ਨਿਊਯਾਰਕ (ਰਾਜ ਗੋਗਨਾ)- ਅਮਰੀਕਾ ਵਿੱਚ ਆਪਣੀ ਪਤਨੀ ਦੇ ਕਤਲ ਦੀ ਯੋਜਨਾ ਬਣਾਉਣ ਦੇ ਦੋਸ਼ ਵਿੱਚ ਇਕ ਭਾਰਤੀ-ਗੁਜਰਾਤੀ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਕਿਸੇ ਅਣਜਾਣ ਵਿਅਕਤੀ ਤੋਂ ਮਿਲੀ ਸੂਚਨਾ ਦੇ ਆਧਾਰ 'ਤੇ ਪੁਲਸ ਨੇ ਦਰਸ਼ਨ ਸੋਨੀ ਨਾਂ ਦੇ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਇਡੀਆਨਾਪੋਲਿਸ ਮੈਟਰੋਪੋਲੀਟਨ ਪੁਲਸ ਵਿਭਾਗ ਨੇ 44 ਸਾਲਾ ਦਰਸ਼ਨ 'ਤੇ ਕਤਲ ਦੀ ਕੋਸ਼ਿਸ਼ ਅਤੇ ਕਤਲ ਦੀ ਸਾਜ਼ਿਸ਼ ਰਚਣ ਦਾ ਦੋਸ਼ ਲਗਾਇਆ ਹੈ। ਲੰਘੀ 12 ਮਈ ਨੂੰ ਇੱਕ ਅਣਪਛਾਤੇ ਵਿਅਕਤੀ ਨੇ ਦਰਸ਼ਨ ਸੋਨੀ ਦੀ ਇਸ ਖ਼ਤਰਨਾਕ ਯੋਜਨਾ ਬਾਰੇ ਪੁਲਸ ਨੂੰ ਸੂਚਿਤ ਕੀਤਾ ਅਤੇ ਫਿਰ ਘਟਨਾ ਦੀ ਜਾਂਚ ਸ਼ੁਰੂ ਕੀਤੀ ਗਈ।
ਸੂਹ ਵਿੱਚ ਕਿਹਾ ਗਿਆ ਹੈ ਕਿ ਦਰਸ਼ਨ ਸੋਨੀ ਨੇ ਆਪਣੀ ਪਤਨੀ ਅਪਰਣਾ ਸੋਨੀ ਦਾ ਕਤਲ ਕਰਨ ਲਈ ਕੇਨ ਕੌਕਸ ਨਾਮਕ ਆਪਣੇ ਇੱਕ ਕਰਮਚਾਰੀ ਦੀ ਮਦਦ ਮੰਗੀ ਸੀ। ਪੁਲਸ ਦੇ ਹਲਫ਼ਨਾਮੇ ਅਨੁਸਾਰ ਦਰਸ਼ਨ ਸੋਨੀ ਦੀ ਯੋਜਨਾ ਲੰਘੀ 16 ਮਈ ਨੂੰ ਅਪਰਣਾ ਨੂੰ ਉਸਦੇ ਹੀ ਘਰ ਵਿੱਚ ਕਤਲ ਕਰਨ ਦੀ ਸੀ, ਜਿਸਦੀ ਤਿਆਰੀ ਉਹ ਕਈ ਮਹੀਨਿਆਂ ਤੋਂ ਕਰ ਰਿਹਾ ਸੀ। ਦਰਸ਼ਨ ਸੋਨੀ ਨੇ ਇਸ ਕਤਲ ਨੂੰ ਅੰਜਾਮ ਦੇਣ ਲਈ ਵਰਤੀ ਗਈ ਬੰਦੂਕ 'ਤੇ ਵਰਤੇ ਗਏ ਸਾਈਲੈਂਸਰ ਬਾਰੇ ਪੁੱਛਗਿੱਛ ਕੀਤੀ ਸੀ ਅਤੇ ਅਜਿਹਾ ਕਰਨ ਲਈ ਵੱਖ-ਵੱਖ ਤਰੀਕੇ ਵੀ ਅਜ਼ਮਾਏ ਸਨ। ਇੰਨਾ ਹੀ ਨਹੀਂ ਦਰਸ਼ਨ ਸੋਨੀ ਨੇ ਇੱਕ ਚਾਂਦੀ ਰੰਗ ਦੀ ਫੋਰਡ ਏਸਕੇਪ ਸੈਕਿੰਡ ਹੈਂਡ ਕਾਰ ਵੀ ਖਰੀਦੀ ਜੋ ਇਸ ਕਤਲ ਵਿੱਚ ਵਰਤੀ ਜਾਣੀ ਸੀ। ਯੋਜਨਾ ਅਨੁਸਾਰ ਇਹ ਫੈਸਲਾ ਕੀਤਾ ਗਿਆ ਸੀ ਕਿ ਦਰਸ਼ਨ ਸੋਨੀ ਦਾ ਉਹ ਕਰਮਚਾਰੀ ਜੋ ਉਸਦੀ ਮਦਦ ਕਰਨ ਵਾਲਾ ਸੀ, ਇਸ ਕਾਰ ਦੀ ਵਰਤੋਂ ਕਰੇਗਾ।
ਪੜ੍ਹੋ ਇਹ ਅਹਿਮ ਖ਼ਬਰ-'ਮੈਂ ਭਾਰਤੀਆਂ ਦੇ ਈਮੇਲ ਦਾ ਜਵਾਬ ਨਹੀਂ ਦਿੰਦੀ’, ਨਿਊਜ਼ੀਲੈਂਡ ਦੇ ਇਮੀਗ੍ਰੇਸ਼ਨ ਮੰਤਰੀ ਦਾ ਵਿਵਾਦਿਤ ਬਿਆਨ
ਪਰ ਪੁਲਸ ਵੱਲੋਂ ਦਾਇਰ ਕੀਤੇ ਗਏ ਹਲਫ਼ਨਾਮੇ ਤੋਂ ਇਹ ਵੀ ਸ਼ੱਕ ਪੈਦਾ ਹੁੰਦਾ ਹੈ ਕਿ ਦਰਸ਼ਨ ਨੇ ਪਹਿਲਾਂ ਅਪਰਣਾ ਤੋਂ ਛੁਟਕਾਰਾ ਪਾਉਣ ਦੀ ਕੋਸ਼ਿਸ਼ ਕੀਤੀ ਹੋ ਸਕਦੀ ਹੈ, ਜਿਸ ਲਈ ਉਸਨੇ ਆਪਣੀ ਪਤਨੀ ਨੂੰ ਜ਼ਹਿਰ ਵੀ ਦਿੱਤਾ ਹੋ ਸਕਦਾ ਹੈ। ਅਪਰਣਾ ਨੂੰ ਕਥਿਤ ਤੌਰ 'ਤੇ ਇਹ ਜ਼ਹਿਰ ਉਸਦੀ ਸਵੇਰ ਦੀ ਸਮੂਦੀ ਵਿੱਚ ਦਿੱਤਾ ਗਿਆ ਸੀ। ਅਪਰਣਾ ਨੇ ਖੁਦ ਪੁਲਸ ਨੂੰ ਦੱਸਿਆ ਕਿ ਇਸ ਸਮੂਦੀ ਦਾ ਸੁਆਦ ਬਹੁਤ ਅਜੀਬ ਸੀ ਅਤੇ ਇਸਨੂੰ ਪੀਣ ਤੋਂ ਬਾਅਦ ਉਸਨੂੰ ਅਸਾਧਾਰਨ ਲੱਛਣਾਂ ਦਾ ਅਨੁਭਵ ਹੋਇਆ। ਇਸ ਤੋਂ ਇਲਾਵਾ ਪੁਲਸ ਨੇ ਹਲਫ਼ਨਾਮੇ ਵਿੱਚ ਦਰਸ਼ਨ ਅਤੇ ਉਸਦੇ ਕਰਮਚਾਰੀ ਕੇਨ ਕੌਕਸ ਵਿਚਕਾਰ ਹੋਈ ਇੱਕ ਮੁਲਾਕਾਤ ਦਾ ਵੀ ਖਾਸ ਤੌਰ 'ਤੇ ਜ਼ਿਕਰ ਕੀਤਾ ਹੈ ਜਿਸ ਵਿੱਚ ਉਸਨੇ ਆਪਣੀ ਹਿੰਸਕ ਯੋਜਨਾ ਬਾਰੇ ਚਰਚਾ ਕੀਤੀ ਸੀ ਅਤੇ ਉਸਨੇ ਆਪਣੇ ਕਰਮਚਾਰੀ ਨੂੰ ਇਹ ਵੀ ਕਿਹਾ ਸੀ ਕਿ ਯੋਜਨਾ ਜਿੰਨੀ ਬੇਰਹਿਮ ਹੋਵੇਗੀ, ਸਾਰੀਆਂ ਸਮੱਸਿਆਵਾਂ ਦਾ ਹੱਲ ਓਨਾ ਹੀ ਆਸਾਨ ਹੋਵੇਗਾ।
ਹਾਲਾਂਕਿ ਦਰਸ਼ਨ ਦੇ ਆਪਣੀ ਯੋਜਨਾ ਨੂੰ ਲਾਗੂ ਕਰਨ ਤੋਂ ਪਹਿਲਾਂ ਹੀ ਪੁਲਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਸੀ। ਇਸ ਮਾਮਲੇ ਦੀ ਜਾਂਚ ਦੌਰਾਨ ਪੁਲਸ ਨੇ ਉਸ ਵਿਅਕਤੀ ਨੂੰ ਆਪਣੇ ਸਰੋਤ ਵਜੋਂ ਵਰਤਿਆ ਜਿਸਨੇ ਅਪਰਣਾ ਦਾ ਕੰਡਾ ਕੱਢਣਾ ਸੀ ਅਤੇ ਦਰਸ਼ਨ ਸੋਨੀ ਵਿਰੁੱਧ ਠੋਸ ਸਬੂਤ ਇਕੱਠੇ ਕੀਤੇ। ਇਸੇ ਵਿਅਕਤੀ ਕੇਨ ਕੌਕਸ ਨੇ ਪੁਲਸ ਨੂੰ ਦੱਸਿਆ ਕਿ ਦਰਸ਼ਨ ਇੱਕ ਸਾਲ ਤੋਂ ਅਪਰਣਾ ਨੂੰ ਮਾਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ ਅਤੇ ਹੋਰ ਭਿਆਨਕ ਤਰੀਕਿਆਂ 'ਤੇ ਵਿਚਾਰ ਕਰ ਰਿਹਾ ਸੀ, ਜਿਸ ਵਿੱਚ ਵੱਖ-ਵੱਖ ਕਿਸਮਾਂ ਦੇ ਜ਼ਹਿਰ ਦੀ ਵਰਤੋਂ ਤੋਂ ਲੈ ਕੇ ਉਸਨੂੰ ਮਾਰਨ ਤੱਕ ਸ਼ਾਮਲ ਸਨ। ਜਾਂਚ ਦੌਰਾਨ ਪੁਲਸ ਨੇ ਅਪਰਣਾ ਨੂੰ ਚੇਤਾਵਨੀ ਵੀ ਦਿੱਤੀ ਕਿ ਉਸਦੀ ਜਾਨ ਨੂੰ ਖ਼ਤਰਾ ਹੈ। ਪੁਲਸ ਅਪਰਣਾ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾ ਰਹੀ ਹੈ ਅਤੇ ਉਸਦੇ ਪਤੀ ਦਰਸ਼ਨ ਸੋਨੀ, ਜੋ ਇਸ ਸਮੇਂ ਹਿਰਾਸਤ ਵਿੱਚ ਹੈ, ਵਿਰੁੱਧ ਹੋਰ ਸਬੂਤ ਇਕੱਠੇ ਕਰ ਰਹੀ ਹੈ। ਅੰਤ ਵਿੱਚ ਆਪਣਾ ਹੋਮਵਰਕ ਪੂਰਾ ਕਰਨ ਤੋਂ ਬਾਅਦ ਪੁਲਸ ਨੇ ਦਰਸ਼ਨ ਨੂੰ 16 ਮਈ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ, ਅਤੇ ਲੰਘੀ 20 ਮਈ ਨੂੰ ਉਸਦੇ ਖਿਲਾਫ ਦੋਸ਼ ਦਾਇਰ ਕੀਤੇ ਗਏ ਸਨ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਆਪਣੀ ਰਾਏ।
21 ਸਾਲਾ ਔਰਤ ਬਣੀ ਆਸਟ੍ਰੇਲੀਆ ਦੀ ਛੋਟੀ ਉਮਰ ਦੀ ਸੈਨੇਟਰ
NEXT STORY 
