ਨਵੀਂ ਦਿੱਲੀ, (ਭਾਸ਼ਾ)– ਜਨਤਕ ਖੇਤਰ ਦੀ ਇੰਜੀਨੀਅਰਿੰਗ ਕੰਪਨੀ ਬੀ. ਐੱਚ. ਈ. ਐੱਲ. ਦਾ ਏਕੀਕ੍ਰਿਤ ਸ਼ੁੱਧ ਲਾਭ ਚਾਲੂ ਮਾਲੀ ਸਾਲ ਦੀ ਅਕਤੂਬਰ-ਦਸੰਬਰ ਤਿਮਾਹੀ ’ਚ ਦੁਗਣੇ ਤੋਂ ਵੱਧ ਹੋ ਕੇ 134.70 ਕਰੋੜ ਰੁਪਏ ਰਿਹਾ ਹੈ। ਕੰਪਨੀ ਨੇ ਦੱਸਿਆ ਕਿ ਉਸ ਦੀ ਆਮਦਨ ’ਚ ਵਾਧੇ ਦੇ ਕਾਰਨ ਉਸ ਦਾ ਮੁਨਾਫਾ ਵਧਿਆ ਹੈ। ਪਿਛਲੇ ਮਾਲੀ ਸਾਲ ਦੀ ਇਸੇ ਤਿਮਾਹੀ ’ਚ ਕੰਪਨੀ ਦਾ ਸ਼ੁੱਧ ਲਾਭ 60.13 ਕਰੋੜ ਰੁਪਏ ਰਿਹਾ ਸੀ। ਬੀ. ਐੱਚ. ਈ. ਐੱਲ. ਨੇ ਦੱਸਿਆ ਕਿ ਉਸ ਦੀ ਕੁੱਲ ਆਮਦਨ ਸਮੀਖਿਆ ਅਧੀਨ ਤਿਮਾਹੀ ’ਚ 7,385 ਕਰੋੜ ਰੁਪਏ ਰਹੀ, ਜੋ ਪਿਛਲੇ ਮਾਲੀ ਸਾਲ ਦੀ ਇਸੇ ਤਿਮਾਹੀ ’ਚ 5,599.63 ਕਰੋੜ ਰੁਪਏ ਰਹੀ ਸੀ।
ਉੱਧਰ ਦਵਾਈ ਬਣਾਉਣ ਵਾਲੀ ਮੁੱਖ ਕੰਪਨੀ ਸਿਪਲਾ ਦਾ 31 ਦਸੰਬਰ 2024 ਨੂੰ ਖਤਮ ਚਾਲੂ ਮਾਲੀ ਸਾਲ ਦੀ ਤੀਜੀ ਤਿਮਾਹੀ ਦਾ ਏਕੀਕ੍ਰਿਤ ਸ਼ੁੱਧ ਲਾਭ 48.73 ਫੀਸਦੀ ਵਧ ਕੇ 1,570.51 ਕਰੋੜ ਰੁਪਏ ’ਤੇ ਪਹੁੰਚ ਗਿਆ। ਸਿਪਲਾ ਨੇ ਦੱਸਿਆ ਕਿ ਉਸ ਦਾ ਸੰਚਾਲਨ ਮਾਲੀਆ ਸਾਲਾਨਾ ਆਧਾਰ ’ਤੇ 6,603.81 ਕਰੋੜ ਤੋਂ ਵੱਧ ਕੇ 7,072.97 ਕਰੋੜ ਰੁਪਏ ਹੋ ਗਿਆ।
ਸੁਜ਼ਲਾਨ ਐਨਰਜੀ ਦਾ ਮੁਨਾਫਾ 91 ਫੀਸਦੀ ਵਧਿਆ
ਅਕਸ਼ੈ ਊਰਜਾ ਹੱਲ ਪ੍ਰਦਾਤਾ ਕੰਪਨੀ ਸੁਜ਼ਲਾਨ ਐਨਰਜੀ ਦਾ ਮੁਨਾਫਾ 91 ਫੀਸਦੀ ਵਧ ਕੇ 388 ਕਰੋੜ ਰੁਪਏ ਰਿਹਾ ਹੈ। ਕੰਪਨੀ ਅਨੁਸਾਰ ਕੰਪਨੀ ਦਾ ਸ਼ੁੱਧ ਮਾਲੀਆ ਇਕ ਸਾਲ ਪਹਿਲਾਂ ਦੀ ਇਸੇ ਮਿਆਦ ਦੇ 1,553 ਕਰੋੜ ਤੋਂ ਵੱਧ ਕੇ 2,969 ਕਰੋੜ ਰੁਪਏ ਹੋ ਗਿਆ। ਕੰਪਨੀ ਨੇ ਅਕਤੂਬਰ-ਦਸੰਬਰ 2024 ’ਚ 447 ਮੈਗਾਵਾਟ ਦੀ ਰਿਕਾਰਡ ਤਿਮਾਹੀ ਡਿਲਿਵਰੀ ਵੀ ਹਾਸਲ ਕੀਤੀ।
ਸੁਜ਼ਲਾਨ ਗਰੁੱਪ ਦੇ ਵਾਈਸ ਚੇਅਰਮੈਨ ਗਿਰੀਸ਼ ਤਾਂਤੀ ਨੇ ਕਿਹਾ,‘ਇਹ ਰਣਨੀਤਕ ਬਦਲਾਅ ਮੰਗ ਨੂੰ ਵਧਾ ਰਿਹਾ ਹੈ, ਜਿਸ ਨਾਲ ਸੁਜ਼ਲਾਨ ਨੂੰ ਹਰਿਤ ਊਰਜਾ ਇੱਛਾਵਾਂ ਨੂੰ ਅੱਗੇ ਵਧਾਉਣ ਵਾਲੇ ਕਾਰੋਬਾਰਾਂ ਲਈ ਇਕ ਭਰੋਸੇਯੋਗ ਭਾਈਵਾਲ ਦੇ ਰੂਪ ’ਚ ਸਥਾਪਿਤ ਕੀਤਾ ਹੈ। ਇਸ ਨਾਲ ਨਵਿਆਉਣਯੋਗ ਊਰਜਾ ਖੇਤਰ ਦੇ ਵਿਕਾਸ ਨੂੰ ਗਤੀ ਮਿਲ ਰਹੀ ਹੈ।’
ਕੋਲਗੇਟ-ਪਾਮੋਲਿਵ ਦਾ ਮੁਨਾਫਾ ਘਟਿਆ
ਕੋਲਗੇਟ-ਪਾਮੋਲਿਵ ਇੰਡੀਆ ਲਿਮਟਿਡ (ਸੀ. ਪੀ. ਆਈ. ਐੱਲ.) ਦਾ ਮੁਨਾਫਾ 2.22 ਫੀਸਦੀ ਘਟ ਕੇ 322.78 ਕਰੋੜ ਰੁਪਏ ਰਿਹਾ ਹੈ। ਕੰਪਨੀ ਨੇ ਦੱਸਿਆ ਕਿ ਮੁਨਾਫੇ ’ਚ ਇਹ ਗਿਰਾਵਟ ਸ਼ਹਿਰੀ ਬਾਜ਼ਾਰ ’ਚ ਮੰਗ ਘਟਣ ਅਤੇ ਪਿਛਲੇ ਸਾਲ ਦੇ ਉੱਚ ਆਧਾਰ ਪ੍ਰਭਾਵ ਦੇ ਕਾਰਨ ਆਈ ਹੈ। ਉਸ ਦੀ ਵਿਕਰੀ 4.74 ਫੀਸਦੀ ਵਧ ਕੇ 1,452.21 ਕਰੋੜ ਰੁਪਏ ਰਹੀ ਹੈ।
ਸਮੀਖਿਆ ਅਧੀਨ ਤਿਮਾਹੀ ’ਚ ਕੰਪਨੀ ਦਾ ਕੁੱਲ ਖਰਚਾ 8.2 ਫੀਸਦੀ ਵਧ ਕੇ 1,049.72 ਕਰੋੜ ਰੁਪਏ ਰਿਹਾ ਹੈ। ਸੀ. ਪੀ. ਆਈ. ਐੱਲ. ਦੀ ਕੁੱਲ ਆਮਦਨੀ (ਹੋਰ ਆਮਦਨ ਸਮੇਤ) ਦਸੰਬਰ ਤਿਮਾਹੀ ’ਚ 4.86 ਫੀਸਦੀ ਵਧ ਕੇ 1,482.24 ਕਰੋੜ ਰੁਪਏ ਰਹੀ ਹੈ।
ਦੁਨੀਆ ਦੀਆਂ 500 ਸਭ ਤੋਂ ਅਮੀਰ ਹਸਤੀਆਂ ਦੇ ਇਕ ਦਿਨ ’ਚ ਡੁੱਬੇ 108 ਅਰਬ ਡਾਲਰ
NEXT STORY 
