ਆਜ਼ਾਦੀ ਦੇ 78 ਸਾਲਾਂ ਬਾਅਦ ਵੀ ਦੇਸ਼ ਅੰਧਵਿਸ਼ਵਾਸਾਂ, ਵਹਿਮਾਂ-ਭਰਮਾਂ ਅਤੇ ਜਾਦੂ-ਟੂਣੇ ਤੋਂ ਮੁਕਤ ਨਹੀਂ ਹੋ ਸਕਿਆ ਅਤੇ ਲੋਕ ਅੰਧਵਿਸ਼ਵਾਸਾਂ ਦੇ ਜਾਲ ’ਚ ਫਸ ਕੇ ਹੱਤਿਆਵਾਂ ਤੱਕ ਕਰ ਰਹੇ ਹਨ, ਜੋ ਪਿਛਲੇ ਮਹਿਜ਼ 2 ਮਹੀਨਿਆਂ ’ਚ ਸਾਹਮਣੇ ਆਈਆਂ ਹੇਠ ਲਿਖੀਆਂ ਘਟਨਾਵਾਂ ਤੋਂ ਸਪੱਸ਼ਟ ਹੈ :
* 18 ਫਰਵਰੀ, 2026 ਨੂੰ ‘ਗਾਜ਼ੀਆਬਾਦ’ (ਉੱਤਰ ਪ੍ਰਦੇਸ਼) ’ਚ ਤੰਤਰ-ਮੰਤਰ ਦੇ ਚੱਕਰ ’ਚ 2 ਦੋਸਤਾਂ ਨੇ ਮਿਲ ਕੇ ਆਪਣੇ ਹੀ ਇਕ ਦੋਸਤ ਦੀ ਹੱਤਿਆ ਕਰ ਦਿੱਤੀ ਅਤੇ ਸਬੂਤ ਮਿਟਾਉਣ ਲਈ ਲਾਸ਼ ਨੂੰ ਸਾੜ ਦਿੱਤਾ।
* 22 ਫਰਵਰੀ, 2026 ਨੂੰ ‘ਹੁਸ਼ਿਆਰਪੁਰ’ (ਪੰਜਾਬ) ਦੇ ਇਕ ਪਿੰਡ ’ਚ ਇਕ ਵਿਅਕਤੀ ਨੂੰ ਆਪਣੀ ਹੀ ਚਾਚੀ ਦੀ ਹੱਤਿਆ ਦੇ ਦੋਸ਼ ਹੇਠ ਗ੍ਰਿਫਤਾਰ ਕੀਤਾ ਗਿਆ। ਮੁਲਜ਼ਮ ਨੂੰ ਸ਼ੱਕ ਸੀ ਕਿ ਉਸ ਦੀ ਚਾਚੀ ਉਸ ਦੇ ਪਰਿਵਾਰ ’ਤੇ ਕਾਲਾ ਜਾਦੂ ਕਰ ਰਹੀ ਸੀ, ਜਿਸ ਨਾਲ ਉਸ ਦੇ ਪਿਤਾ ਦੀ ਮੌਤ ਹੋਈ ਅਤੇ ਕਾਰੋਬਾਰ ’ਚ ਘਾਟਾ ਪਿਆ।
* 25 ਫਰਵਰੀ, 2026 ਨੂੰ ‘ਗੋਰਖਪੁਰ’ (ਉੱਤਰ ਪ੍ਰਦੇਸ਼) ’ਚ ਤੰਤਰ-ਮੰਤਰ ਅਤੇ ਜਾਦੂ-ਟੂਣੇ ਦੇ ਚੱਕਰ ’ਚ ਫਸੀ ‘ਪੂਜਾ ਮੌਰਿਆ’ ਨਾਂ ਦੀ ਇਕ ਔਰਤ ਨੂੰ ਆਪਣੀ ਸੌਂ ਰਹੀ 3 ਸਾਲਾ ਧੀ ਦਾ ਕੁਹਾੜੀ ਨਾਲ ਸਿਰ ਧੜ ਤੋਂ ਵੱਖ ਕਰ ਦੇਣ ਦੇ ਦੋਸ਼ ਹੇਠ ਗ੍ਰਿਫਤਾਰ ਕੀਤਾ ਗਿਆ।
* 27 ਫਰਵਰੀ, 2026 ਨੂੰ ‘ਗੁਮਲਾ’ (ਝਾਰਖੰਡ) ’ਚ ਜਾਦੂ-ਟੂਣਾ ਕਰਨ ਦੇ ਸ਼ੱਕ ’ਚ ਇਕ ਔਰਤ ਦੀ ਕੁਹਾੜੀ ਨਾਲ ਹੱਤਿਆ ਕਰ ਦਿੱਤੀ ਗਈ।
* 11 ਮਾਰਚ, 2026 ਨੂੰ ‘ਗੌਰੇਲਾ’ (ਛੱਤੀਸਗੜ੍ਹ) ’ਚ ਜਾਦੂ-ਟੂਣਾ ਦੇ ਸ਼ੱਕ ’ਚ ‘ਕੌਸ਼ੱਲਿਆ ਸ਼ਿਆਮ’ ਨਾਂ ਦੀ ਇਕ ਔਰਤ ਦੀ ਬੇਰਹਿਮੀ ਨਾਲ ਹੱਤਿਆ ਕਰਨ ਤੋਂ ਬਾਅਦ ਉਸ ਦੀ ਲਾਸ਼ ਖੂਹ ’ਚ ਸੁੱਟ ਦੇਣ ਦੇ ਦੋਸ਼ ਹੇਠ ਉਸ ਦੇ ਗੁਆਂਢੀ ‘ਬੀਰਪਾਲ’ ਨੂੰ ਗ੍ਰਿਫਤਾਰ ਕੀਤਾ ਗਿਆ। ‘ਬੀਰਪਾਲ’ ਕੁਝ ਸਮਾਂ ਪਹਿਲਾਂ ਹੋਈ ਆਪਣੇ ਬੇਟੇ ਦੀ ਮੌਤ ਲਈ ‘ਕੌਸ਼ੱਲਿਆ ਸ਼ਿਆਮ’ ਵੱਲੋਂ ਕੀਤੇ ਗਏ ਜਾਦੂ-ਟੂਣੇ ਨੂੰ ਜ਼ਿੰਮੇਵਾਰ ਮੰਨਦਾ ਸੀ।
* 12 ਮਾਰਚ, 2026 ਨੂੰ ‘ਬੈਂਗਲੁਰੂ’ (ਕਰਨਾਟਕ) ’ਚ ਇਕ ਰੀਅਲ ਅਸਟੇਟ ਕਾਰੋਬਾਰੀ ‘ਗੋਪਾਲ’ (ਗੋਪੀ) ਦੀ ਹੱਤਿਆ ਕਰ ਦਿੱਤੀ ਗਈ। ਗ੍ਰਿਫਤਾਰ ਕੀਤੇ ਗਏ ਮੁੱਖ ਮੁਲਜ਼ਮ ‘ਮੋਹਨ ਬਾਬੂ’ ਨੇ ਦਾਅਵਾ ਕੀਤਾ ਕਿ ‘ਗੋਪਾਲ’ ਉਸ ’ਤੇ ‘ਕਾਲਾ ਜਾਦੂ’ ਕਰ ਰਿਹਾ ਸੀ, ਜਿਸ ਨਾਲ ਉਸ ਦੀ ਸਿਹਤ ਅਤੇ ਕਾਰੋਬਾਰ ਨੂੰ ਨੁਕਸਾਨ ਪਹੁੰਚ ਰਿਹਾ ਸੀ।
* 15 ਮਾਰਚ, 2026 ਨੂੰ ‘ਮੁੰਬਈ’ ਦੇ ‘ਧਾਰਾਵੀ’ ’ਚ ਇਕ 58 ਸਾਲਾ ਵਿਅਕਤੀ ਨੇ ਉਸ ’ਤੇ ਕਾਲਾ ਜਾਦੂ ਕਰਨ ਦੇ ਸ਼ੱਕ ’ਚ ਆਪਣੀ ਪਤਨੀ ਦੀ ਹੱਤਿਆ ਕਰ ਦਿੱਤੀ।
* 25 ਮਾਰਚ, 2026 ਨੂੰ ‘ਹਜ਼ਾਰੀਬਾਗ’ (ਝਾਰਖੰਡ) ਦੇ ‘ਕੁਸੁੰਭਾ’ ਪਿੰਡ ’ਚ ਇਕ ਔਰਤ ਤਾਂਤਰਿਕ ‘ਸ਼ਾਂਤੀ ਦੇਵੀ’ ਉਰਫ ‘ਭਗਤਿਨੀ’ ਦੇ ਚੱਕਰ ’ਚ ਪਈ ‘ਰੇਸ਼ਮੀ ਦੇਵੀ’ ਨੇ ਆਪਣੇ ਬੇਟੇ ਦੀ ਬੀਮਾਰੀ ਅਤੇ ਘਰੇਲੂ ਸਮੱਸਿਆਵਾਂ ਦੂਰ ਕਰਨ ਲਈ ਆਪਣੀ 13 ਸਾਲਾ ਧੀ ਦੀ ਹੱਤਿਆ ਕਰਕੇ ਉਸ ਦੀ ਲਾਸ਼ ਪਿੰਡ ਦੇ ਸਕੂਲ ਦੇ ਪਿੱਛੇ ਝਾੜੀਆਂ ’ਚ ਸੁੱਟ ਦਿੱਤੀ।
* 5 ਅਪ੍ਰੈਲ, 2026 ਨੂੰ ‘ਠਾਣੇ’ (ਮਹਾਰਾਸ਼ਟਰ) ’ਚ ਕਾਲੇ ਜਾਦੂ ਦਾ ਡਰ ਦਿਖਾ ਕੇ ਇਸ ਤੋਂ ਮੁਕਤੀ ਦਿਵਾਉਣ ਲਈ ‘ਅਘੋਰੀ ਪ੍ਰਥਾਵਾਂ’ (ਤੰਤਰ ਮੰਤਰ) ਦੇ ਵਿਆਪਕ ਅਨੁਸ਼ਠਾਨ ਦਾ ਝਾਂਸਾ ਦੇ ਕੇ ਇਕ ਪਰਿਵਾਰ ਤੋਂ 1.66 ਕਰੋੜ ਰੁਪਏ ਠੱਗਣ ਦੇ ਦੋਸ਼ ਹੇਠ ‘ਮੰਜੂ ਨਾਥ ਸ਼ੈੱਟੀ’ ਨਾਂ ਦੇ ਇਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ।
* 11 ਅਪ੍ਰੈਲ, 2026 ਨੂੰ ‘ਪੱਛਮੀ ਸਿੰਘਭੂਮ’ (ਝਾਰਖੰਡ) ’ਚ ‘ਡਾਇਣ’ ਹੋਣ ਦੇ ਸ਼ੱਕ ’ਚ ਇਕ ਔਰਤ ਅਤੇ ਉਸ ਦੇ 10 ਮਹੀਨਿਆਂ ਦੇ ਬੇਟੇ ਨੂੰ ਜ਼ਿੰਦਾ ਸਾੜ ਕੇ ਮਾਰ ਦੇਣ ਅਤੇ ਉਸ ਦੇ ਪਤੀ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕਰਕੇ ਜ਼ਖਮੀ ਕਰ ਦੇਣ ਦੇ ਦੋਸ਼ ਹੇਠ 4 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ।
* ਅਤੇ ਹੁਣ 13 ਅਪ੍ਰੈਲ, 2026 ਨੂੰ ‘ਇੰਦੌਰ’ (ਮੱਧ ਪ੍ਰਦੇਸ਼) ’ਚ ਕਾਲਾ ਜਾਦੂ ਦੇ ਸ਼ੱਕ ’ਚ ਪੱਥਰ ਮਾਰ-ਮਾਰ ਕੇ ‘ਕ੍ਰਿਸ਼ਨ ਕੁਮਾਰ ਅਹੀਰਵਾਰ’ ਨਾਂ ਦੇ ਇਕ ਵਿਅਕਤੀ ਦੀ ਬੇਰਹਿਮੀ ਨਾਲ ਹੱਤਿਆ ਕਰਨ ਤੋਂ ਬਾਅਦ ਉਸ ਦੀ ਲਾਸ਼ ਇਕ ਖੇਤ ’ਚ ਸੁੱਟ ਦੇਣ ਦੇ ਦੋਸ਼ ਹੇਠ ਪੁਲਸ ਨੇ 3 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ।
ਉਕਤ ਉਦਾਹਰਣਾਂ ਤੋਂ ਸਪੱਸ਼ਟ ਹੈ ਕਿ ਸਮਾਜ ’ਚ ਅਨੇਕਾਂ ਅਜਿਹੇ ਲੋਕ ਮੌਜੂਦ ਹਨ, ਜੋ ਲੋਕਾਂ ਨੂੰ ਤੰਤਰ-ਮੰਤਰ ਅਤੇ ਜਾਦੂ-ਟੂਣੇ ਦੇ ਜਾਲ ’ਚ ਫਸਾ ਕੇ ਉਨ੍ਹਾਂ ਤੋਂ ਹੱਤਿਆ ਤੱਕ ਦੇ ਅਪਰਾਧ ਕਰਵਾ ਰਹੇ ਹਨ। ਇਸ ਲਈ ਜਿੱਥੇ ਲੋਕਾਂ ਨੂੰ ਜਾਗਰੂਕ ਹੋਣ ਅਤੇ ਅਜਿਹੇ ਤੱਤਾਂ ਤੋਂ ਸਾਵਧਾਨ ਰਹਿਣ ਦੀ ਲੋੜ ਹੈ, ਉੱਥੇ ਹੀ ਅਜਿਹੇ ਤੱਤਾਂ ਵਿਰੁੱਧ ਪ੍ਰਸ਼ਾਸਨ ਵੱਲੋਂ ਸਖ਼ਤ ਕਾਰਵਾਈ ਕਰਨ ਦੀ ਵੀ ਬੇਹੱਦ ਲੋੜ ਹੈ।
—ਵਿਜੇ ਕੁਮਾਰ
ਭਾਰਤ ਕਰ ਰਿਹਾ ਜੰਗ ਦੇ ਲੰਬੇ ਸਮੇਂ ਅਤੇ ਗੰਭੀਰ ਪ੍ਰਭਾਵਾਂ ਦਾ ਸਾਹਮਣਾ
NEXT STORY 
