ਦੀਵਾਲੀ ਦਾ ਤਿਉਹਾਰ ਬਰੂਹਾਂ ‘ਤੇ ਹੈ। ਦੀਵਾਲੀ ਦੀਆਂ ਰੌਣਕਾਂ ਬਾਜ਼ਾਰਾਂ ‘ਚ ਨਜ਼ਰੀਂ ਪੈਣ ਲੱਗੀਆਂ ਹਨ। ਕੋਈ ਸਮਾਂ ਸੀ ਜਦੋਂ ਦੀਵਾਲੀ ਦੇ ਤਿਉਹਾਰ ਨਾਲ ਮੇਰਾ ਅਟੁੱਟ ਰਿਸ਼ਤਾ ਸੀ। ਮੇਰੇ ਤੋਂ ਬਿਨਾਂ ਦੀਵਾਲੀ ਦੇ ਤਿਉਹਾਰ ਦੀ ਕਲਪਨਾ ਵੀ ਨਹੀਂ ਸੀ ਕੀਤੀ ਜਾ ਸਕਦੀ ਜਾਂ ਕਹਿ ਲਓ ਦੀਵਾਲੀ ਮੌਕੇ ਮੇਰੀ ਟੌਹਰ ਨਵਾਬੀ ਹੁੰਦੀ ਸੀ। ਹਰ ਕਿਸੇ ਦੀ ਜ਼ੁਬਾਨ ‘ਤੇ ਮੇਰਾ ਨਾਮ ਹੁੰਦਾ ਸੀ। ਦੀਵਾਲੀ ਤੋਂ ਕਈ ਦਿਨ ਪਹਿਲਾਂ ਕਾਰੀਗਰਾਂ ਵੱਲੋਂ ਪੂਰੀ ਰੀਝ ਨਾਲ ਮੇਰਾ ਵਜ਼ੂਦ ਤਿਆਰ ਕੀਤਾ ਜਾਂਦਾ ਸੀ। ਕਾਰੀਗਰ ਮੈਨੂੰ ਕਈ ਸ਼ਕਲਾਂ ਅਤੇ ਰੂਪਾਂ ਵਿੱਚ ਤਿਆਰ ਕਰਦੇ ਸਨ। ਦੀਵਾਲੀ ਤੋਂ ਪਹਿਲਾਂ ਹੀ ਮੇਰੇ ਜ਼ਰੂਰਤਮੰਦ ਮੇਰੇ ਆਲੇ-ਦੁਆਲੇ ਆ ਜੁੜਦੇ ਸਨ। ਦੀਵਾਲੀ ਵਾਲੇ ਦਿਨ ਪਹਿਲਾਂ ਮੈਨੂੰ ਪਾਣੀ ਨਾਲ ਇਸ਼ਨਾਨ ਕਰਵਾਇਆ ਜਾਂਦਾ ਸੀ ਅਤੇ ਫਿਰ ਸ਼ਾਮ ਢਲਦੇ ਸੁਆਣੀਆਂ ਮੇਰਾ ਢਿੱਡ ਸਰੋਂ ਦੇ ਤੇਲ ਨਾਲ ਭਰ ਕੇ ਵਿੱਚ ਰੂੰ ਤੋਂ ਤਿਆਰ ਕੀਤੀ ਬੱਤੀ ਰੱਖ ਕੇ ਰੌਸ਼ਨੀਆਂ ਕਰਦੀਆਂ ਸਨ। ਸੁਆਣੀਆਂ ਖੁਦ ਮੈਨੂੰ ਘਰਾਂ ਦੇ ਬਨੇਰਿਆਂ ‘ਤੇ ਸ਼ਸੋਭਿਤ ਕਰਕੇ ਆਉਂਦੀਆਂ ਸਨ। ਮੈਂ ਵੀ ਉਨ੍ਹਾਂ ਦੀਆਂ ਖੁਸ਼ੀਆਂ ਦਾ ਖੈਰਖਵਾਹ ਬਣਦਿਆਂ ਉਨ੍ਹਾਂ ਦੇ ਘਰਾਂ ਦਾ ਚੌਗਿਰਦਾ ਰੁਸ਼ਨਾਉਣ ਲਈ ਆਪਣੀ ਪੂਰੀ ਵਾਹ ਲਗਾ ਦਿੰਦਾ ਸੀ। ਦੀਵਾਲੀ ਤੋਂ ਦੂਸਰੇ ਦਿਨ ਆਹ ਸ਼ਰਾਰਤੀ ਬੱਚੇ ਮੇਰੀ ਭੰਨ ਤੋੜ ਕੇ ਆਨੰਦ ਲੈਂਦੇ ਸਨ ਪਰ ਮੈਨੂੰ ਇਨ੍ਹਾਂ ਸ਼ਰਰਾਤੀਆਂ ‘ਤੇ ਕਦੇ ਵੀ ਗੁੱਸਾ ਨਹੀਂ ਸੀ ਆਉਂਦਾ।
ਪੜ੍ਹੋ ਇਹ ਵੀ ਖ਼ਬਰ - Diwali 2020 : ਦੀਵਾਲੀ ਦੇ ਮੌਕੇ ਜਾਣੋ ਕੀ ਕਰਨਾ ਹੁੰਦੈ ‘ਸ਼ੁੱਭ’ ਅਤੇ ਕੀ ਨਾ ਕਰਨਾ ਹੈ ‘ਅਸ਼ੁੱਭ’
ਦੀਵੇ ਦੀ ਨਹੀਂ ਹੋ ਰਹੀ ਪੁੱਛ ਪ੍ਰਤੀਤ
ਪਰ ਹੁਣ ਸਮਾਂ ਉਹ ਨਹੀਂ ਰਿਹਾ। ਲੋਕ ਮੇਰੇ ਤੋਂ ਲਗਾਤਾਰ ਮੂੰਹ ਮੋੜ ਰਹੇ ਹਨ। ਮੇਰੀ ਪੁੱਛ ਪ੍ਰਤੀਤ ਘਟਦੀ ਹੀ ਨਹੀਂ ਸਗੋਂ ਖਤਮ ਹੋਣ ਵਰਗੀ ਹੋ ਗਈ ਹੈ। ਰੌਸ਼ਨੀਆਂ ਦੇ ਹੋਰ ਸਾਧਨ ਆ ਜਾਣ ਨਾਲ ਲੋਕਾਂ ਨੇ ਮੈਨੂੰ ਵਿਸਾਰਨਾ ਸ਼ੁਰੂ ਕਰ ਦਿੱਤਾ ਹੈ। ਦੀਵਾਲੀ ਮੌਕੇ ਚੀਨੀ ਬਿਜਲਈ ਲੜ੍ਹੀਆਂ ਦੀ ਆਮਦ ਤਾਂ ਮੇਰੇ ਲਈ ਸ਼ਰਾਪ ਬਣਕੇ ਰਹਿ ਗਈ ਹੈ। ਚੀਨੀ ਲੜ੍ਹੀਆਂ ਦੀ ਚਕਾਚੌਂਧ ਭਰਪੂਰ ਰੌਸ਼ਨੀ ਅੱਗੇ ਮੇਰੀ ਰੌਸ਼ਨੀ ਦੇ ਪੈਰ ਨਹੀਂ ਲੱਗ ਰਹੇ। ਪਹਿਲਾਂ ਪਹਿਲ ਮੋਮਬੱਤੀਆਂ ਨੇ ਮੇਰੇ ‘ਤੇ ਵਾਰ੍ਹ ਕੀਤਾ। ਮੈਂ ਹਾਲੇ ਮੋਮਬੱਤੀ ਦੇ ਵਾਰ੍ਹ ਤੋਂ ਚੰਗੀ ਤਰ੍ਹਾਂ ਉੱਭਰਿਆ ਨਹੀਂ ਸੀ ਕਿ ਚੀਨੀ ਲੜ੍ਹੀਆਂ ਨੇ ਮੇਰਾ ਵਰਤਮਾਨ ਅਤੇ ਭਵਿੱਖ ਦੋਵੇਂ ਹਨ੍ਹੇਰੇ ਵਿੱਚ ਪਾ ਦਿੱਤੇ।
ਪੜ੍ਹੋ ਇਹ ਵੀ ਖ਼ਬਰ - Dhanteras 2020: ਧਨਤੇਰਸ 'ਤੇ ਕੀ ਖ਼ਰੀਦਣਾ ਸ਼ੁੱਭ ਹੁੰਦਾ ਹੈ ਤੇ ਕੀ ਨਹੀਂ, ਜਾਣਨ ਲਈ ਪੜ੍ਹੋ ਇਹ ਖ਼ਬਰ
ਚੀਨੀ ਲੜ੍ਹੀਆਂ ਕਾਰਨ ਦੀਵੇ ਦੀ ਖ਼ਰੀਦਦਾਰੀ ਨੂੰ ਲੱਗਾ ਖੋਰਾ
ਚੀਨੀ ਲੜ੍ਹੀਆਂ ਦੀ ਵਧਦੀ ਖ਼ਰੀਦਦਾਰੀ ਬਦੌਲਤ ਮੇਰੀ ਖ਼ਰੀਦਦਾਰੀ ਨੂੰ ਲਗਤਾਰ ਖੋਰਾ ਲੱਗ ਰਿਹਾ ਹੈ। ਮੇਰਾ ਇਸਤੇਮਾਲ ਹੁਣ ਸਿਰਫ਼ ਰਸਮਾਂ ਨਿਭਾਉਣ ਲਈ ਹੀ ਕੀਤਾ ਜਾਂਦਾ ਹੈ, ਜਦਕਿ ਰੌਸ਼ਨੀਆਂ ਲਈ ਤਾਂ ਚੀਨੀ ਲੜੀਆਂ ਦਾ ਹੀ ਇਸਤੇਮਾਲ ਹੋ ਰਿਹਾ ਹੈ। ਮੇਰੇ ਤੋਂ ਖ਼ਰੀਦਦਾਰਾਂ ਦਾ ਭੰਗ ਹੋ ਰਿਹਾ ਮੋਹ ਕਈ ਘਰਾਂ ਦੇ ਦੀਵੇ ਗੁੱਲ ਕਰਨ ਦਾ ਸਬੱਬ ਬਣ ਕੇ ਰਹਿ ਗਿਆ ਹੈ। ਬਹੁਤੇ ਘਰਾਂ ਦੇ ਬਨੇਰਿਆਂ ‘ਤੇ ਅੱਜਕੱਲ੍ਹ ਮੈਨੂੰ ਜਗ੍ਹਾ ਨਸੀਬ ਨਹੀਂ ਹੁੰਦੀ। ਮੇਰੇ ਕਾਰੀਗਰਾਂ ਦੇ ਚਿਹਰੇ ਦੀਵਾਲੀ ਦੇ ਮੌਕੇ ਵੀ ਨਹੀਂ ਖਿੜਦੇ। ਮੈਂ ਸਾਰਾ ਦਿਨ ਬਾਜ਼ਾਰਾਂ ‘ਚ ਪਿਆ ਗਾਹਕਾਂ ਦੀ ਉਡੀਕ ਕਰਦਾ ਰਹਿੰਦਾ ਹਾਂ ਪਰ ਕਿਸੇ ਸਮੇਂ ਮੈਨੂੰ ਮਣਾਂਮੂੰਹੀਂ ਮੋਹ ਦੇਣ ਵਾਲੇ ਮੇਰੇ ਆਪਣੇ ਮੇਰੇ ਕੋਲੋਂ ਮੂੰਹ ਫੇਰ ਕਿਸੇ ਬਿਜਲੀ ਦੀ ਦੁਕਾਨ ਵਿੱਚ ਇਸ ਤਰ੍ਹਾਂ ਵੜਦੇ ਕਿ ਉਨ੍ਹਾਂ ਨੂੰ ਮੇਰਾ ਚੇਤਾ ਹੀ ਭੁੱਲ ਜਾਂਦਾ। ਜਦੋਂ ਉਹ ਮੇਰੇ ਸਾਹਮਣੇ ਚੀਨ ਦੀਆਂ ਬਣੀਆਂ ਲੜ੍ਹੀਆਂ ਖ਼ਰੀਦ ਕੇ ਲਿਜਾਂਦੇ ਹਨ ਤਾਂ ਮੇਰੇ ਦਿਲ ‘ਤੇ ਕੀ ਬੀਤਦੀ ਹੈ, ਉਹ ਮੈਂ ਹੀ ਜਾਣਦਾ ਹਾਂ। ਮੇਰੇ ਵਿਕਰੇਤਾ ਸਾਰਾ ਸਾਰਾ ਦਿਨ ਗਾਹਕਾਂ ਦੀ ਉਡੀਕ ਵਿੱਚ ਲੰਘਾਂ ਘਰਾਂ ਨੂੰ ਵਾਪਸ ਚਲੇ ਜਾਂਦੇ ਹਨ।
ਪੜ੍ਹੋ ਇਹ ਵੀ ਖ਼ਬਰ - Diwali 2020 : ਧਨਤੇਰਸ, ਦੀਵਾਲੀ ਤੇ ਭਾਈ ਦੂਜ ਦੇ ਤਿਉਹਾਰਾਂ ਦੀ ਜਾਣੋ ਤਾਰੀਖ਼ ਅਤੇ ਸ਼ੁੱਭ ਮਹੂਰਤ
ਅਲੋਪ ਹੋ ਜਾਵੇਗਾ ਰੌਸ਼ਨੀ ਦਾ ਦੀਵਾ
ਮੈਨੂੰ ਸਮਝ ਨਹੀਂ ਆ ਰਹੀ ਕਿ ਆਖਿਰ ਮੇਰੇ ਤੋਂ ਅਜਿਹਾ ਕਿਹੜਾ ਗੁਨਾਹ ਹੋ ਗਿਆ ਕਿ ਮੇਰੇ ਆਪਣੇ ਮੇਰੇ ਤੋਂ ਮੁਨਕਰ ਹੋ ਗਏ ਹਨ? ਕਿਉਂ ਮੇਰੇ ਆਪਣਿਆਂ ਨੂੰ ਹੀ ਹੁਣ ਮੇਰੀ ਰੌਸ਼ਨੀ ਚੰਗੀ ਨਹੀਂ ਲੱਗਦੀ? ਚੀਨ ਦੀ ਲੜ੍ਹੀ ਵੱਲੋਂ ਕੀਤੀ ਜਾਂਦੀ ਰੌਸ਼ਨੀ ਵਿੱਚ ਅਜਿਹਾ ਕੀ ਹੈ ਕਿ ਮੇਰੀ ਰੌਸ਼ਨੀ ਦੀ ਚਿਣਗ ਮੱਧਮ ਪੈ ਗਈ ਹੈ? ਕਦੇ ਕਦੇ ਤਾਂ ਮੈਨੂੰ ਆਪਣੇ ਨਾਮ ਤੋਂ ਹੀ ਘ੍ਰਿਣਾ ਆਉਣ ਲੱਗਦੀ ਹੈ ਕਿ ਕਹਿਣ ਨੂੰ ਤਾਂ ਮੈਂ ਰੌਸ਼ਨੀਆਂ ਦਾ ਗਵਾਹ ਹਾਂ ਪਰ ਭਵਿੱਖ ’ਚ ਮੈਂ ਆਪ ਹਨ੍ਹੇਰੇ ’ਚ ਪਿਆ ਹੋਇਆ ਹਾਂ। ਤੁਹਾਡਾ ਇਹ ਰੁੱਖਾਪਣ ਮੇਰੇ ਤੋਂ ਬਰਦਾਸ਼ਤ ਨਹੀਂ ਹੋ ਰਿਹਾ। ਜੇਕਰ ਤੁਸੀਂ ਇਸੇ ਤਰ੍ਹਾਂ ਮੇਰੇ ਤੋਂ ਮੂੰਹ ਮੋੜਦੇ ਰਹੇ ਤਾਂ ਮੈਂ ਇੱਕ ਦਿਨ ਅਲੋਪ ਹੀ ਹੋ ਜਾਵਾਂਗਾ ਅਤੇ ਫਿਰ ਤੁਸੀਂ ਆਪਣੀਆ ਆਉਣ ਵਾਲੀਆਂ ਨਸਲਾਂ ਨੂੰ ਮੇਰੇ ਬਾਰੇ ਮੇਰੀਆਂ ਤਸਵੀਰਾਂ ਵਿਖਾ ਵਿਖਾ ਕੇ ਦੱਸਿਆ ਕਰੋਗੇ ਪਰ ਮੈਂ ਨਹੀਂ ਮਿਲਣਾ ਤੁਹਾਨੂੰ ਦੁਬਾਰਾ।
ਪੜ੍ਹੋ ਇਹ ਵੀ ਖ਼ਬਰ - ਸਟੂਡੈਂਟ ਸਪਾਊਸ ਦੇ ਓਪਨ ਵਰਕ ਪਰਮਿਟ ਜਾਣੋਂ ਕਿਉਂ ਹੋ ਰਹੇ ਨੇ ‘ਧੜਾਧੜ ਰਿਫਿਊਜ’
ਹਾਲੇ ਵੀ ਕੁੱਝ ਨਹੀਂ ਵਿਗੜਿਆ। ਤੁਸੀਂ ਮੇਰੇ ਵੱਲ੍ਹ ਰਤਾ ਕੁ ਤਾਂ ਪਿਆਰ ਨਾਲ ਵੇਖੋ। ਮੈਂ ਤਾਂ ਹੁਣ ਵੀ ਤਿਆਰ ਹਾਂ ਤੁਹਾਡੇ ਘਰਾਂ ਦੀਆਂ ਰੌਸ਼ਨੀਆਂ ਦਾ ਚਿਰਾਗ ਬਣਨ ਲਈ। ਮੈਂ ਤਾਂ ਹੁਣ ਵੀ ਤਿਆਰ ਹਾਂ ਤੁਹਾਡੀਆਂ ਖੁਸ਼ੀਆਂ ‘ਚ ਖੁਸ਼ ਹੋਣ ਲਈ। ਜੇਕਰ ਮੇਰੇ ਬਾਰੇ ਨਹੀਂ ਸੋਚਣਾ ਤਾਂ ਭਲਿਓ ਮਾਣਸੋ ਘੱਟੋ ਘੱਟ ਮੈਨੂੰ ਜੀਵਨ ਦਾਨ ਦੇਣ ਵਾਲਿਆਂ ਬਾਰੇ ਹੀ ਸੋਚ ਲਵੋ। ਮੇਰੀ ਅਤੇ ਤੁਹਾਡੀ ਨੇੜਤਾ ਵਿੱਚੋਂ ਉਸ ਵਿਚਾਰੇ ਨੂੰ ਕਿੰਨ੍ਹੀ ਖੁਸ਼ੀ ਮਿਲਦੀ ਹੈ ਤੁਹਾਨੂੰ ਅੰਦਾਜ਼ਾ ਵੀ ਨਹੀਂ ਹੋਣਾ। ਜਦੋਂ ਤੁਹਾਡੇ ਵਿੱਚੋਂ ਕੋਈ ਮੇਰਾ ਗਾਹਕ ਬਣ ਕੇ ਆਉਂਦਾ ਹੈ ਤਾਂ ਮੇਰੇ ਕਾਰੀਗਰ ਦਾ ਅੰਗ ਅੰਗ ਨਸ਼ਿਆ ਜਾਂਦਾ ਹੈ।
ਪੜ੍ਹੋ ਇਹ ਵੀ ਖ਼ਬਰ - Diwali 2020 : ਲਕਸ਼ਮੀ ਮਾਤਾ ਜੀ ਦੇ ਸਵਾਗਤ ਤੇ ਸੁੱਖ-ਸਮ੍ਰਿਧੀ ਦੇ ਵਾਸ ਲਈ ਘਰ ’ਚ ਬਣਾਓ ‘ਰੰਗੋਲੀ’, ਹੁੰਦਾ ਹੈ ਸ਼ੁੱਭ
ਉਏ ਭਲਿਓ ਮਾਣਸੋ ਉਨ੍ਹਾਂ ਵਿਚਾਰਿਆਂ ਨੇ ਵੀ ਪਰਿਵਾਰ ਪਾਲਣੇ ਹਨ। ਜੇਕਰ ਤੁਸੀਂ ਮੇਰੇ ਨਾਲ ਇਸੇ ਤਰ੍ਹਾਂ ਨਰਾਜ਼ ਰਹੇ ਤਾਂ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਕਸ਼ਟ ਪਹੁੰਚੇਗਾ। ਮੈਂ ਆਪਣਾ ਰੁਦਨ ਬਿਆਨ ਕਰ ਦਿੱਤਾ ਹੈ। ਹੁਣ ਸੋਚਣਾ ਤੁਸੀ ਹੈ ਕਿ ਆਖਿਰ ਕੀ ਫ਼ੈਸਲਾ ਲੈਣਾ ਹੈ? ਮੇਰੇ ਨਾਲ ਨਾਰਾਜ਼ ਰਹਿੰਦਿਆਂ ਉਸ ਵਿਦੇਸ਼ਣ ਮਗਰ ਲੱਗੇ ਰਹਿਣਾ ਹੈ ਜਾਂ ਫਿਰ ਪਰਤਣਾ ਹੈ ਮੇਰੇ ਵੱਲ੍ਹ। ਮੈਂ ਚਾਹਾਂਗਾ ਕਿ ਆਪਣੇ ਵਿਚਕਾਰ ਪਈਆਂ ਦੂਰੀਆਂ ਇਸ ਵਾਰ ਦੀ ਦੀਵਾਲੀ ਮੌਕੇ ਜ਼ਰੂਰ ਮਿਟ ਜਾਣ। ਮੈਂ ਇਸ ਵਾਰ ਤੁਹਾਨੂੰ ਜ਼ਰੂਰ ਉਡੀਕਾਂਗਾ! ਮੈਂ ਚਾਹਾਂਗਾ ਕਿ ਇਸ ਵਰ੍ਹੇ ਤੁਹਾਡੇ ਬਨੇਰਿਆਂ ਨੂੰ ਰੁਸ਼ਨਾਉਣ ਦਾ ਅਵਸਰ ਮੈਨੂੰ ਨਸੀਬ ਹੋਵੇ। ਬਾਕੀ ਤੁਹਾਡੀ ਮਰਜ਼ੀ ਦੋਸਤੋ ਮੇਰਾ ਜੋਰ ਤਾਂ ਕੋਈ ਨਹੀਂ ਪਰ ਇੱਕ ਵਾਅਦਾ ਹੈ ਮੇਰਾ, ਕੀ ਮੈਂ ਉਮਰ ਭਰ ਤੁਹਾਡਾ ਸਾਥ ਨਿਭਾਵਾਂਗਾ, ਜਿਸ ਘਰ ਵੀ ਜਾਵਾਂਗਾ, ਉਥੇ ਹਮੇਸ਼ਾ ਰੌਸ਼ਨੀਆਂ ਹੀ ਕਰਾਂਗਾ।
ਪੜ੍ਹੋ ਇਹ ਵੀ ਖ਼ਬਰ - Beauty Tips : ਰਿਮੂਵਰ ਨਾ ਹੋਣ ’ਤੇ ਹੁਣ ਤੁਸੀਂ ਇਸ ਤਰ੍ਹਾਂ ਵੀ ਉਤਾਰ ਸਕਦੇ ਹੋ ‘ਨੇਲ ਪੇਂਟ’
ਬਿੰਦਰ ਸਿੰਘ ਖੁੱਡੀ ਕਲਾਂ
ਮੋਬ: 98786-05965
ਗਲੀ ਨੰਬਰ 1,ਸ਼ਕਤੀ ਨਗਰ,ਬਰਨਾਲਾ।
ਅੱਗ ਲਾਏ ਬਿਨਾਂ ਪਰਾਲੀ ਸੰਭਾਲਣ ਦਾ ਰਕਬਾ ਪਿਛਲੇ ਸਾਲ ਨਾਲੋਂ ਵੱਧ : ਪੀ.ਏ.ਯੂ. ਮਾਹਿਰ
NEXT STORY 
