ਮਾਲੇਰਕੋਟਲਾ, (ਜ਼ਹੂਰ/ਸ਼ਹਾਬੂਦੀਨ)- ਸੁਨਾਮੀ ਗੇਟ ਮੁਹੱਲਾ ਨਿਆਈਆਂ ਦੇ ਨਿਵਾਸੀ ਮੁਹੰਮਦ ਉਮੈਰ (20) ਪੁੱਤਰ ਮੁਹੰਮਦ ਯਾਮੀਨ ਦਾ ਬੀਤੇ ਤਿੰਨ ਮਹੀਨਿਆਂ ਤੋਂ ਲਾਪਤਾ ਹੋਣ ਦੇ ਬਾਵਜੂਦ ਹੁਣ ਤੱਕ ਕੋਈ ਥਹੁ ਪਤਾ ਨਹੀਂ ਲੱਗ ਸਕਿਆ। ਮੁਹੰਮਦ ਉਮੈਰ ਦੀ ਮਾਤਾ ਫਰਹਤ ਨੇ ਭਰੇ ਮਨ ਨਾਲ ਦੱਸਿਆ ਕਿ ਉਸ ਦਾ ਪੁੱਤਰ ਬੀਤੀ 9 ਜੂਨ ਨੂੰ ਕਟਿਹਾਰ ਐਕਸਪ੍ਰੈੱਸ ਗੱਡੀ ਰਾਹੀਂ ਦਿੱਲੀ ਤੋਂ ਮਾਲੇਰਕੋਟਲਾ ਵਾਪਸ ਆ ਰਿਹਾ ਸੀ ਤਾਂ ਉਸ ਦੇ ਸਾਥੀਆਂ ਦੇ ਦੱਸਣ ਮੁਤਾਬਕ ਅੰਬਾਲਾ ਰੇਲਵੇ ਸਟੇਸ਼ਨ ’ਤੇ ਉੱਤਰ ਕੇ ਪਾਣੀ ਪੀਣ ਸਮੇਂ ਆਪਣੇ ਸਾਥੀਆਂ ਤੋਂ ਵਿਛਡ਼ ਗਿਆ ਸੀ, ਜਿਸ ਦੀ ਰਿਪੋਰਟ ਮਾਲੇਰਕੋਟਲਾ ਥਾਣਾ ਸਿਟੀ-2 ਪੁਲਸ ਨੂੰ ਉਸ ਦੇ ਨਜ਼ਦੀਕੀ ਰਿਸ਼ਤੇਦਾਰ ਮੁਹੰਮਦ ਫਾਰੂਕ ਵੱਲੋਂ ਲਿਖਾਈ ਗਈ ਸੀ। ਪਰਿਵਾਰਕ ਮੈਂਬਰਾਂ ਵੱਲੋਂ ਦਿੱਲੀ ਤੋਂ ਲੈ ਕੇ ਅੰਮ੍ਰਿਤਸਰ ਤੱਕ ਚੱਪਾ-ਚੱਪਾ ਛਾਣ ਮਾਰਿਆ ਹੈ ਪਰ ਉਮੈਰ ਬਾਰੇ ਹਾਲੇ ਤੱਕ ਕਿਤੋਂ ਵੀ ਪਤਾ ਨਹੀਂ ਚੱਲ ਸਕਿਆ ਹੈ।
ਪੁਲਸ ਵੀ ਹੁਣ ਤੱਕ ਉਸ ਦਾ ਕੋਈ ਸੁਰਾਗ ਲੱਭਣ ’ਚ ਸਫਲ ਨਹੀਂ ਹੋ ਸਕੀ। ਉਮੈਰ ਦੀ ਮਾਤਾ ਫਰਹਤ ਵੱਲੋਂ ਹੁਣ ਇਸ ਮਾਮਲੇ ’ਚ ਮਾਣਯੋਗ ਹਾਈਕੋਰਟ ਤੱਕ ਪਹੁੰਚ ਕੀਤੀ ਗਈ ਹੈ। ਫਰਹਤ ਨੇ ਦੱਸਿਆ ਕਿ ਉਸ ਦੇ ਪੁੱਤਰ ਦੀ ਜਾਂਚ ਸਬੰਧੀ ਮਾਲੇਰਕੋਟਲਾ ਥਾਣਾ ਸਿਟੀ-2 ਨੂੰ ਲਿਖਾਈ ਐੱਫ. ਆਈ. ਆਰ. ਨੰਬਰ 0059 ਮਿਤੀ 11 ਜੂਨ 2019 ਅਧੀਨ ਪੁਲਸ ਵੱਲੋਂ ਜਾਂਚ ਕੀਤੀ ਗਈ ਪਰ ਉਹ ਜਾਂਚ ਤੋਂ ਸੰਤੁਸ਼ਟ ਨਹੀਂ ਸਨ, ਜਿਸ ਲਈ ਉਸ ਨੇ ਮਾਣਯੋਗ ਅਦਾਲਤ ਦਾ ਦਰਵਾਜ਼ਾ ਖੜਕਾਇਆ ਅਤੇ ਮਾਣਯੋਗ ਜੱਜ ਅਨਮੋਲ ਰਤਨ ਸਿੰਘ ਨੇ ਆਪਣੇ ਹੁਕਮ ਮਿਤੀ 9 ਅਗਸਤ 2019 ਰਾਹੀਂ ਇਸ ਮਾਮਲੇ ਸਬੰਧੀ ਜ਼ਿਲੇ ਦੇ ਐੱਸ. ਐੱਸ. ਪੀ. ਨੂੰ ਨਿੱਜੀ ਜਵਾਬ ਦੇਣ ਲਈ ਕਿਹਾ ਅਤੇ ਪੁਲਸ ਵੱਲੋਂ ਵਿਸਥਾਰ ਸਹਿਤ ਮਾਣਯੋਗ ਅਦਾਲਤ ਨੂੰ ਜਵਾਬ ਦੇ ਦਿੱਤਾ ਗਿਆ।
ਫਰਹਤ ਦੇ ਵਕੀਲ ਨਰਿੰਦਰ ਪਾਲ ਭਾਰਦਵਾਜ ਨੇ ਦੱਸਿਆ ਕਿ ਇਸ ਤੋਂ ਬਾਅਦ ਮਾਣਯੋਗ ਜੱਜ ਨੇ ਆਪਣੇ ਹੁਕਮ ਮਿਤੀ 26 ਅਗਸਤ 2019 ਰਾਹੀਂ ਡਿਪਟੀ ਜਨਰਲ ਮੈਨੇਜਰ ਨਾਰਦਰਨ ਰੇਲਵੇ ਤੋਂ ਪੁੱਛਿਆ ਹੈ ਕਿ ਅੰਬਾਲਾ ਕੈਂਟ ਰੇਲਵੇ ਸਟੇਸ਼ਨ ਉੱਪਰ ਲੱਗੇ ਸੀ.ਸੀ.ਟੀ.ਵੀ. ਦੀ 9 ਜੂਨ ਅਤੇ 10 ਜੂਨ ਦੀ ਫੁਟੇਜ ਮਿਟ ਗਈ ਹੈ, ਜੇ ਨਹੀਂ ਮਿਟੀ ਤਾਂ ਕੀ ਕੈਮਰੇ ਖਰਾਬ ਹਨ ਜਾਂ ਫੁਟੇਜ ਸਹੀ ਤਰੀਕੇ ਨਾਲ ਨਹੀਂ ਲੈ ਰਹੇ। ਮਾਣਯੋਗ ਜੱਜ ਨੇ ਇਹ ਵੀ ਹਲਫੀਆ ਬਿਆਨ ਰਾਹੀਂ ਜਵਾਬ ਮੰਗਿਆ ਹੈ ਕਿ ਡੀ. ਜੀ. ਐੱਮ. ਨਾਰਦਰਨ ਰੇਲਵੇ ਦੇ ਅਧਿਕਾਰ ਖੇਤਰ ’ਚ ਆਉਂਦੇ ਹੋਰ ਰੇਲਵੇ ਸਟੇਸ਼ਨਾਂ ’ਤੇ ਲੱਗੇ ਕੈਮਰੇ ਸਹੀ ਕੰਮ ਕਰ ਰਹੇ ਹਨ ਜਾਂ ਨਹੀਂ, ਜੇ ਨਹੀਂ ਤਾਂ ਡੀ. ਜੀ. ਐੱਮ. ਕੀ ਕਦਮ ਚੁੱਕ ਰਹੇ ਹਨ ਕਿਉਂਕਿ ਲੱਗੇ ਕੈਮਰੇ ਸਿਰਫ ਸ਼ੋਅ-ਪੀਸ ਨਹੀਂ ਹੁੰਦੇ ਹਨ। ਹੁਣ ਮਾਮਲੇ ਦੀ ਸੁਣਵਾਈ 16 ਸਤੰਬਰ 2019 ਰੱਖੀ ਗਈ ਹੈ, ਜਿਸ ’ਚ ਡੀ. ਜੀ. ਐੱਮ. ਨਾਰਦਰਨ ਰੇਲਵੇ ਅਾਪਣਾ ਜਵਾਬ ਪੇਸ਼ ਕਰਨਗੇ।
ਹਰਸਿਮਰਤ ਨੇ ਮੋਦੀ ਸਰਕਾਰ ਦੇ 100 ਦਿਨ ਦੇ ਫੈਸਲਿਆਂ ਨੂੰ ਦੱਸਿਆ ਇਤਿਹਾਸਕ
NEXT STORY 
