ਅਸੀਂ ਲਿਖਦੇ ਰਹਿੰਦੇ ਹਾਂ ਕਿ ਲੋਕਾਂ ਨੂੰ ਸਸਤੀ ਅਤੇ ਮਿਆਰੀ ਸਿੱਖਿਆ ਤੇ ਇਲਾਜ, ਸਾਫ਼ ਪੀਣ ਵਾਲਾ ਪਾਣੀ ਅਤੇ ਲਗਾਤਾਰ ਬਿਜਲੀ ਉਪਲੱਬਧ ਕਰਵਾਉਣਾ ਕੇਂਦਰ ਅਤੇ ਰਾਜ ਸਰਕਾਰਾਂ ਦੀ ਜ਼ਿੰਮੇਵਾਰੀ ਹੈ ਪਰ ਇਹ ਇਸ ’ਚ ਅਸਫ਼ਲ ਹੋ ਰਹੀਆਂ ਹਨ।
‘ਡਰੱਗਜ਼ ਕੰਟਰੋਲ ਮੀਡੀਆ ਨੈੱਟਵਰਕ’ ਦੇ 24 ਫਰਵਰੀ, 2026 ਦੇ ਅੰਕੜਿਆਂ ਅਨੁਸਾਰ, ਇਸ ਸਾਲ ਦੇ ਸ਼ੁਰੂਆਤੀ ਮਹੀਨਿਆਂ ’ਚ ਕੇਰਲ, ਬਿਹਾਰ ਅਤੇ ਉੱਤਰ ਪ੍ਰਦੇਸ਼ ਦੇ ਪੇਂਡੂ ਤੇ ਸਰਕਾਰੀ ਪ੍ਰਾਇਮਰੀ ਸਿਹਤ ਕੇਂਦਰਾਂ ’ਚ ਅਨੈਤਿਕ ਡਾਕਟਰੀ ਵਿਵਹਾਰ ਲਾਪਰਵਾਹੀ ਕਾਰਨ ਕਈ ਮਰੀਜ਼ਾਂ ਦੀ ਬੇਵਕਤੀ ਮੌਤ ਦੇ ਗੰਭੀਰ ਮਾਮਲੇ ਦਰਜ ਕੀਤੇ ਗਏ ਹਨ।
ਇਸੇ ਲਈ ਸਰਕਾਰੀ ਹਸਪਤਾਲਾਂ ’ਚ ਇਲਾਜ ਦੌਰਾਨ ਹੋਣ ਵਾਲੀਆਂ ਲਾਪਰਵਾਹੀਆਂ ਕਾਰਨ ਲੋਕ ਉੱਥੇ ਇਲਾਜ ਲਈ ਜਾਣ ਤੋਂ ਝਿਜਕਦੇ ਹਨ। ਅਜਿਹੀਆਂ ਹੀ ਲਾਪਰਵਾਹੀਆਂ ਦੀਆਂ ਇਸੇ ਸਾਲ ਦੇ 5 ਮਹੀਨਿਆਂ ’ਚ ਸਾਹਮਣੇ ਆਈਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 26 ਜਨਵਰੀ ਨੂੰ ‘ਤਿਰੂਵਨੰਤਪੁਰਮ’ (ਕੇਰਲ) ਦੇ ‘ਵਿਲਾਪਿਲ ਕਮਿਊਨਿਟੀ ਹੈਲਥ ਸੈਂਟਰ’ ’ਚ ਸਾਹ ਲੈਣ ’ਚ ਗੰਭੀਰ ਤਕਲੀਫ਼ ਦੇ ਇਲਾਜ ਲਈ ਲਿਆਂਦੇ ਗਏ ‘ਪੀ. ਬਿਸਮੀਰ’ (37) ਨੂੰ ਸੀ. ਸੀ. ਟੀ. ਵੀ. ਫੁਟੇਜ ’ਚ ਫ਼ਰਸ਼ ’ਤੇ ਤੜਫਦੇ ਹੋਏ ਅਤੇ ਉਸ ਦੀ ਪਤਨੀ ਨੂੰ ਮਦਦ ਲਈ ਡਾਕਟਰਾਂ ਦੇ ਕਮਰਿਆਂ ਦੇ ਚੱਕਰ ਕੱਟਦੇ ਦੇਖਿਆ ਗਿਆ ਪਰ ਸਮੇਂ ਸਿਰ ਕੋਈ ਇਲਾਜ ਨਾ ਮਿਲਣ ਕਾਰਨ ਉਸਦੀ ਜਾਨ ਚਲੀ ਗਈ।
* 23 ਮਈ ਨੂੰ ‘ਤਿਰੂਚੀ’ (ਤਾਮਿਲਨਾਡੂ) ਸਥਿਤ ‘ਮਹਾਤਮਾ ਗਾਂਧੀ ਮੈਮੋਰੀਅਲ ਸਰਕਾਰੀ ਹਸਪਤਾਲ’ ’ਚ ਸਿਰਦਰਦ ਅਤੇ ਨੱਕ ਦੇ ਪਰਦੇ ਦੀ ਮਾਮੂਲੀ ਸਰਜਰੀ ਲਈ ਭਰਤੀ ਨਰਸਿੰਗ ਵਿਦਿਆਰਥਣ ‘ਸੀਤਾਲਕਸ਼ਮੀ’ ਦੀ ਐਨੇਸਥੀਸੀਆ ਦੇਣ ਦੌਰਾਨ ਦਿਲ ਦਾ ਦੌਰਾ ਪੈਣ ਨਾਲ ਮੌਤ ਹੋ ਗਈ।
ਮੌਤ ਦੇ ਕਾਰਨਾਂ ਦੀ ਜਾਂਚ ਲਈ ਗਠਿਤ ਕਮੇਟੀ ਨੇ ਪਾਇਆ ਕਿ ‘ਸੀਤਾਲਕਸ਼ਮੀ’ ਦੀ ਮੌਤ ਸਰਜਰੀ ਤੋਂ ਪਹਿਲਾਂ ਦਿੱਤੇ ਗਏ ‘ਡੈਕਸਾਮੇਥਾਸੋਨ’ ਇੰਜੈਕਸ਼ਨ ਕਾਰਨ ਉਸ ਦੀ ਦਿਲ ਦੀ ਰਫਤਾਰ ਬਹੁਤ ਜ਼ਿਆਦਾ ਹੌਲੀ ਹੋ ਜਾਣ (Arrhythmia) ਨਾਲ ਹੋਈ ਸੀ।
* 13 ਜੂਨ ਨੂੰ ‘ਭੋਪਾਲ’ (ਮੱਧ ਪ੍ਰਦੇਸ਼) ਸਥਿਤ ‘ਏਮਜ਼’ ’ਚ ਕੈਂਸਰ ਪੀੜਤ ਬੱਚੇ ਨੂੰ ਨਰਸਿੰਗ ਸਟਾਫ਼ ਵਲੋਂ ਦਵਾਈ ਦੀ ਜਗ੍ਹਾ ‘ਫਾਰਮੇਲਿਨ’ (ਲਾਸ਼ ਨੂੰ ਸੁਰੱਖਿਅਤ ਰੱਖਣ ਵਾਲਾ ਕੈਮੀਕਲ) ਦਾ ਇੰਜੈਕਸ਼ਨ ਲਗਾ ਦੇਣ ਨਾਲ ਉਸਦੀ ਦਰਦਨਾਕ ਮੌਤ ਹੋ ਗਈ। ਇਸ ਸਿਲਸਿਲੇ ’ਚ 2 ਨਰਸਿੰਗ ਅਧਿਕਾਰੀਆਂ ’ਤੇ ਕੇਸ ਦਰਜ ਕੀਤਾ ਗਿਆ।
* 26 ਜੂਨ ਨੂੰ ‘ਖਰਸੀਆ’ (ਛੱਤੀਸਗੜ੍ਹ) ਸਥਿਤ ਕਮਿਊਨਿਟੀ ਹੈਲਥ ਸੈਂਟਰ ’ਚ ਬਵਾਸੀਰ ਦੇ ਇਕ ਆਮ ਆਪ੍ਰੇਸ਼ਨ ਤੋਂ ਬਾਅਦ ਇਕ ਨੌਜਵਾਨ ਦੀ ਦੇਖਭਾਲ ’ਚ ਭਾਰੀ ਲਾਪਰਵਾਹੀ ਕਾਰਨ ਹਾਲਤ ਵਿਗੜ ਜਾਣ ਨਾਲ ਮੌਤ ਹੋ ਗਈ।
* 28 ਜੂਨ ਨੂੰ ਰਾਜਸਥਾਨ ਦੇ ਇਲਾਜ ਅਤੇ ਸਿਹਤ ਮੰਤਰੀ ਦੇ ਗ੍ਰਹਿ ਜ਼ਿਲੇ ‘ਨਾਗੌਰ’ ਸਥਿਤ ਸਭ ਤੋਂ ਵੱਡੇ ‘ਜੇ. ਐੱਲ. ਐੱਨ. ਸਰਕਾਰੀ ਹਸਪਤਾਲ’ ’ਚ ਅਚਾਨਕ 2 ਘੰਟੇ ਤੱਕ ਬਿਜਲੀ ਗੁੱਲ ਰਹੀ ਅਤੇ ਹਸਪਤਾਲ ਦਾ ਮੁੱਖ ਜਨਰੇਟਰ ਵੀ ਠੱਪ ਹੋ ਗਿਆ। ਇਸ ਦੌਰਾਨ ਡਾਕਟਰਾਂ ਨੂੰ ਮੋਬਾਈਲ ਦੀ ਟਾਰਚ ਜਗਾ ਕੇ ਮਰੀਜ਼ਾਂ ਦਾ ਇਲਾਜ ਕਰਨਾ ਪਿਆ। ਆਕਸੀਜਨ ਦੀ ਸਪਲਾਈ ਪ੍ਰਭਾਵਿਤ ਹੋਣ ਕਾਰਨ ਮਰੀਜ਼ਾਂ ਨੂੰ ਭਾਰੀ ਪਰੇਸ਼ਾਨੀ ਹੋਈ।
* 29 ਜੂਨ ਨੂੰ ਹੀ ‘ਬਾਂਦਾ’ (ਮੱਧ ਪ੍ਰਦੇਸ਼) ਸਥਿਤ ਸਿਵਲ ਹਸਪਤਾਲ ’ਚ ਮਾਮੂਲੀ ਸਰਦੀ-ਖੰਘ ਦੇ ਇਲਾਜ ਲਈ ਲਿਆਂਦੇ ਗਏ 19 ਮਹੀਨਿਆਂ ਦੇ ਮਾਸੂਮ ਬੱਚੇ ਦੀਆਂ ਅੱਖਾਂ ’ਚ ਡਾਕਟਰਾਂ ਨੇ ਆਈ ਡਰਾਪ ਦੀ ਬਜਾਏ ਕਫ਼ ਸਿਰਪ ਪਾ ਦਿੱਤਾ ਜਿਸ ਨਾਲ ਬੱਚੇ ਦੀਆਂ ਅੱਖਾਂ ਦੀ ਰੌਸ਼ਨੀ ਹਮੇਸ਼ਾ ਦੇ ਲਈ ਚਲੀ ਗਈ।
* 29 ਜੂਨ ਨੂੰ ਹੀ ‘ਜਹਾਨਾਬਾਦ’ (ਬਿਹਾਰ) ਸਥਿਤ ਸਦਰ ਹਸਪਤਾਲ ’ਚ ਇਲਾਜ ਅਧੀਨ ਇਕ ਔਰਤ ਦੀ ਮੌਤ ਹੋ ਗਈ। ਮ੍ਰਿਤਕਾ ਦੇ ਪਰਿਵਾਰ ਵਾਲਿਆਂ ਨੇ ਡਾਕਟਰਾਂ ’ਤੇ ਸਮੇਂ ਸਿਰ ਇਲਾਜ ਨਾ ਕਰਨ ਅਤੇ ਲਾਪਰਵਾਹੀ ਵਰਤਣ ਦਾ ਦੋਸ਼ ਲਗਾਉਂਦੇ ਹੋਏ ਹਸਪਤਾਲ ’ਚ ਭਾਰੀ ਹੰਗਾਮਾ ਕੀਤਾ।
* 30 ਜੂਨ ਨੂੰ ‘ਕੁੱਲੂ’ ਸਥਿਤ ਖੇਤਰੀ ਹਸਪਤਾਲ, ‘ਢਾਲਪੁਰ’ ’ਚ ਮੰਡੀ ਜ਼ਿਲੇ ਦੀ ਰਹਿਣ ਵਾਲੀ ਮੰਜੂ ਸ਼ਰਮਾ (23) ਦੀ ਜਣੇਪੇ ਤੋਂ ਬਾਅਦ ਮੌਤ ਹੋ ਗਈ। ਪਰਿਵਾਰ ਵਾਲਿਆਂ ਨੇ ਇਲਾਜ ’ਚ ਗੰਭੀਰ ਲਾਪਰਵਾਹੀ ਦਾ ਦੋਸ਼ ਲਗਾਉਂਦੇ ਹੋਏ ਹਸਪਤਾਲ ਕੰਪਲੈਕਸ ’ਚ ਸੈਂਕੜੇ ਲੋਕਾਂ ਦੇ ਨਾਲ ਭਾਰੀ ਵਿਰੋਧ ਪ੍ਰਦਰਸ਼ਨ ਕੀਤਾ, ਜਿਸ ਤੋਂ ਬਾਅਦ ਇਕ ਮਹਿਲਾ ਡਾਕਟਰ ਨੂੰ ਮੁਅੱਤਲ ਕਰ ਦਿੱਤਾ ਗਿਆ।
* ਅਤੇ ਹੁਣ 30 ਜੂਨ ਨੂੰ ਹੀ ‘ਔਰੰਗਾਬਾਦ’ (ਬਿਹਾਰ) ਦੇ ‘ਦਾਊਦ ਨਗਰ ਸਰਕਾਰੀ ਹਸਪਤਾਲ’ ’ਚ ਇਲਾਜ ਅਧੀਨ ਇਕ ਔਰਤ ਨੂੰ ਐਕਸਪਾਇਰਡ (ਖਤਮ ਮਿਆਦ ਵਾਲੀ) ਸਲਾਈਨ ਚੜ੍ਹਾ ਦੇਣ ਨਾਲ ਉਸ ਦੀ ਤਬੀਅਤ ਵਿਗੜ ਗਈ।
ਉਪਰੋਕਤ ਉਦਾਹਰਣਾਂ ਤੋਂ ਸਹਿਜੇ ਹੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਸਾਡੇ ਸਰਕਾਰੀ ਹਸਪਤਾਲ ਕਿਸ ਕਦਰ ਬਦਹਾਲੀ ਦੇ ਸ਼ਿਕਾਰ ਹੋ ਚੁੱਕੇ ਹਨ। ਇਨ੍ਹਾਂ ਦੀ ਅਜਿਹੀ ਦੁਰਦਸ਼ਾ ਯਕੀਨੀ ਤੌਰ ’ਤੇ ਇਕ ਚਿੰਤਾਜਨਕ ਸਮੱਸਿਆ ਹੈ, ਜੋ ਦੂਰ ਹੋਣੀ ਚਾਹੀਦੀ ਹੈ, ਨਹੀਂ ਤਾਂ ਇਸੇ ਤਰ੍ਹਾਂ ਹਸਪਤਾਲਾਂ ’ਚ ਅਣਸੁਖਾਵੀਆਂ ਘਟਨਾਵਾਂ ਹੁੰਦੀਆਂ ਰਹਿਣਗੀਆਂ।
—ਵਿਜੇ ਕੁਮਾਰ
ਸਪੇਨ ਦੁਨੀਆ ਨੂੰ ਰੋਜ਼ਗਾਰ ਦੇ ਰਿਹਾ ਹੈ, ਭਾਰਤ ਆਪਣੇ ਲੋਕਾਂ ਨੂੰ ਕਿਉਂ ਨਹੀਂ ?
NEXT STORY 
