ਵੈੱਬ ਡੈਸਕ- ਗਰਮੀਆਂ ਦੇ ਮੌਸਮ ਵਿਚ ਮੁਟਿਆਰਾਂ ਅਤੇ ਔਰਤਾਂ ਗੂੜ੍ਹੇ ਰੰਗਾਂ (ਡਾਰਕ ਸ਼ੇਡ) ਦੇ ਮੁਕਾਬਲੇ ਹਲਕੇ ਰੰਗਾਂ (ਲਾਈਟ ਸ਼ੇਡ) ਦੇ ਪਹਿਰਾਵੇ ਪਹਿਨਣਾ ਪਸੰਦ ਕਰਦੀਆਂ ਹਨ। ਜੇਕਰ ਭਾਰਤੀ ਪਹਿਰਾਵੇ ਦੀ ਗੱਲ ਕਰੀਏ ਤਾਂ ਅੱਜਕੱਲ ਕਈ ਤਰ੍ਹਾਂ ਦੇ ਹਲਕੇ ਰੰਗਾਂ ਵਾਲੇ ਕੁੜਤਾ ਸੈੱਟ ਅਤੇ ਸੂਟ ਕਾਫੀ ਟ੍ਰੈਂਡ ਵਿਚ ਹਨ। ਲਾਈਟ ਸ਼ੇਡਜ਼ ਵਿਚ ਵੀ ਚਿੱਟਾ (ਵ੍ਹਾਈਟ), ਆਫ-ਵ੍ਹਾਈਟ ਅਤੇ ਹਲਕਾ ਗੁਲਾਬੀ ਵਰਗੇ ਰੰਗ ਪਹਿਲੀ ਪਸੰਦ ਬਣੇ ਹੋਏ ਹਨ। ਖਾਸ ਕਰ ਕੇ ਆਫ-ਵ੍ਹਾਈਟ ਕੁੜਤਾ ਸੈੱਟ ਅਤੇ ਸੂਟ ਮੁਟਿਆਰਾਂ ਦੀ ਪਹਿਲੀ ਪਸੰਦ ਬਣ ਕੇ ਉਭਰੇ ਹਨ।
ਆਫ-ਵ੍ਹਾਈਟ ਸੂਟ ਵਿੱਚ ਮੁਟਿਆਰਾਂ ਨੂੰ ਸ਼ਾਰਟ ਫਰਾਕ ਸੂਟ, ਸ਼ਰਾਰਾ ਸੂਟ, ਪਲਾਜ਼ੋ ਸੂਟ, ਪਟਿਆਲਾ ਸੂਟ, ਸਟ੍ਰੇਟ ਕੁੜਤੀ ਸੂਟ, ਅਨਾਰਕਲੀ ਸੂਟ, ਨਾਇਰਾ ਸੂਟ ਵਰਗੇ ਕਈ ਬਦਲ ਮਿਲ ਰਹੇ ਹਨ। ਇਹ ਸੂਟ ਪ੍ਰਿੰਟਿਡ ਅਤੇ ਪਲੇਨ ਦੋਵਾਂ ਡਿਜ਼ਾਈਨਾਂ ਵਿਚ ਉਪਲਬਧ ਹਨ। ਹਾਲਾਂਕਿ ਜ਼ਿਆਦਾਤਰ ਮੁਟਿਆਰਾਂ ਪਲੇਨ ਆਫ-ਵ੍ਹਾਈਟ ਸੂਟ ਨੂੰ ਜ਼ਿਆਦਾ ਪਸੰਦ ਕਰ ਰਹੀਆਂ ਹਨ। ਇਨ੍ਹਾਂ ਉੱਪਰ ਕਈ ਤਰ੍ਹਾਂ ਦੀ ਕਢਾਈ (ਐਂਬ੍ਰਾਇਡਰੀ) ਅਤੇ ਵਰਕ ਕੀਤਾ ਹੁੰਦਾ ਹੈ, ਜੋ ਦਿੱਖ (ਲੁੱਕ) ਨੂੰ ਚਾਰ ਚੰਨ ਲਗਾ ਦਿੰਦਾ ਹੈ। ਆਫ-ਵ੍ਹਾਈਟ ਸੂਟ ਦੀ ਖਾਸੀਅਤ ਇਹ ਹੈ ਕਿ ਇਸ ’ਤੇ ਹਰ ਰੰਗ ਦੀ ਕਢਾਈ ਜਚਦੀ ਹੈ। ਕਿਸੇ ਨੂੰ ਗੁਲਾਬੀ ਕਢਾਈ ਵਾਲੇ ਸੂਟ ਭਾਅ ਰਹੇ ਹਨ ਤਾਂ ਕਿਸੇ ਨੂੰ ਕਾਲੇ, ਨੀਲੇ, ਹਰੇ, ਪੀਲੇ ਅਤੇ ਜਾਮਣੀ ਕਢਾਈ ਵਾਲੇ। ਇਸ ਤੋਂ ਇਲਾਵਾ ਸ਼ੀਸ਼ਾ ਵਰਕ (ਮਿਰਰ ਵਰਕ), ਸਟੋਨ ਵਰਕ ਅਤੇ ਪਰਲ ਵਰਕ ਵੀ ਕਾਫੀ ਪਸੰਦ ਕੀਤਾ ਜਾ ਰਿਹਾ ਹੈ, ਜੋ ਲੁੱਕ ਨੂੰ ਹੋਰ ਸਟਾਈਲਿਸ਼ ਅਤੇ ਸ਼ਾਹੀ (ਰਾਇਲ) ਬਣਾਉਂਦੇ ਹਨ। ਆਫ-ਵ੍ਹਾਈਟ ਸੂਟ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਹੈ ਕਿ ਇਸ ਨੂੰ ਹਰ ਤਰ੍ਹਾਂ ਦੇ ਮੌਕਿਆਂ ’ਤੇ ਆਸਾਨੀ ਨਾਲ ਪਹਿਨਿਆ ਜਾ ਸਕਦਾ ਹੈ। ਇਸ ਨੂੰ ਕੈਜ਼ੂਅਲ ਵੇਅਰ ਦੇ ਨਾਲ-ਨਾਲ ਸ਼ਾਪਿੰਗ, ਆਊਟਿੰਗ ਅਤੇ ਪਿਕਨਿਕ ਦੌਰਾਨ ਵੀ ਪਹਿਨਿਆ ਜਾ ਰਿਹਾ ਹੈ।
ਖਾਸ ਮੌਕਿਆਂ ’ਤੇ ਵੀ ਇਹ ਕਾਫੀ ਜਚਦੇ ਹਨ। ਸਿਰਫ ਆਮ ਮੁਟਿਆਰਾਂ ਹੀ ਨਹੀਂ, ਸਗੋਂ ਬਾਲੀਵੁੱਡ ਅਦਾਕਾਰਾਵਾਂ ਨੂੰ ਵੀ ਕਈ ਮੌਕਿਆਂ ’ਤੇ ਆਫ-ਵ੍ਹਾਈਟ ਸੂਟ ਵਿੱਚ ਦੇਖਿਆ ਜਾ ਸਕਦਾ ਹੈ। ਆਫ-ਵ੍ਹਾਈਟ ਸੂਟ ਦੇ ਨਾਲ ਹਰ ਤਰ੍ਹਾਂ ਦੀ ਜਿਊਲਰੀ ਮੈਚ ਹੋ ਜਾਂਦੀ ਹੈ। ਮੁਟਿਆਰਾਂ ਇਸ ਦੇ ਨਾਲ ਗੋਲਡਨ, ਡਾਇਮੰਡ, ਸਿਲਵਰ ਅਤੇ ਟੈਰਾਕੋਟਾ ਜਿਊਲਰੀ ਦੇ ਨਾਲ-ਨਾਲ ਕਢਾਈ ਨਾਲ ਮਿਲਦੀ-ਜੁਲਦੀ ਜਿਊਲਰੀ ਵੀ ਪਹਿਨਣਾ ਪਸੰਦ ਕਰ ਰਹੀਆਂ ਹਨ। ਹੇਅਰ ਸਟਾਈਲ ਵਿਚ ਗੁੱਤ, ਜੂੜਾ, ਓਪਨ ਹੇਅਰ ਅਤੇ ਬਨ ਸਾਰੇ ਸਟਾਈਲ ਕੀਤੇ ਜਾ ਰਹੇ ਹਨ। ਫੁੱਟਵੀਅਰ ਵਿਚ ਸੈਂਡਲ, ਹਾਈ ਹੀਲਜ਼ ਅਤੇ ਜੁੱਤੀ ਨੂੰ ਪਹਿਲ ਦਿੱਤੀ ਜਾ ਰਹੀ ਹੈ। ਇਸ ਦੇ ਨਾਲ ਧੁੱਪ ਤੋਂ ਬਚਣ ਲਈ ਜ਼ਿਆਦਾਤਰ ਮੁਟਿਆਰਾਂ ਸਨਗਲਾਸਿਜ਼ (ਧੁੱਪ ਵਾਲੀਆਂ ਐਨਕਾਂ) ਸਟਾਈਲ ਕਰ ਰਹੀਆਂ ਹਨ। ਬੈਗ ਅਤੇ ਘੜੀ ਵਰਗੀਆਂ ਅਸੈਸਰੀਜ਼ ਲੁੱਕ ਨੂੰ ਮੁਕੰਮਲ ਕਰ ਰਹੀਆਂ ਹਨ ਅਤੇ ਮੁਟਿਆਰਾਂ ਨੂੰ ਹੋਰ ਵੀ ਸਟਾਈਲਿਸ਼ ਬਣਾ ਰਹੀਆਂ ਹਨ।
ਬੇਕਾਰ ਸਮਝ ਕੇ ਨਾ ਸੁੱਟੋ ਨਾਰੀਅਲ ਦੇ ਛਿਲਕੇ, ਇਨ੍ਹਾਂ 7 ਤਰੀਕਿਆਂ ਨਾਲ ਘਰ ਨੂੰ ਦਿਓ ਨਵੀਂ ਅਤੇ ਕ੍ਰਿਏਟਿਵ ਲੁੱਕ
NEXT STORY 
