ਕੁਆਲਾਲੰਪੁਰ: ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਪੀਵੀ ਸਿੰਧੂ ਲੰਬੇ ਸਮੇਂ ਬਾਅਦ ਮੰਗਲਵਾਰ ਤੋਂ ਮਲੇਸ਼ੀਆ ਓਪਨ 2026 ਬੈਡਮਿੰਟਨ ਟੂਰਨਾਮੈਂਟ ਰਾਹੀਂ ਭਾਰਤੀ ਚੁਣੌਤੀ ਦੀ ਅਗਵਾਈ ਕਰੇਗੀ। ਕੁਆਲਾਲੰਪੁਰ ਦੇ ਸਟੇਡੀਅਮ ਐਕਸੀਆਟਾ ਐਰੀਨਾ ਵਿੱਚ ਸ਼ੁਰੂ ਹੋਣ ਵਾਲਾ ਇਹ ਸੀਜ਼ਨ ਦਾ ਪਹਿਲਾ ਟਾਪ-ਟੀਅਰ ਬੀਡਬਲਿਊਐਫ (BWF) ਸੁਪਰ 1000 ਟੂਰਨਾਮੈਂਟ ਹੈ, ਜੋ ਸਿੰਧੂ ਲਈ ਸੱਟਾਂ ਭਰੇ 2025 ਸੀਜ਼ਨ ਤੋਂ ਬਾਅਦ ਇੱਕ ਨਵੀਂ ਉਮੀਦ ਲੈ ਕੇ ਆਇਆ ਹੈ। ਜ਼ਿਕਰਯੋਗ ਹੈ ਕਿ 30 ਸਾਲਾ ਸਿੰਧੂ ਪੈਰ ਦੀ ਸੱਟ ਕਾਰਨ ਪਿਛਲੇ ਸਾਲ ਸਤੰਬਰ ਵਿੱਚ ਚਾਈਨਾ ਮਾਸਟਰਜ਼ ਦੌਰਾਨ ਐਨ ਸੇ ਯੰਗ ਤੋਂ ਹਾਰਨ ਤੋਂ ਬਾਅਦ ਕਿਸੇ ਵੀ ਟੂਰਨਾਮੈਂਟ ਵਿੱਚ ਨਹੀਂ ਖੇਡੀ ਸੀ। ਉਨ੍ਹਾਂ ਨੇ ਆਪਣਾ ਆਖਰੀ ਖਿਤਾਬ ਦਸੰਬਰ 2024 ਵਿੱਚ ਸਈਅਦ ਮੋਦੀ ਇੰਟਰਨੈਸ਼ਨਲ ਵਿੱਚ ਜਿੱਤਿਆ ਸੀ।
ਸਿੰਗਲਜ਼ ਵਰਗ: ਮਹਿਲਾ ਸਿੰਗਲਜ਼ ਵਿੱਚ ਸਿੰਧੂ ਦੇ ਨਾਲ ਮਾਲਵਿਕਾ ਬੰਸੋੜ ਅਤੇ ਉੱਨਤੀ ਹੁੱਡਾ ਵੀ ਭਾਰਤੀ ਚੁਣੌਤੀ ਪੇਸ਼ ਕਰਨਗੀਆਂ। ਪੁਰਸ਼ ਸਿੰਗਲਜ਼ ਵਿੱਚ ਭਾਰਤੀ ਉਮੀਦਾਂ ਲਕਸ਼ੈ ਸੇਨ ਅਤੇ ਆਯੁਸ਼ ਸ਼ੈੱਟੀ 'ਤੇ ਟਿਕੀਆਂ ਹੋਈਆਂ ਹਨ। ਹਾਲਾਂਕਿ ਇਨ੍ਹਾਂ ਦੋਵਾਂ ਨੇ ਪਿਛਲੇ ਸਾਲ ਆਸਟ੍ਰੇਲੀਅਨ ਓਪਨ ਅਤੇ ਯੂਐਸ ਓਪਨ ਵਿੱਚ ਸਫਲਤਾ ਹਾਸਲ ਕੀਤੀ ਸੀ, ਪਰ ਉਨ੍ਹਾਂ ਦਾ ਪਿਛਲਾ ਸੀਜ਼ਨ ਕਾਫੀ ਉਤਾਰ-ਚੜ੍ਹਾਅ ਵਾਲਾ ਰਿਹਾ ਹੈ।
ਡਬਲਜ਼ ਵਰਗ: ਪੁਰਸ਼ ਡਬਲਜ਼ ਵਿੱਚ ਦੋ ਵਾਰ ਦੇ ਵਿਸ਼ਵ ਚੈਂਪੀਅਨਸ਼ਿਪ ਦੇ ਕਾਂਸੀ ਦਾ ਤਮਗਾ ਜੇਤੂ ਚਿਰਾਗ ਸ਼ੈੱਟੀ ਅਤੇ ਸਾਤਵਿਕਸਾਈਰਾਜ ਰੰਕੀਰੇਡੀ ਭਾਰਤ ਦੀ ਅਗਵਾਈ ਕਰਨਗੇ। ਮਹਿਲਾ ਡਬਲਜ਼ ਵਿੱਚ ਤ੍ਰਿਸ਼ਾ ਜੌਲੀ ਅਤੇ ਗਾਯਤਰੀ ਗੋਪੀਚੰਦ ਤੋਂ ਮਜ਼ਬੂਤ ਪ੍ਰਦਰਸ਼ਨ ਦੀ ਉਮੀਦ ਹੈ, ਜਦਕਿ ਮਿਕਸਡ ਡਬਲਜ਼ ਵਿੱਚ ਦੁਨੀਆ ਦੀ 17ਵੇਂ ਨੰਬਰ ਦੀ ਜੋੜੀ ਤਨੀਸ਼ਾ ਕਰਾਸਟੋ ਅਤੇ ਧਰੁਵ ਕਪਿਲਾ ਭਾਰਤ ਦੀ ਸਭ ਤੋਂ ਮਜ਼ਬੂਤ ਜੋੜੀ ਵਜੋਂ ਮੈਦਾਨ ਵਿੱਚ ਉਤਰਨਗੇ।
ਇਹ ਟੂਰਨਾਮੈਂਟ ਭਾਰਤੀ ਖਿਡਾਰੀਆਂ ਲਈ ਆਪਣੀ ਫਾਰਮ ਅਤੇ ਫਿਟਨੈਸ ਸਾਬਤ ਕਰਨ ਦਾ ਇੱਕ ਵੱਡਾ ਮੌਕਾ ਹੈ।
ਆਦਿਆ ਬਹੇਤੀ ਤੇ ਰਾਜਦੀਪ ਬਿਸ਼ਵਾਸ ਨੂੰ ਸਿੰਗਲ ਖਿਤਾਬ
NEXT STORY 
