ਲਖਨਊ : ਮਸ਼ਹੂਰ ਸ਼ਾਇਰ ਸਵਰਗਵਾਸੀ ਮੁਨੱਵਰ ਰਾਣਾ ਦੀ ਬੇਟੀ ਹਿਬਾ ਰਾਣਾ ਨਾਲ ਜੁੜੀ ਇੱਕ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਹਿਬਾ ਰਾਣਾ ਦੇ ਪਤੀ ਵੱਲੋਂ ਉਸ ਨੂੰ 'ਤਿੰਨ ਤਲਾਕ' ਦੇ ਕੇ ਘਰੋਂ ਕੱਢ ਦਿੱਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਸਬੰਧੀ ਉੱਤਰ ਪ੍ਰਦੇਸ਼ ਦੀ ਸਆਦਤਗੰਜ ਪੁਲਸ ਨੇ ਹਿਬਾ ਦੇ ਪਤੀ ਅਤੇ ਸਹੁਰੇ ਖਿਲਾਫ ਮੁਕੱਦਮਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਦਾਜ ਲਈ ਕੀਤਾ ਜਾਂਦਾ ਸੀ ਪਰੇਸ਼ਾਨ
ਹਿਬਾ ਰਾਣਾ ਦਾ ਵਿਆਹ ਸਾਲ 2013 ਵਿੱਚ ਸੁੰਨੀ ਰੀਤੀ-ਰਿਵਾਜਾਂ ਅਨੁਸਾਰ ਮੁਹੰਮਦ ਸਾਕਿਬ ਨਾਲ ਹੋਇਆ ਸੀ। ਵਿਆਹ ਸਮੇਂ ਹਿਬਾ ਦੇ ਪਰਿਵਾਰ ਵੱਲੋਂ ਸੋਨੇ-ਹੀਰੇ ਦੇ ਗਹਿਣਿਆਂ ਤੋਂ ਇਲਾਵਾ 10 ਲੱਖ ਰੁਪਏ ਨਕਦ ਵੀ ਦਿੱਤੇ ਗਏ ਸਨ। ਪਰ ਦੋਸ਼ ਹੈ ਕਿ ਵਿਆਹ ਤੋਂ ਬਾਅਦ ਪਤੀ ਸਾਕਿਬ ਅਤੇ ਸਹੁਰਾ ਹਸੀਬ ਅਹਿਮਦ 20 ਲੱਖ ਰੁਪਏ ਹੋਰ ਦਾਜ ਦੀ ਮੰਗ ਕਰਨ ਲੱਗੇ। ਹਿਬਾ ਦੇ ਪਰਿਵਾਰ ਨੇ ਕਈ ਵਾਰ ਉਨ੍ਹਾਂ ਦੀਆਂ ਮੰਗਾਂ ਪੂਰੀਆਂ ਵੀ ਕੀਤੀਆਂ ਤਾਂ ਜੋ ਵਿਆਹੁਤਾ ਜੀਵਨ ਠੀਕ ਚੱਲ ਸਕੇ, ਪਰ ਕੁੱਟਮਾਰ ਦਾ ਸਿਲਸਿਲਾ ਜਾਰੀ ਰਿਹਾ।
ਬੱਚਿਆਂ ਨੂੰ ਕਮਰੇ 'ਚ ਬੰਦ ਕਰਕੇ ਘਰੋਂ ਕੱਢਿਆ
ਦਰਜ ਐੱਫ.ਆਈ.ਆਰ. (FIR) ਦੇ ਮੁਤਾਬਕ, 9 ਅਪ੍ਰੈਲ 2025 ਨੂੰ ਪਤੀ ਸਾਕਿਬ ਨੇ ਹਿਬਾ ਨਾਲ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ। ਜਦੋਂ ਹਿਬਾ ਦੀ ਭੈਣ ਆਰਸ਼ੀਆ ਰਾਣਾ ਉਸ ਦਾ ਹਾਲ-ਚਾਲ ਜਾਣਨ ਗਈ, ਤਾਂ ਮੁਲਜ਼ਮ ਪਤੀ ਨੇ ਉਸ 'ਤੇ ਵੀ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ। ਇਸੇ ਦੌਰਾਨ ਸਾਕਿਬ ਨੇ ਹਿਬਾ ਰਾਣਾ ਨੂੰ ਤਿੰਨ ਵਾਰ ਤਲਾਕ ਬੋਲ ਕੇ ਧੱਕੇ ਮਾਰ ਕੇ ਘਰੋਂ ਬਾਹਰ ਕੱਢ ਦਿੱਤਾ ਅਤੇ ਉਸ ਦੇ ਦੋਵਾਂ ਬੱਚਿਆਂ (ਬੇਟਾ ਅਤੇ ਬੇਟੀ) ਨੂੰ ਕਮਰੇ ਵਿੱਚ ਬੰਦ ਕਰ ਦਿੱਤਾ।
ਪਰਿਵਾਰ ਨੂੰ ਮਿਲ ਰਹੀਆਂ ਨੇ ਧਮਕੀਆਂ
ਪੁਲਸ ਅਨੁਸਾਰ, ਇਸ ਘਟਨਾ ਤੋਂ ਬਾਅਦ ਪੀੜਤਾ ਮਾਨਸਿਕ ਤੌਰ 'ਤੇ ਕਾਫੀ ਪਰੇਸ਼ਾਨ ਅਤੇ ਡਰੀ ਹੋਈ ਹੈ। ਪੀੜਤਾ ਨੇ ਦੋਸ਼ ਲਗਾਇਆ ਹੈ ਕਿ ਉਸ ਦੇ ਪਤੀ ਅਤੇ ਸਹੁਰੇ ਵੱਲੋਂ ਉਸ ਦੇ ਪਰਿਵਾਰ ਨੂੰ ਲਗਾਤਾਰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ। ਫਿਲਹਾਲ ਪੁਲਸ ਨੇ ਮੁਹੰਮਦ ਸਾਕਿਬ ਅਤੇ ਹਸੀਬ ਅਹਿਮਦ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ ਅਤੇ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
ਮਸ਼ਹੂਰ ਮਰਹੂਮ ਸ਼ਾਇਰ ਦੀ ਬੇਟੀ ਨੂੰ ਪਤੀ ਨੇ ਦਿੱਤਾ ਤਿੰਨ ਤਲਾਕ; ਮਾਰਕੁੱਟ ਕਰ ਘਰੋਂ ਬਾਹਰ ਕੱਢਿਆ, FIR ਦਰਜ
NEXT STORY 
