ਦਿੱਲੀ ਵਿਚ ਕੁਝ ਦਿਨ ਪਹਿਲਾਂ ਤੇਜ਼ ਗਰਮੀ ਤੋਂ ਬਾਅਦ ਭਾਰੀ ਬਾਰਿਸ਼ ਹੋਈ। ਸ਼ਾਮ ਨੂੰ ਹਵਾ ਵੀ ਚੱਲਣੀ ਸ਼ੁਰੂ ਹੋ ਗਈ ਤਾਂ ਮੌਸਮ ਕੁਝ ਸੁਹਾਵਣਾ ਹੋ ਗਿਆ। ਸੋਚਿਆ ਕਿ ਚੰਗਾ ਮੌਕਾ ਹੈ , ਬਾਜ਼ਾਰ ਜਾਣ ਦਾ। ਗਰਮੀ ਦੇ ਕਾਰਨ ਇੰਨੇ ਦਿਨਾਂ ਤੋਂ ਟਾਲ ਰਹੀ ਸੀ, ਤਾਂ ਚੱਲ ਪਈ। ਰਸਤੇ ਵਿਚ ਆਪਣੀ ਇਕ ਪੁਰਾਣੀ ਸਹੇਲੀ ਮਿਲੀ। ਉਮਰ ’ਚ ਬਹੁਤ ਛੋਟੀ। ਪਰ ਰਿਸ਼ਤਾ ਦੋਸਤੀ ਦਾ। ਉਸ ਦੀ ਧੀ ਦਾ ਜਨਮ ਜਦੋਂ ਹੋਇਆ, ਉਦੋਂ ਤੋਂ ਮੁਲਾਕਾਤ ਘੱਟ ਹੋ ਪਾਉਂਦੀ ਸੀ। ਅਸੀਂ ਦੋਵੇਂ ਗੱਲਾਂ ਕਰਨ ਲੱਗੇ। ਉਸ ਦੇ ਨਾਲ ਛੇਵੀਂ ’ਚ ਪੜ੍ਹਨ ਵਾਲੀ ਉਸ ਦੀ ਧੀ ਸੀ।
ਉਹ ਦੱਸਣ ਲੱਗੀ ਕਿ ਇੱਥੋਂ ਦੇ ਮਸ਼ਹੂਰ ਬਿਊਟੀ ਪਾਰਲਰ ਤੋਂ ਬੱਚੀ ਮੈਨੀਕਿਊਰੋ ਅਤੇ ਪੈਡੀਕਿਊਰ ਕਰਾਉਣ ਜਾਂਦੀ ਹੈ ਪਰ ਪਿਛਲੇ ਦਿਨੀਂ ਪਤਾ ਨਹੀਂ ਕੀ ਹੋਇਆ ਕਿ ਬੱਚੀ ਦੇ ਹੱਥ-ਪੈਰ ’ਚ ਪਾਰਲਰ ਤੋਂ ਵਾਪਸ ਆਉਂਦੇ ਹੀ ਬੁਰੀ ਤਰ੍ਹਾਂ ਨਾਲ ਐਲਰਜੀ ਹੋ ਗਈ। ਹੁਣ ਸਕਿਨ ਮਾਹਿਰ ਦਾ ਇਲਾਜ ਚੱਲ ਰਿਹਾ ਹੈ। ਉੱਥੇ ਹੀ ਜਾ ਰਹੀ ਹੈ।
ਸਹੇਲੀ ਤਾਂ ਆਪਣੀ ਧੀ ਦੇ ਨਾਲ ਚਲੀ ਗਈ ਪਰ ਬਹੁਤ ਸਾਰੇ ਸਵਾਲ ਪਿੱਛੇ ਛੱਡ ਗਈ। ਇਨ੍ਹੀਂ ਦਿਨੀਂ ਬਚਪਨ ਤੋਂ ਹੀ ਬੱਚੀਆਂ ਨੂੰ ਇਹ ਅਹਿਸਾਸ ਕਰਾਇਆ ਜਾਂਦਾ ਹੈ ਕਿ ਉਹ ਸੁੰਦਰ ਅਤੇ ਬਸ ਸੁੰਦਰ ਹੀ ਦਿਸਣ ਜਾਂ ਇੰਝ ਕਿਹਾ ਜਾਂਦਾ ਹੈ ਕਿ ਇਹ ਸਦੀ ਔਰਤਾਂ ਦੇ ਸਰਵਸ਼ਕਤੀਮਾਨ ਹੋਣ ਦੀ ਸਦੀ ਹੈ। ਉਹ ਆਪਣੀ ਸਿੱਖਿਆ ਅਤੇ ਕਰੀਅਰ ਦੇ ਉਨ੍ਹਾਂ ਮੁਕਾਮਾਂ ’ਤੇ ਪਹੁੰਚਣਗੀਆਂ, ਜਿੱਥੇ ਪਹਿਲੇ ਕਦੇ ਨਹੀਂ ਪਹੁੰਚੀਆਂ। ਪਰ ਜੇਕਰ ਸਮੇਂ-ਸਮੇਂ ’ਤੇ ਸਕੂਲਾਂ ’ਚ ਜਾਂਦੇ ਹੋ, ਜੇ ਤੁਸੀਂ ਕੁਝ ਸਲਾਹਕਾਰਾਂ ਦੇ ਸੰਪਰਕ ਵਿਚ ਹੋ, ਤਾਂ ਬਹੁਤ ਸਾਰੀਆਂ ਹੋਰ ਗੱਲਾਂ ਵੀ ਸੁਣਨ ਨੂੰ ਮਿਲਦੀਆਂ ਹਨ।
ਅਧਿਆਪਿਕਾਵਾਂ ਕਹਿੰਦੀਆਂ ਹਨ ਕਿ ਪੰਜਵੀਂ-ਛੇਵੀਂ ’ਚ ਪੜ੍ਹਨ ਵਾਲੀਆਂ ਕੁੜੀਆਂ ਤੱਕ ਆਪਣੇ-ਆਪਣੇ ਬੁਆਏਫ੍ਰੈਂਡ ਦੀ ਤਲਾਸ਼ ’ਚ ਰਹਿੰਦੀਆਂ ਹਨ। ਇਸ ਦੇ ਲਈ ਉਹ ਤਰ੍ਹਾਂ-ਤਰ੍ਹਾਂ ਦੇ ਉਪਾਅ ਕਰਦੀਆਂ ਹਨ। ਉਹ ਜ਼ਿਆਦਾ ਤੋਂ ਜ਼ਿਆਦਾ ਸੁੰਦਰ ਦਿਸਣਾ ਚਾਹੁੰਦੀਆਂ ਹਨ। ਪਰਿਵਾਰ ਵਾਲੇ ਵੀ ਉਨ੍ਹਾਂ ਦਾ ਸਾਥ ਦਿੰਦੇ ਹਨ। ਬੱਚੀਆਂ ਅਤੇ ਬੱਚੇ ਵੀ ਬਹੁਤ ਜਲਦੀ ਬਾਲਗਾਂ ਵਾਂਗ ਵਿਵਹਾਰ ਕਰਨ ਲੱਗੇ ਹਨ। ਬਹੁਤੇ ਤਾਂ 13-14 ਸਾਲ ਦੀ ਉਮਰ ਤੱਕ ਆਉਂਦੇ-ਆਉਂਦੇ, ਸਰੀਰਕ ਸਬੰਧਾਂ ਵੱਲ ਵੀ ਵਧ ਜਾਂਦੇ ਹਨ।
ਇਸ ਦਾ ਇਕ ਹੋਰ ਪਹਿਲੂ ਇਹ ਹੈ ਕਿ ਇਹ ਕੁੜੀਆਂ ਕਿਸੇ ਵੀ ਕੀਮਤ ’ਤੇ ਮੁੰਡਿਆਂ ਨੂੰ ਆਕਰਸ਼ਿਤ ਕਰਨਾ ਚਾਹੁੰਦੀਆਂ ਹਨ। ਇਸ ਲਈ, ਉਹ ਆਪਣੇ ਬੁਆਏਫ੍ਰੈਂਡ ਦੀ ਹਰ ਗੱਲ ਮੰਨਦੀਆਂ ਹਨ। ਉਨ੍ਹਾਂ ਨੂੰ ਇਹ ਵੀ ਡਰ ਹੁੰਦਾ ਹੈ ਕਿ ਜੇ ਉਹ ਅਜਿਹਾ ਨਹੀਂ ਕਰਦੀਆਂ ਤਾਂ ਉਨ੍ਹਾਂ ਦਾ ਦੋਸਤ ਕੋਈ ਹੋਰ ਕੁੜੀ ਲੱਭ ਲਵੇਗਾ। ਇੱਥੋਂ ਤੱਕ ਕਿ ਇਹ ਨੌਜਵਾਨ ਕੁੜੀਆਂ ਅਤੇ ਮੁੰਡੇ ਵੀ ਵੱਡੇ ਪੱਧਰ ’ਤੇ ਡੇਟਿੰਗ ਐਪਸ ਅਤੇ ਡੇਟਿੰਗ ਵੈੱਬਸਾਈਟਾਂ ਦੀ ਵਰਤੋਂ ਕਰਦੇ ਹਨ।
ਇਕ ਕੌਂਸਲਰ ਨੇ ਦੱਸਿਆ ਕਿ ਇਕ 18 ਸਾਲ ਦੀ ਕੁੜੀ ਉਸ ਕੋਲ ਆਉਂਦੀ ਸੀ। ਉਹ ਅਕਸਰ ਇਸ ਗੱਲ ਤੋਂ ਨਾਖੁਸ਼ ਰਹਿੰਦੀ ਸੀ ਕਿ ਉਹ ਇਕ ਅਮੀਰ ਪਰਿਵਾਰ ਤੋਂ ਹੈ। ਦੇਖਣ ’ਚ ਵੀ ਚੰਗੀ, ਸਮਾਟ ਹੈ। ਉਸ ਦਾ ਡਰਾਈਵਰ ਸਕੂਲ ਦੇ ਬਾਹਰ ਉਸ ਦਾ ਇੰਤਜ਼ਾਰ ਕਰਦਾ ਰਹਿੰਦਾ ਹੈ। ਉਹ ਮੁੰਡਿਆਂ ਨਾਲ ਦੋਸਤੀ ਕਰਨ ਲਈ ਬਹੁਤ ਸਾਰਾ ਪੈਸਾ ਖਰਚ ਕਰਦੀ ਹੈ ਪਰ ਕੁਝ ਦਿਨਾਂ ਬਾਅਦ ਮੁੰਡੇ ਉਸ ਨੂੰ ਛੱਡ ਦਿੰਦੇ ਹਨ। ਉਹ ਸਲਾਹ ਲੈਣ ਆਈ ਸੀ ਕਿ ਕੀ ਕਰੇ ਤਾਂ ਜੋ ਮੁੰਡੇ ਅਜਿਹਾ ਨਾ ਕਰਨ। ਕਿਉਂਕਿ ਜਦੋਂ ਅਜਿਹਾ ਹੁੰਦਾ ਹੈ, ਤਾਂ ਉਸ ਨੂੰ ਅਕਸਰ ਰਿਜ਼ੈਕਸ਼ਨ ਦੀ ਫੀਲਿੰਗ ਹੁੰਦੀ ਹੈ ਅਤੇ ਖੁਦਕੁਸ਼ੀ ਕਰਨ ਦਾ ਮਨ ਕਰਦਾ ਹੈ।
ਕਈ ਸੈਸ਼ਨਾਂ ਤੋਂ ਬਾਅਦ, ਜਦੋਂ ਇਹ ਕੁੜੀ ਕੌਂਸਲਰ ਦੇ ਸਾਹਮਣੇ ਬੈਠੀ ਸੀ, ਇਕ ਦਿਨ ਉਸ ਨੂੰ ਉਸ ਦੇ ਫੋਨ ’ਤੇ ਇਕ ਮੈਸੇਜ ਆਇਆ। ਇਸ ਨੂੰ ਦੇਖ ਕੇ ਉਹ ਮੁਸਕਰਾਉਣ ਲੱਗ ਪਈ। ਉਸ ਦਾ ਚਿਹਰਾ ਚਮਕਣ ਲੱਗ ਪਿਆ। ਜਦੋਂ ਕੌਂਸਲਰ ਨੇ ਪੁੱਛਿਆ, ਤਾਂ ਉਸ ਨੇ ਦੱਸਿਆ ਕਿ ਉਹ ਇਕ ਡੇਟਿੰਗ ਐਪ ’ਤੇ ਇਕ ਮੁੰਡੇ ਨੂੰ ਮਿਲੀ ਸੀ। ਹੁਣ ਉਸ ਦਾ ਮੈਸੇਜ ਆ ਗਿਆ ਹੈ। ਉਹ ਮਿਲਣਾ ਚਾਹੁੰਦਾ ਹੈ, ਜਿਸ ਦਾ ਮਤਲਬ ਹੈ ਕਿ ਉਹ ਉਸ ਵਿਚ ਦਿਲਚਸਪੀ ਲੈ ਰਿਹਾ ਹੈ।
ਇਸ ਉਮਰ ਵਿਚ ਜਦੋਂ ਅੱਲੜ੍ਹਾਂ ਦੀ ਤਰਜੀਹ ਉਨ੍ਹਾਂ ਦੀ ਸਿੱਖਿਆ ਅਤੇ ਕਰੀਅਰ ਹੋਣੀ ਚਾਹੀਦੀ ਹੈ, ਉਹ ਵਿਰੋਧੀ ਲਿੰਗ ਦੇ ਆਕਰਸ਼ਣ ਵਿਚ ਵਧੇਰੇ ਦਿਲਚਸਪੀ ਲੈ ਰਹੀਅਾਂ ਹਨ। ਇਹ ਚੀਜ਼ਾਂ ਉਨ੍ਹਾਂ ਦੇ ਕਰੀਅਰ ਅਤੇ ਸਿਹਤ ਦੋਵਾਂ ਲਈ ਚੰਗੀਆਂ ਨਹੀਂ ਹਨ। ਪਰ ਕੀ ਕੀਤਾ ਜਾ ਸਕਦਾ ਹੈ। ਬੱਚਿਆਂ ਦੇ ਸਾਹਮਣੇ ਦੁਨੀਆ ਖੁੱਲ੍ਹੀ ਹੈ। ਹਰ ਰੋਜ਼ ਵਿਦੇਸ਼ਾਂ ਤੋਂ ਖ਼ਬਰਾਂ ਆਉਂਦੀਆਂ ਹਨ ਕਿ ਕੋਈ ਕੁੜੀ 12 ਸਾਲ ਦੀ ਉਮਰ ਵਿਚ ਮਾਂ ਬਣ ਗਈ ਅਤੇ ਕੋਈ ਮੁੰਡਾ 14 ਸਾਲ ਦੀ ਉਮਰ ਵਿਚ ਪਿਤਾ ਬਣਿਆ।
ਅਜਿਹਾ ਲੱਗਦਾ ਹੈ ਜਿਵੇਂ ਅਸੀਂ ਕੁਝ ਸਦੀਆਂ ਪਿੱਛੇ ਚਲੇ ਗਏ ਹਾਂ ਅਤੇ ਬਾਲ ਵਿਆਹਾਂ ਦੇ ਸਮੇਂ ਨੂੰ ਦੇਖ ਰਹੇ ਹਾਂ। ਜ਼ਿਆਦਾਤਰ ਪੱਛਮੀ ਦੇਸ਼ ਅੱਲੜ੍ਹ ਉਮਰ ਵਿਚ ਗਰਭਵਤੀ ਹੋਣ ਦੀ ਸਮੱਸਿਆ ਤੋਂ ਪਰੇਸ਼ਾਨ ਹਨ। ਅਮਰੀਕਾ ਵਿਚ ਡਾਕਟਰ ਮਾਪਿਆਂ ਨੂੰ ਸਲਾਹ ਦਿੰਦੇ ਹਨ ਕਿ ਉਹ ਆਪਣੀਆਂ ਕੁੜੀਆਂ ਨੂੰ 9-10 ਸਾਲ ਦੀ ਉਮਰ ਦੇ ਹੁੰਦੇ ਹੀ ਹਰ ਰੋਜ਼ ਗਰਭ ਨਿਰੋਧਕ ਗੋਲੀਆਂ ਦੇਣ, ਤਾਂ ਹੀ ਅਣਚਾਹੇ ਗਰਭ ਤੋਂ ਬਚਿਆ ਜਾ ਸਕਦਾ ਹੈ।
ਅਮਰੀਕਾ ਅਤੇ ਯੂਰਪ ਦੇ ਜ਼ਿਆਦਾਤਰ ਸਕੂਲਾਂ ਵਿਚ ਸਵੇਰ ਤੋਂ ਬਾਅਦ ਪਿਲਸ ਦੀਆਂ ਮਸ਼ੀਨਾਂ ਵੀ ਲੱਗੀਅਾਂ ਹਨ ਪਰ ਕਈ ਵਾਰ ਕੁੜੀਆਂ ਇੱਥੋਂ ਗੋਲੀਆਂ ਲੈਣਾ ਭੁੱਲ ਜਾਂਦੀਆਂ ਹਨ ਅਤੇ ਗਰਭਵਤੀ ਹੋ ਜਾਂਦੀਆਂ ਹਨ।
ਕਈ ਸਾਲ ਪਹਿਲਾਂ, ਮੈਂ ਟੀ.ਵੀ. ’ਤੇ ਇਕ ਕਾਰਟੂਨ ਦੇਖ ਰਹੀ ਸੀ, ਜਿਸ ਵਿਚ ਇਕ 8 ਸਾਲ ਦੇ ਬੱਚੇ ਤੋਂ ਪੁੱਛਿਆ ਜਾ ਰਿਹਾ ਸੀ ਕਿ ਉਸ ਦੀ ਕੋਈ ਪ੍ਰੇਮਿਕਾ ਹੈ ਜਾਂ ਨਹੀਂ। ਇਹ ਕਾਰਟੂਨ ਬੱਚਿਆਂ ਵਿਚ ਬਹੁਤ ਮਸ਼ਹੂਰ ਸੀ। ਆਖ਼ਰਕਾਰ, ਲੇਖਕ ਦਾ 8 ਸਾਲ ਦੇ ਬੱਚੇ ਨੂੰ ਅਜਿਹਾ ਸਵਾਲ ਪੁੱਛਣ ਦਾ ਕੀ ਮਕਸਦ ਸੀ?
ਬਾਲ ਅਧਿਕਾਰਾਂ ਲਈ ਕੰਮ ਕਰਨ ਵਾਲੀਆਂ ਸੰਸਥਾਵਾਂ ਨੂੰ ਵੀ ਇਨ੍ਹਾਂ ਗੱਲਾਂ ਵੱਲ ਧਿਆਨ ਦੇਣਾ ਚਾਹੀਦਾ ਹੈ। ਅਸੀਂ ਆਪਣੇ ਬੱਚਿਆਂ ਅਤੇ ਖਾਸ ਕਰ ਕੇ ਕੁੜੀਆਂ ਨੂੰ ਕਿੱਥੇ ਧੱਕ ਰਹੇ ਹਾਂ? ਇਹ ਠੀਕ ਹੈ ਕਿ ਉਹ ਸੁੰਦਰ ਦਿਸਣ ਪਰ ਸਿਰਫ਼ ਵੱਧ ਤੋਂ ਵੱਧ ਮੁੰਡਿਆਂ ਨੂੰ ਆਕਰਸ਼ਿਤ ਕਰਨ ਲਈ ਸੁੰਦਰ ਦਿਖਾਈ ਦੇਣਾ ਉਨ੍ਹਾਂ ਦੇ ਭਵਿੱਖ ਲਈ ਚੰਗਾ ਨਹੀਂ ਹੈ। ਬਹੁਤ ਸਾਰੇ ਅਧਿਆਪਕ ਕਹਿੰਦੇ ਹਨ ਕਿ ਕੁੜੀਆਂ ਇਸ ਡਰ ਤੋਂ ਕਿ ਉਨ੍ਹਾਂ ਦੇ ਬੁਆਏਫ੍ਰੈਂਡ ਉਨ੍ਹਾਂ ਨੂੰ ਕਿਤੇ ਛੱਡ ਨਾ ਦੇਣ, ਉਹ ਉਨ੍ਹਾਂ ਚੀਜ਼ਾਂ ਲਈ ਵੀ ਸਹਿਮਤ ਹੋ ਜਾਂਦੀਆਂ ਹਨ ਜਿਨ੍ਹਾਂ ਦਾ ਉਨ੍ਹਾਂ ਨੂੰ ਬਾਅਦ ਵਿਚ ਬਹੁਤ ਪਛਤਾਵਾ ਹੁੰਦਾ ਹੈ।
ਸ਼ਮਾ ਸ਼ਰਮਾ
RCB ਲੀਜੈਂਡਸ ਡਿਵਿਲੀਅਰਸ ਤੇ ਕ੍ਰਿਸ ਗੇਲ IPL 2025 ਦੇ ਫਾਈਨਲ ਲਈ ਪੁੱਜੇ ਅਹਿਮਦਾਬਾਦ
NEXT STORY 
