ਮੁੰਬਈ - ਫਿਲਮ ਇੰਡਸਟਰੀ 'ਚ 'ਕਾਸਟਿੰਗ ਕਾਊਚ' ਦੀਆਂ ਘਟਨਾਵਾਂ ਅਕਸਰ ਸੁਰਖੀਆਂ 'ਚ ਰਹਿੰਦੀਆਂ ਹਨ। ਹੁਣ ਬਾਲੀਵੁੱਡ ਅਦਾਕਾਰਾ ਡੇਜ਼ੀ ਸ਼ਾਹ ਨੇ ਆਪਣੇ ਕਰੀਅਰ ਦੇ ਸ਼ੁਰੂਆਤੀ ਦਿਨਾਂ ਦਾ ਇਕ ਹੈਰਾਨ ਕਰਨ ਵਾਲਾ ਤਜ਼ਰਬਾ ਸਾਂਝਾ ਕੀਤਾ ਹੈ। ਅਦਾਕਾਰਾ ਨੇ ਖੁਲਾਸਾ ਕੀਤਾ ਹੈ ਕਿ ਕਿਵੇਂ ਇਕ ਸਾਊਥ ਇੰਡੀਅਨ ਫਿਲਮਮੇਕਰ ਨੇ ਮੁੰਬਈ 'ਚ ਆਡੀਸ਼ਨ ਦੌਰਾਨ ਉਸ ਨਾਲ ਬਦਸਲੂਕੀ ਕੀਤੀ ਸੀ।
ਡੇਜ਼ੀ ਸ਼ਾਹ ਨੇ ਦੱਸਿਆ ਕਿ ਇਹ ਘਟਨਾ ਉਸ ਦੇ ਬਾਲੀਵੁੱਡ ਡੈਬਿਊ ਤੋਂ ਕਾਫੀ ਸਮਾਂ ਪਹਿਲਾਂ ਦੀ ਹੈ। ਇਕ ਸਾਊਥ ਫਿਲਮਮੇਕਰ ਕਾਸਟਿੰਗ ਲਈ ਮੁੰਬਈ ਆਇਆ ਸੀ ਅਤੇ ਉਸ ਨੇ ਡੇਜ਼ੀ ਸਮੇਤ 6-7 ਕੁੜੀਆਂ ਨੂੰ ਮਿਲਣ ਲਈ ਬੁਲਾਇਆ ਸੀ। ਅਦਾਕਾਰਾ ਮੁਤਾਬਕ, ਉਹ ਫਿਲਮਮੇਕਰ ਸਾਰੀਆਂ ਕੁੜੀਆਂ ਨੂੰ ਵੱਖੋ-ਵੱਖਰੇ ਤੌਰ 'ਤੇ ਮਿਲ ਰਿਹਾ ਸੀ। ਜਦੋਂ ਡੇਜ਼ੀ ਦੀ ਵਾਰੀ ਆਈ ਤਾਂ ਉਸ ਫਿਲਮਮੇਕਰ ਨੇ ਉਸ ਨੂੰ ਗਲਤ ਤਰੀਕੇ ਨਾਲ ਛੂਹਿਆ ਅਤੇ ਉਸ ਦਾ ਹੱਥ ਫੜ ਲਿਆ, ਜਿਸ ਕਾਰਨ ਉਹ ਕਾਫੀ ਅਸਹਿਜ ਮਹਿਸੂਸ ਕਰਨ ਲੱਗੀ।
ਆਪਣੇ ਇਸ ਕੌੜੇ ਤਜ਼ਰਬੇ ਬਾਰੇ ਗੱਲ ਕਰਦਿਆਂ ਡੇਜ਼ੀ ਨੇ ਕਿਹਾ, "ਮੈਂ ਹਮੇਸ਼ਾ ਤੋਂ ਲੋਕਾਂ ਦੇ ਛੂਹਣ ਤੋਂ ਡਰਦੀ ਰਹੀ ਹਾਂ। ਮੈਂ ਮਸਾਜ ਵੀ ਇਸ ਲਈ ਨਹੀਂ ਕਰਵਾਉਂਦੀ ਕਿਉਂਕਿ ਮੈਨੂੰ ਕਿਸੇ ਦਾ ਛੂਹਣਾ ਪਸੰਦ ਨਹੀਂ ਹੈ, ਫਿਰ ਚਾਹੇ ਉਹ ਕੋਈ ਔਰਤ ਹੀ ਕਿਉਂ ਨਾ ਹੋਵੇ"। ਉਸ ਨੇ ਅੱਗੇ ਦੱਸਿਆ ਕਿ ਉਸ ਸਮੇਂ ਉਸ ਨੇ ਫਿਲਮਮੇਕਰ ਨੂੰ ਕਿਹਾ ਕਿ ਉਹ ਬਾਅਦ 'ਚ ਦੱਸੇਗੀ, ਪਰ ਉਸ ਨੇ ਉਸ ਨੂੰ ਕਦੇ ਕੋਈ ਜਵਾਬ ਨਹੀਂ ਦਿੱਤਾ। ਹਾਲਾਂਕਿ, ਅਦਾਕਾਰਾ ਨੇ ਉਸ ਫਿਲਮਮੇਕਰ ਦੇ ਨਾਂ ਦਾ ਖੁਲਾਸਾ ਨਹੀਂ ਕੀਤਾ ਹੈ।
ਡੇਜ਼ੀ ਸ਼ਾਹ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੋਰੀਓਗ੍ਰਾਫਰ ਗਣੇਸ਼ ਅਚਾਰੀਆ ਦੀ ਅਸਿਸਟੈਂਟ ਵਜੋਂ ਕੀਤੀ ਸੀ। ਉਸ ਨੇ ਕੰਨੜ ਸਿਨੇਮਾ 'ਚ 'ਭਦਰਾ' ਅਤੇ 'ਬਾਡੀਗਾਰਡ' ਵਰਗੀਆਂ ਫਿਲਮਾਂ 'ਚ ਕੰਮ ਕੀਤਾ। ਬਾਲੀਵੁੱਡ 'ਚ ਉਸ ਨੂੰ ਸਲਮਾਨ ਖਾਨ ਦੀ ਫਿਲਮ 'ਜੈ ਹੋ' ਤੋਂ ਵੱਡੀ ਪਛਾਣ ਮਿਲੀ। ਇਸ ਤੋਂ ਇਲਾਵਾ ਉਹ 'ਹੇਟ ਸਟੋਰੀ 3' ਅਤੇ ਹਾਲ ਹੀ 'ਚ ਵੈੱਬ ਸੀਰੀਜ਼ 'ਰੈੱਡ ਰੂਮ' 'ਚ ਵੀ ਨਜ਼ਰ ਆਈ ਹੈ।
ਡੇਜ਼ੀ ਸ਼ਾਹ ਜਲਦ ਹੀ ਪਲਾਸ਼ ਮੁੱਛਲ ਦੇ ਨਿਰਦੇਸ਼ਨ ਹੇਠ ਬਣ ਰਹੀ ਇਕ ਥ੍ਰਿਲਰ ਫਿਲਮ 'ਚ ਮੁੱਖ ਭੂਮਿਕਾ ਨਿਭਾਉਂਦੀ ਨਜ਼ਰ ਆਵੇਗੀ, ਜਿਸ 'ਚ ਸ਼੍ਰੇਅਸ ਤਲਪੜੇ ਵੀ ਅਹਿਮ ਭੂਮਿਕਾ 'ਚ ਹਨ।
ਮੁੰਬਈ ਇੰਡੀਅਨਜ਼ 'ਤੇ ਪੰਜਾਬ ਕਿੰਗਜ਼ ਦੀ ਜਿੱਤ ਮਗਰੋਂ 7ਵੇਂ ਆਸਮਾਨ ਪੁੱਜੀ ਪ੍ਰੀਟੀ ਜ਼ਿੰਟਾ, ਕਿਹਾ...
NEXT STORY 
