ਲੁਧਿਆਣਾ,(ਅਨਿਲ): ਪੰਜਾਬ ਦੀ ਕਾਂਗਰਸ ਸਰਕਾਰ ਨੇ ਲੋਕਾਂ ਦੇ ਇਲਾਜ ਲਈ ਪਿੰਡਾਂ ਵਿਚ ਸਰਕਾਰੀ ਡਿਸਪੈਂਸਰੀਆਂ ਤਾਂ ਬਣਾ ਰੱਖੀਆਂ ਹਨ ਪਰ ਇਨ੍ਹਾਂ ਵਿਚ ਲੋਕਾਂ ਦੇ ਇਲਾਜ ਲਈ ਕੋਈ ਐੱਮ. ਬੀ. ਬੀ. ਐੱਸ. ਡਾਕਟਰ ਮੌਜੂਦ ਨਹੀਂ ਹੈ ਅਤੇ ਜੋ ਡਾਕਟਰ ਇਸ ਸਮੇਂ ਡਿਸਪੈਂਸਰੀ ਚਲਾ ਰਹੇ ਹਨ, ਉਨ੍ਹਾਂ ਕੋਲ ਮਰੀਜ਼ਾਂ ਦੇ ਇਲਾਜ ਲਈ ਦਵਾਈਆਂ ਨਹੀਂ ਹਨ, ਜਿਸ ਦੀ ਮਿਸਾਲ ਕਸਬਾ ਲਾਡੋਵਾਲ ਦੀ ਸਰਕਾਰੀ ਡਿਸਪੈਂਸਰੀ 'ਚ ਆਮ ਹੀ ਦੇਖਣ ਨੂੰ ਮਿਲਦੀ ਹੈ। ਇਸ ਡਿਸਪੈਂਸਰੀ ਵਿਚ ਆਲੇ-ਦਆਲੇ ਦੇ ਕਰੀਬ 40 ਪਿੰਡਾਂ ਦੇ ਲੋਕ ਆਪਣਾ ਇਲਾਜ ਕਰਵਾਉਣ ਲਈ ਆਉਂਦੇ ਹਨ ਪਰ 3 ਮਹੀਨੇ ਤੋਂ ਇਸ ਡਿਸਪੈਂਸਰੀ ਵਿਚ ਐੱਮ. ਬੀ. ਬੀ. ਐੱਸ. ਡਾਕਟਰ ਦੀ ਬਦਲੀ ਹੋ ਜਾਣ ਕਾਰਣ ਬਾਅਦ ਵਿਚ ਕਿਸੇ ਡਾਕਟਰ ਦੀ ਨਿਯੁਕਤੀ ਨਹੀਂ ਕੀਤੀ ਗਈ। ਪੰਜਾਬ ਸਰਕਾਰ ਦੇ ਸਿਹਤ ਮੰਤਰੀ ਵੱਲੋਂ ਆਏ ਦਿਨ ਵੱਡੇ-ਵੱਡੇ ਬਿਆਨ ਦਾਗੇ ਜਾ ਰਹੇ ਹਨ ਕਿ ਸਰਕਾਰੀ ਡਿਸਪੈਂਸਰੀਆਂ ਵਿਚ ਪ੍ਰਾਈਵੇਟ ਹਸਪਤਾਲਾਂ ਤੋਂ ਵਧੀਆ ਇਲਾਜ ਦੀ ਸਹੂਲਤ ਹੋਵੇਗੀ ਪਰ ਲਾਡੋਵਾਲ ਦੀ ਸਰਕਾਰੀ ਡਿਸਪੈਂਸਰੀ ਵਿਚ ਨਾ ਤਾਂ ਡਾਕਟਰ ਦੀ ਕਮੀ ਪੂਰੀ ਕੀਤੀ ਜਾਂਦੀ ਹੈ ਅਤੇ ਨਾ ਹੀ ਦਵਾਈਆਂ ਦੀ ਕਮੀ, ਜਿਸ ਕਾਰਣ ਲੋਕਾਂ ਨੂੰ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਪਰ ਸਿਹਤ ਵਿਭਾਗ ਇਸ ਵੱਲ ਆਪਣੀਆਂ ਅੱਖਾਂ ਬੰਦ ਕਰ ਕੇ ਕੁੰਭਕਰਨੀ ਨੀਂਦ ਸੁੱਤਾ ਪਿਆ ਹੈ। ਲਾਡੋਵਾਲ ਪਿੰਡ ਦੀ ਪੰਚਾਇਤ ਮੈਂਬਰ ਸ਼ਿਵਾਨੀ ਗਾਦੜਾ, ਪੰਚ ਬਲਵੀਰ ਕੁਮਾਰ, ਪੰਚ ਜੋਤੀ ਮਹਿਰਾ, ਪ੍ਰਧਾਨ ਯਮਲਾ ਮਹਿਰਾ, ਸਾਬਕਾ ਪੰਚ ਈਸ਼ਰ ਦਾਸ ਅਤੇ ਮਦਨ ਲਾਲ ਨੇ ਦੱਸਿਆ ਕਿ ਜਦੋਂ ਕੋਈ ਵੀ ਵਿਅਕਤੀ ਇੱਥੇ ਦਵਾਈ ਲੈਣ ਜਾਂਦਾ ਹੈ ਤਾਂ ਅੰਦਰ ਮੌਜੂਦ ਡਾਕਟਰ ਦਵਾਈਆਂ ਦੀ ਲਿਸਟ ਬਣਾ ਕੇ ਦੇ ਦਿੰਦੇ ਹਨ, ਜਿਸ ਵਿਚੋਂ ਇਕ ਦਵਾਈ ਅੰਦਰੋਂ ਅਤੇ ਬਾਕੀ 5 ਬਾਹਰੋਂ ਪ੍ਰਾਈਵੇਟ ਮੈਡੀਕਲ ਸਟੋਰ ਤੋਂ ਲੈਣ ਲਈ ਭੇਜ ਦਿੰਦੇ ਹਨ। ਦਵਾਈਆਂ ਇੰਨੀਆਂ ਮਹਿੰਗੀਆਂ ਹੁੰਦੀਆਂ ਹਨ ਕਿ ਲੋਕ ਬਾਹਰੋਂ ਖਰੀਦ ਨਹੀਂ ਸਕਦੇ, ਜਿਸ ਕਾਰਣ ਲੋਕਾਂ ਦੇ ਇਲਾਜ ਅਧੂਰੇ ਰਹਿ ਜਾਂਦੇ ਹਨ। ਆਲੇ-ਦੁਆਲੇ ਦੇ ਪਿੰਡਾਂ ਦੀਆਂ ਦਰਜਨਾਂ ਪੰਚਾਇਤਾਂ ਵੱਲੋਂ ਕਈ ਵਾਰ ਸਬੰਧਤ ਵਿਭਾਗ ਨੂੰ ਡਾਕਟਰ ਦੀ ਕਮੀ ਸਬੰਧੀ ਲਿਖ ਕੇ ਦਿੱਤਾ ਜਾ ਚੁੱਕਾ ਹੈ ਪਰ ਲੋਕਾਂ ਦੀ ਸਮੱਸਿਆ ਜਿਉਂ ਦੀ ਤਿਉਂ ਬਣੀ ਹੋਈ ਹੈ।
ਇੰਚਾਰਜ ਦੀ ਬਦਲੀ ਤੋਂ ਬਾਅਦ ਦਵਾਈਆਂ ਦੀ ਕਮੀ ਹੋਣ ਲੱਗੀ
ਪਿੰਡ ਦੇ ਲੋਕਾਂ ਨੇ ਦੱਸਿਆ ਕਿ ਪਹਿਲਾਂ ਇਸ ਡਿਸਪੈਂਸਰੀ ਵਿਚ ਐੱਮ. ਬੀ. ਬੀ. ਐੱਸ. ਡਾਕਟਰ ਰੁਪਿੰਦਰ ਸਿੰਘ ਗਿੱਲ ਬਤੌਰ ਇੰਚਾਰਜ ਨਿਯੁਕਤ ਸਨ ਪਰ ਉਨ੍ਹਾਂ ਦੀ ਬਦਲੀ ਤਿੰਨ ਮਹੀਨੇ ਪਹਿਲਾਂ ਕਿਸੇ ਹੋਰ ਹਸਪਤਾਲ 'ਚ ਹੋ ਗਈ, ਜਿਸ ਤੋਂ ਬਾਅਦ ਡਿਸਪੈਂਸਰੀ ਵਿਚ ਕੋਈ ਵੀ ਹੋਰ ਡਾਕਟਰ ਦੀ ਨਿਯੁਕਤੀ ਨਹੀਂ ਕੀਤੀ ਅਤੇ ਉਸ ਤੋਂ ਬਾਅਦ ਦਿਨ-ਬ-ਦਿਨ ਡਿਸਪੈਂਸਰੀ ਵਿਚ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਸਹਿਣੀਆਂ ਪੈ ਰਹੀਆਂ ਹਨ ਅਤੇ ਦਵਾਈਆਂ ਦੀ ਕਮੀ ਦਿਨ-ਬ-ਦਿਨ ਵਧਣ ਲੱਗੀ ਹੈ। ਲੋਕਾਂ ਨੇ ਦੱਸਿਆ ਕਿ ਡਾ. ਆਰ. ਐੱਸ. ਗਿੱਲ ਦੇ ਰਹਿੰਦੇ ਕਦੇ ਕਿਸੇ ਵਿਅਕਤੀ ਨੂੰ ਕੋਈ ਪ੍ਰੇਸ਼ਾਨੀ ਨਹੀਂ ਸਹਿਣੀ ਪਈ ਸੀ। ਇੱਥੋਂ ਤੱਕ ਕਿ ਆਪਣੀ ਜੇਬ 'ਚੋਂ ਲੋਕਾਂ ਦੀ ਮਦਦ ਕਰ ਦਿੰਦੇ ਸਨ।
ਪੰਜਾਬ ਦਾ ਕਿਸਾਨ ਝੋਨਾ ਵੇਚਣ ਹਰਿਆਣਾ ਤੇ ਇਲਾਜ ਲਈ ਜਾ ਰਿਹੈ ਦਿੱਲੀ : ਭਗਵੰਤ ਮਾਨ
NEXT STORY