ਨਵੀਂ ਦਿੱਲੀ - ਸਾਲ 2026 ਦਾ ਪਹਿਲਾ ਚੰਦਰ ਗ੍ਰਹਿਣ ਅੱਜ ਮੰਗਲਵਾਰ 3 ਮਾਰਚ ਨੂੰ ਲੱਗਣ ਜਾ ਰਿਹਾ ਹੈ। ਵਿਗਿਆਨਕ ਨਜ਼ਰੀਏ ਤੋਂ ਇਲਾਵਾ, ਦੁਨੀਆ ਭਰ ਦੀਆਂ ਵੱਖ-ਵੱਖ ਸੱਭਿਆਚਾਰਾਂ 'ਚ ਇਸ ਖਗੋਲੀ ਘਟਨਾ ਨੂੰ ਲੈ ਕੇ ਕਈ ਦਿਲਚਸਪ ਅਤੇ ਡਰਾਉਣੀਆਂ ਮਾਨਤਾਵਾਂ ਪ੍ਰਚਲਿਤ ਹਨ। ਅੱਜ ਦਾ ਇਹ ਗ੍ਰਹਿਣ ਦੁਪਹਿਰ 3:20 ਵਜੇ ਸ਼ੁਰੂ ਹੋਵੇਗਾ ਅਤੇ ਸ਼ਾਮ 6:47 ਵਜੇ ਸਮਾਪਤ ਹੋਵੇਗਾ। ਇਸ ਨੂੰ 'ਬਲੱਡ ਮੂਨ' ਵੀ ਕਿਹਾ ਜਾ ਰਿਹਾ ਹੈ ਕਿਉਂਕਿ ਇਸ ਦੌਰਾਨ ਚੰਦਰਮਾ ਦਾ ਰੰਗ ਗੂੜ੍ਹਾ ਲਾਲ ਦਿਖਾਈ ਦਿੰਦਾ ਹੈ।
ਕਿਉਂ ਪੈਂਦਾ ਹੈ ਚੰਦ ਦਾ ਰੰਗ ਲਾਲ?
ਪ੍ਰਾਚੀਨ ਮਾਨਤਾਵਾਂ ਅਨੁਸਾਰ, ਚੰਦਰਮਾ ਦੇ ਲਾਲ ਹੋਣ ਪਿੱਛੇ ਕਈ ਕਹਾਣੀਆਂ ਹਨ। ਇੰਕਾ ਸਭਿਅਤਾ ਦੇ ਲੋਕਾਂ ਦਾ ਮੰਨਣਾ ਸੀ ਕਿ ਇਕ ਭੁੱਖੇ ਜਗੁਆਰ ਨੇ ਚੰਦ 'ਤੇ ਹਮਲਾ ਕਰਕੇ ਉਸ ਨੂੰ ਨਿਗਲ ਲਿਆ ਸੀ, ਜਿਸ ਕਾਰਨ ਉਸ ਦਾ ਰੰਗ ਖੂਨ ਵਾਂਗ ਲਾਲ ਹੋ ਗਿਆ। ਲੋਕਾਂ ਨੂੰ ਡਰ ਸੀ ਕਿ ਚੰਦ ਨੂੰ ਖਾਣ ਤੋਂ ਬਾਅਦ ਜਗੁਆਰ ਧਰਤੀ 'ਤੇ ਆ ਕੇ ਇਨਸਾਨਾਂ ਨੂੰ ਵੀ ਖਾ ਜਾਵੇਗਾ। ਇਸ ਨੂੰ ਰੋਕਣ ਲਈ, ਉਹ ਭਾਲੇ ਹਿਲਾ ਕੇ ਸ਼ੋਰ ਮਚਾਉਂਦੇ ਸਨ ਅਤੇ ਆਪਣੇ ਕੁੱਤਿਆਂ ਨੂੰ ਵੀ ਕੁੱਟਦੇ ਸਨ ਤਾਂ ਜੋ ਉਹਨਾਂ ਦੇ ਭੌਂਕਣ ਦੀ ਆਵਾਜ਼ ਨਾਲ ਜਗੁਆਰ ਡਰ ਕੇ ਭੱਜ ਜਾਵੇ।
ਰਾਜੇ ਦੀ ਜਾਨ ਬਚਾਉਣ ਲਈ ਬਣਾਇਆ ਜਾਂਦਾ ਸੀ 'ਨਕਲੀ ਰਾਜਾ'
ਪ੍ਰਾਚੀਨ ਮੇਸੋਪੋਟਾਮੀਆ ਦੇ ਲੋਕ ਚੰਦਰ ਗ੍ਰਹਿਣ ਨੂੰ ਸੱਤ ਰਾਖਸ਼ਾਂ ਦਾ ਚੰਦ 'ਤੇ ਹਮਲਾ ਮੰਨਦੇ ਸਨ। ਉਹ ਇਸ ਘਟਨਾ ਨੂੰ ਆਪਣੇ ਰਾਜੇ 'ਤੇ ਹਮਲੇ ਵਾਂਗ ਦੇਖਦੇ ਸਨ। ਗ੍ਰਹਿਣ ਦੇ ਬੁਰੇ ਪ੍ਰਭਾਵ ਤੋਂ ਬਚਣ ਲਈ, ਉਹ ਕੁਝ ਸਮੇਂ ਲਈ ਇਕ ਵਿਕਲਪਿਕ (ਨਕਲੀ) ਰਾਜਾ ਨਿਯੁਕਤ ਕਰ ਦਿੰਦੇ ਸਨ ਤਾਂ ਜੋ ਕੋਈ ਵੀ ਮੁਸੀਬਤ ਉਸ 'ਤੇ ਆਵੇ, ਜਦਕਿ ਅਸਲੀ ਰਾਜਾ ਇਕ ਆਮ ਨਾਗਰਿਕ ਦੇ ਭੇਸ 'ਚ ਲੁਕ ਜਾਂਦਾ ਸੀ। ਗ੍ਰਹਿਣ ਖਤਮ ਹੋਣ ਤੋਂ ਬਾਅਦ, ਉਸ ਨਕਲੀ ਰਾਜੇ ਨੂੰ ਅਕਸਰ ਜ਼ਹਿਰ ਦੇ ਕੇ ਮਾਰ ਦਿੱਤਾ ਜਾਂਦਾ ਸੀ।
ਚੰਦ ਦੀਆਂ 20 ਪਤਨੀਆਂ ਅਤੇ ਬੀਮਾਰੀ ਦੀ ਮਾਨਤਾ
ਕੈਲੀਫੋਰਨੀਆ ਦੇ ਹੂਪਾ ਕਬੀਲੇ ਦੀ ਮਾਨਤਾ ਸੀ ਕਿ ਚੰਦਰਮਾ ਦੀਆਂ 20 ਪਤਨੀਆਂ ਸਨ। ਜਦੋਂ ਚੰਦ ਆਪਣੇ ਪਾਲਤੂ ਜਾਨਵਰਾਂ (ਪਹਾੜੀ ਸ਼ੇਰਾਂ ਅਤੇ ਸੱਪਾਂ) ਨੂੰ ਪੂਰਾ ਖਾਣਾ ਨਹੀਂ ਦਿੰਦਾ ਸੀ, ਤਾਂ ਉਹ ਉਸ 'ਤੇ ਹਮਲਾ ਕਰਕੇ ਉਸ ਨੂੰ ਜ਼ਖਮੀ ਕਰ ਦਿੰਦੇ ਸਨ। ਮੰਨਿਆ ਜਾਂਦਾ ਸੀ ਕਿ ਜਦੋਂ ਉਸ ਦੀਆਂ ਪਤਨੀਆਂ ਆ ਕੇ ਚੰਦ ਦੀ ਰੱਖਿਆ ਕਰਦੀਆਂ ਸਨ, ਉਦੋਂ ਹੀ ਗ੍ਰਹਿਣ ਖਤਮ ਹੁੰਦਾ ਸੀ। ਇਸੇ ਤਰ੍ਹਾਂ ਲੁਈਸੇਨੋ ਕਬੀਲੇ ਦੇ ਲੋਕ ਚੰਦਰ ਗ੍ਰਹਿਣ ਨੂੰ ਚੰਦਰਮਾ ਦੇ ਬੀਮਾਰ ਹੋਣ ਦਾ ਸੰਕੇਤ ਮੰਨਦੇ ਸਨ ਅਤੇ ਉਸ ਨੂੰ ਠੀਕ ਕਰਨ ਲਈ ਮੰਤਰ ਪੜ੍ਹਦੇ ਸਨ।
ਵਿਗਿਆਨੀਆਂ ਅਨੁਸਾਰ ਭਾਵੇਂ ਇਹ ਸਭ ਮਾਨਤਾਵਾਂ ਹਨ, ਪਰ ਅੱਜ ਵੀ ਦੁਨੀਆ ਦੇ ਕਈ ਹਿੱਸਿਆਂ ਵਿੱਚ ਲੋਕ ਇਹਨਾਂ ਰਸਮਾਂ ਨੂੰ ਬੜੀ ਸ਼ਰਧਾ ਅਤੇ ਡਰ ਨਾਲ ਦੇਖਦੇ ਹਨ।
ਈਰਾਨ 'ਚ ਫਸੇ ਭਾਰਤੀ ਵਿਦਿਆਰਥੀਆਂ ਲਈ ਵੱਡੀ ਖ਼ਬਰ ! ਹੁਣ ਜ਼ਮੀਨੀ ਰਸਤੇ ਦੇਸ਼ ਛੱਡਣ ਦੀ ਮਿਲੀ ਇਜਾਜ਼ਤ
NEXT STORY 
