ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਟਰੂਡੋ ਐਤਵਾਰ ਨੂੰ ਫੈਡਰਲ ਚੋਣਾਂ ਦਾ ਐਲਾਨ ਕਰਨ ਲਈ ਤਿਆਰ ਹਨ। ਸੂਤਰਾਂ ਨੇ ਕਿਹਾ, ਜਿਨ੍ਹਾਂ ਨੇ ਸਥਿਤੀ ਦੀ ਸੰਵੇਦਨਸ਼ੀਲਤਾ ਨੂੰ ਦੇਖਦਿਆਂ ਆਪਣਾ ਨਾਂ ਗੁਪਤ ਰੱਖਣ ਦੀ ਬੇਨਤੀ ਕੀਤੀ ਹੈ। ਟਰੂਡੋ ਦੇ ਸਹਿਯੋਗੀ ਮਹੀਨਿਆਂ ਤੋਂ ਕਹਿੰਦੇ ਆ ਰਹੇ ਹਨ ਕਿ ਸੱਤਾਧਾਰੀ ਲਿਬਰਲ ਨਿਰਧਾਰਤ ਸਮੇਂ ਤੋਂ ਦੋ ਸਾਲ ਪਹਿਲਾਂ, 2021 ਦੇ ਅੰਤ ਤੋਂ ਚੋਣਾਂ ਦਾ ਬਿਗੁਲ ਵਜਾ ਦੇਣਗੇ। ਟਰੂਡੋ ਕੋਲ ਸਿਰਫ ਘੱਟਗਿਣਤੀ ਵਾਲੀ ਲੰਗੜੀ ਸਰਕਾਰ ਹੈ ਅਤੇ ਜਦ ਵੀ ਕੋਈ ਬਿੱਲ ਜਾਂ ਰੱਦੋਬਦਲ ਕਰਨੀ ਹੋਵੇ ਤਾਂ ਦੂਸਰੀਆਂ ਪਾਰਟੀਆਂ ਨੂੰ ਆਪਣੀ ਬੈਸਾਖੀ ਬਣਾ ਕੇ ਚੱਲਣਾ ਪੈਂਦਾ ਹੈ। ਹਾਲ ਹੀ ਦੇ ਮਹੀਨਿਆਂ ’ਚ ਉਸ ਨੇ ਉਸ ਬਾਰੇ ਸ਼ਿਕਾਇਤ ਕੀਤੀ ਹੈ, ਜਿਸ ਨੂੰ ਉਹ ਵਿਰੋਧੀ ਧਿਰ ਦੀ ਰੁਕਾਵਟ ਕਹਿੰਦੇ ਮੰਨਦੇ ਹਨ। ਇਨ੍ਹਾਂ ਕਿਆਸ-ਅਰਾਈਆਂ ਦੇ ਚੱਲਦਿਆਂ 20 ਸਤੰਬਰ ਨੂੰ ਵੋਟਾਂ ਪੈ ਸਕਦੀਆਂ ਹਨ। ਮਹਾਮਾਰੀ ’ਚ ਫੈਡਰਲ ਪੱਧਰ ਉੱਤੇ ਚੋਣਾਂ ਹੋਣਗੀਆਂ ਜਾਂ ਨਹੀਂ, ਇਸ ਬਾਰੇ ਕਈ ਮਹੀਨਿਆਂ ਦੀਆਂ ਕਿਆਸ-ਅਰਾਈਆਂ ਤੋਂ ਬਾਅਦ ਇਹ ਪਤਾ ਲੱਗਿਆ ਹੈ ਕਿ ਟਰੂਡੋ ਇਸ ਵੀਕੈਂਡ ਉੱਤੇ ਰੀਡੋ ਹਾਲ ਵਿਖੇ ਗਵਰਨਰ ਜਨਰਲ ਮੈਰੀ ਸਾਈਮਨ ਨਾਲ ਮੁਲਾਕਾਤ ਕਰਨਗੇ ਤੇ 43ਵੀਂ ਸੰਸਦ ਭੰਗ ਕਰਨ ਦੀ ਮੰਗ ਕਰਨਗੇ
ਇਸ ਨਾਲ ਇਸ ਸਾਲ ਦੇ ਅੰਤ ’ਚ ਚੋਣਾਂ ਦੀਆਂ ਸੰਭਾਵਨਾਵਾਂ ਨੇ ਹੋਰ ਜ਼ੋਰ ਫੜ ਲਿਆ ਹੈ। ਜੇ ਇਸ ਐਤਵਾਰ ਚੋਣ ਮੁਹਿੰਮ ਸ਼ੁਰੂ ਹੁੰਦੀ ਹੈ ਤਾਂ 2021 ਦੀਆਂ ਫੈਡਰਲ ਚੋਣਾਂ ਲਈ ਇਹ ਕੈਂਪੇਨ 36 ਦਿਨਾਂ ਤੱਕ ਚੱਲੇਗੀ, ਜੋ ਇਲੈਕਸ਼ਨਜ਼ ਲਾਅ ਤਹਿਤ ਮਨਜ਼ੂਰ ਸਭ ਤੋਂ ਘੱਟ ਅਰਸਾ ਹੈ। ਇਸ ਸਮੇਂ ਚੋਣਾਂ ਦਾ ਐਲਾਨ ਕਰਨ ਦਾ ਮਤਲਬ ਹੋਵੇਗਾ ਕੈਨੇਡੀਅਨਜ਼ ਨੂੰ ਪੰਜ ਹਫਤਿਆਂ ਤੱਕ ਕੈਂਪੇਨਿੰਗ ’ਚੋਂ ਲੰਘਣਾ ਹੋਵੇਗਾ, ਵੱਖ-ਵੱਖ ਪਾਰਟੀਆਂ ਦੇ ਆਗੂਆਂ ਨੂੰ ਪੂਰੇ ਦੇਸ਼ ’ਚ ਇੱਕ ਸਿਰੇ ਤੋਂ ਦੂਜੇ ਸਿਰ ਤੱਕ ਭੱਜ-ਨੱਠ ਕਰਦਿਆਂ ਵੇਖਣਾ ਹੋਵੇਗਾ, ਪਾਰਟੀਆਂ ਦੇ ਉਮੀਦਵਾਰਾਂ ਨਾਲ ਮੁਲਾਕਾਤ ਕਰਨੀ ਹੋਵੇਗੀ, ਉਨ੍ਹਾਂ ਦੇ ਪਲੇਟਫਾਰਮਜ਼ ਸੁਣਨੇ ਹੋਣਗੇ ਤੇ ਇਹ ਸਭ ਮਹਾਮਾਰੀ ਦੇ ਇਸ ਦੌਰ ’ਚ ਸਿਹਤ ਸਬੰਧੀ ਪਾਬੰਦੀਆਂ ਦੇ ਬਾਵਜੂਦ ਕਰਨਾ ਹੋਵੇਗਾ। ਹਾਲਾਂਕਿ ਅਗਲੀਆਂ ਚੋਣਾਂ ਜੇ ਨਿਰਧਾਰਤ ਸਮੇਂ ਉੱਤੇ ਹੰਦੀਆਂ ਹਨ ਤਾਂ ਉਨ੍ਹਾਂ ਲਈ ਅਕਤੂਬਰ 2023 ਮਹੀਨਾ ਤੇ ਸਾਲ ਤੈਅ ਹੈ। ਘੱਟਗਿਣਤੀ ਸਰਕਾਰਾਂ ਚੋਣਾਂ ਦਰਮਿਆਨ ਮਸਾਂ ਹੀ ਚਾਰ ਸਾਲ ਦਾ ਸਮਾਂ ਪੂਰਾ ਕਰਦੀਆਂ ਹਨ।
2019 ਦੀਆਂ ਫੈਡਰਲ ਚੋਣਾਂ ’ਚ ਵੋਟਰਾਂ ਨੇ ਲਿਬਰਲਾਂ ਦੀ ਬਹੁਗਿਣਤੀ ਨੂੰ ਘਟਾ ਕੇ ਘੱਟਗਿਣਤੀ ਸਰਕਾਰ ਬਣਾ ਦਿੱਤਾ ਸੀ। ਉਦੋਂ ਤੋਂ ਲੈ ਕੇ ਹੁਣ ਤੱਕ ਲਿਬਰਲਾਂ ਨੂੰ ਕਈ ਝਟਕੇ ਬਰਦਾਸ਼ਤ ਕਰਨੇ ਪਏ ਹਨ। ਐਤਵਾਰ ਨੂੰ ਰੀਡੋ ਹਾਲ ਦੇ ਬਾਹਰ ਟਰੂਡੋ ਨੂੰ ਇਹ ਦੱਸਣਾ ਹੋਵੇਗਾ ਕਿ ਮਹਾਮਾਰੀ ਦੌਰਾਨ ਜਦੋਂ ਰੀਓਪਨਿੰਗ ਤੇ ਵੈਕਸੀਨੇਸ਼ਨ ਸਬੰਧੀ ਕੋਸ਼ਿਸ਼ਾਂ ਅਜੇ ਵੀ ਜਾਰੀ ਹਨ ਤੇ ਡੈਲਟਾ ਵੇਰੀਐਂਟ ਕਾਰਨ ਚੌਥੀ ਵੇਵ ਦਾ ਖਦਸ਼ਾ ਪ੍ਰਗਟਾਇਆ ਜਾ ਰਿਹਾ ਹੈ, ਅਜਿਹੀ ਹਾਲਤ ’ਚ ਉਨ੍ਹਾਂ ਵੱਲੋਂ ਅਚਨਚੇਤੀ ਚੋਣਾਂ ਦਾ ਐਲਾਨ ਕਿਉਂ ਕੀਤਾ ਜਾ ਰਿਹਾ ਹੈ। ਇਸ ਉੱਤੇ ਕੰਜ਼ਰਵੇਟਿਵ ਆਗੂ ਐਰਿਨ ਓਟੂਲ ਤੇ ਐੱਨ. ਡੀ. ਪੀ. ਆਗੂ ਜਗਮੀਤ ਸਿੰਘ ਵੱਲੋਂ ਅਚਨਚੇਤੀ ਚੋਣਾਂ ਖਿਲਾਫ ਗੱਲ ਕੀਤੀ ਜਾ ਰਹੀ ਹੈ ਪਰ ਸਾਰੀਆਂ ਪਾਰਟੀਆਂ ਦੇ ਆਗੂਆਂ ਵੱਲੋਂ ਪੂਰੀਆਂ ਗਰਮੀਆਂ ਚੋਣਾਂ ਦੀ ਤਿਆਰੀ ਕਰਦਿਆਂ ਹੀ ਬਿਤਾਈਆਂ ਗਈਆਂ ਹਨ। ਇਸ ਮਾਮਲੇ ਤੋਂ ਜਾਣੂ ਚਾਰ ਸੂਤਰਾਂ ਨੇ ਵੀਰਵਾਰ ਦੱਸਿਆ ਕਿ ਕੈਨੇਡੀਅਨ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਕੋਵਿਡ-19 ਨਾਲ ਲੜਨ ਦੀਆਂ ਸਰਕਾਰੀ ਯੋਜਨਾਵਾਂ ਲਈ ਵੋਟਰਾਂ ਦੀ ਮਨਜ਼ੂਰੀ ਲੈਣ ਲਈ 20 ਸਤੰਬਰ ਨੂੰ ਅਚਨਚੇਤ ਚੋਣਾਂ ਦੀ ਯੋਜਨਾ ਬਣਾ ਰਹੇ ਹਨ।
ਲਿਬਰਲਾਂ ਨੇ ਕਰਜ਼ੇ ਦੇ ਰਿਕਾਰਡ ਪੱਧਰ ਨੂੰ ਉੱਚਾ ਚੁੱਕਿਆ ਕਿਉਂਕਿ ਉਨ੍ਹਾਂ ਨੇ ਵਿਅਕਤੀਆਂ ਅਤੇ ਕਾਰੋਬਾਰਾਂ ਨੂੰ ਕੋਵਿਡ-19 ਤੋਂ ਬਚਾਉਣ ਲਈ ਬਹੁਤ ਜ਼ਿਆਦਾ ਖਰਚ ਕੀਤਾ। ਉਹ ਅਗਲੇ ਤਿੰਨ ਸਾਲਾਂ ’ਚ ਅਰਥ ਵਿਵਸਥਾ ’ਚ ਜੀ. ਡੀ. ਪੀ. ਦੇ 3 ਫੀਸਦੀ ਅਤੇ 4 ਫੀਸਦੀ ਦੇ ਵਿਚਕਾਰ 100 ਬਿਲੀਅਨ ਡਾਲਰ (80 ਬਿਲੀਅਨ ਡਾਲਰ) ਵਾਧੂ ਪਾਉਣ ਦੀ ਯੋਜਨਾ ਬਣਾ ਰਹੇ ਹਨ। ਵਿਕਾਸ ਤੀਜੀ ਤਿਮਾਹੀ ’ਚ ਮੁੜ ਵਾਪਸੀ ਲਈ ਨਿਰਧਾਰਤ ਕੀਤਾ ਗਿਆ ਹੈ ਅਤੇ ਇਸ ਵੇਲੇ ਕੈਨੇਡਾ ਕੋਲ ਵਿਸ਼ਵ ਦੇ ਸਰਬੋਤਮ ਟੀਕਾਕਰਨ ਦੇ ਰਿਕਾਰਡਾਂ ’ਚੋਂ ਇੱਕ ਹੈ। ਟਰੂਡੋ 2015 ’ਚ 338 ਸੀਟਾਂ ਦੇ ਬਹੁਮਤ ਨਾਲ ਸੱਤਾ ’ਚ ਪਹਿਲੀ ਵਾਰ ਆਏ ਸਨ ਪਰ 2019 ’ਚ ਉਨ੍ਹਾਂ ਦੇ ਬਲੈਕਫੇਸ ਪਹਿਨਣ ਦੀਆਂ ਪੁਰਾਣੀਆਂ ਫੋਟੋਆਂ ਸਾਹਮਣੇ ਆਉਣ ਤੋਂ ਬਾਅਦ ਉਹ ਘੱਟਗਿਣਤੀ ’ਚ ਰਹਿ ਗਏ। ਸੂਤਰਾਂ ’ਚੋਂ ਇੱਕ ਨੇ ਕਿਹਾ, “2019 ਤੋਂ ਹਾਲਾਤ ਵੱਡੇ ਪੱਧਰ ’ਤੇ ਬਦਲ ਗਏ ਹਨ। ਸਾਨੂੰ ਇਹ ਜਾਣਨ ਦੀ ਜ਼ਰੂਰਤ ਹੈ ਕਿ ਕੈਨੇਡੀਅਨ ਆਰਥਿਕ ਸੁਧਾਰ ਲਈ ਸਾਡੀਆਂ ਯੋਜਨਾਵਾਂ ਦਾ ਸਮਰਥਨ ਕਰਦੇ ਹਨ ਜਾਂ ਨਹੀਂ।”
ਲਿਬਰਲਾਂ ਨੇ ਸਵੀਕਾਰ ਕੀਤਾ ਕਿ ਹੁਣ ਚੋਣਾਂ ਲਈ ਸੱਦਾ ਦੇਣਾ ਇੱਕ ਜੂਆ ਹੋਵੇਗਾ, ਇਹ ਵੇਖਦੇ ਹੋਏ ਕਿ ਹਾਲ ਹੀ ਦੇ ਓਪੀਨੀਅਨ ਪੋਲ ਸੁਝਾਉਂਦੇ ਹਨ ਕਿ ਪਾਰਟੀ ਨੂੰ ਅਜੇ ਬਹੁਮਤ ਦੀ ਗਾਰੰਟੀ ਨਹੀਂ ਹੈ ਅਤੇ ਕੋਵਿਡ ਦੀ ਚੌਥੀ ਲਹਿਰ ਦਾ ਜੋਖਮ ਹੈ। ਉਸ ਨੇ ਕਿਹਾ ਕਿ ਐਬੈਕਸ ਵੱਲੋਂ ਵੀਰਵਾਰ ਨੂੰ ਕੀਤੇ ਗਏ ਇੱਕ ਸਰਵੇਖਣ ’ਚ ਲਿਬਰਲਾਂ ਨੂੰ 37 ਫੀਸਦੀ ਅਤੇ ਕੰਜ਼ਰਵੇਟਿਵਾਂ ਨੂੰ 28 ਫੀਸਦੀ ’ਤੇ ਰੱਖਿਆ ਗਿਆ ਹੈ। 6 ਤੋਂ 11 ਅਗਸਤ ਦਰਮਿਆਨ ਕਰਵਾਏ ਗਏ 3000 ਲੋਕਾਂ ਦੇ ਸਰਵੇ ਮੁਤਾਬਿਕ ਟਰੂਡੋ ਹਾਊਸ ਆਫ਼ ਕਾਮਨਜ਼ ਦਾ ਕੰਟਰੋਲ ਮੁੜ ਹਾਸਲ ਕਰ ਸਕਦੇ ਹਨ। ਲਿਬਰਲਾਂ ਕੋਲ ਇਸ ਵੇਲੇ 338 ’ਚੋਂ 155 ਸੀਟਾਂ ਹਨ। ਉਨ੍ਹਾਂ ਨੂੰ ਬਹੁਗਿਣਤੀ ਸਰਕਾਰ ਬਣਾਉਣ ਲਈ 170 ਸੀਟਾਂ ਦੀ ਲੋੜ ਹੈ। ਰਸਮੀ ਤੌਰ ’ਤੇ ਇਸ ਮੁਹਿੰਮ ਨੂੰ ਸ਼ੁਰੂ ਕਰਨ ਲਈ ਟਰੂਡੋ ਨੂੰ ਰਾਜਪਾਲ ਮਹਾਰਾਣੀ ਐਲਿਜ਼ਾਬੇਥ ਦੇ ਨਿੱਜੀ ਪ੍ਰਤੀਨਿਧੀ ਗਵਰਨਰ ਜਨਰਲ ਮੈਰੀ ਸਾਈਮਨ ਨਾਲ ਮੁਲਾਕਾਤ ਕਰ ਕੇ ਸੰਸਦ ਨੂੰ ਭੰਗ ਕਰਨ ਦੀ ਮੰਗ ਕਰਨੀ ਪਵੇਗੀ। ਜੋ ਕਿਆਸ-ਅਰਾਈਆਂ ਲਾਈਆਂ ਜਾ ਰਹੀਆਂ ਹਨ ਕਿ ਉਹ ਇਸ ਐਤਵਾਰ ਨੂੰ ਗਵਰਨਰ ਜਰਨਲ ਨੂੰ ਮਿਲ ਰਹੇ ਹਨ, ਸੰਵਿਧਾਨਿਕ ਮਾਹਿਰਾਂ ਦਾ ਕਹਿਣਾ ਹੈ ਕਿ ਸਾਈਮਨ ਬੇਨਤੀ ਨਾਲ ਸਹਿਮਤ ਹੋਣਗੇ।
-ਸੁਰਜੀਤ ਸਿੰਘ ਫਲੋਰਾ
ਹਿੰਦੀ ਫ਼ਿਲਮਾਂ ਦੇ ਗੀਤਕਾਰ ਅਤੇ ਸ਼ਾਇਰੀ ਦੇ ਬੇਤਾਜ ਬਾਦਸ਼ਾਹ ਰਾਹਤ ਇੰਦੋਰੀ, ਜਾਣੋ ਜ਼ਿੰਦਗੀ ਦੇ ਖ਼ਾਸ ਪਹਿਲੂ
NEXT STORY 
