ਨਵੀਂ ਦਿੱਲੀ/ਚੰਡੀਗੜ੍ਹ (ਏਜੰਸੀਆਂ) - ਪੰਜਾਬ, ਹਰਿਆਣਾ, ਹਿਮਾਚਲ ਅਤੇ ਚੰਡੀਗੜ੍ਹ ਸਮੇਤ ਉੱਤਰੀ ਭਾਰਤ ਦੇ ਵੱਖ-ਵੱਖ ਇਲਾਕਿਆਂ ਵਿਚ ਅਜੇ ਹੋਰ ਕੜਾਕੇ ਦੀ ਠੰਡ ਪਵੇਗੀ। ਇਸ ਵਾਰ ਪਿਛਲੇ ਸਾਲ ਨਾਲੋਂ ਵੀ ਵਧ ਠੰਡ ਪੈਣ ਦੀ ਸੰਭਾਵਨਾ ਹੈ।
ਕੌਮੀ ਰਾਜਧਾਨੀ ਦਿੱਲੀ ਵਿਚ ਤਾਂ ਪਿਛਲੇ 10 ਸਾਲਾਂ ਵਿਚ ਪਹਿਲੀ ਵਾਰ ਇਸ ਸਾਲ ਨਵੰਬਰ ਵਿਚ ਸਭ ਤੋਂ ਵਧ ਠੰਡ ਪਈ। ਭਾਰਤੀ ਮੌਸਮ ਵਿਭਾਗ ਨੇ ਦਸੰਬਰ ਤੋਂ ਫਰਵਰੀ ਲਈ ਠੰਡ ਬਾਰੇ ਆਪਣੇ ਪੇਸ਼ਗੀ ਅਨੁਮਾਨ ਵਿਚ ਕਿਹਾ ਹੈ ਕਿ ਉੱਤਰੀ ਅਤੇ ਕੇਂਦਰੀ ਭਾਰਤ ਵਿਚ ਸਾਧਾਰਣ ਘੱਟੋ-ਘੱਟ ਤਾਪਮਾਨ ਦੇ ਆਮ ਨਾਲੋਂ ਹੇਠਾਂ ਹੀ ਰਹਿਣ ਦੀ ਸੰਭਾਵਨਾ ਹੈ। ਉੱਤਰੀ ਭਾਰਤ ਵਿਚ ਰਾਤ ਦਾ ਤਾਪਮਾਨ ਵੀ ਆਮ ਨਾਲੋਂ ਘੱਟ ਰਹਿ ਸਕਦਾ ਹੈ। ਦਿਨ ਦਾ ਤਾਪਮਾਨ ਕੁਝ ਵਧ ਹੋਣ ਦੀ ਉਮੀਦ ਹੈ।
ਦਿੱਲੀ ਵਿਚ ਇਸ ਸਾਲ ਠੰਡੀਆਂ ਰਾਤਾਂ ਨੂੰ ਲੈ ਕੇ ਪਿੱਛਲੇ ਕਈ ਸਾਲਾਂ ਦੇ ਰਿਕਾਰਡ ਟੁੱਟੇ ਹਨ। ਇਸ ਸਾਲ ਨਵੰਬਰ ਦੇ ਮਹੀਨੇ ਵਿਚ ਔਸਤ ਘੱਟੋ-ਘੱਟ ਤਾਪਮਾਨ 10 ਡਿਗਰੀ ਸੈਲਸੀਅਸ ਦੇ ਨੇੜੇ ਰਿਹਾ ਹੈ। ਦਿੱਲੀ ਵਿਚ ਉਂਝ ਨਵੰਬਰ ਮਹੀਨੇ ਦਾ ਔਸਤ ਘੱਟੋ-ਘੱਟ ਤਾਪਮਾਨ 12.9 ਡੀਗਰੀ ਸੈਲਸੀਅਸ ਹੁੰਦਾ ਹੈ। ਭਾਰਤੀ ਮੌਸਮ ਵਿਗਿਆਨ ਵਿਭਾਗ ਦੇ ਅੰਕੜਿਆਂ ਮੁਤਾਬਕ 1 ਨਵੰਬਰ ਤੋਂ 29 ਨਵੰਬਰ ਤੱਕ ਦਿੱਲੀ ਵਿਚ ਔਸਤ ਘੱਟੋ-ਘੱਟ ਤਾਪਮਾਨ 10.3 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜੋ ਤਕਰੀਬਨ ਇਕ ਦਹਾਕੇ ਵਿਚ ਸਭ ਤੋਂ ਘੱਟ ਤਾਪਮਾਨ ਹੈ। ਪਿਛਲੇ ਸਾਲ ਔਸਤ ਘੱਟੋ ਘੱਟ ਤਾਪਮਾਨ 15 ਡਿਗਰੀ ਸੈਲਸੀਅਸ ਰਿਹਾ ਸੀ। 2018 ਵਿਚ 13.4 ਅਤੇ 2017 ਤੇ 2016 ਵਿਚ ਇਹ 12.8 ਸੀ। ਐਤਵਾਰ ਨੂੰ ਦਿੱਲੀ ਦਾ ਘੱਟੋ ਘੱਟ ਤਾਪਮਾਨ 7 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ।
ਇਹ ਵੀ ਪੜ੍ਹੋ: ਮੋਦੀ ਦੀ ਸੁਰੱਖਿਆ ਲਈ ਵੀ ਵਰਤਿਆ ਜਾਵੇਗਾ 'ਡਰੋਨ ਕਿਲਰ'
ਪੰਜਾਬ ਤੇ ਹਰਿਆਣਾ ਦੇ ਕਈ ਸ਼ਹਿਰ ਸ਼ਿਮਲਾ ਤੋਂ ਵੀ ਠੰਡੇ
ਪੰਜਾਬ ਅਤੇ ਹਰਿਆਣਾ ਦੇ ਕਈ ਸ਼ਹਿਰਾਂ ਵਿਚ ਐਤਵਾਰ ਦਾ ਤਾਪਮਾਨ ਸ਼ਿਮਲਾ ਨਾਲੋਂ ਵੀ ਘੱਟ ਸੀ। ਹਰਿਆਣਾ ਦੇ ਨਾਲਨੌਲ ਤੇ ਹਿਸਾਰ ਵਿਚ ਘੱਟੋ ਘੱਟ ਤਾਪਮਾਨ 5 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਪੰਜਾਬ ਦੇ ਜਲੰਧਰ ਨੇੜਲੇ ਆਦਮਪੁਰ ਅਤੇ ਫਰੀਦਕੋਟ ਵਿਚ ਇਹ ਤਾਪਮਾਨ 6 ਡਿਗਰੀ ਸੀ। ਸ਼ਿਮਲਾ ਦਾ ਘੱਟੋ ਘੱਟ ਤਾਪਮਾਨ 10 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ।
ਹਿਮਾਚਲ ਦੇ ਮਨਾਲੀ ਵਿਚ ਘੱਟੋ ਘੱਟ ਤਾਪਮਾਨ 3, ਸੋਲਨ ਵਿਚ 5 ਅਤੇ ਕਲਪਾ ਵਿਚ 1 ਡਿਗਰੀ ਸੈਲਸੀਅਸ ਸੀ। ਸ਼੍ਰੀਨਗਰ ਵਿਖੇ ਮਨਫੀ 1 ਅਤੇ ਜੰਮੂ ਵਿਖੇ 9 ਡਿਗਰੀ ਸੈਲਸੀਅਸ ਤਾਪਮਾਨ ਸੀ। ਮੌਸਮ ਵਿਭਾਗ ਮੁਤਾਬਕ ਬੁੱਧਵਾਰ ਤੱਕ ਪੂਰੇ ਖੇਤਰ ਵਿਚ ਮੌਸਮ ਆਮ ਤੌਰ ਉੱਤੇ ਖੁਸ਼ਕ ਹੀ ਰਹੇਗਾ।
ਮਨਾਲੀ ਵਿਚ ਇਕ ਦਿਨ ਧੁੱਪ ਚੜਨ ਪਿੱਛੋਂ ਉੱਚੇ ਪਹਾੜਾਂ ਉੱਤੇ ਮੁੜ ਹੋਈ ਬਰਫਬਾਰੀ
ਮਨਾਲੀ ਵਿਚ ਇਕ ਦਿਨ ਧੁੱਪ ਚੜਨ ਪਿੱਛੋਂ ਮਨਾਲੀ ਦੇ ਉੱਚੇ ਪਹਾੜਾਂ ਅਤੇ ਲਾਹੌਲ ਸਪਿਤੀ ਦੇ ਪਹਾੜਾਂ ਉੱਤੇ ਬਰਫਬਾਰੀ ਦਾ ਤਾਜ਼ਾ ਦੌਰ ਐਤਵਾਰ ਸ਼ੁਰੂ ਹੋ ਗਿਆ। ਰੋਹਤਾਂਗ ਅਤੇ ਬਾਰਾਲਾਚਾ ਦੇ ਦੱਰੇ ਸਮੇਤ ਵੱਖ-ਵੱਖ ਉੱਚੇ ਇਲਾਕਿਆਂ ਵਿਚ ਬਰਫ ਡਿੱਗਣੀ ਸ਼ੁਰੂ ਹੋ ਗਈ। ਇਸ ਕਾਰਣ ਮਨਾਲੀ ਅਤੇ ਕੇਲਾਂਗ ਵਿਖੇ ਮੌਸਮ ਹੋਰ ਵੀ ਠੰਡਾ ਹੋ ਗਿਆ ਹੈ। ਸਕੀਇੰਗ ਲਈ ਸਮੁੱਚੀ ਦੁਨੀਆ ਵਿਚ ਪ੍ਰਸਿੱਧ ਸੋਲੰਗਨਾਲਾ ਵਿਖੇ ਹਿੰਮਤੀ ਸਰਗਰਮੀਆਂ ਦੀਆਂ ਧੁੰਮਾਂ ਮਚੀਆਂ ਹੋਈਆਂ ਹਨ।
ਲੁਧਿਆਣਾ ਜ਼ਿਲ੍ਹੇ 'ਚ ਕੋਰੋਨਾ ਨਾਲ 4 ਮਰੀਜ਼ਾਂ ਦੀ ਮੌਤ, 105 ਨਵੇਂ ਮਰੀਜ਼
NEXT STORY 
