ਉਦੈਪੁਰ- ਜੰਮੂ ਦੇ ਕਟੜਾ ਸਥਿਤ ਪ੍ਰਸਿੱਧ ਮਾਤਾ ਵੈਸ਼ਨੋ ਦੇਵੀ ਮੰਦਰ ਦੀ ਤਰਜ 'ਤੇ ਰਾਜਸਥਾਨ ਦੇ ਉਦੈਪੁਰ 'ਚ ਵੀ ਮਾਂ ਵੈਸ਼ਨੋ ਦੇਵੀ ਦਾ ਮੰਦਰ ਬਣ ਕੇ ਤਿਆਰ ਹੋ ਗਿਆ ਹੈ। ਅਰਾਵਲੀ ਦੇ ਉੱਚੇ ਪਹਾੜ 'ਤੇ ਬਣ ਕੇ ਤਿਆਰ ਹੋਇਆ ਇਹ ਮੰਦਰ ਹੂਬਹੂ ਵੈਸ਼ਨੋ ਦੇਵੀ ਮੰਦਰ ਵਰਗਾ ਹੀ ਹੈ। ਇਹ ਉਦੈਪੁਰ ਤੋਂ 17 ਕਿਲੋਮੀਟਰ ਦੂਰ ਨਾਥਦੁਆਰਾ ਰੋਡ 'ਤੇ ਬਣਿਆ ਹੈ। ਇਸਦਾ ਕੰਪਲੈਕਸ ਸਵਾ ਚਾਰ ਲੱਖ ਫੁੱਟ 'ਚ ਬਣਿਆ ਹੈ, ਜਿਸ ਵਿੱਚੋਂ ਸਵਾ ਤਿੰਨ ਲੱਖ ਫੁੱਟ 'ਚ ਮੰਦਰ ਦਾ ਨਿਰਮਾਣ ਕੀਤਾ ਗਿਆ ਹੈ, ਬਾਕੀ ਇਕ ਲੱਖ ਫੁੱਟ ਕੰਪਲੈਕਸ 'ਚ ਪਾਰਕਿੰਗ ਬਣਾਈ ਗਈ ਹੈ।
ਇਹ ਮੰਦਰ ਸ਼੍ਰੀ ਮੀਰਾ ਕਿਸ਼ਨ ਦਰਬਾਰ ਟਰੱਸਟ ਦੁਆਰਾ ਬਣਾਇਆ ਗਿਆ ਹੈ। ਇਸ ਮੰਦਰ 'ਚ ਸ਼ਰਧਾਲੂਆਂ ਨੂੰ ਪਿੰਡੀ ਰੂਪ 'ਚ ਦਰਸ਼ਨ ਹੋਣਗੇ। ਮਾਂ ਵੈਸ਼ਨੋ ਦੇਵੀ ਦੇ ਮੰਦਰ ਦਾ ਉਦਘਾਟਨ 3 ਮਾਰਚ 2024 ਨੂੰ ਮੀਰਾ ਦੇਵੀ ਖਤਰੀ ਕਿਸ਼ਨ ਲਾਲ ਖਤਰੀ ਦਰਬਾਰ ਦੀ ਮੌਜੂਦਗੀ 'ਚ ਹੋਵੇਗਾ।
ਇਸ ਤੋਂ ਪਹਿਲਾਂ 3 ਮਾਰਚ ਨੂੰ ਸਵੇਰੇ 10 ਵਜੇ ਸ਼ਹਿਰ ਵਿੱਚ ਵਿਸ਼ਾਲ ਜੋਤ ਯਾਤਰਾ ਕੱਢੀ ਜਾਵੇਗੀ। ਜੋਤ ਯਾਤਰਾ ਦੌਰਾਨ ਕਟੜਾ ਤੋਂ ਮਾਤਾ ਦੀ ਲਿਆਂਦੀ ਗਈ ਜੋਤ ਦੇ ਦਰਸ਼ਨ ਹੋਣਗੇ, ਜੋ ਮੰਦਰ ਵਿੱਚ ਸਥਾਪਿਤ ਕੀਤੀ ਜਾਵੇਗੀ। ਕਟੜਾ ਸਥਿਤ ਮਾਤਾ ਵੈਸ਼ਨੋ ਦੇਵੀ ਮੰਦਰ ਦੀ ਤਰ੍ਹਾਂ ਇਸ ਮੰਦਰ ਵਿੱਚ ਵੀ ਦੋ ਗੁਫਾਵਾਂ ਬਣਾਈਆਂ ਗਈਆਂ ਹਨ। ਇੱਥੇ ਨੌਜਵਾਨਾਂ ਲਈ 311 ਫੁੱਟ ਲੰਬੀ ਅਤੇ ਬਜ਼ੁਰਗਾਂ ਲਈ 251 ਫੁੱਟ ਲੰਬੀ ਗੁਫਾ ਬਣਾਈ ਗਈ ਹੈ।
ਜਿਸ ਤਰ੍ਹਾਂ ਸ਼ਰਧਾਲੂਆਂ ਨੂੰ ਕਟੜਾ ਤੋਂ ਮਾਤਾ ਵੈਸ਼ਨੋ ਦੇਵੀ ਤੱਕ ਪੈਦਲ ਚੱਲ ਕੇ ਦਰਸ਼ਨੀ ਡਿਉੜੀ ਦੇ ਦਰਸ਼ਨ ਹੁੰਦੇ ਹਨ, ਉਸੇ ਤਰ੍ਹਾਂ ਇਸ ਮੰਦਰ ਵਿੱਚ ਵੀ ਸ਼ਰਧਾਲੂਆਂ ਨੂੰ ਬਾਨ ਗੰਗਾ, ਗਰਭ ਜੂਨ, ਹਾਥੀ ਮੱਥਾ ਅਤੇ ਸਾਂਝੀ ਛਤ ਰਾਹੀਂ ਤ੍ਰੀਕੂਟ ਪਰਬਤ ਵਿੱਚ ਪ੍ਰਵੇਸ਼ ਕਰਨ ਦਾ ਅਨੁਭਵ ਮਿਲੇਗਾ।
ਇੱਥੇ 51 ਫੁੱਟ ਉੱਚਾ ਤ੍ਰਿਸ਼ੂਲ ਅਤੇ ਭੈਰੋ ਨਾਥ ਮੰਦਰ ਵੀ ਬਣਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਮੰਦਰ ਵਿੱਚ 12 ਜੋਤੀਲਿੰਗ ਅਤੇ ਨੌਂ ਦੇਵ-ਦੇਵਤਿਆਂ ਦੀਆਂ ਮੂਰਤੀਆਂ ਸਥਾਪਿਤ ਕੀਤੀਆਂ ਗਈਆਂ ਹਨ। ਮੰਦਰ ਵਿੱਚ ਕੁੱਲ 21 ਵਿਸ਼ਾਲ ਮੂਰਤੀਆਂ ਸਥਾਪਿਤ ਕੀਤੀਆਂ ਗਈਆਂ ਹਨ ਜੋ ਹੂਬਹੂ ਬਣਾਈਆਂ ਗਈਆਂ ਹਨ।
ਇਸ ਤੋਂ ਇਲਾਵਾ ਮੰਦਰ ਦੇ ਦਰਸ਼ਨਾਂ ਲਈ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਮਾਤਾ ਵੈਸ਼ਨੋ ਦੇਵੀ ਦੀ ਫਿਲਮ ਮੁਫ਼ਤ ਦਿਖਾਈ ਜਾਵੇਗੀ। ਇਸ ਦੇ ਲਈ ਦੋ ਵੱਡੇ 7ਡੀ ਸਿਨੇਮਾਘਰਾਂ ਦਾ ਨਿਰਮਾਣ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਕੈਂਪਸ ਵਿੱਚ ਮੈਡੀਟੇਸ਼ਨ ਸੈਂਟਰ, ਰੀਡਿੰਗ ਰੂਮ ਅਤੇ ਗਊ ਸ਼ੈੱਡ ਦਾ ਵੀ ਨਿਰਮਾਣ ਕੀਤਾ ਗਿਆ ਹੈ।
ਮਾਤਾ ਵੈਸ਼ਨੋ ਦੇਵੀ ਮੰਦਰ ਦੀ ਉਸਾਰੀ ਦਾ ਕੰਮ ਕਈ ਸਾਲਾਂ ਵਿੱਚ ਪੂਰਾ ਹੋਇਆ। ਇਸ ਸ਼ਾਨਦਾਰ ਮੰਦਰ ਨੂੰ ਬਣਾਉਣ ਲਈ ਬੰਗਾਲ, ਇੰਦੌਰ ਅਤੇ ਜੈਪੁਰ ਤੋਂ ਵਿਸ਼ੇਸ਼ ਕਾਰੀਗਰ ਆਏ ਸਨ। ਇਨ੍ਹਾਂ ਨੇ ਚਿੱਟੇ ਪੱਥਰ ਉੱਤੇ ਮੂਰਤੀਆਂ ਨੂੰ ਤਰਾਸ਼ਿਆ। ਇਨ੍ਹਾਂ ਕਾਰੀਗਰਾਂ ਨੇ ਪੂਰੇ ਮੰਦਰ 'ਤੇ ਆਪਣੀ ਕਲਾ ਦੀ ਅਮਿੱਟ ਛਾਪ ਛੱਡੀ ਹੈ। ਮੰਦਰ ਵਿੱਚ ਹਰ ਰੋਜ਼ ਵਿਸ਼ੇਸ਼ ਐੱਲ.ਈ.ਡੀ. ਲਾਈਟਾਂ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਇਹ ਲਾਈਟਾਂ ਆਰਤੀ ਦੌਰਾਨ ਆਪਣੀ ਵਿਸ਼ੇਸ਼ ਰੌਸ਼ਨੀ ਫੈਲਾਉਣਗੀਆਂ। ਮੰਦਰ ਵਿੱਚ ਹਰ ਰੋਜ਼ ਸਵੇਰੇ 9 ਵਜੇ ਤੋਂ ਰਾਤ 9 ਵਜੇ ਤੱਕ ਮਾਂ ਦਾ ਭੰਡਾਰਾ ਪ੍ਰਸਾਦ ਦੇ ਰੂਪ ਵਿੱਚ ਚੱਲੇਗਾ। ਇੱਕ ਸ਼ਾਨਦਾਰ ਕੁਦਰਤੀ ਰਸੋਈ ਵੀ ਬਣਾਈ ਗਈ ਹੈ ਜੋ ਇੱਕ ਸਮੇਂ ਵਿੱਚ ਹਜ਼ਾਰਾਂ ਲੋਕਾਂ ਲਈ ਖਾਣਾ ਬਣਾ ਸਕਦੀ ਹੈ।
ਖਨੌਰੀ ਬਾਰਡਰ ਜਾ ਰਹੇ ਕਿਸਾਨਾਂ 'ਤੇ ਪੁਲਸ ਨੇ ਕੀਤਾ ਲਾਠੀਚਾਰਜ, ਸੁੱਟੇ ਹੰਝੂ ਗੈਸ ਦੇ ਗੋਲੇ
NEXT STORY 
