ਜਲੰਧਰ(ਬਹਿਲ, ਸੋਮਨਾਥ)- ਸਿੱਖ ਫਾਰ ਜਸਟਿਸ ਵਲੋਂ 12 ਅਗਸਤ ਨੂੰ ਯੂ. ਕੇ. ਸਥਿਤ ਤਰਫਲਗਰ ਸਕਵੇਅਰ ਵਿਚ ਸਿੱਖ ਰੈਫਰੈਂਡਮ 2020 ਰੈਲੀ ਕੀਤੀ ਜਾ ਰਹੀ ਹੈ। ਇਸ ਰੈਲੀ ਨੂੰ ਲੈ ਕੇ ਬੀਤੇ ਦਿਨੀਂ ਲੰਡਨ ਵਿਚ ਸਿੱਖ ਫਾਰ ਜਸਟਿਸ ਵਲੋਂ ਪ੍ਰੈੱਸ ਕਾਨਫਰੰਸ ਕੀਤੀ ਗਈ। ਇਸ ਪ੍ਰੈੱਸ ਕਾਨਫਰੰਸ ਵਿਚ ਓਵਰਸੀਜ਼ ਪਾਕਿਸਤਾਨੀ ਵੈਲਫੇਅਰ ਕੌਂਸਲ, ਵਰਲਡ ਕਸ਼ਮੀਰ ਫਰੀਡਮ ਮੂਵਮੈਂਟ ਕਸ਼ਮੀਰ, ਪੈਟਰੋਇਟਿਕ ਫੋਰਮ ਇੰਟਰਨੈਸ਼ਨਲ ਦੇ ਨੇਤਾਵਾਂ ਦੇ ਨਾਲ ਖਾਲਿਸਤਾਨੀ ਅੱਤਵਾਦੀ ਪਰਮਜੀਤ ਸਿੰਘ ਪੰਮਾ ਵੀ ਸਾਹਮਣੇ ਆਇਆ ਹੈ। ਪਰਮਜੀਤ ਸਿੰਘ ਪੰਮਾ ਐੱਨ. ਆਈ. ਏ. ਨੂੰ ਪਟਿਆਲਾ ਤੇ ਅੰਬਾਲਾ ਵਿਚ ਦੋਹਰੇ ਬੰਬ ਬਲਾਸਟ ਕੇਸ ਵਿਚ ਵਾਂਟੇਡ ਹੈ। ਪੰਮਾ 2009 ਵਿਚ ਆਰ. ਐੱਸ. ਐੱਸ. ਦੇ ਵਿੰਗ ਰਾਸ਼ਟਰੀ ਸਿੱਖ ਸੰਗਤ ਦੇ ਮੁਖੀ ਰੁਲਦਾ ਸਿੰਘ ਦੀ ਹੱਤਿਆ ਦੇ ਮਾਮਲੇ ਵਿਚ ਵੀ ਲੋੜੀਦਾ ਹੈ।
ਖਾਲਿਸਤਾਨੀ ਟਾਈਗਰ ਫੋਰਸ ਦੀਆਂ ਸਰਗਰਮੀਆਂ ਦਾ ਸੰਚਾਲਕ ਹੈ ਪੰਮਾ
ਖਾਲਿਸਤਾਨੀ ਅੱਤਵਾਦੀ ਵਧਵਾ ਸਿੰਘ ਦੇ ਸਹਿਯੋਗੀ ਪਰਮਜੀਤ ਸਿੰਘ ਪੰਮਾ ਨੇ ਬਾਅਦ ਵਿਚ ਖਾਲਿਸਤਾਨ ਟਾਈਗਰ ਫੋਰਸ ਦੇ ਮੁਖੀ ਜਗਤਾਰ ਸਿੰਘ ਤਾਰਾ ਨਾਲ ਹੱਥ ਮਿਲਾ ਲਿਆ ਸੀ। ਤਾਰਾ ਦੀ ਥਾਈਲੈਂਡ ਵਿਚ ਗ੍ਰਿਫਤਾਰੀ ਤੋਂ ਬਾਅਦ ਪੰਮਾ ਖਾਲਿਸਤਾਨ ਟਾਈਗਰ ਫੋਰਸ ਦੀਆਂ ਸਰਗਰਮੀਆਂ ਦਾ ਮੁੱਖ ਸੰਚਾਲਕ ਬਣ ਗਿਆ ਸੀ। ਬਾਅਦ ਵਿਚ ਪੰਮਾ ਪਾਕਿਸਤਾਨ ਚਲਾ ਗਿਆ ਸੀ ਅਤੇ ਉਥੋਂ ਸੰਨ 2000 ਵਿਚ ਉਸ ਨੇ ਯੂ. ਕੇ. ਵਿਚ ਸਿਆਸੀ ਪਨਾਅ ਲੈ ਲਈ ਸੀ। ਪਟਿਆਲਾ ਤੇ ਅੰਬਾਲਾ ਵਿਚ ਹੋਏ ਬੰਬ ਧਮਾਕਿਆਂ ਤੋਂ ਬਾਅਦ ਉਸ ਦਾ ਨਾਂ ਰੁਲਦਾ ਸਿੰਘ ਮਰਡਰ ਕੇਸ ਵਿਚ ਸਾਹਮਣੇ ਆਇਆ ਸੀ। ਰੁਲਦਾ ਸਿੰਘ ਮਰਡਰ ਕੇਸ ਵਿਚ ਉਸ ਦੀ ਯੂ. ਕੇ. ਵਿਚ ਇਕ ਵਾਰ ਗ੍ਰਿਫਤਾਰੀ ਹੋ ਚੁੱਕੀ ਹੈ। ਉਸ ਤੋਂ ਬਾਅਦ ਬ੍ਰਿਟਿਸ਼ ਪੁਲਸ ਦੀ ਇਕ ਟੀਮ ਰੁਲਦਾ ਸਿੰਘ ਮਰਡਰ ਕੇਸ ਵਿਚ ਜਾਂਚ ਕਰਨ ਪਟਿਆਲਾ ਆਈ ਸੀ ਪਰ ਕੋਈ ਅਹਿਮ ਤੱਥ ਨਾ ਮਿਲਣ ਤੋਂ ਬਾਅਦ ਪੰਮਾ ਨੂੰ ਯੂ. ਕੇ. ਪੁਲਸ ਨੇ ਛੱਡ ਦਿੱਤਾ ਸੀ। ਓਧਰ ਇੰਟਰਪੋਲ ਵਲੋਂ ਪੰਮਾ ਦੇ ਵਿਰੁੱਧ ਰੈੱਡ ਕਾਰਨਰ ਨੋਟਿਸ ਜਾਰੀ ਹੋਣ ਕਾਰਨ ਉਸ ਨੂੰ ਪੁਰਤਗਾਲ ਵਿਚ ਵੀ ਗ੍ਰਿਫਤਾਰ ਕੀਤਾ ਗਿਆ ਸੀ ਪਰ ਭਾਰਤ ਸਰਕਾਰ ਵਲੋਂ ਸਮੇਂ ਸਿਰ ਕੋਈ ਦਸਤਾਵੇਜ਼ ਮੁਹੱਈਆ ਨਾ ਕਰਵਾਏ ਜਾਣ 'ਤੇ ਪੁਰਤਗਾਲ ਪੁਲਸ ਨੇ ਉਸ ਨੂੰ ਰਿਹਾਅ ਕਰ ਦਿੱਤਾ ਸੀ ਤੇ ਹੁਣ ਪੰਮਾ ਯੂ. ਕੇ. ਵਿਚ ਰਹਿ ਰਿਹਾ ਹੈ।
ਪ੍ਰੈੱਸ ਕਾਨਫਰੰਸ ਵਿਚ ਕੀ ਕਿਹਾ ਪੰਮੇ ਨੇ
ਸੋਸ਼ਲ ਮੀਡੀਆ 'ਤੇ ਸਿੱਖ ਫਾਰ ਜਸਟਿਸ ਦੀ ਵਾਇਰਲ ਪ੍ਰੈੱਸ ਕਾਨਫਰੰਸ ਵਿਚ ਪਾਕਿਸਤਾਨੀ ਅਤੇ ਕਸ਼ਮੀਰੀ ਨੇਤਾਵਾਂ ਦੇ ਨਾਲ ਪਰਮਜੀਤ ਸਿੰਘ ਪੰਮੇ ਨੇ ਕਿਹਾ ਕਿ ਸਿੱਖ ਰੈਫਰੈਂਡਮ ਦੇ ਦੋ ਮੁੱਦੇ ਹਨ। ਪਹਿਲਾ ਉਨ੍ਹਾਂ ਦਾ ਰੈਫਰੈਂਡਮ ਕਰਨ ਦਾ ਉਦੇਸ਼ ਦੁਨੀਆ ਭਰ ਨੂੰ ਦੱਸਣਾ ਹੈ ਕਿ ਪੰਜਾਬ ਤੇ ਕਸ਼ਮੀਰ ਦੀਆਂ ਦੋ ਮੁੱਖ ਕੌਮਾਂ ਸਿੱਖ ਤੇ ਮੁਸਲਮਾਨ ਕੌਮ 'ਤੇ ਕਿਵੇਂ ਭਾਰਤ ਸਰਕਾਰ ਨੇ ਕਹਿਰ ਢਾਹਿਆ ਹੈ। ਦੂਸਰਾ ਤਰਫਲਗਾਰ ਵਿਚ ਅਸੀਂ ਰੈਫਰੈਂਡਮ ਕਰ ਕੇ ਦੁਨੀਆ ਨੂੰ ਦੱਸਣਾ ਚਾਹੁੰਦੇ ਹਾਂ ਕਿ ਅਸੀਂ ਜਮਹੂਰੀ ਢੰਗ ਨਾਲ ਭਾਰਤ ਸਰਕਾਰ ਤੋਂ ਪੰਜਾਬ ਨੂੰ ਆਜ਼ਾਦ ਕਰਵਾਉਣਾ ਚਾਹੁੰਦੇ ਹਾਂ। ਉਸ ਦੇ ਲਈ 12 ਅਗਸਤ ਨੂੰ ਇਹ ਰੈਲੀ ਰੱਖੀ ਗਈ ਹੈ। ਇਸ ਦੇ ਲਈ ਕਸ਼ਮੀਰੀ ਭਰਾਵਾਂ ਨੇ ਵੀ ਸਾਨੂੰ ਸਹਿਯੋਗ ਦਿੱਤਾ ਹੈ।
ਨਈਮ ਨੇ ਦਿੱਤਾ 'ਦਬੰਗ ਪੈਗਾਮ'
ਪ੍ਰੈੱਸ ਕਾਨਫਰੰਸ ਵਿਚ ਓਵਰਸੀਜ਼ ਪਾਕਿਸਤਾਨੀ ਵੈਲਫੇਅਰ ਕੌਂਸਲ ਦੇ ਨਈਮ ਨੇ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਸਾਡੀ ਕਸ਼ਮੀਰੀ ਕਮਿਊਨਿਟੀ ਸਿੱਖ ਫਾਰ ਜਸਟਿਸ ਦੇ ਸਿੱਖ ਰੈਫਰੈਂਡਮ ਵਿਚ ਪੂਰੀ ਤਰ੍ਹਾਂ ਇਨ੍ਹਾਂ ਦੇ ਨਾਲ ਹੈ ਅਤੇ ਇਸ ਮਿਸ਼ਨ ਵਿਚ ਪੂਰਾ ਸਾਥ ਦਿੱਤਾ ਜਾਵੇਗਾ। ਨਈਮ ਨੇ ਕਿਹਾ ਕਿ ਅਸੀਂ ਮਿਲ ਕੇ ਖਾਲਿਸਤਾਨ ਫਰੀਡਮ ਮੂਵਮੈਂਟ ਚਲਾਵਾਂਗੇ ਅਤੇ ਭਾਰਤ ਸਰਕਾਰ ਨੂੰ ਇਹ ਸਾਡਾ ਦਬੰਗ ਪੈਗਾਮ ਹੈ। ਸਾਨੂੰ ਇਹ ਫੈਸਲਾ ਪਹਿਲਾਂ ਮਿਲ ਕੇ ਕਰਨਾ ਚਾਹੀਦਾ ਸੀ ਫਿਰ ਵੀ ਅਸੀਂ ਸਾਰੇ ਮਿਲ ਕੇ ਇਕ-ਦੂਸਰੇ ਨੂੰ ਹੋਰ ਮਜ਼ਬੂਤ ਕਰਾਂਗੇ। ਪ੍ਰੈੱਸ ਕਾਨਫਰੰਸ ਨੂੰ ਚੌਧਰੀ ਗੁਲਾਮ ਰੱਬਾਨੀ ਨੇ ਵੀ ਸੰਬੋਧਨ ਕਰਦੇ ਹੋਏ ਪੰਜਾਬ ਤੇ ਕਸ਼ਮੀਰ ਦੀ ਆਜ਼ਾਦੀ ਦਾ ਮੁੱਦਾ ਉਠਾਇਆ।
ਕਸ਼ਮੀਰੀ ਤੇ ਖਾਲਿਸਤਾਨੀ ਅੱਤਵਾਦੀ ਗੱਠਜੋੜ ਬਣ ਸਕਦਾ ਹੈ ਵੱਡਾ ਖਤਰਾ
ਖੁਫੀਆ ਏਜੰਸੀਆਂ ਦਾ ਕਹਿਣਾ ਹੈ ਕਿ ਜਿਸ ਤਰ੍ਹਾਂ ਇਹ ਅੱਤਵਾਦੀ ਖੁਲ੍ਹੇਆਮ ਕੰਮ ਕਰ ਰਹੇ ਹਨ, ਆਉਣ ਵਾਲੇ ਦਿਨਾਂ ਵਿਚ ਇਹ ਇਕ ਵੱਡਾ ਖਤਰਾ ਬਣ ਸਕਦੇ ਹਨ ਹਾਲਾਂਕਿ ਖਾਲਿਸਤਾਨੀ ਅਤੇ ਕਸ਼ਮੀਰੀ ਅੱਤਵਾਦੀ ਕਾਫੀ ਸਮੇਂ ਤੋਂ ਨਾਲ ਮਿਲ ਕੇ ਕੰਮ ਕਰਨ ਦੀ ਯੋਜਨਾ ਬਣਾ ਰਹੇ ਹਨ ਪਰ ਅਜੇ ਤਕ ਇਸ ਵਿਚ ਇਨ੍ਹਾਂ ਨੂੰ ਕੋਈ ਵੱਡੀ ਸਫਲਤਾ ਨਹੀਂ ਮਿਲੀ ਹੈ। ਪਰ ਜਿਸ ਤਰ੍ਹਾਂ ਇਹ ਮਿਲ ਕੇ ਸਾਹਮਣੇ ਆਏ ਹਨ, ਆਉਣ ਵਾਲੇ ਦਿਨਾਂ ਵਿਚ ਇਹ ਦੋਹਾਂ ਸੂਬਿਆਂ ਵਿਚ ਅੱਤਵਾਦੀ ਹਮਲੇ ਕਰ ਸਕਦੇ ਹਨ ਕਿਉਂਕਿ ਦੋਵਾਂ ਦਾ ਦੁਸ਼ਮਣ ਇਕ ਹੈ।
ਪੰਚਾਇਤੀ ਰਾਜ ਚੋਣਾਂ : ਪੰਜਾਬ 'ਚ ਪਹਿਲੇ ਪੜਾਅ 'ਚ ਜ਼ਿਲਾ ਪ੍ਰੀਸ਼ਦ ਅਤੇ ਪੰਚਾਇਤ ਕਮੇਟੀਆਂ ਅਤੇ ਦੂਜੇ ਪੜਾਅ 'ਚ ਹੋਣਗੀਆਂ ਪੰਚਾਇਤੀ ਚੋਣਾਂ
NEXT STORY 
