ਅੱਜ ਦੇ ਵਿਗਿਆਨਕ ਯੁੱਗ ’ਚ ਵੀ ਦੇਸ਼ ਅੰਧਵਿਸ਼ਵਾਸਾਂ, ਵਹਿਮਾਂ-ਭਰਮਾਂ ਅਤੇ ਜਾਦੂ-ਟੂਣੇ ਤੋਂ ਮੁਕਤ ਨਹੀਂ ਹੋ ਸਕਿਆ। ਇਕ ਪਾਸੇ ਅਨੇਕਾਂ ਲੋਕ ਅੰਧਵਿਸ਼ਵਾਸਾਂ ਦੇ ਜਾਲ ’ਚ ਫਸ ਕੇ ਕਤਲ ਤੱਕ ਕਰ ਰਹੇ ਹਨ ਅਤੇ ਦੂਜੇ ਪਾਸੇ ਕੁਝ ਢੋਂਗੀ ਤਾਂਤਰਿਕ ਅਤੇ ਬਾਬੇ ਆਦਿ ਜਾਦੂ-ਟੂਣੇ ਰਾਹੀਂ ਲੋਕਾਂ ਦੀਆਂ ਸਮੱਸਿਆਵਾਂ ਹੱਲ ਕਰਨ ਦਾ ਦਾਅਵਾ ਕਰ ਕੇ ਉਨ੍ਹਾਂ ਦਾ ਯੌਨ ਸ਼ੋਸ਼ਣ ਕਰ ਰਹੇ ਹਨ, ਜਿਨ੍ਹਾਂ ਦੀਆਂ ਪਿਛਲੇ ਲਗਭਗ 2 ਮਹੀਨਿਆਂ ’ਚ ਸਾਹਮਣੇ ਆਈਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 9 ਜੁਲਾਈ ਨੂੰ ‘ਪੁਰੂਲੀਆ’ (ਪੱਛਮੀ ਬੰਗਾਲ) ਜ਼ਿਲੇ ਦੇ ‘ਆਂਕਰੋਂ’ ਪਿੰਡ ’ਚ ਇਕ 18 ਸਾਲਾ ਮੁਟਿਆਰ ਤੋਂ ਬੁਰਾ ਸਾਇਆ ਹਟਾਉਣ ਲਈ ਤੰਤਰ-ਮੰਤਰ ਦੇ ਨਾਂ ’ਤੇ ਉਸ ਨੂੰ ਇਕ ਖਾਲੀ ਕਮਰੇ ’ਚ ਲਿਜਾ ਕੇ ਉਸ ਨਾਲ ਜਬਰ-ਜ਼ਨਾਹ ਕਰਨ ਦੇ ਦੋਸ਼ ’ਚ ‘ਸੌਮੈਨ ਗੋਸਵਾਮੀ’ ਨਾਂ ਦੇ ਢੋਂਗੀ ਬਾਬੇ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
* 9 ਅਗਸਤ ਨੂੰ ‘ਆਗਰਾ’ (ਉੱਤਰ ਪ੍ਰਦੇਸ਼) ਦੀ ਪੁਲਸ ਨੇ ਇਕ ਮੁਟਿਆਰ ਦੇ ਘਰ ’ਚ ਚੰਗੇ ਦਿਨ ਲਿਆਉਣ ਲਈ ਉਸ ਦੇ ਸਰੀਰ ਤੋਂ ਭੂਤ ਦਾ ਸਾਇਆ ਦੌੜਾਉਣ ਦਾ ਝਾਂਸਾ ਦੇ ਕੇ ਉਸ ਨਾਲ ਜਬਰ-ਜ਼ਨਾਹ ਕਰਨ ਅਤੇ ਉਸ ਦੀ ਵੀਡੀਓ ਬਣਾ ਕੇ ਬਲੈਕਮੇਲ ਕਰਨ ਦੇ ਦੋਸ਼ ’ਚ ‘ਜੈਪ੍ਰਕਾਸ਼’ ਨਾਂ ਦੇ ਤਾਂਤਰਿਕ ਨੂੰ ਗ੍ਰਿਫ਼ਤਾਰ ਕੀਤਾ।
* 14 ਅਗਸਤ ਨੂੰ ‘ਵਾਰਾਣਸੀ’ (ਉੱਤਰ ਪ੍ਰਦੇਸ਼) ’ਚ ਇਕ ਪਰਿਵਾਰ ਦੇ ਮੈਂਬਰਾਂ ਨੇ ਆਪਣੀ ਗਰੀਬੀ, ਲਗਾਤਾਰ ਬੀਮਾਰੀ ਅਤੇ ‘ਓਪਰੀ ਪਰਛਾਵੇਂ’ ਦੀਆਂ ਸਮੱਸਿਆਵਾਂ ਲਈ ਕਿਸੇ ਵਿਅਕਤੀ ਵੱਲੋਂ ਕੀਤੇ ਜਾਣ ਵਾਲੇ ਤੰਤਰ-ਮੰਤਰ ਨੂੰ ਜ਼ਿੰਮੇਵਾਰ ਮੰਨਦਿਆਂ ਉਸ ਨੂੰ ਆਪਣੇ ਘਰ ਬੁਲਾਇਆ ਅਤੇ ਉਸ ’ਤੇ ਲੋਹੇ ਦੀ ਰਾਡ ਨਾਲ ਹਮਲਾ ਕਰ ਕੇ ਉਸ ਨੂੰ ਮਾਰ ਦਿੱਤਾ। ਪੁਲਸ ਨੇ ਇਸ ਮਾਮਲੇ ’ਚ 6 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ।
* 5 ਸਤੰਬਰ ਨੂੰ ‘ਦੰਤੇਵਾੜਾ’ (ਛੱਤੀਸਗੜ੍ਹ) ਜ਼ਿਲੇ ਦੇ ‘ਅਰਨਪੁਰ’ ਥਾਣਾ ਖੇਤਰ ਦੇ ਅਧੀਨ ‘ਪੋਰਰੋ’ ਪਿੰਡ ’ਚ ਜਾਦੂ-ਟੂਣੇ ਦੇ ਸ਼ੱਕ ’ਚ ਪਿੰਡ ਵਾਸੀਆਂ ਨੇ ਇਕ ਗ੍ਰਾਮੀਣ ਦਾ ਕਤਲ ਕਰ ਦਿੱਤਾ। ਪੁਲਸ ਨੇ ਇਸ ਮਾਮਲੇ ’ਚ 5 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ।
* 5 ਸਤੰਬਰ ਨੂੰ ਹੀ ‘ਦੁਮਕਾ’ (ਝਾਰਖੰਡ) ਦੇ ਇਕ ਪਿੰਡ ’ਚ ਹੋਈਆਂ ਕੁਝ ਅਜੀਬ ਘਟਨਾਵਾਂ ਅਤੇ ਲੋਕਾਂ ਦੀ ਬੀਮਾਰੀ ਲਈ ਇਕ 84 ਸਾਲਾ ਬਜ਼ੁਰਗ ਔਰਤ ਨੂੰ ਜ਼ਿੰਮੇਵਾਰ ਮੰਨ ਕੇ ਅਤੇ ਉਸ ਦੇ ਡੈਣ ਹੋਣ ਦੇ ਸ਼ੱਕ ’ਚ ਉਸ ਦੀ ਕੁੱਟ-ਕੁੱਟ ਕੇ ਘਿਨੌਣੀ ਹੱਤਿਆ ਕਰ ਦੇਣ ਦੇ ਦੋਸ਼ ’ਚ ਪੁਲਸ ਨੇ 6 ਔਰਤਾਂ ਸਮੇਤ ਕਈ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ।
* 10 ਸਤੰਬਰ ਨੂੰ ‘ਗਯਾ ਜੀ’ (ਬਿਹਾਰ) ਜ਼ਿਲੇ ਦੇ ‘ਇਮਾਮਗੰਜ’ ਥਾਣਾ ਖੇਤਰ ਦੇ ਅਧੀਨ ‘ਕੁਈਬਾਰ’ ਪਿੰਡ ’ਚ ਇਕ ਨੌਜਵਾਨ ਨੇ ਆਪਣੇ ਹੀ ਪਿਤਾ ਦਾ ਬੇਰਹਿਮੀ ਨਾਲ ਕਤਲ ਕਰਨ ਤੋਂ ਬਾਅਦ ਲਾਸ਼ ਨੂੰ ਨੇੜਲੇ ਜੰਗਲ ’ਚ ਲਿਜਾ ਕੇ ਸਾੜ ਦਿੱਤਾ। ਪੁਲਸ ਅਨੁਸਾਰ ਨੌਜਵਾਨ ਆਪਣੇ ਪਿਤਾ ’ਤੇੇ ਜਾਦੂ-ਟੂਣਾ ਕਰਨ ਦਾ ਸ਼ੱਕ ਕਰਦਾ ਸੀ।
* 12 ਸਤੰਬਰ ਨੂੰ ‘ਨਾਗਪੁਰ’ (ਮਹਾਰਾਸ਼ਟਰ) ’ਚ ਇਕ 72 ਸਾਲਾ ਬਜ਼ੁਰਗ ‘ਨੱਥੂਮਲ ਭਗਵਾਨ ਪਾਲੀ’ ਨੇ ਆਪਣੀ 42 ਸਾਲਾ ਨੂੰਹ ‘ਲਕਸ਼ਮੀ’ ਦੇ ਸਿਰ ’ਤੇ ਕੁਲਹਾੜੀ ਨਾਲ ਵਾਰ ਕਰ ਕੇ ਉਸ ਨੂੰ ਮਾਰ ਦਿੱਤਾ। ਪੁਲਸ ਅਨੁਸਾਰ ‘ਨੱਥੂਮਲ ਭਗਵਾਨ ਪਾਲੀ’ ਨੂੰ ਸ਼ੱਕ ਸੀ ਕਿ ‘ਲਕਸ਼ਮੀ’ ਉਸ ਦੇ ਪੁੱਤਰ ‘ਰਵੀਸ਼ੰਕਰ’ ’ਤੇ ਕਾਲਾ ਜਾਦੂ ਕਰਦੀ ਸੀ, ਜਿਸ ਦੇ ਸਿੱਟੇ ਵਜੋਂ ਉਸ ਦੇ ਪੁੱਤਰ ‘ਰਵੀਸ਼ੰਕਰ’ ਦੀ 2019 ’ਚ ਮੌਤ ਹੋ ਗਈ।
* 15 ਸਤੰਬਰ ਨੂੰ ‘ਪੱਛਮੀ ਸਿੰਘਭੂਮ’ (ਝਾਰਖੰਡ) ਜ਼ਿਲੇ ਦੇ ‘ਸਦਾਬੁਰੂ-ਪਾਸੂਬੇਦਾ’ ਪਿੰਡ ’ਚ ‘ਸ਼ੰਕਰਣ ਸੁਰੀਨ’ ਨਾਂ ਦੀ ਇਕ 58 ਸਾਲਾ ਔਰਤ ਨੂੰ ਜੰਗਲ ’ਚ ਲਿਜਾ ਕੇ ਪੱਥਰਾਂ ਨਾਲ ਕੁਚਲ ਕੇ ਮਾਰ ਦਿੱਤਾ ਗਿਆ। ਇਸ ਸੰਬੰਧ ’ਚ ਗ੍ਰਿਫ਼ਤਾਰ ਕੀਤੇ ਗਏ ਮੋਬਾਈਲ ਟਾਵਰ ਲਗਾਉਣ ਦਾ ਕੰਮ ਕਰਨ ਵਾਲੇ ਦੋ ਮੁਲਜ਼ਮਾਂ ਨੂੰ ਸ਼ੱਕ ਸੀ ਕਿ ‘ਸ਼ੰਕਰਣ ਸੁਰੀਨ’ ਡੈਣ ਹੈ ਅਤੇ ਉਹ ਉਨ੍ਹਾਂ ਨੂੰ ਟਾਵਰ ਤੋਂ ਡਿੱਗ ਕੇ ਮਰ ਜਾਣ ਦਾ ਸਰਾਪ ਦਿੰਦੀ ਸੀ।
* 17 ਸਤੰਬਰ ਨੂੰ ‘ਖਰਗੋਨ’ (ਮੱਧ ਪ੍ਰਦੇਸ਼) ਦੇ ‘ਝਿਰਨਿਆ’ ਖੇਤਰ ਦੇ ਕਈ ਪਿੰਡਾਂ ਤੋਂ ਲੰਘਣ ਵਾਲੀ ਸੜਕ ’ਤੇ ਹਲਦੀ, ਚੂਨੇ ਅਤੇ ਸਿੰਧੂਰ ਨਾਲ ਬਣਾਈ ਚੌਕੜੀ, ਜਿੱਥੇ ਕੁਝ ਚੂੜੀਆਂ ਅਤੇ ਕਾਗਜ਼ ਵੀ ਰੱਖੇ ਹੋਏ ਸਨ, ਦੇ ਨੇੜੇ ‘ਮੌਤ’ ਲਿਖਿਆ ਦੇਖ ਕੇ ਉੱਥੋਂ ਲੰਘਣ ਵਾਲੇ ਲੋਕਾਂ ’ਚ ਦਹਿਸ਼ਤ ਫੈਲ ਗਈ ਅਤੇ ਲੋਕਾਂ ਨੇ ਕਾਲੇ ਜਾਦੂ ਜਾਂ ਜਾਦੂ-ਟੂਣੇ ਦੇ ਸ਼ੱਕ ’ਚ ਉੱਥੋਂ ਰਸਤਾ ਬਦਲ ਲਿਆ।
ਹਾਲਾਂਕਿ ਬਿਹਾਰ, ਕਰਨਾਟਕ, ਝਾਰਖੰਡ, ਅਸਾਮ, ਛੱਤੀਸਗੜ੍ਹ, ਓਡਿਸ਼ਾ, ਮਹਾਰਾਸ਼ਟਰ, ਰਾਜਸਥਾਨ ਆਦਿ ’ਚ ਅੰਧਵਿਸ਼ਵਾਸਾਂ ’ਤੇ ਰੋਕ ਦੇ ਸੰਬੰਧ ’ਚ ਕਾਨੂੰਨ ਤਾਂ ਬਣਾਏ ਗਏ ਹਨ, ਪਰ ਉਨ੍ਹਾਂ ’ਚ ਕੋਈ ਨਾ ਕੋਈ ਕਮੀ ਹੋਣ ਕਾਰਨ ਲਗਾਤਾਰ ਅਜਿਹੇ ਅਪਰਾਧ ਹੋ ਰਹੇ ਹਨ।
ਇਸ ਲਈ ਜਿੱਥੇ ਲੋਕਾਂ ਨੂੰ ਅੰਧਵਿਸ਼ਵਾਸਾਂ ਦੇ ਪ੍ਰਭਾਵ ਤੋਂ ਮੁਕਤ ਕਰਨ ਲਈ ਜਾਗਰੂਕਤਾ ਮੁਹਿੰਮ ਚਲਾਉਣ ਦੀ ਲੋੜ ਹੈ, ਉੱਥੇ ਹੀ ਅਜਿਹੇ ਮਾਮਲਿਆਂ ’ਚ ਸ਼ਾਮਲ ਲੋਕਾਂ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾ ਦੇਣ ਦੀ ਵੀ ਜ਼ਰੂਰਤ ਹੈ।
—ਵਿਜੇ ਕੁਮਾਰ
ਹੁਣ ਯੂਨਾਈਟਿਡ ਨਹੀਂ? ਯੂ. ਕੇ. ਤੋਂ ਆਜ਼ਾਦੀ ਦੀ ਮੰਗ
NEXT STORY 
