ਖਰੜ, (ਗਗਨਦੀਪ)- ਪੰਜਾਬ ਸਰਕਾਰ ਦੇ ਲੋਕ ਨਿਰਮਾਣ ਤੇ ਬੀ. ਐਂਡ ਆਰ. ਵਿਭਾਗ ਵਲੋਂ ਐੱਸ. ਡੀ. ਐੱਮ. ਖਰੜ ਦੀ ਇਮਾਰਤ ਕਈ ਸਾਲ ਪਹਿਲਾਂ ਲੱਖਾਂ ਰੁਪਏ ਖਰਚ ਕੇ ਤਿਆਰ ਕੀਤੀ ਗਈ ਸੀ ਪਰ ਇਸ ਸਮੇਂ ਇਮਾਰਤ ਦੇ ਨਾਲ-ਨਾਲ ਕਮਰਿਆਂ ਦੀਆਂ ਕੰਧਾਂ ਵਿਚ ਤਰੇੜਾਂ ਪੈ ਚੁੱਕੀਆਂ ਹਨ ਤੇ ਫਰਸ਼ 'ਤੇ ਲੱਗੀਆਂ ਟਾਈਲਾਂ ਵੀ ਥਾਂ-ਥਾਂ ਤੋਂ ਉੱਖੜ ਚੁੱਕੀਆਂ ਹਨ।
ਜਾਣਕਾਰੀ ਅਨੁਸਾਰ ਐੱਸ. ਡੀ. ਐੱਮ. ਖਰੜ ਦੇ ਦਫਤਰ ਦੀ ਇਸ ਇਮਾਰਤ ਵਿਚ ਐੱਸ. ਡੀ. ਐੱਮ. ਦਾ ਰੂਮ, ਰਿਟਾਇਰਿੰਗ ਕਮਰਾ, ਮੀਟਿੰਗ ਹਾਲ, ਅਦਾਲਤੀ ਕਮਰਾ, ਰੀਡਰ, ਲੈਂਡ ਰਿਕਾਰਡ ਸਮੇਤ ਹੋਰ ਕਮਰੇ, ਗੈਲਰੀਆਂ, ਸੇਵਾ ਕੇਂਦਰ ਹਨ। ਉਨ੍ਹਾਂ ਵਿਚੋਂ ਕਈ ਥਾਵਾਂ 'ਤੇ ਫਰਸ਼ੀ ਟਾਈਲਾਂ ਉੱਖੜ ਚੁੱਕੀਆਂ ਹਨ ਤੇ ਕਮਰਿਆਂ ਦੀਆਂ ਕੰਧਾਂ ਵਿਚ ਵੀ ਕਈ ਥਾਵਾਂ 'ਤੇ ਤਰੇੜਾਂ ਆ ਚੁੱਕੀਆਂ ਹਨ। ਐੱਸ. ਡੀ. ਐੱਮ. ਦਫਤਰ ਤੋਂ ਇਲਾਵਾ ਕੰਪਲੈਕਸ, ਰਿਹਾਇਸ਼ੀ ਕੰਪਲੈਕਸ ਵਿਚ ਬਰਸਾਤੀ ਪਾਣੀ ਦੇ ਨਿਕਾਸ ਦਾ ਕੋਈ ਪ੍ਰਬੰਧ ਨਹੀਂ ਹੈ ਤੇ ਥੋੜ੍ਹਾ ਜਿਹਾ ਮੀਂਹ ਪੈਣ ਨਾਲ ਸੜਕ 'ਤੇ ਪਾਣੀ ਖੜ੍ਹਾ ਹੋ ਜਾਂਦਾ ਹੈ ਤੇ ਬੀਮਾਰੀ ਫੈਲਣ ਦਾ ਖਦਸ਼ਾ ਵੀ ਬਣਿਆ ਰਹਿੰਦਾ ਹੈ। ਰਿਹਾਇਸ਼ੀ ਕੰਪਲੈਕਸ ਵਿਚ ਐੱਸ. ਡੀ. ਐੱਮ., ਚਾਰ ਜੱਜਾਂ, ਡੀ. ਐੱਸ. ਪੀ. ਦਾ ਦਫਤਰ ਤੇ ਸਰਕਾਰੀ ਰਿਹਾਇਸ਼ ਹੈ, ਜਿਥੇ ਕਿ ਪਾਣੀ ਜਮ੍ਹਾ ਹੋਣ ਕਾਰਨ ਆਉਣਾ-ਜਾਣਾ ਮੁਸ਼ਕਿਲ ਹੋ ਜਾਂਦਾ ਹੈ। ਇਸ ਤੋਂ ਇਲਾਵਾ ਆਵਾਰਾ ਕੁੱਤੇ, ਆਵਾਰਾ ਪਸ਼ੂ ਆਮ ਘੁੰਮਦੇ ਰਹਿੰਦੇ ਹਨ, ਜਿਸ ਕਾਰਨ ਰਿਹਾਇਸ਼ੀ ਕੰਪਲੈਕਸ ਵਿਚ ਬਣੇ ਪਾਰਕ ਦੀ ਵੀ ਹਾਲਤ ਤਰਸਯੋਗ ਬਣੀ ਪਈ ਹੈ।
ਇਸ ਵਿਚ ਪਾਰਕਿੰਗ ਦਾ ਕੋਈ ਪ੍ਰਬੰਧ ਨਹੀਂ, ਬਲਕਿ ਅਦਾਲਤ, ਐੱਸ. ਡੀ. ਐੱਮ. ਦਫਤਰ ਵਿਚ ਕੰਮ ਕਰਵਾਉਣ ਲਈ ਆਉਣ-ਜਾਣ ਵਾਲੇ ਲੋਕ ਆਪਣੇ ਵਾਹਨ ਸੜਕਾਂ 'ਤੇ ਹੀ ਖੜ੍ਹੇ ਕਰ ਦਿੰਦੇ ਹਨ। ਐੱਸ. ਡੀ. ਐੱਮ. ਦਫ਼ਤਰ, ਖਜ਼ਾਨਾ ਦਫਤਰ, ਡੀ. ਐੱਸ. ਪੀ. ਦਫਤਰ ਤੇ ਰਿਹਾਇਸ਼ੀ ਕੋਠੀਆਂ ਦੇ ਨਾਲ ਮੀਂਹ ਦਾ ਪਾਣੀ ਭਰ ਜਾਂਦਾ ਹੈ ਤੇ ਇਸਦੀ ਕਦੇ ਵੀ ਸਬੰਧਿਤ ਵਿਭਾਗ ਵਲੋਂ ਸਫਾਈ ਨਹੀਂ ਕਰਵਾਈ ਜਾਂਦੀ ਤੇ ਇਸ ਟੋਭੇ ਵਿਚ ਜ਼ਹਿਰੀਲੇ ਸੱਪ ਅਤੇ ਹੋਰ ਕੀੜੇ-ਮਕੌੜੇ ਇਕੱਠੇ ਹੋ ਰਹੇ ਹਨ।
ਇਸ ਸਬੰਧੀ ਜਦੋਂ ਜ਼ਿਲਾ ਮੋਹਾਲੀ ਦੇ ਲੋਕ ਨਿਰਮਾਣ ਵਿਭਾਗ ਅਤੇ ਬੀ. ਐਂਡ ਆਰ. ਦੇ ਐਕਸੀਅਨ ਇੰਦਰਜੀਤ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਵਿਭਾਗ ਦੇ ਸਬੰਧਿਤ ਜੇ. ਈ. ਨੂੰ ਭੇਜ ਕੇ ਐੱਸ. ਡੀ. ਐੱਮ. ਦਫਤਰ ਦੀ ਇਮਾਰਤ ਵਿਚ ਫਰਸ਼ੀ ਟਾਈਲਾਂ ਤੇ ਹੋਰ ਕੰਮਾਂ ਦਾ ਜਾਇਜ਼ਾ ਲਿਆ ਜਾਵੇਗਾ ਤੇ ਜੋ ਵੀ ਖਾਮੀਆਂ ਆ ਰਹੀਆਂ ਹਨ, ਉਹ ਜਲਦ ਹੀ ਦੂਰ ਕਰਵਾ ਦਿੱਤੀਆਂ ਜਾਣਗੀਆਂ। ਗੰਦੇ ਪਾਣੀ ਦਾ ਨਿਕਾਸ ਨਾ ਹੋਣ ਸਬੰਧੀ ਉਨ੍ਹਾਂ ਕਿਹਾ ਕਿ ਇਹ ਕੰਮ ਵਾਟਰ ਸਪਲਾਈ ਤੇ ਸੀਵਰੇਜ ਬੋਰਡ ਵਲੋਂ ਕੀਤਾ ਜਾਣਾ ਹੈ।
ਸ਼ਿਵਾਲਿਕ ਸਿਟੀ ਫਾਇਰਿੰਗ ਮਾਮਲੇ 'ਚ ਇਕ ਕਾਬੂ
NEXT STORY 
