ਨਵੀਂ ਦਿੱਲੀ - ਦੇਸ਼ ਅਤੇ ਦੁਨੀਆ ਵਿੱਚ ਸੈਰ-ਸਪਾਟੇ (ਟੂਰਿਜ਼ਮ) ਦਾ ਸਰੂਪ ਤੇਜ਼ੀ ਨਾਲ ਬਦਲ ਰਿਹਾ ਹੈ। ਪਹਿਲਾਂ ਜਿੱਥੇ ਲੋਕ ਪਰਿਵਾਰ ਜਾਂ ਦੋਸਤਾਂ ਨਾਲ ਯਾਤਰਾ ਕਰਨਾ ਪਸੰਦ ਕਰਦੇ ਸਨ, ਉੱਥੇ ਹੀ ਹੁਣ ਵੱਡੀ ਗਿਣਤੀ ਵਿੱਚ ਲੋਕ ਇਕੱਲੇ ਘੁੰਮਣ ਨਿਕਲ ਰਹੇ ਹਨ। ਇਸ ਬਦਲਦੇ ਰੁਝਾਨ (ਟ੍ਰੈਂਡ) ਵਿੱਚ ਔਰਤਾਂ ਦੀ ਭਾਗੀਦਾਰੀ ਸਭ ਤੋਂ ਤੇਜ਼ੀ ਨਾਲ ਵਧੀ ਹੈ।
ਯੂਰਪੀਅਨ ਟ੍ਰੈਵਲ ਕੰਪਨੀ 'ਮੇਵਿਅਨ' ਅਤੇ ਡਾਟਾ ਕੰਪਨੀ ਦੇ ਅਧਿਐਨ ਅਨੁਸਾਰ ਐਡਵੈਂਚਰ ਟ੍ਰੈਵਲ ਲਈ ਰਜਿਸਟਰਡ ਯਾਤਰੀਆਂ ਵਿੱਚ 47 ਫ਼ੀਸਦੀ 'ਸੋਲੋ ਟ੍ਰੈਵਲਰ' (ਇਕੱਲੇ ਸਫ਼ਰ ਕਰਨ ਵਾਲੇ) ਹਨ ਅਤੇ ਇਨ੍ਹਾਂ ਵਿੱਚੋਂ ਲਗਭਗ 85 ਫ਼ੀਸਦੀ ਔਰਤਾਂ ਹਨ। ਮਾਹਰਾਂ ਦਾ ਮੰਨਣਾ ਹੈ ਕਿ ਆਤਮਨਿਰਭਰਤਾ, ਆਤਮਵਿਸ਼ਵਾਸ ਅਤੇ ਨਵੀਂਆਂ ਥਾਵਾਂ ਨੂੰ ਆਪਣੇ ਤਰੀਕੇ ਨਾਲ ਦੇਖਣ ਦੀ ਚਾਹਤ ਇਸ ਬਦਲਾਅ ਦੀ ਸਭ ਤੋਂ ਵੱਡੀ ਵਜ੍ਹਾ ਹੈ।
ਭਾਰਤ ਵਿੱਚ ਵੀ ਵਧ ਰਹੀਆਂ ਹਨ ਮਹਿਲਾ ਸੋਲੋ ਟੂਰਿਜ਼ਮ ਦੀਆਂ ਸੰਭਾਵਨਾਵਾਂ
ਸੈਰ-ਸਪਾਟਾ ਮਾਹਰਾਂ ਦਾ ਕਹਿਣਾ ਹੈ ਕਿ ਭਾਰਤ ਵਿੱਚ 'ਮਹਿਲਾ ਸੋਲੋ ਟ੍ਰੈਵਲ' ਦਾ ਬਾਜ਼ਾਰ ਤੇਜ਼ੀ ਨਾਲ ਫੈਲ ਰਿਹਾ ਹੈ। ਅਨੁਮਾਨ ਹੈ ਕਿ ਆਉਣ ਵਾਲੇ ਸਾਲਾਂ ਵਿੱਚ ਇਸ ਖੇਤਰ ਵਿੱਚ ਲਗਭਗ 20 ਫ਼ੀਸਦੀ ਸਾਲਾਨਾ ਵਾਧਾ ਹੋ ਸਕਦਾ ਹੈ। ਕੁਦਰਤੀ ਸੁੰਦਰਤਾ, ਧਾਰਮਿਕ ਅਸਥਾਨਾਂ, ਇਤਿਹਾਸਕ ਵਿਰਾਸਤਾਂ ਅਤੇ ਸਾਹਸਿਕ ਸੈਰ-ਸਪਾਟੇ ਦੀ ਵੰਨ-ਸੁਵੰਨਤਾ ਭਾਰਤ ਨੂੰ ਮਹਿਲਾ ਯਾਤਰੀਆਂ ਲਈ ਇੱਕ ਆਕਰਸ਼ਕ ਮੰਜ਼ਿਲ ਬਣਾ ਰਹੀ ਹੈ। ਇਸ ਦੇ ਚਲਦਿਆਂ ਟੂਰਿਜ਼ਮ ਕੰਪਨੀਆਂ ਵੀ ਔਰਤਾਂ ਲਈ ਵਿਸ਼ੇਸ਼ ਪੈਕੇਜ ਅਤੇ ਸੁਰੱਖਿਅਤ ਯਾਤਰਾ ਸਹੂਲਤਾਂ ਸ਼ੁਰੂ ਕਰ ਰਹੀਆਂ ਹਨ।
ਸੁਰੱਖਿਆ ਅਤੇ ਸਹੂਲਤਾਂ 'ਤੇ ਵਿਸ਼ੇਸ਼ ਫੋਕਸ
ਟੂਰਿਜ਼ਮ ਕੰਪਨੀਆਂ ਹੁਣ ਇਕੱਲੀਆਂ ਸਫ਼ਰ ਕਰਨ ਵਾਲੀਆਂ ਔਰਤਾਂ ਲਈ ਪ੍ਰਮਾਣਿਤ ਹੋਮਸਟੇ, ਮਹਿਲਾ-ਹਿੱਤੈਸ਼ੀ ਹੋਟਲ, ਸਥਾਨਕ ਮਹਿਲਾ ਗਾਈਡ, ਐਮਰਜੈਂਸੀ ਸਹਾਇਤਾ ਅਤੇ ਮੋਬਾਈਲ ਸੁਰੱਖਿਆ ਐਪ ਵਰਗੀਆਂ ਸਹੂਲਤਾਂ ਉਪਲਬਧ ਕਰਵਾ ਰਹੀਆਂ ਹਨ। ਹਿਮਾਚਲ ਵਿੱਚ ਮਹਿਲਾ ਉੱਦਮੀਆਂ ਨੂੰ ਟੂਰਿਜ਼ਮ ਕਾਰੋਬਾਰ ਨਾਲ ਜੋੜਨ ਲਈ ਵਿਸ਼ੇਸ਼ ਸਹਾਇਤਾ ਯੋਜਨਾਵਾਂ ਵੀ ਸ਼ੁਰੂ ਕੀਤੀਆਂ ਗਈਆਂ ਹਨ। ਮਾਹਰਾਂ ਦਾ ਮੰਨਣਾ ਹੈ ਕਿ ਜੇਕਰ ਸੁਰੱਖਿਆ ਅਤੇ ਬੁਨਿਆਦੀ ਸਹੂਲਤਾਂ ਨੂੰ ਹੋਰ ਮਜ਼ਬੂਤ ਕੀਤਾ ਜਾਵੇ ਤਾਂ ਭਾਰਤ 'ਮਹਿਲਾ ਸੋਲੋ ਟ੍ਰੈਵਲ' ਦਾ ਪ੍ਰਮੁੱਖ ਗਲੋਬਲ ਕੇਂਦਰ ਬਣ ਸਕਦਾ ਹੈ।
ਹਿਮਾਚਲ ਨੇ ਬਣਾਈ ਵਿਸ਼ੇਸ਼ 'ਸੋਲੋ ਟ੍ਰੈਵਲ ਨੀਤੀ'
ਔਰਤਾਂ ਦੀ ਵਧਦੀ ਰੁਚੀ ਨੂੰ ਦੇਖਦਿਆਂ ਹਿਮਾਚਲ ਪ੍ਰਦੇਸ਼ ਸਰਕਾਰ ਨੇ ਦੇਸ਼ ਦੀ ਪਹਿਲੀ 'ਸੋਲੋ ਟ੍ਰੈਵਲ ਨੀਤੀ-2026' ਤਿਆਰ ਕਰਨ ਦੀ ਦਿਸ਼ਾ ਵਿੱਚ ਕਦਮ ਵਧਾਇਆ ਹੈ। ਸਰਕਾਰ ਦਾ ਟੀਚਾ ਅਗਲੇ ਦੋ ਸਾਲਾਂ ਵਿੱਚ ਸੂਬੇ ਵਿੱਚ ਆਉਣ ਵਾਲੀਆਂ ਇਕੱਲੀਆਂ ਮਹਿਲਾ ਯਾਤਰੀਆਂ ਦੀ ਗਿਣਤੀ ਨੂੰ ਦੁੱਗਣਾ ਕਰਨਾ ਹੈ। ਇਸ ਲਈ ਸੁਰੱਖਿਅਤ ਰਿਹਾਇਸ਼, ਮਹਿਲਾ ਗਾਈਡ, ਹੈਲਪਲਾਈਨ ਅਤੇ ਸੈਰ-ਸਪਾਟੇ ਨਾਲ ਜੁੜੇ ਸਿਖਲਾਈ ਪ੍ਰੋਗਰਾਮਾਂ 'ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਜਾ ਰਿਹਾ ਹੈ।
ਲੱਦਾਖ, ਜੰਮੂ-ਕਸ਼ਮੀਰ ਸਣੇ ਇਨ੍ਹਾਂ ਪਹਾੜੀ ਖੇਤਰਾਂ 'ਚ ਆਬਾਦੀ ਦੀ ਗਣਨਾ 1 ਸਤੰਬਰ ਤੋਂ, ਕੇਂਦਰ ਵੱਲੋਂ ਨੋਟੀਫਿਕੇਸ਼ਨ ਜਾਰੀ
NEXT STORY 
