ਪੈਰਿਸ: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 14 ਜੁਲਾਈ ਨੂੰ ਪੈਰਿਸ ਵਿੱਚ ਹੋਣ ਵਾਲੀ ਬੈਸਟੀਲ ਡੇਅ ਪਰੇਡ ਵਿੱਚ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਿਰਕਤ ਕਰਨਗੇ। ਇਸ ਦੌਰਾਨ ਪੰਜਾਬ ਰੈਜੀਮੈਂਟ ਫਰਾਂਸ ਵਿੱਚ ਹੋਣ ਵਾਲੇ ਬੈਸਟੀਲ ਡੇਅ ਸਮਾਰੋਹ ਵਿੱਚ ਭਾਰਤੀ ਫ਼ੌਜ ਦੀ ਨੁਮਾਇੰਦਗੀ ਕਰੇਗੀ। ਇਸ ਪਰੇਡ ਦਾ ਅਭਿਆਸ ਵੀਡੀਓ ਟਵਿੱਟਰ 'ਤੇ ਸਾਹਮਣੇ ਆਇਆ ਹੈ। ਵੀਡੀਓ 'ਚ ਪੰਜਾਬ ਰੈਜੀਮੈਂਟ ਦੇ ਜਵਾਨ 'ਜੋ ਬੋਲੇ ਸੋ ਨਿਹਾਲ, ਸਤਿ ਸ਼੍ਰੀ ਅਕਾਲ' ਕਹਿੰਦੇ ਅਤੇ 'ਭਾਰਤੀ ਸੈਨਾ ਕੀ ਜੈ', 'ਭਾਰਤ ਮਾਤਾ ਦੀ ਜੈ' ਦੇ ਨਾਅਰੇ ਲਗਾ ਰਹੇ ਹਨ।
ਭਾਰਤੀ ਹਥਿਆਰਬੰਦ ਸੈਨਾਵਾਂ ਦਾ ਤਿੰਨ-ਸੇਵਾ ਦਲ, ਜੋ 6 ਜੁਲਾਈ ਨੂੰ ਪੈਰਿਸ ਲਈ ਰਵਾਨਾ ਹੋਇਆ, ਉਸ ਵਿੱਚ 269 ਮੈਂਬਰ ਸ਼ਾਮਲ ਹਨ। ਇਸ ਟੁਕੜੀ ਵਿੱਚ ਫ਼ੌਜ ਦੇ 77 ਮਾਰਚਿੰਗ ਜਵਾਨ ਅਤੇ ਬੈਂਡ ਦੇ 38 ਜਵਾਨ ਸ਼ਾਮਲ ਹਨ। ਕੈਪਟਨ ਅਮਨ ਜਗਤਾਪ ਫ਼ੌਜੀ ਟੁਕੜੀ ਦੀ ਅਗਵਾਈ ਕਰਨਗੇ, ਕਮਾਂਡਰ ਵ੍ਰਤ ਬਘੇਲ ਜਲ ਸੈਨਾ ਦੀ ਟੁਕੜੀ ਦੀ ਅਗਵਾਈ ਕਰਨਗੇ ਅਤੇ ਸਕੁਐਡਰਨ ਲੀਡਰ ਸਿੰਧੂ ਰੈੱਡੀ ਹਵਾਈ ਫ਼ੌਜ ਦੀ ਟੁਕੜੀ ਦੀ ਅਗਵਾਈ ਕਰਨਗੇ। ਪੰਜਾਬ ਰੈਜੀਮੈਂਟ ਨੇ ਨਾ ਸਿਰਫ਼ ਵਿਸ਼ਵ ਯੁੱਧਾਂ ਵਿਚ ਸਗੋਂ ਆਜ਼ਾਦੀ ਤੋਂ ਬਾਅਦ ਦੇ ਆਪਰੇਸ਼ਨਾਂ ਵਿਚ ਵੀ ਹਿੱਸਾ ਲਿਆ ਹੈ। ਇਸ ਮੌਕੇ ਪੰਜਾਬ ਰੈਜੀਮੈਂਟ ਦੇ ਸੂਬੇਦਾਰ ਸਤਿੰਦਰਪਾਲ ਸਿੰਘ ਨੇ ਕਿਹਾ ਕਿ “ਸਾਨੂੰ ਮਾਣ ਮਹਿਸੂਸ ਹੋ ਰਿਹਾ ਹੈ, ਸਾਡੇ ਪੁਰਖਿਆਂ ਨੇ ਇੱਥੇ ਆਪਣੀਆਂ ਜਾਨਾਂ ਕੁਰਬਾਨ ਕੀਤੀਆਂ। ਲੋਕ ਸਾਨੂੰ ਇੱਜ਼ਤ ਨਾਲ ਦੇਖ ਰਹੇ ਹਨ ਅਤੇ ਅਸੀਂ ਚੰਗਾ ਮਹਿਸੂਸ ਕਰ ਰਹੇ ਹਾਂ... ਇਹ ਮਾਣ ਵਾਲੀ ਗੱਲ ਹੈ ਕਿ ਅਸੀਂ (ਬੈਸਟੀਲ ਡੇਅ ਪਰੇਡ ਦੌਰਾਨ) ਮਾਰਚ ਕਰਾਂਗੇ ਅਤੇ ਪ੍ਰਧਾਨ ਮੰਤਰੀ ਮੋਦੀ ਨੂੰ ਸਲਾਮੀ ਦੇਵਾਂਗੇ।”
ਬੈਸਟੀਲ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ ਫਰਾਂਸ ਦਾ ਰਾਸ਼ਟਰੀ ਦਿਵਸ
ਇਸ ਸਾਲ ਮਾਰਚ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਨੂੰ ਫਰਾਂਸ ਨੇ ਜੁਲਾਈ ਵਿੱਚ ਸਾਲਾਨਾ ਬੈਸਟੀਲ ਡੇਅ ਪਰੇਡ ਵਿੱਚ ਮਹਿਮਾਨ ਵਜੋਂ ਪੈਰਿਸ ਆਉਣ ਦਾ ਸੱਦਾ ਦਿੱਤਾ ਸੀ। ਇਹ ਫਰਾਂਸ ਦਾ ਰਾਸ਼ਟਰੀ ਦਿਵਸ ਹੈ, ਜਿਸ ਨੂੰ ਬੈਸਟਿਲ ਦਿਵਸ ਵੀ ਕਿਹਾ ਜਾਂਦਾ ਹੈ। ਇਹ ਹਰ ਸਾਲ 14 ਜੁਲਾਈ ਨੂੰ ਮਨਾਇਆ ਜਾਂਦਾ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 14 ਤੋਂ 16 ਜੁਲਾਈ ਤੱਕ ਫਰਾਂਸ ਦੇ ਦੌਰੇ 'ਤੇ ਹੋਣਗੇ। ਤਿੰਨੋਂ ਸੇਵਾਵਾਂ ਦੀ ਇਕ-ਇਕ ਟੁਕੜੀ 14 ਜੁਲਾਈ ਨੂੰ ਫਰਾਂਸ ਵਿੱਚ ਬੈਸਟੀਲ ਦਿਵਸ ਸਮਾਰੋਹ ਵਿੱਚ ਹਿੱਸਾ ਲਵੇਗੀ, ਜਿੱਥੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਮੁੱਖ ਮਹਿਮਾਨ ਹੋਣਗੇ। ਅਧਿਕਾਰਤ ਸੂਤਰਾਂ ਨੇ ਦੱਸਿਆ ਕਿ ਮੋਦੀ ਦਾ ਦੌਰਾ ਅਜਿਹੇ ਸਮੇਂ 'ਚ ਹੋ ਰਿਹਾ ਹੈ ਜਦੋਂ ਭਾਰਤ-ਫਰਾਂਸ ਦੀ ਰਣਨੀਤਕ ਸਾਂਝੇਦਾਰੀ 25ਵੇਂ ਸਾਲ 'ਚ ਦਾਖਲ ਹੋ ਚੁੱਕੀ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਆਸੀਆਨ ਬੈਠਕ 'ਚ ਨਹੀਂ ਆਉਣਗੇ ਚੀਨ ਦੇ ਵਿਦੇਸ਼ ਮੰਤਰੀ ਕਿਨ ਕਾਂਗ, ਦੱਸੀ ਵਜ੍ਹਾ
NEXT STORY 
