਤ ਕਾਰਵਾਈ ਕਰਕੇ ਪੀਣ ਵਾਲੇ ਪਾਣੀ ਵਿਚੋਂ ਸੀਵਰੇਜ ਦਾ ਪਾਣੀ ਮਿਲਣ ਤੋਂ ਰੋਕਿਆ ਜਾਵੇ, ਮਿਊਂਸਿਪਲ ਕਮੇਟੀ ਹੁਣ ਤੱਕ ਕੀ ਕੀਤਾ ਹੈ? ਇਸ ਦੀ ਪੂਰੀ ਜਾਣਕਾਰੀ ਜਨਤਾ ਦੇ ਸਾਹਮਣੇ ਰੱਖੀ ਜਾਵੇ, EO, ਕਮੇਟੀ ਪ੍ਰਧਾਨ ਤੇ ਸਾਰੇ ਜ਼ਿੰਮੇਵਾਰ ਅਧਿਕਾਰੀਆਂ ਤੋਂ ਜਵਾਬਦੇਹੀ ਲਈ ਜਾਵੇ, ਚਾਰਦੀਵਾਰੀ ਤੇ ਘੱਟ ਗੁਣਵੱਤਾ ਵਾਲੇ ਡਸਟਬਿਨਾਂ ’ਤੇ ਹੋ ਰਹੇ ਬੇਕਾਰ ਖਰਚੇ ਰੋਕ ਕੇ ਇਹ ਰਕਮ ਬੁਨਿਆਦੀ ਸੁਵਿਧਾਵਾਂ ਜਿਵੇਂ ਸਾਫ ਪਾਣੀ, ਸੀਵਰੇਜ, ਸਫਾਈ ਤੇ ਸਿਹਤ ’ਤੇ ਲਗਾਈ ਜਾਵੇ ਅਤੇ ਭਵਿੱਖ ਵਿਚ ਇਹੋ ਜਿਹੀ ਲਾਪਰਵਾਹੀ ਮੁੜ ਨਾ ਹੋਵੇ, ਇਸ ਲਈ ਪੱਕਾ ਹੱਲ ਕੀਤਾ ਜਾਵੇ। ਉਨ੍ਹਾਂ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਲਹਿਰਾਗਾਗਾ ਦੇ ਲੋਕ ਹੁਣ ਹੋਰ ਚੁੱਪ ਨਹੀਂ ਰਹਿਣਗੇ ਤੇ ਜੇ ਸਰਕਾਰ ਤੇ ਮਿਊਂਸਿਪਲ ਕਮੇਟੀ ਨੇ ਤੁਰੰਤ ਕਾਰਵਾਈ ਨਾ ਕੀਤੀ ਤਾਂ ਲੋਕਾਂ ਨੂੰ ਮਜਬੂਰ ਹੋ ਕੇ ਸੜਕਾਂ ’ਤੇ ਉਤਰਨਾ ਪਵੇਗਾ।
ਨੋਟ - ਇਸ ਖ਼ਬਰ ਬਾਰੇ ਕੁਮੈਂਟ ਬਾਕਸ ਵਿਚ ਦਿਓ ਆਪਣੀ ਰਾਏ।
ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਪੰਜਾਬ ਨੂੰ ਦਹਿਲਾਉਣ ਦੀ ਸਾਜ਼ਿਸ਼ ਨਾਕਾਮ! ਇਸ ਇਲਾਕੇ 'ਚੋਂ ਮਿਲੇ ਗ੍ਰਨੇਡ
NEXT STORY 
