ਨੈਸ਼ਨਲ ਡੈਸਕ : ਛੱਤੀਸਗੜ੍ਹ ਦੀ ਰਾਜਧਾਨੀ ਰਾਏਪੁਰ ਵਿੱਚ ਬੁੱਧਵਾਰ ਨੂੰ ਉਸ ਸਮੇਂ ਦਹਿਸ਼ਤ ਦਾ ਮਾਹੌਲ ਬਣ ਗਿਆ, ਜਦੋਂ ਡੰਡਿਆਂ ਨਾਲ ਲੈਸ 80-90 ਲੋਕਾਂ ਦੀ ਭੀੜ ਨੇ ਸ਼ਹਿਰ ਦੇ ਮਸ਼ਹੂਰ ਮੈਗਨੇਟੋ ਮਾਲ ਵਿੱਚ ਵੜ ਕੇ ਭਾਰੀ ਭੰਨ-ਤੋੜ ਕੀਤੀ। ਇਹ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਸੂਬੇ ਵਿੱਚ ਕਥਿਤ ਧਾਰਮਿਕ ਪਰਿਵਰਤਨ ਦੇ ਵਿਰੋਧ ਵਿੱਚ 'ਬੰਦ' ਦਾ ਸੱਦਾ ਦਿੱਤਾ ਗਿਆ ਸੀ। ਭੀੜ ਨੇ ਮਾਲ ਦੇ ਅੰਦਰ ਲੱਗੇ ਕ੍ਰਿਸਮਸ ਟ੍ਰੀ, ਲਾਈਟਾਂ ਅਤੇ ਹੋਰ ਸਜਾਵਟੀ ਸਾਮਾਨ ਨੂੰ ਪੂਰੀ ਤਰ੍ਹਾਂ ਤਹਿਸ-ਨਹਿਸ ਕਰ ਦਿੱਤਾ।
ਸੁਰੱਖਿਆ ਗਾਰਡ ਰਹੇ ਬੇਵੱਸ, ਲੋਕਾਂ 'ਚ ਮਚੀ ਭਾਜੜ
ਜਾਣਕਾਰੀ ਅਨੁਸਾਰ ਮਾਲ ਦੇ ਸੁਰੱਖਿਆ ਕਰਮਚਾਰੀਆਂ ਨੇ ਹਿੰਸਕ ਭੀੜ ਨੂੰ ਰੋਕਣ ਦੀ ਪੂਰੀ ਕੋਸ਼ਿਸ਼ ਕੀਤੀ, ਪਰ ਉਹ ਅਸਫਲ ਰਹੇ। ਮਾਲ ਦੇ ਕਰਮਚਾਰੀਆਂ ਨੇ ਦੱਸਿਆ ਕਿ ਭੀੜ ਨੇ ਉਨ੍ਹਾਂ ਨੂੰ ਧਮਕਾਇਆ ਅਤੇ ਹਿੰਸਕ ਵਿਵਹਾਰ ਕੀਤਾ, ਜਿਸ ਕਾਰਨ ਮਾਲ ਵਿੱਚ ਮੌਜੂਦ ਕਈ ਔਰਤਾਂ ਡਰ ਕੇ ਰੋਣ ਲੱਗ ਪਈਆਂ। ਫਿਲਮ ਦੇਖਣ ਆਏ ਦਰਸ਼ਕ ਵੀ ਆਪਣੀ ਜਾਨ ਬਚਾਉਣ ਲਈ ਇੱਧਰ-ਉੱਧਰ ਭੱਜਦੇ ਨਜ਼ਰ ਆਏ। ਚਸ਼ਮਦੀਦਾਂ ਅਨੁਸਾਰ ਭੀੜ ਵਾਰ-ਵਾਰ ਨਾਅਰੇਬਾਜ਼ੀ ਕਰ ਰਹੀ ਸੀ ਕਿ ਉਹ ਮਾਲ ਵਿੱਚ ਸਾਂਤਾ ਕਲੌਜ਼ ਦੀਆਂ ਸਜਾਵਟਾਂ ਨਹੀਂ ਦੇਖਣਾ ਚਾਹੁੰਦੇ।
ਕਿਉਂ ਬੁਲਾਇਆ ਗਿਆ ਸੀ ਛੱਤੀਸਗੜ੍ਹ ਬੰਦ?
ਸਰਵ ਹਿੰਦੂ ਸਮਾਜ ਵੱਲੋਂ ਕਥਿਤ ਧਾਰਮਿਕ ਪਰਿਵਰਤਨ ਦੇ ਮੁੱਦੇ 'ਤੇ ਸੂਬਾ ਵਿਆਪੀ ਬੰਦ ਦਾ ਸੱਦਾ ਦਿੱਤਾ ਗਿਆ ਸੀ। ਇਸ ਤਣਾਅ ਦਾ ਮੁੱਖ ਕਾਰਨ ਕਾਂਕੇਰ ਜ਼ਿਲ੍ਹੇ ਦੇ ਪਿੰਡ ਬੜੇਤੇਵੜਾ ਵਿੱਚ ਹੋਇਆ ਇੱਕ ਵਿਵਾਦ ਸੀ, ਜਿੱਥੇ 16 ਦਸੰਬਰ ਨੂੰ ਇੱਕ ਸਰਪੰਚ ਨੇ ਆਪਣੇ ਪਿਤਾ ਦੀ ਮ੍ਰਿਤਕ ਦੇਹ ਨੂੰ ਈਸਾਈ ਰੀਤੀ-ਰਿਵਾਜਾਂ ਅਨੁਸਾਰ ਆਪਣੀ ਨਿੱਜੀ ਜ਼ਮੀਨ 'ਤੇ ਦਫ਼ਨਾਇਆ ਸੀ। ਇਸ ਘਟਨਾ ਤੋਂ ਬਾਅਦ ਦੋਵਾਂ ਭਾਈਚਾਰਿਆਂ ਵਿੱਚ ਹਿੰਸਕ ਝੜਪਾਂ ਹੋਈਆਂ ਸਨ ਅਤੇ ਪੱਥਰਬਾਜ਼ੀ ਵਿੱਚ 20 ਤੋਂ ਵੱਧ ਪੁਲਿਸ ਕਰਮਚਾਰੀ ਵੀ ਜ਼ਖ਼ਮੀ ਹੋ ਗਏ ਸਨ।
ਬੰਦ ਦਾ ਮਿਲਿਆ-ਜੁਲਿਆ ਅਸਰ
ਸੂਬੇ ਵਿੱਚ ਬੰਦ ਦਾ ਮਿਲਿਆ-ਜੁਲਿਆ ਅਸਰ ਦੇਖਣ ਨੂੰ ਮਿਲਿਆ। ਰਾਏਪੁਰ ਸਮੇਤ ਕਈ ਸ਼ਹਿਰੀ ਇਲਾਕਿਆਂ ਵਿੱਚ ਦੁਕਾਨਾਂ ਅਤੇ ਵਪਾਰਕ ਅਦਾਰੇ ਪੂਰੀ ਤਰ੍ਹਾਂ ਬੰਦ ਰਹੇ, ਜਦੋਂ ਕਿ ਪੇਂਡੂ ਖੇਤਰਾਂ ਵਿੱਚ ਇਸ ਦਾ ਅਸਰ ਘੱਟ ਰਿਹਾ। ਹਾਲਾਂਕਿ ਕੁਝ ਥਾਵਾਂ 'ਤੇ ਤੋੜਫੋੜ ਦੀਆਂ ਛੋਟੀਆਂ-ਮੋਟੀਆਂ ਘਟਨਾਵਾਂ ਵਾਪਰੀਆਂ, ਪਰ ਜ਼ਿਆਦਾਤਰ ਇਲਾਕਿਆਂ ਵਿੱਚ ਸ਼ਾਂਤੀ ਬਣੀ ਰਹੀ।
ਗੁਜਰਾਤ ਵਿਧਾਨ ਸਭਾ ਦੇ ਡਿਪਟੀ ਸਪੀਕਰ ਜੇਠਾਭਾਈ ਭਾਰਵਡ ਨੇ ਦਿੱਤਾ ਅਸਤੀਫਾ, ਜਾਣੋ ਕਾਰਨ
NEXT STORY 
