ਵੈੱਬ ਡੈਸਕ : ਵਿਗਿਆਨੀਆਂ ਨੇ ਇੱਕ ਅਜਿਹਾ ਵਿਗਿਆਨਕ ਟੂਲ ਵਿਕਸਿਤ ਕੀਤਾ ਹੈ ਜਿਸ ਨਾਲ ਇਹ ਪਤਾ ਲਗਾਇਆ ਜਾ ਸਕਦਾ ਹੈ ਕਿ ਕਿਸੇ ਇਨਸਾਨ ਦੀ ਬਾਇਓਲੋਜੀਕਲ ਮੌਤ ਕਦੋਂ ਹੋਵੇਗੀ। ਹਾਰਵਰਡ ਮੈਡੀਕਲ ਸਕੂਲ ਤੇ ਜਪਾਨ ਦੀ ਤੋਹੋਕੂ ਯੂਨੀਵਰਸਿਟੀ ਦੇ ਖੋਜਕਰਤਾਵਾਂ ਦੀ ਅਗਵਾਈ ਵਿਚ ਕੀਤੀ ਗਈ ਇਹ ਸਟੱਡੀ ਪ੍ਰਸਿੱਧ 'ਨੇਚਰ' ਜਰਨਲ ਵਿਚ ਪ੍ਰਕਾਸ਼ਿਤ ਹੋਈ ਹੈ। ਇਸ ਨਵੀਂ ਤਕਨੀਕ ਨੂੰ ਵਿਗਿਆਨ ਤੇ ਤਕਨੀਕ ਦੀ ਦੁਨੀਆ ਵਿਚ ਇੱਕ ਬਹੁਤ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।
ਕੀ ਹੈ ਇਹ 'ਟ੍ਰਾਂਸਕ੍ਰਿਪਟੋਮਿਕ ਕਲੌਕ' ਟੂਲ?
ਹੁਣ ਤੱਕ ਅਸੀਂ ਆਪਣੀ ਉਮਰ ਦਾ ਅੰਦਾਜ਼ਾ ਜਨਮ ਤੋਂ ਬੀਤੇ ਸਾਲਾਂ (ਕ੍ਰੋਨੋਲੋਜੀਕਲ ਉਮਰ) ਤੋਂ ਲਗਾਉਂਦੇ ਹਾਂ ਪਰ ਇਹ ਨਵਾਂ ਟੂਲ, ਜਿਸ ਨੂੰ 'ਟ੍ਰਾਂਸਕ੍ਰਿਪਟੋਮਿਕ ਕਲੌਕ' ਕਿਹਾ ਜਾਂਦਾ ਹੈ, ਸਾਡੇ ਸਰੀਰ ਦੀਆਂ ਕੋਸ਼ਿਕਾਵਾਂ ਦੇ ਕੰਮ ਕਰਨ ਦੇ ਤਰੀਕੇ ਦੇ ਅਧਾਰ 'ਤੇ ਬਾਇਓਲੋਜੀਕਲ ਉਮਰ ਨੂੰ ਮਾਪਦਾ ਹੈ।
ਇਸ ਟੂਲ ਨੂੰ ਵਿਕਸਿਤ ਕਰਨ ਲਈ ਵਿਗਿਆਨੀਆਂ ਨੇ ਚੂਹਿਆਂ, ਬਾਂਦਰਾਂ ਅਤੇ ਇਨਸਾਨਾਂ ਦੇ ਲਗਭਗ 11,000 ਜੀਨ ਐਕਸਪ੍ਰੈਸ਼ਨ ਪ੍ਰੋਫਾਈਲ (ਟ੍ਰਾਂਸਕ੍ਰਿਪਟੋਮਸ) ਦੀ ਡੂੰਘਾਈ ਨਾਲ ਸਟੱਡੀ ਕੀਤੀ। ਸਰੀਰ ਦੇ 25 ਵੱਖ-ਵੱਖ ਟਿਸ਼ੂਆਂ ਦੀ ਜਾਂਚ ਕੀਤੀ ਤਾਂ ਜੋ ਇਹ ਸਮਝਿਆ ਜਾ ਸਕੇ ਕਿ ਉਮਰ ਵਧਣ ਨਾਲ ਕਿਹੜੇ ਜੀਨ ਸਰਗਰਮ ਜਾਂ ਨਿਸ਼ਕਿਰਿਆ ਹੁੰਦੇ ਹਨ।
ਕੋਸ਼ਿਕਾਵਾਂ ਕਿਵੇਂ ਦਿੰਦੀਆਂ ਹਨ ਮੌਤ ਦਾ ਸੰਕੇਤ?
ਅਧਿਐਨ ਦੌਰਾਨ ਵਿਗਿਆਨੀਆਂ ਨੇ ਦੇਖਿਆ ਕਿ ਉਮਰ ਵਧਣ ਦੇ ਨਾਲ ਵੱਖ-ਵੱਖ ਕੋਸ਼ਿਕਾਵਾਂ ਵਿਚ ਇੱਕੋ ਜਿਹੇ ਮੌਲੀਕਿਊਲਰ ਬਦਲਾਅ ਆਉਂਦੇ ਹਨ। ਖੋਜ ਦੇ ਮੁੱਖ ਲੇਖਕ ਅਲੇਕਜ਼ੈਂਡਰ ਤਿਆਸ਼ਕੋਵਸਕੀ ਅਨੁਸਾਰ, ਜਿਨ੍ਹਾਂ ਕੋਸ਼ਿਕਾਵਾਂ ਵਿਚ ਸਿਹਤਮੰਦ ਕੋਸ਼ਿਕਾ ਵੰਡ ਤੇ ਜ਼ਖਮ ਭਰਨ ਵਾਲੇ ਜੀਨ ਸਰਗਰਮ ਸਨ, ਉਹ ਹੌਲੀ ਗਤੀ ਨਾਲ ਬੁੱਢੇ ਹੋ ਰਹੇ ਸਨ। ਇਸਦੇ ਉਲਟ, ਜਿਨ੍ਹਾਂ ਵਿਚ ਸੋਜ ਅਤੇ ਕੋਸ਼ਿਕਾ ਦੀ ਮੌਤ ਨਾਲ ਜੁੜੇ ਜੀਨ ਜ਼ਿਆਦਾ ਸਰਗਰਮ ਪਾਏ ਗਏ, ਉਹ ਤੇਜ਼ੀ ਨਾਲ ਬੁਢਾਪੇ ਅਤੇ ਮੌਤ ਵੱਲ ਵਧ ਰਹੇ ਸਨ।
ਇਹ 'ਏਜਿੰਗ ਕਲੌਕਸ' ਭਵਿੱਖ ਵਿਚ ਇਲਾਜ ਦੇ ਤਰੀਕਿਆਂ ਨੂੰ ਬਦਲ ਸਕਦੀਆਂ ਹਨ, ਜਿਸ ਨਾਲ ਡਾਕਟਰ ਮਰੀਜ਼ ਦੀ ਜੈਵਿਕ ਉਮਰ ਅਨੁਸਾਰ ਉਸਦਾ ਨਿੱਜੀ ਇਲਾਜ ਕਰ ਸਕਣਗੇ। ਇਸਦੀ ਮਦਦ ਨਾਲ ਬੁਢਾਪਾ ਰੋਕਣ ਵਾਲੀਆਂ ਦਵਾਈਆਂ ਦਾ ਅਸਰ ਦੇਖਣ ਲਈ ਹੁਣ ਸਾਲਾਂ ਜਾਂ ਦਹਾਕਿਆਂ ਤੱਕ ਇੰਤਜ਼ਾਰ ਨਹੀਂ ਕਰਨਾ ਪਵੇਗਾ।
ਵਿਗਿਆਨੀਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਟੂਲ ਫਿਲਹਾਲ ਸਿਰਫ ਇੱਕ ਖੋਜ ਟੂਲ ਹੈ। ਇਹ ਸਿਰਫ ਕੁਦਰਤੀ ਮੌਤ ਜਾਂ ਬਿਮਾਰੀ ਕਾਰਨ ਹੋਣ ਵਾਲੀ ਮੌਤ ਦਾ ਅੰਦਾਜ਼ਾ ਲਗਾ ਸਕਦਾ ਹੈ, ਇਹ ਕਿਸੇ ਸੜਕ ਹਾਦਸੇ ਜਾਂ ਅਚਾਨਕ ਹੋਣ ਵਾਲੀ ਆਫ਼ਤ ਦੀ ਭਵਿੱਖਬਾਣੀ ਨਹੀਂ ਕਰ ਸਕਦਾ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਇੰਡੀਅਨ ਡਰੈੱਸ ’ਚ ਛਾਇਆ ਮਲਟੀਕਲਰ ਦਾ ਟ੍ਰੈਂਡ
NEXT STORY 
