ਸਪੋਰਟਸ ਡੈਸਕ : 7 ਫਰਵਰੀ ਤੋਂ ਸ਼ੁਰੂ ਹੋਣ ਵਾਲੇ ਟੀ-20 ਵਿਸ਼ਵ ਕੱਪ 2026 ਵਿੱਚ ਇਸ ਵਾਰ ਅਨੋਖਾ ਨਜ਼ਾਰਾ ਦੇਖਣ ਨੂੰ ਮਿਲੇਗਾ। ਇਸ ਟੂਰਨਾਮੈਂਟ ਵਿੱਚ ਹਿੱਸਾ ਲੈਣ ਵਾਲੀਆਂ 20 ਵਿੱਚੋਂ ਕਈ ਵਿਦੇਸ਼ੀ ਟੀਮਾਂ ਵਿੱਚ ਭਾਰਤੀ ਮੂਲ ਦੇ ਖਿਡਾਰੀਆਂ ਦੀ ਭਰਮਾਰ ਹੈ। ਅੰਕੜਿਆਂ ਮੁਤਾਬਕ, ਵੱਖ-ਵੱਖ ਦੇਸ਼ਾਂ ਦੀਆਂ ਟੀਮਾਂ ਵਿੱਚ 3 ਦਰਜਨ ਤੋਂ ਵੱਧ ਅਜਿਹੇ ਖਿਡਾਰੀ ਹਨ ਜੋ ਭਾਰਤ ਵਿੱਚ ਪੈਦਾ ਹੋਏ ਜਾਂ ਭਾਰਤੀ ਮੂਲ ਦੇ ਹਨ। ਇਸ ਸੂਚੀ ਵਿੱਚ ਕੈਨੇਡਾ 11 ਖਿਡਾਰੀਆਂ ਨਾਲ ਸਭ ਤੋਂ ਅੱਗੇ ਹੈ, ਜਦਕਿ ਅਮਰੀਕਾ (9), ਓਮਾਨ (7) ਅਤੇ ਯੂਏਈ (7) ਵਿੱਚ ਵੀ ਭਾਰਤੀ ਮੂਲ ਦੇ ਖਿਡਾਰੀਆਂ ਦਾ ਵੱਡਾ ਦਬਦਬਾ ਹੈ।
ਪੰਜਾਬ ਦੇ ਗੱਭਰੂ ਵਿਦੇਸ਼ੀ ਟੀਮਾਂ ਦੀ ਕਰਨਗੇ ਕਪਤਾਨੀ
ਪੰਜਾਬ ਦੇ ਖਿਡਾਰੀਆਂ ਲਈ ਇਹ ਮਾਣ ਵਾਲੀ ਗੱਲ ਹੈ ਕਿ ਗੁਰਦਾਸਪੁਰ ਵਿੱਚ ਜਨਮੇ ਦਿਲਪ੍ਰੀਤ ਬਾਜਵਾ ਇਸ ਵਾਰ ਕੈਨੇਡਾ ਦੀ ਟੀਮ ਦੇ ਕਪਤਾਨ ਵਜੋਂ ਭਾਰਤ ਆਏ ਹਨ। ਇਸੇ ਤਰ੍ਹਾਂ ਲੁਧਿਆਣਾ ਵਿੱਚ ਜਨਮੇ ਜਤਿੰਦਰ ਸਿੰਘ ਓਮਾਨ ਦੀ ਟੀਮ ਦੀ ਕਪਤਾਨੀ ਕਰਨਗੇ। ਫਗਵਾੜਾ ਦੇ ਰਹਿਣ ਵਾਲੇ ਜਸਪ੍ਰੀਤ ਸਿੰਘ, ਜੋ ਕਦੇ ਇਟਲੀ ਵਿੱਚ ਆਪਣੀ ਰੋਜ਼ੀ-ਰੋਟੀ ਲਈ 'ਉਬਰ ਡਰਾਈਵਰ' ਵਜੋਂ ਕੰਮ ਕਰਦੇ ਸਨ, ਹੁਣ ਇਟਲੀ ਦੀ ਟੀਮ ਵੱਲੋਂ ਤੇਜ਼ ਗੇਂਦਬਾਜ਼ ਵਜੋਂ ਮੈਦਾਨ ਵਿੱਚ ਉਤਰਨਗੇ। ਨੀਦਰਲੈਂਡ ਦੇ ਆਰਿਅਨ ਦੱਤ ਦਾ ਪਰਿਵਾਰ ਵੀ 1980 ਦੇ ਦਹਾਕੇ ਵਿੱਚ ਪੰਜਾਬ ਤੋਂ ਉੱਥੇ ਗਿਆ ਸੀ।
ਬਚਪਨ ਦੇ ਦੋਸਤਾਂ ਵਿਚਾਲੇ ਹੋਵੇਗੀ ਟੱਕਰ
ਟੂਰਨਾਮੈਂਟ ਵਿੱਚ ਕਈ ਭਾਵੁਕ ਪਲ ਵੀ ਦੇਖਣ ਨੂੰ ਮਿਲਣਗੇ। ਅਮਰੀਕਾ ਦੀ ਕਪਤਾਨੀ ਗੁਜਰਾਤ ਦੇ ਆਨੰਦ ਵਿੱਚ ਜਨਮੇ ਮੋਨਾਂਕ ਪਟੇਲ ਕਰਨਗੇ, ਜੋ ਆਪਣੇ ਬਚਪਨ ਦੇ ਦੋਸਤ ਅਤੇ ਭਾਰਤ ਦੇ ਸਟਾਰ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਦਾ ਸਾਹਮਣਾ ਕਰਨ ਲਈ ਉਤਸ਼ਾਹਿਤ ਹਨ। ਇਸੇ ਤਰ੍ਹਾਂ ਮੁੰਬਈ ਵਿੱਚ ਜਨਮੇ ਅਤੇ ਸੌਫਟਵੇਅਰ ਇੰਜੀਨੀਅਰ ਵਜੋਂ ਕੰਮ ਕਰਦੇ ਅਮਰੀਕੀ ਤੇਜ਼ ਗੇਂਦਬਾਜ਼ ਸੌਰਭ ਨੇਤਰਵਲਕਰ ਵਾਨਖੇੜੇ ਸਟੇਡੀਅਮ ਵਿੱਚ ਆਪਣੇ ਪੁਰਾਣੇ ਸਾਥੀ ਸੂਰਿਆਕੁਮਾਰ ਯਾਦਵ ਵਿਰੁੱਧ ਗੇਂਦਬਾਜ਼ੀ ਕਰਨਗੇ।
ਬੇਂਜੇਮਾ ਅਲ ਹਿਲਾਲ ਨਾਲ ਜੁੜੇ, ਰੋਨਾਲਡੋ ਦੀਆਂ ਉਮੀਦਾਂ 'ਤੇ ਫੇਰ ਸਕਦੈ ਪਾਣੀ
NEXT STORY 
