ਅੰਮ੍ਰਿਤਸਰ (ਨੀਰਜ) : ਰਜਿਸਟਰੀ ਦਫ਼ਤਰ-2 ਅਤੇ ਰਜਿਸਟਰੀ ਦਫ਼ਤਰ-3 ਵਿਚ ਨਕਲੀ ਚਾਚਾ ਖੜ੍ਹਾ ਕਰ ਕੇ ਕਲਯੁਗੀ ਭਤੀਜਿਆਂ ਵੱਲੋਂ 8 ਜਾਅਲੀ ਰਜਿਸਟਰੀਆਂ ਕਰਵਾਉਣ ਦੇ ਮਾਮਲੇ ਵਿਚ ਅਤੇ ਇਸ ਤੋਂ ਬਾਅਦ ਅੱਗੇ ਜਾਅਲੀ ਰਜਿਸਟਰੀ ਨੂੰ ਕਿਸੇ ਹੋਰ ਵਿਅਕਤੀ ਦੇ ਨਾਂ ’ਤੇ 9ਵੀਂ ਰਜਿਸਟਰੀ ਕਰਨ ਦੇ ਮਾਮਲੇ ਨੂੰ ‘ਜਗ ਬਾਣੀ’ ਵੱਲੋਂ ਪ੍ਰਮੁੱਖਤਾ ਨਾਲ ਪ੍ਰਕਾਸ਼ਿਤ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਡੀ. ਸੀ. ਦਲਵਿੰਦਰਜੀਤ ਸਿੰਘ, ਡੀ. ਆਰ. ਓ. ਨਵਕੀਰਤ ਸਿੰਘ ਰੰਧਾਵਾ ਅਤੇ ਐੱਸ. ਡੀ. ਐੱਮ. ਮਨਕਵਲ ਸਿੰਘ ਚਾਹਲ ਦੀ ਰਿਪੋਰਟ ਦੇ ਆਧਾਰ ’ਤੇ ਆਖ਼ਿਰਕਾਰ ਪੁਲਸ ਨੇ ਕਲਯੁੱਗੀ ਭਤੀਜਿਆਂ ਅਤੇ ਉਨ੍ਹਾਂ ਦੇ ਸਾਥੀਆਂ ਖ਼ਿਲਾਫ਼ ਪੰਜ ਮਹੀਨਿਆਂ ਬਾਅਦ ਐੱਫ. ਆਈ. ਆਰ. ਦਰਜ ਕਰ ਦਿੱਤੀ ਹੈ।
ਹਾਲਾਂਕਿ, ਇਸ ਐੱਫ. ਆਈ. ਆਰ. ਵਿਚ ਅਜੇ ਤੱਕ ਇਕ ਹੋਰ ਮੁਲਜ਼ਮ ਅਰੁਣ ਨੌਕਰ, ਰਜਿਸਟਰੀਆਂ ਲਿਖਣ ਵਾਲਾ ਇਕ ਕਥਿਤ ਵਸੀਕਾ ਨਵੀਸ ਅਤੇ ਡੀ. ਸੀ. ਦਫ਼ਤਰ ਦੇ ਦੋ ਮੁਲਾਜ਼ਮਾਂ ਦੇ ਨਾਂ ਸ਼ਾਮਲ ਨਹੀਂ ਕੀਤੇ ਗਏ ਹਨ, ਪਰ ਪਤਾ ਲੱਗਿਆ ਹੈ ਕਿ ਜਿਵੇਂ-ਜਿਵੇਂ ਪੁਲਸ ਵੱਲੋਂ ਜਾਂਚ ਅੱਗੇ ਵਧਾਈ ਜਾਵੇਗੀ, ਓਵੇਂ-ਓਵੇਂ ਹੋਰ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਵੀ ਤੈਅ ਹੈ। ਇਸ ਮਾਮਲੇ ਵਿਚ ਮ੍ਰਿਤਕ ਜਗਦੀਸ਼ ਰਾਜ ਦੇ ਪੁੱਤਰਾਂ ਰੋਮੀ ਅਤੇ ਹਰਭਜਨ ਸਿੰਘ ਵੱਲੋਂ ਬਾਰ ਐਸੋਸੀਏਸ਼ਨ ਦੇ ਪ੍ਰਧਾਨ ਐਡਵੋਕੇਟ ਗੁਰਪ੍ਰੀਤ ਸਿੰਘ ਪਨੇਸਰ ਅਤੇ ਐਡਵੋਕੇਟ ਮੰਗਤ ਰਾਮ ਸਿੱਲੀ ਰਾਹੀਂ ਕਾਨੂੰਨੀ ਲੜਾਈ ਸ਼ੁਰੂ ਕੀਤੀ ਗਈ ਸੀ। ਜਿਨ੍ਹਾਂ ਮੁਲਜ਼ਮਾਂ ਖ਼ਿਲਾਫ਼ ਐੱਫ. ਆਈ. ਆਰ. ਦਰਜ ਕੀਤੀ ਗਈ ਹੈ, ਉਨ੍ਹਾਂ ਵਿਚ ਰਾਜੇਸ਼ ਧਵਨ, ਵਰੁਣ ਧਵਨ, ਵਿਕ੍ਰਾਂਤ ਆਨੰਦ, ਅਣਪਛਾਤੀ ਸਿਮਰਨਜੀਤ ਕੌਰ ਅਤੇ ਸੁਨੀਲ ਕੁਮਾਰ ਦੇ ਨਾਂ ਸ਼ਾਮਲ ਹਨ। ਪੁਲਸ ਵੱਲੋਂ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਗਈ ਹੈ।
ਐੱਸ. ਡੀ. ਐੱਮ. ਚਾਹਲ ਨੇ 29 ਪੰਨਿਆਂ ’ਚ ਕੀਤੀ FIR ਦੀ ਸਿਫ਼ਾਰਸ਼
ਸਬ-ਰਜਿਸਟਰਾਰ-2 ਅਤੇ ਸਬ-ਰਜਿਸਟਰਾਰ-3 ਦਫ਼ਤਰ ਵੱਲੋਂ ਜਦੋਂ ਸ਼ੁਰੂਆਤ ਵਿਚ 8 ਜਾਅਲੀ ਰਜਿਸਟਰੀਆਂ ਸਬੰਧੀ ਡੀ. ਆਰ. ਓ. ਨੂੰ ਰਿਪੋਰਟ ਭੇਜੀ ਗਈ ਸੀ, ਤਾਂ ਐੱਫ. ਸੀ. ਆਰ. ਅਨੁਰਾਗ ਵਰਮਾ ਅਤੇ ਡੀ. ਸੀ. ਦਲਵਿੰਦਰਜੀਤ ਸਿੰਘ ਦੇ ਹੁਕਮਾਂ ਅਨੁਸਾਰ ਐੱਸ. ਡੀ. ਐੱਮ. ਅੰਮ੍ਰਿਤਸਰ-2 ਮਨਕਵਲ ਸਿੰਘ ਚਾਹਲ ਨੇ ਆਪਣੀ ਜਾਂਚ ਪੂਰੀ ਕਰਦੇ ਹੋਏ ਨਕਲੀ ਚਾਚੇ ਸਮੇਤ ਸਾਰੇ ਭਤੀਜਿਆਂ, ਅਣਪਛਾਤੀ ਸਿਮਰਨਜੀਤ ਕੌਰ ਅਤੇ ਉਸ ਦੇ ਸਾਥੀਆਂ ਖ਼ਿਲਾਫ਼ ਲੈਂਡ ਰਜਿਸਟ੍ਰੇਸ਼ਨ ਐਕਟ ਦੀ ਧਾਰਾ 82 ਤਹਿਤ ਐੱਫ. ਆਈ. ਆਰ. ਦਰਜ ਕਰਨ ਦੀ ਸਿਫ਼ਾਰਸ਼ ਕੀਤੀ ਸੀ। ਐੱਸ. ਡੀ. ਐੱਮ. ਨੇ ਆਪਣੀ 29 ਪੰਨਿਆਂ ਦੀ ਇਹ ਜਾਂਚ ਰਿਪੋਰਟ ਡੀ. ਸੀ. ਦਲਵਿੰਦਰਜੀਤ ਸਿੰਘ ਨੂੰ ਸੌਂਪੀ ਸੀ, ਜਿਸ ਤੋਂ ਬਾਅਦ ਡੀ. ਸੀ. ਨੇ ਡੀ. ਆਰ. ਓ. ਦਫ਼ਤਰ ਤੋਂ ਵੀ ਇਸ ਸਬੰਧ ਵਿਚ ਟਿੱਪਣੀਆਂ (ਕਮੈਂਟਸ) ਮੰਗੀਆਂ ਸਨ। ਡੀ. ਆਰ. ਓ. ਨੇ ਵੀ ਆਪਣੀ ਜਾਂਚ ਤੋਂ ਬਾਅਦ ਮੁਲਜ਼ਮਾਂ ਖ਼ਿਲਾਫ਼ ਐੱਫ. ਆਈ. ਆਰ. ਦਰਜ ਕਰਨ ਲਈ ਡੀ. ਸੀ. ਨੂੰ ਸਿਫ਼ਾਰਸ਼ ਕਰ ਦਿੱਤੀ, ਜਿਸ ’ਤੇ ਡੀ. ਸੀ. ਵੱਲੋਂ ਅਗਲੀ ਕਾਰਵਾਈ ਕਰਦਿਆਂ ਐੱਫ. ਸੀ. ਆਰ. ਨੂੰ ਜਾਂਚ ਰਿਪੋਰਟ ਭੇਜਣ ਅਤੇ ਪੁਲਸ ਕਮਿਸ਼ਨਰ ਨੂੰ ਐੱਫ. ਆਈ. ਆਰ. ਦਰਜ ਕਰਨ ਸਬੰਧੀ ਲਿਖਤੀ ਕਾਰਵਾਈ ਕੀਤੀ ਗਈ। ਇੰਨਾ ਹੀ ਨਹੀਂ, ਇਸ ਜਾਂਚ ਰਿਪੋਰਟ ਵਿਚ ਉਸ ਅਸ਼ਟਾਮ ਫ਼ਰੋਸ਼ ਅਤੇ ਗਵਾਹਾਂ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ, ਜਿਸ ਨੇ ਬਿਨਾਂ ਦਸਤਾਵੇਜ਼ ਚੈੱਕ ਕੀਤੇ ਇਕ-ਦੋ ਨਹੀਂ ਬਲਕਿ 8 ਜਾਅਲੀ ਰਜਿਸਟਰੀਆਂ ਲਈ ਮੁਲਜ਼ਮਾਂ ਨੂੰ ਅਸ਼ਟਾਮ ਦਿੱਤੇ ਸਨ।
ਇਹ ਵੀ ਪੜ੍ਹੋ : ਪੰਜਾਬ 'ਚ ਵਿਆਹ ਕਰਵਾਉਣ ਆਈ 72 ਸਾਲਾ NRI ਮਹਿਲਾ ਦੇ ਕਤਲਕਾਂਡ 'ਚ ਸਨਸਨੀਖੇਜ਼ ਖ਼ੁਲਾਸਾ
ਜਾਅਲੀ ਰਜਿਸਟਰੀਆਂ ਦੀ ਅਸਲੀ ਫ਼ੋਟੋ ਨਾਲ ਫਸੇ ਮੁਲਜ਼ਮ
ਨਕਲੀ ਚਾਚਾ ਖੜ੍ਹਾ ਕਰ ਕੇ ਅਤੇ ਵੱਖ-ਵੱਖ ਚਾਚੇ ਖੜ੍ਹੇ ਕਰ ਕੇ ਭਤੀਜਿਆਂ ਨੇ ਜੋ ਜਾਅਲੀ ਰਜਿਸਟਰੀਆਂ ਕਰਵਾਈਆਂ, ਉਹ ਉਨ੍ਹਾਂ ਦੀ ਅਸਲੀ ਫ਼ੋਟੋ ਕਾਰਨ ਫਸ ਗਏ, ਕਿਉਂਕਿ ਸਬ-ਰਜਿਸਟਰਾਰ ਸੁਨੀਲ ਗਰਗ, ਪ੍ਰਿਯੰਕਾ ਕੁਮਾਰੀ ਅਤੇ ਸਪਰਸ਼ ਕੌਰ ਵੱਲੋਂ ਮਾਮਲੇ ਦੀ ਸ਼ੁਰੂਆਤ ਵਿਚ ਹੀ ਅਸਲੀ ਚਾਚੇ ਜਗਦੀਸ਼ ਰਾਜ ਦੀ ਸ਼ਿਕਾਇਤ ਮਿਲਣ ਤੋਂ ਬਾਅਦ ਜਾਅਲੀ ਰਜਿਸਟਰੀਆਂ ’ਤੇ ਲੱਗੀਆਂ ਫ਼ੋਟੋਆਂ ਅਤੇ ਹੋਰ ਦਸਤਾਵੇਜ਼ ਇਕੱਠੇ ਕਰ ਲਏ ਗਏ ਸਨ ਅਤੇ ਇਸ ਦੀ ਰਿਪੋਰਟ ਉੱਚ ਅਧਿਕਾਰੀਆਂ ਨੂੰ ਦਿੱਤੀ ਸੀ। ਇੰਨਾ ਹੀ ਨਹੀਂ, ਐੱਫ. ਸੀ. ਆਰ. ਅਤੇ ਡੀ. ਸੀ. ਦੇ ਹੁਕਮ ਮਿਲਣ ਤੋਂ ਬਾਅਦ ਐੱਸ. ਡੀ. ਐੱਮ. ਮਨਕਵਲ ਸਿੰਘ ਚਾਹਲ ਨੇ ਮਾਮਲੇ ਦੇ ਹਰ ਪਹਿਲੂ ’ਤੇ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕੀਤੀ ਅਤੇ ਸਾਰੀਆਂ ਧਿਰਾਂ ਦੇ ਬਿਆਨ ਲਏ। ਹਾਲਾਂਕਿ, ਇਕ ਸਮਾਂ ਅਜਿਹਾ ਵੀ ਆਇਆ ਜਦੋਂ ਅਸਲੀ ਚਾਚੇ ਨੇ ਐੱਸ. ਡੀ. ਐੱਮ. ਦੇ ਸਾਹਮਣੇ ਆ ਕੇ ਕਿਹਾ ਕਿ ਸਾਰੀਆਂ ਰਜਿਸਟਰੀਆਂ ਅਸਲੀ ਹਨ, ਪਰ ਜਾਅਲੀ ਰਜਿਸਟਰੀਆਂ ’ਤੇ ਲੱਗੀ ਨਕਲੀ ਚਾਚੇ ਅਤੇ ਹੋਰਨਾਂ ਦੀਆਂ ਫ਼ੋਟੋਆਂ ਨੇ ਸਭ ਕੁਝ ਸਪੱਸ਼ਟ ਕਰ ਦਿੱਤਾ, ਕਿਉਂਕਿ ਨਕਲੀ ਰਜਿਸਟਰੀਆਂ ’ਤੇ ਲੱਗੀ ਫ਼ੋਟੋ ਨੂੰ ਬਦਲਣਾ ਅਸੰਭਵ ਕੰਮ ਸੀ।
ਜਗਦੀਸ਼ ਰਾਜ ਦੇ ਬੇਟਿਆਂ ਨੂੰ ਅਜੇ ਵੀ ਪੁਲਸ ਸੁਰੱਖਿਆ ਨਹੀਂ
ਐੱਸ. ਡੀ. ਐੱਮ. ਵੱਲੋਂ ਸ਼ੁਰੂ ਕੀਤੀ ਗਈ ਜਾਂਚ ਦੌਰਾਨ ਜਗਦੀਸ਼ ਰਾਜ ਦੇ ਬੇਟਿਆਂ ਵੱਲੋਂ ਪੁਲਸ ਕਮਿਸ਼ਨਰ ਗੁਰਪ੍ਰੀਤ ਸਿੰਘ ਭੁੱਲਰ ਅਤੇ ਐੱਸ. ਡੀ. ਐੱਮ. ਨੂੰ ਪੁਲਸ ਸੁਰੱਖਿਆ ਲਈ ਲਿਖਤੀ ਅਪੀਲ ਕੀਤੀ ਗਈ ਸੀ, ਪਰ ਅਜੇ ਤੱਕ ਉਨ੍ਹਾਂ ਨੂੰ ਪੁਲਸ ਸੁਰੱਖਿਆ ਨਹੀਂ ਮਿਲੀ ਹੈ। ਦੋਵਾਂ ਪੁੱਤਰਾਂ ਨੇ ਆਪਣੀ ਸ਼ਿਕਾਇਤ ਵਿਚ ਲਿਖਿਆ ਹੈ ਕਿ ਜਦੋਂ ਵੀ ਉਹ ਤਹਿਸੀਲ ਅਤੇ ਐੱਸ. ਡੀ. ਐੱਮ. ਕੋਰਟ ਵਿਚ ਜਾਣ ਲਈ ਜਾਂ ਘਰੋਂ ਬਾਹਰ ਨਿਕਲਦੇ ਹਨ, ਤਾਂ ਕੁਝ ਅਣਪਛਾਤੇ ਲੋਕ ਉਨ੍ਹਾਂ ਦਾ ਪਿੱਛਾ ਕਰਦੇ ਹਨ, ਜਿਨ੍ਹਾਂ ਤੋਂ ਉਨ੍ਹਾਂ ਨੂੰ ਜਾਨ-ਮਾਲ ਦਾ ਖ਼ਤਰਾ ਹੈ। ਮੌਜੂਦਾ ਸਮੇਂ ਵਿਚ ਜਗਦੀਸ਼ ਰਾਜ ਦੇ ਅਸਲੀ ਪੁੱਤਰਾਂ ਹਰਭਜਨ ਸਿੰਘ ਅਤੇ ਹੋਰਨਾਂ ਵੱਲੋਂ ਜਾਨੋਂ ਮਾਰਨ ਦੀਆਂ ਧਮਕੀਆਂ ਮਿਲਣ ਸਬੰਧੀ ਸਾਈਬਰ ਸੈੱਲ ਵਿਚ ਸ਼ਿਕਾਇਤ ਕੀਤੀ ਗਈ ਹੈ, ਜਿਸ ’ਤੇ ਜਾਂਚ ਜਾਰੀ ਹੈ।
ਆਨਲਾਈਨ ਸਿਸਟਮ ਦੇ ਬਾਵਜੂਦ ਕਿਵੇਂ ਤਿਆਰ ਹੋ ਰਹੇ ਹਨ ਨਕਲੀ ਦਸਤਾਵੇਜ਼?
ਮੌਜੂਦਾ ਸਮੇਂ ਵਿਚ ਰਜਿਸਟਰੀ ਦਫ਼ਤਰਾਂ ਵਿਚ ਈ-ਰਜਿਸਟਰੀ ਅਤੇ ਔਨਲਾਈਨ ਅਪੌਇੰਟਮੈਂਟ ਸਿਸਟਮ ਲਾਗੂ ਹੈ, ਜਿਸ ਵਿਚ ਜਾਅਲੀ ਦਸਤਾਵੇਜ਼ ਤਿਆਰ ਕਰਨਾ ਆਸਾਨ ਨਹੀਂ ਹੈ। ਡੀ. ਸੀ., ਐੱਸ. ਡੀ. ਐੱਮ. ਅਤੇ ਡੀ. ਆਰ. ਓ. ਦੀ ਜਾਂਚ ਅਤੇ ਇਸ ਤੋਂ ਬਾਅਦ ਪੁਲਸ ਕਾਰਵਾਈ ਦੀ ਸ਼ੁਰੂਆਤ ਹੁੰਦੇ ਹੀ ਇਹ ਵੀ ਪਤਾ ਲੱਗ ਜਾਵੇਗਾ ਕਿ ਆਖ਼ਿਰਕਾਰ ਜ਼ਿਲਾ ਕਚਹਿਰੀ ਵਿਚ ਉਹ ਕਿਹੜੇ ਲੋਕ ਹਨ ਜੋ ਨਕਲੀ ਦਸਤਾਵੇਜ਼ ਤਿਆਰ ਕਰਨ ਦਾ ਕੰਮ ਕਰਦੇ ਹਨ ਅਤੇ ਲੈਂਡ ਮਾਫ਼ੀਆ ਗੈਂਗ ਨਾਲ ਮਿਲੀਭੁਗਤ ਰੱਖਦੇ ਹਨ। ਕੁਝ ਮਹੀਨੇ ਪਹਿਲਾਂ ਇਕ ਜੂਡੀਸ਼ੀਅਲ ਅਧਿਕਾਰੀ ਵੱਲੋਂ ਵੀ ਕੁਝ ਲੋਕਾਂ ਖ਼ਿਲਾਫ਼ ਪਰਚਾ ਦਰਜ ਕਰਵਾਇਆ ਗਿਆ ਸੀ, ਜੋ ਨਕਲੀ ਦਸਤਾਵੇਜ਼ਾਂ ਦੇ ਸਿਰ ’ਤੇ ਜ਼ਮਾਨਤਾਂ ਕਰਵਾਉਣ ਦਾ ਕੰਮ ਕਰ ਰਹੇ ਸਨ। ਅਜਿਹੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਨ ਵਾਲੇ ਗੈਂਗ ਦਾ ਪਰਦਾਫ਼ਾਸ਼ ਕੀਤਾ ਜਾਣਾ ਵੀ ਬਹੁਤ ਜ਼ਰੂਰੀ ਹੈ।
ਇਹ ਵੀ ਪੜ੍ਹੋ : ਹੁਣ ਸਿੱਧਾ UPI ਰਾਹੀਂ ਨਿਕਲੇਗਾ PF ਦਾ ਪੈਸਾ! ਮਿੰਟਾਂ 'ਚ ਹੋਵੇਗਾ ਹਫਤਿਆਂ ਦਾ ਕੰਮ
ਕਿਸੇ ਨੂੰ ਵੀ ਕਾਨੂੰਨ ਨਾਲ ਖਿਲਵਾੜ ਨਹੀਂ ਕਰਨ ਦਿੱਤਾ ਜਾਵੇਗਾ : ਡੀ. ਸੀ.
ਜ਼ਿਲਾ ਮੈਜਿਸਟ੍ਰੇਟ ਅਤੇ ਡਿਪਟੀ ਕਮਿਸ਼ਨਰ ਦਲਵਿੰਦਰਜੀਤ ਸਿੰਘ ਨੇ ਕਿਹਾ ਕਿ ਜਾਅਲੀ ਰਜਿਸਟਰੀਆਂ ਕਰਵਾਉਣ ਵਾਲਿਆਂ ਖ਼ਿਲਾਫ਼ ਸਖ਼ਤ ਤੋਂ ਸਖ਼ਤ ਐਕਸ਼ਨ ਲਿਆ ਜਾਵੇਗਾ ਤਾਂ ਜੋ ਭਵਿੱਖ ਵਿਚ ਕੋਈ ਵੀ ਵਿਅਕਤੀ ਜਾਅਲੀ ਦਸਤਾਵੇਜ਼ਾਂ ਨਾਲ ਕਿਸੇ ਦੀ ਜ਼ਮੀਨ ਨਾ ਹੜੱਪ ਸਕੇ। ਕਿਸੇ ਨੂੰ ਵੀ ਕਾਨੂੰਨ ਨਾਲ ਖਿਲਵਾੜ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
8 ਸਾਲਾ ਹਰਨਾਜ਼ ਕੌਰ ਦਾ ਨਾਂ ‘ਇੰਡੀਆ ਬੁੱਕ ਆਫ ਰਿਕਾਰਡਜ਼ 2026’ 'ਚ ਦਰਜ
NEXT STORY 
