ਮੈਲਬੌਰਨ (ਮਨਦੀਪ ਸਿੰਘ ਸੈਣੀ)- ਆਸਟ੍ਰੇਲੀਆ ਭਰ ਵਿੱਚ ਹਰ ਪੰਜ ਸਾਲ ਬਾਅਦ ਕਰਵਾਈ ਜਾਣ ਵਾਲੀ ਰਾਸ਼ਟਰੀ ਮਰਦਮਸ਼ੁਮਾਰੀ ਇਸ ਵਾਰ 11 ਅਗਸਤ 2026 ਨੂੰ ਹੋਣ ਜਾ ਰਹੀ ਹੈ, ਜਿਸ ਤਹਿਤ ਮੁਲਕ ਭਰ ਦੇ ਵਸਨੀਕਾਂ ਦੀ ਗਿਣਤੀ ਦਰਜ ਕੀਤੀ ਜਾਵੇਗੀ। ਆਸਟ੍ਰੇਲੀਆਈ ਅੰਕੜਾ ਵਿਭਾਗ ਵੱਲੋਂ ਕੌਮੀ ਪੱਧਰ 'ਤੇ ਕਰਵਾਈ ਜਾ ਰਹੀ ਇਸ ਜਨਗਣਨਾ ਦੇ ਹਦਾਇਤ ਪੱਤਰ ਅਤੇ ਆਨਲਾਈਨ 'ਐਕਸੈਸ ਕੋਡ' ਜੁਲਾਈ ਦੇ ਅਖੀਰ ਤੋਂ ਘਰਾਂ ਵਿੱਚ ਪਹੁੰਚਣੇ ਸ਼ੁਰੂ ਹੋ ਜਾਣਗੇ, ਜਿਸ ਤੋਂ ਬਾਅਦ ਜ਼ਿਆਦਾਤਰ ਨਾਗਰਿਕ ਆਨਲਾਈਨ ਫਾਰਮ ਭਰਨਗੇ। ਇਹ ਫਾਰਮ ਆਸਟ੍ਰੇਲੀਆ ਵਿੱਚ ਰਹਿ ਰਹੇ ਹਰ ਵਸਨੀਕ ਲਈ ਭਰਨਾ ਲਾਜ਼ਮੀ ਹੈ, ਭਾਵੇਂ ਉਹ ਉੱਥੋਂ ਦਾ ਪੱਕਾ ਨਾਗਰਿਕ ਹੋਵੇ, ਪੱਕਾ ਵਸਨੀਕ ਹੋਵੇ ਜਾਂ ਫਿਰ ਕਿਸੇ ਵੀ ਅਸਥਾਈ ਵੀਜ਼ੇ 'ਤੇ ਆਸਟ੍ਰੇਲੀਆ ਵਿੱਚ ਰਹਿ ਰਿਹਾ ਹੋਵੇ। ਜੇਕਰ ਆਨਲਾਈਨ ਫਾਰਮ ਭਰਨ ਵਿੱਚ ਕੋਈ ਸਮੱਸਿਆ ਆਉਂਦੀ ਹੈ, ਤਾਂ ਪੱਤਰ ਵਿਹਾਰ ਰਾਹੀਂ ਵੀ ਆਪਣੀ ਹਾਜ਼ਰੀ ਦਰਜ ਕਰਵਾਈ ਜਾ ਸਕਦੀ ਹੈ।
ਇਸ ਵਾਰ 2026 ਦੀ ਮਰਦਮਸ਼ੁਮਾਰੀ ਵਿੱਚ ਤਿੰਨ ਵੱਡੇ ਅਹਿਮ ਬਦਲਾਅ ਕੀਤੇ ਜਾ ਰਹੇ ਹਨ। ਪਹਿਲਾ ਬਦਲਾਅ ਲਿੰਗ ਅਤੇ ਪਛਾਣ ਨਾਲ ਜੁੜੀ ਸ਼ਬਦਾਵਲੀ ਵਿੱਚ ਕੀਤਾ ਗਿਆ ਹੈ, ਜਿੱਥੇ ਲਿੰਗ ਦਰਜ ਕਰਨ ਲਈ 'ਜਨਮ ਸਮੇਂ ਦਰਜ ਲਿੰਗ' ਲਿਖਿਆ ਜਾਵੇਗਾ ਅਤੇ ਪਹਿਲੀ ਵਾਰ 'ਯੌਨ ਰੁਚੀ' ਅਤੇ 'ਲਿੰਗਕ ਪਛਾਣ' ਬਾਰੇ ਵੀ ਇੱਛੁਕ ਸਵਾਲ ਸ਼ਾਮਲ ਕੀਤੇ ਗਏ ਹਨ। ਦੂਜੇ ਬਦਲਾਅ ਦੇ ਤਹਿਤ ਆਸਟ੍ਰੇਲੀਆ ਦੀ ਵਧ ਰਹੀ ਬਹੁ-ਸੱਭਿਆਚਾਰਕਤਾ ਨੂੰ ਦਰਸਾਉਣ ਲਈ ਹੁਣ ਨਾਗਰਿਕ ਆਪਣੀ ਪੀੜ੍ਹੀ ਜਾਂ ਪਿਛੋਕੜ ਵਿੱਚ ਸਿਰਫ਼ ਦੋ ਦੀ ਬਜਾਏ ਚਾਰ ਵੱਖ-ਵੱਖ ਪਿਛੋਕੜ ਦਰਜ ਕਰ ਸਕਣਗੇ, ਤਾਂ ਜੋ ਲੋਕ ਆਪਣੀ ਪੂਰੀ ਪਰਿਵਾਰਕ ਜਾਣਕਾਰੀ ਦਰਜ ਕਰ ਸਕਣ। ਤੀਜਾ ਬਦਲਾਅ ਜਨਮ ਦਰ ਦੇ ਅੰਕੜਿਆਂ ਨਾਲ ਜੁੜਿਆ ਹੈ, ਜਿੱਥੇ "ਕੁੱਲ ਪੈਦਾ ਹੋਏ ਬੱਚਿਆਂ ਦੀ ਗਿਣਤੀ" ਵਾਲਾ ਸਵਾਲ ਹੁਣ ਹਰ 5 ਸਾਲ ਦੀ ਬਜਾਏ 10 ਸਾਲਾਂ ਵਿੱਚ ਇੱਕ ਵਾਰ ਪੁੱਛਣ ਦਾ ਫੈਸਲਾ ਕੀਤਾ ਗਿਆ ਹੈ।
ਇਹ ਮਰਦਮਸ਼ੁਮਾਰੀ ਆਸਟ੍ਰੇਲੀਆ ਵਿੱਚ ਵੱਸਦੇ ਪੰਜਾਬੀ ਅਤੇ ਸਿੱਖ ਭਾਈਚਾਰੇ ਲਈ ਵੀ ਖ਼ਾਸ ਮਹੱਤਵ ਰੱਖਦੀ ਹੈ। ਪਿਛਲੇ ਅੰਕੜਿਆਂ ਅਨੁਸਾਰ ਆਸਟ੍ਰੇਲੀਆ ਵਿੱਚ ਪੰਜਾਬੀ ਭਾਸ਼ਾ ਬੋਲਣ ਵਾਲਿਆਂ ਦੀ ਗਿਣਤੀ 80 ਪ੍ਰਤੀਸ਼ਤ ਵਾਧੇ ਨਾਲ ਲਗਭਗ 2,39,033 ਹੋ ਚੁੱਕੀ ਹੈ (ਜਿਨ੍ਹਾਂ ਵਿੱਚੋਂ 2,09,000 ਲੋਕ ਸਿੱਖ ਭਾਈਚਾਰੇ ਨਾਲ ਸਬੰਧਤ ਹਨ)। ਪੰਜਾਬੀ ਹੁਣ ਅੰਗਰੇਜ਼ੀ ਤੋਂ ਇਲਾਵਾ ਸਭ ਤੋਂ ਵੱਧ ਬੋਲੀਆਂ ਜਾਣ ਵਾਲੀਆਂ ਪਹਿਲੀਆਂ 5 ਭਾਸ਼ਾਵਾਂ ਵਿੱਚ ਸ਼ਾਮਲ ਹੋ ਚੁੱਕੀ ਹੈ। ਇਸੇ ਲਈ ਆਸਟ੍ਰੇਲੀਆ ਦੇ ਗੁਰੂਦੁਆਰਿਆਂ ਅਤੇ ਸਿੱਖ ਸੰਸਥਾਵਾਂ ਵੱਲੋਂ ਭਾਈਚਾਰੇ ਨੂੰ ਜਾਗਰੂਕ ਕਰਨ ਲਈ ਵਿਸ਼ੇਸ਼ ਮੁਹਿੰਮ ਚਲਾਈ ਜਾ ਰਹੀ ਹੈ, ਤਾਂ ਜੋ ਲੋਕ ਫਾਰਮ ਵਿੱਚ ਦਿੱਤੇ 'ਹੋਰ' ਦੇ ਖਾਨੇ ਵਿੱਚ "ਸਿੱਖ ਧਰਮ" ਅਤੇ "ਪੰਜਾਬੀ ਭਾਸ਼ਾ/ਪਿਛੋਕੜ" ਸਪਸ਼ਟ ਤੌਰ 'ਤੇ ਦਰਜ ਕਰਨ।
ਮਰਦਮਸ਼ੁਮਾਰੀ ਦੁਆਰਾ ਇਕੱਠੀ ਕੀਤੀ ਗਈ ਜਾਣਕਾਰੀ ਦੇ ਆਧਾਰ 'ਤੇ ਹੀ ਸਰਕਾਰਾਂ ਵੱਖ-ਵੱਖ ਭਾਈਚਾਰਿਆਂ ਦੀ ਗਿਣਤੀ ਅਨੁਸਾਰ ਸਰਕਾਰੀ ਗ੍ਰਾਂਟਾਂ, ਸਕੂਲ, ਹਸਪਤਾਲ, ਘਰ, ਉਦਯੋਗ ਅਤੇ ਹੋਰ ਬੁਨਿਆਦੀ ਸਹੂਲਤਾਂ ਦੀ ਯੋਜਨਾਬੰਦੀ ਕਰਦੀਆਂ ਹਨ। ਇਸ ਲਈ 2026 ਦੀ ਮਰਦਮਸ਼ੁਮਾਰੀ ਵਿੱਚ 'ਪਿਛੋਕੜ' ਦੇ 4 ਬਦਲ ਮਿਲਣ ਨਾਲ ਪੰਜਾਬੀ ਭਾਈਚਾਰੇ ਨੂੰ ਆਪਣੀ ਸੱਭਿਆਚਾਰਕ, ਧਾਰਮਿਕ ਅਤੇ ਪਰਿਵਾਰਕ ਪਛਾਣ ਨੂੰ ਹੋਰ ਵੀ ਮਜ਼ਬੂਤੀ ਨਾਲ ਦਰਜ ਕਰਵਾਉਣ ਅਤੇ ਭਵਿੱਖੀ ਸਰਕਾਰੀ ਨੀਤੀਆਂ ਵਿੱਚ ਆਪਣਾ ਯੋਗ ਹੱਕ ਪ੍ਰਾਪਤ ਕਰਨ ਦਾ ਸੁਨਹਿਰੀ ਮੌਕਾ ਮਿਲੇਗਾ।
ਇਟਲੀ ਦੇ ਫੁੱਟਬਾਲ ਜਗਤ 'ਚ ਵਧ ਰਿਹਾ ਹੈ ਭਾਰਤੀ ਮੂਲ ਦੇ ਖਿਡਾਰੀਆਂ ਦਾ ਦਬਦਬਾ
NEXT STORY 
