ਅੰਮ੍ਰਿਤਸਰ, (ਰਮਨ)- ਨਗਰ ਨਿਗਮ ਦੇ ਐੱਮ. ਟੀ. ਪੀ. ਵਿਭਾਗ ਦੀਆਂ ਮਨਮਰਜ਼ੀਆਂ ਕਾਰਨ ਹਮੇਸ਼ਾ ਹੀ ਕਾਰਵਾਈ ਕਾਗਜ਼ਾਂ ਤੱਕ ਰਹੀ ਸੀਮਤ ਹੈ। ਨਤੀਜਾ ਅਧਿਕਾਰੀ ਬੇਲਗਾਮ ਹੋ ਗਏ। ਹਮੇਸ਼ਾ ਹੀ ਨਿਗਮ ਦੇ ਹਾਊਸ ਜਾਂ ਬਜਟ ਦੀ ਮੀਟਿੰਗ 'ਚ ਗੈਰ-ਕਾਨੂੰਨੀ ਬਿਲਡਿੰਗਾਂ ਕੌਂਸਲਰਾਂ ਦੇ ਨਿਸ਼ਾਨੇ 'ਤੇ ਰਹੀਆਂ ਹਨ ਪਰ ਅੱਜ ਤੱਕ ਚੋਣਵੀਆਂ ਥਾਵਾਂ 'ਤੇ ਕਾਰਵਾਈ ਕਰਨਾ ਵਿਭਾਗ ਦੀ ਕਾਰਜਪ੍ਰਣਾਲੀ 'ਤੇ ਸਵਾਲੀਆ ਨਿਸ਼ਾਨ ਖੜ੍ਹਾ ਕਰਦੀ ਹੈ। ਲੋਕਾਂ ਨੇ ਸ਼ਹਿਰ 'ਚ ਵਿਰਾਸਤੀ ਇਮਾਰਤਾਂ ਨਾਲ ਵੀ ਛੇੜਛਾੜ ਤੋਂ ਗੁਰੇਜ਼ ਨਹੀਂ ਕੀਤਾ, ਜਿਸ ਦੇ ਨਤੀਜੇ ਵਜੋਂ ਸ਼ਹਿਰ ਦੀ ਵਿਰਾਸਤੀ ਚਾਰਦੀਵਾਰੀ 'ਚ ਤੇ ਕਈਆਂ ਨੇ ਸਾਲਾਂ ਪੁਰਾਣੀਆਂ ਇਮਾਰਤਾਂ ਨਾਲ ਛੇੜਛਾੜ ਕਰ ਕੇ ਦੁਕਾਨਾਂ ਬਣਾ ਲਈਆਂ ਤੇ ਆਪਣੀਆਂ ਜੇਬਾਂ ਭਰਨ 'ਚ ਲੱਗੇ ਹੋਏ ਹਨ। ਇਹ ਸਾਰਾ ਕੰਮ ਅਧਿਕਾਰੀਆਂ ਦੀ ਮਿਲੀਭੁਗਤ ਨਾਲ ਹੋ ਰਿਹਾ ਹੈ।
ਵਿਭਾਗੀ ਅਧਿਕਾਰੀ ਖਾਨਾਪੂਰਤੀ ਲਈ ਨੋਟਿਸ ਕੱਢ ਦਿੰਦੇ ਹਨ ਤਾਂ ਕਿ ਜਦੋਂ ਉਨ੍ਹਾਂ ਦੀ ਜਬਾਵਦੇਹੀ ਹੋਵੇ ਤਾਂ ਉਹ ਬਚ ਨਿਕਲਣ, ਜਿਸ ਨਾਲ ਸਾਰੇ ਸ਼ਹਿਰ 'ਚ ਧੜੱਲੇ ਨਾਲ ਗੈਰ-ਕਾਨੂੰਨੀ ਉਸਾਰੀਆਂ ਹੋ ਰਹੀਆਂ ਹਨ। ਸ਼ਹਿਰ ਦੇ ਬੱਸ ਸਟੈਂਡ ਤਹਿਸੀਲਪੁਰਾ, ਰਾਮਬਾਗ, ਲਾਹੌਰੀ ਗੇਟ ਆਦਿ ਇਲਾਕਿਆਂ 'ਚ ਲੋਕਾਂ ਵੱਲੋਂ ਗੈਰ-ਕਾਨੂੰਨੀ ਤਰੀਕੇ ਨਾਲ ਉਸਾਰੀ ਕਰ ਕੇ ਦੁਕਾਨਾਂ ਬਣਾਈਆਂ ਗਈਆਂ ਹਨ, ਜਿਸ 'ਤੇ ਵਿਭਾਗ ਕੋਈ ਕਾਰਵਾਈ ਨਹੀਂ ਕਰਦਾ। ਰਾਜਨੀਤਕ ਸ਼ਹਿ 'ਤੇ ਵਿਭਾਗ 'ਚ ਚੱਲ ਰਹੀ ਤਾਲਮੇਲ ਦਾ ਅੰਦਾਜ਼ਾ ਇਸ ਗੱਲ ਤੋਂ ਹੀ ਲਾਇਆ ਜਾ ਸਕਦਾ ਹੈ ਕਿ ਇੰਸਪੈਕਟਰ ਹੀ ਨਹੀਂ, ਵਿਭਾਗ ਦੇ ਕਲਰਕ ਤੱਕ ਸਾਲਾਂ ਤੋਂ ਇਕ ਹੀ ਸੀਟ 'ਤੇ ਕਬਜ਼ਾ ਜਮਾਈ ਬੈਠੇ ਹਨ। ਉਨ੍ਹਾਂ ਨੂੰ ਪੁੱਛਣ ਦੀ ਹਿੰਮਤ ਕਿਸੇ 'ਚ ਨਹੀਂ ਹੈ।
ਵਿਭਾਗੀ ਨਿਯਮਾਂ ਮੁਤਾਬਕ ਪਬਲਿਕ ਸੀਟ 'ਤੇ ਕੋਈ ਕਰਮਚਾਰੀ 3 ਸਾਲਾਂ ਤੋਂ ਵੱਧ ਨਹੀਂ ਬੈਠ ਸਕਦਾ। ਬੱਸ ਸਟੈਂਡ ਤਹਿਸੀਲਪੁਰਾ 'ਚ ਇਕ ਵਿਅਕਤੀ ਨੇ ਵਿਰਾਸਤੀ ਗੇਟ ਨਾਲ ਲੱਗਦੀ ਪੌੜੀ 'ਤੇ ਛੋਟੀ ਦੁਕਾਨ ਕੱਢ ਲਈ, ਜਿਸ ਦਾ ਪਤਾ ਵਿਭਾਗੀ ਇੰਸਪੈਕਟਰ ਨੂੰ ਵੀ ਹੈ ਪਰ ਉਨ੍ਹਾਂ ਵੱਲੋਂ ਕੁਝ ਨਹੀਂ ਕੀਤਾ ਗਿਆ।
ਨਹੀਂ ਦਿਸ ਰਹੀ ਸ਼ਹਿਰ 'ਚ ਹੋ ਰਹੀ ਉਸਾਰੀ : ਨਿਗਮ ਦਾ ਬਿਲਡਿੰਗ ਵਿਭਾਗ ਆਉਣ ਵਾਲੇ ਸਮੇਂ 'ਚ ਕਮਾਊ ਪੁੱਤ ਬਣ ਸਕਦਾ ਹੈ। ਵਿਭਾਗ ਵੱਲੋਂ ਲੱਖਾਂ ਦੀ ਕਮਾਈ ਹੋ ਸਕਦੀ ਹੈ ਪਰ ਹੈਰਾਨੀ ਦੀ ਗੱਲ ਹੈ ਕਿ ਰਿਕਵਰੀ ਪ੍ਰਤੀ ਇਹ ਗੰਭੀਰ ਨਹੀਂ ਹੈ। ਸ਼ਹਿਰ 'ਚ ਬਿਨਾਂ ਨਕਸ਼ੇ ਦੇ ਅਜੇ ਵੀ ਨਿਰਮਾਣ ਦੀ ਰਫਤਾਰ ਰੁਕ ਨਹੀਂ ਰਹੀ ਪਰ ਵਿਭਾਗੀ ਇੰਸਪੈਕਟਰਾਂ ਨੂੰ ਸ਼ਾਇਦ ਇਹ ਦਿਖਾਈ ਨਹੀਂ ਦੇ ਰਿਹਾ, ਜਿਸ ਦਾ ਸਿੱਧਾ ਅਸਰ ਨਿਗਮ ਦੀ ਕਮਾਈ 'ਤੇ ਪੈ ਰਿਹਾ ਹੈ।
ਪੁਲਸ ਜ਼ੋਨ ਖਤਮ ਕਰਕੇ ਆਈ. ਜੀ. ਨੂੰ ਰੇਂਜ 'ਚ ਤਾਇਨਾਤ ਕਰਨ ਦਾ ਰਾਹ ਸਾਫ਼
NEXT STORY 
