ਅੱਪਰਾ (ਦੀਪਾ)- ਪੰਜਾਬ ਦੇ ਵੱਖ-ਵੱਖ ਪਿੰਡਾਂ 'ਚ ਰੋਜ਼ੀ-ਰੋਟੀ ਕਮਾਉਣ ਲਈ ਕੁਵੈਤ ਗਏ ਪੰਜਾਬੀਆਂ ਨੇ ਉੱਥੇ ਜਾ ਕੇ ਬੁਰੀ ਤਰ੍ਹਾਂ ਫੱਸ ਜਾਣ 'ਤੇ ਪੰਜਾਬ ਦੇ ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਨੂੰ ਪੱਤਰ ਲਿਖ ਕੇ ਉਨ੍ਹਾਂ ਨੂੰ ਭਾਰਤ ਵਾਪਸ ਲਿਆਉਣ ਲਈ ਗੁਹਾਰ ਲਗਾਈ ਹੈ। ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਨੂੰ ਲਿਖੇ ਪੱਤਰ 'ਚ ਜਸਪਾਲ ਸਿੰਘ ਪੁੱਤਰ ਬਲਵੀਰ ਸਿੰਘ ਵਾਸੀ ਅੱਪਰਾ (ਜਲੰਧਰ), ਰਣਜੀਤ ਸਿੰਘ ਪੁੱਤਰ ਸਕੱਤਰ ਸਿੰਘ ਵਾਸੀ ਪਿੰਡ ਤਖਤੂ ਚੱਕ (ਖਡੂਰ ਸਾਹਿਬ), ਬਲਵੀਰ ਸਿੰਘ ਪੁੱਤਰ ਹਰਜੀਤ ਸਿੰਘ ਵਾਸੀ ਪਿੰਡ ਮੈਲੀਆ (ਤਰਨਤਾਰਨ), ਸੁਨੀਲ ਕੁਮਾਰ ਪੁੱਤਰ ਜਗੀਰੀ ਲਾਲ ਵਾਸੀ ਗੜ੍ਹਾ (ਜਲੰਧਰ), ਰਣਜੀਤ ਸਿੰਘ ਪੁੱਤਰ ਸਰਵਣ ਸਿੰਘ ਵਾਸੀ ਲਾਊਕਾ (ਤਰਨਤਾਰਨ), ਵਿਜੇ ਕੁਮਾਰ ਪੁੱਤਰ ਜਸਪਾਲ ਚੰਦ ਵਾਸੀ ਹਿਆਤਪੁਰ ਬੇਟ (ਲੁਧਿਆਣਾ), ਪਰਮਿੰਦਰ ਸਿੰਘ ਬਾਠ, ਗੁਰਦੇਵ ਸਿੰਘ, ਵਿਜੈ ਕੁਮਾਰ, ਗੋਲਡੀ ਰਾਮ, ਪਾਖਰ ਰਾਮ, ਬਲਜਿੰਦਰ ਸਿੰਘ, ਜਤਿੰਦਰ ਸਿੰਘ ਬਾਠ, ਲਵਜੀਤ ਸਿੰਘ ਆਦਿ ਨੇ ਦੱਸਿਆ ਕਿ ਉਹ ਹੁਸ਼ਿਆਰਪੁਰ ਦੇ ਇੱਕ ਏਜੰਟ ਰਾਹੀਂ ਇੱਥੇ ਆਏ ਸਨ। ਉਨ੍ਹਾਂ ਦੀ ਇੰਟਰਵਿਊ ਬੀਤੀ 18-10-2016 ਨੂੰ ਹੋਈ ਸੀ, ਜਿੱਥੇ ਉਨਾਂ ਨੂੰ ਕੰਪਨੀ ਦਾ ਨਾਂ 'ਅਲਸਾਗਰ' ਦੱਸਿਆ ਗਿਆ, ਪਰੰਤੂ ਉਨ੍ਹਾਂ ਨੂੰ ਕੁਵੈਤ 'ਚ 'ਅਲ ਨੀਰਜ' ਨਾਂ ਦੀ ਕੰਪਨੀ 'ਚ ਭੇਜ ਦਿੱਤਾ ਗਿਆ, ਇਹ ਕੰਪਨੀ ਜਿਸ ਜਗ੍ਹਾ ਕੰਮ ਹੋਵੇ ਉਸ ਜਗ੍ਹਾ ਵਿਅਕਤੀ (ਮੈਨ ਪਾਵਰ) ਸਪਲਾਈ ਕਰਦੀ ਹੈ। ਜਿਸ 'ਚ ਚਾਰ ਹੋਰ ਕੰਪਨੀਆਂ ਐਸ. ਐਨ. ਡੀ, ਅਬਦੁੱਲਾ, ਅਲਟਰਾ ਤੇ ਡੀ. ਸੀ. ਸੀ. ਹਨ। ਇਹ ਕੰਪਨੀ ਫਾਹਿਲ ਸਿਟੀ ਵਿਖੇ ਸਥਿਤ ਹੈ। ਦਸੰਬਰ 2016 ਤੋਂ ਲੈ ਕੇ ਅਪ੍ਰੈਲ 2017 ਤੱਕ ਅਸੀਂ ਵੱਖ-ਵੱਖ ਫਲਾਈਟਾਂ ਰਾਹੀਂ ਇੱਥੇ ਪਹੁੰਚੇ। ਦਸੰਬਰ 'ਚ ਆਏ ਹੋਏ ਵਰਕਰਾਂ ਨੇ ਕੰਪਨੀ ਦੇ ਮਾੜੇ ਹਾਲਾਤਾਂ ਬਾਰੇ ਏਜੰਟ ਨੂੰ ਦੱਸਿਆ ਪਰੰਤੂ ਏਜੰਟ ਨੇ ਆਪਣੇ ਲਾਲਚ ਕਾਰਣ ਵਰਕਰਾਂ ਨੂੰ ਭੇਜਣਾ ਜਾਰੀ ਰੱਖਿਆ।
ਉਨਾਂ ਪੱਤਰ 'ਚ ਲਿਖਿਆ ਕਿ ਉਹ 20 ਵਰਕਰ ਹਨ, ਜੋ ਕਿ ਬਿਨਾਂ ਵੀਜ਼ਾ ਤੋਂ ਇੱਥੇ ਰਹਿ ਰਹੇ ਹਨ। ਪਿਛਲੇ 5 ਮਹੀਨਿਆਂ ਤੋਂ ਨਾ ਹੀ ਉਨ੍ਹਾਂ ਨੂੰ ਕੰਮ ਦਿੱਤਾ ਗਿਆ ਤੇ ਨਾਂ ਹੀ ਰੋਜ਼ੀ-ਰੋਟੀ ਲਈ ਪੈਸੇ ਦਿੱਤੇ ਗਏ। ਕਈ-ਕਈ ਦਿਨ ਕੈਂਪ ਦੀ ਬਿਜਲੀ ਤੇ ਪਾਣੀ ਸਪਲਾਈ ਵੀ ਬੰਦ ਕਰ ਦਿੱਤੀ ਜਾਂਦੀ ਹੈ। ਉਨ੍ਹਾਂ ਵਲੋਂ ਵਾਰ-ਵਾਰ ਫੋਨ ਕਰਨ 'ਤੇ ਵੀ ਕੰਪਨੀ ਦੇ ਅਧਿਕਾਰੀ ਫੋਨ ਨਹੀਂ ਚੁੱਕਦੇ। ਉਨ੍ਹਾਂ ਅੱਗੇ ਲਿਖਿਆ ਕਿ ਉਹ ਗਰੀਬ ਘਰਾਂ ਨਾਲ ਸੰਬੰਧ ਰੱਖਦੇ ਹਨ ਤੇ ਏਜੰਟ ਨੂੰ 1 ਲੱਖ ਰੁਪਏ ਤੋਂ ਲੈ ਕੇ 1 ਲੱਖ 25 ਹਜ਼ਾਰ ਰੁਪਏ ਤੱਕ ਦੇ ਕੇ ਇੱਥੇ ਪਹੁੰਚੇ ਸਨ, ਜਦਕਿ ਏਜੰਟ ਸਾਨੂੰ ਹੁਣ ਵੀ ਕਹਿ ਰਿਹਾ ਹੈ ਕਿ ਦੋ ਮਹੀਨੇ ਹੋਰ ਇੰਤਜ਼ਾਰ ਕਰੋ। ਕੁਵੈਤ 'ਚ ਫਸੇ ਉਕਤ ਪੰਜਾਬੀਆਂ ਨੇ ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਨੂੰ ਪੱਤਰ ਲਿਖ ਕੇ ਭਾਰਤ ਵਾਪਸੀ ਲਈ ਮੱਦਦ ਦੀ ਮੰਗ ਕੀਤੀ ਹੈ। ਇਸ ਸੰਬੰਧੀ ਜਦੋਂ ਭੰਗਵਤ ਮਾਨ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਦੇ ਪੀ. ਏ. ਨੇ ਕਿਹਾ ਕਿ ਸਾਰੇ ਮਾਮਲੇ ਦੀ ਰਿਪੋਰਟ ਤਿਆਰ ਹੋ ਚੁੱਕੀ ਹੈ, ਜੋ ਕਿ ਇੱਕ ਦੋ ਦਿਨਾਂ ਤੱਕ ਗ੍ਰਹਿ ਵਿਭਾਗ ਕੋਲ ਭੇਜ ਕੇ ਲੋੜੀਂਦੀ ਕਾਰਵਾਈ ਦੀ ਮੰਗ ਕੀਤੀ ਜਾਵੇਗੀ।
ਕਤਲ ਕਰਨ ਵਾਲੇ 2 ਭਰਾਵਾਂ ਨੂੰ ਪੁਲਸ ਨੇ ਕੀਤਾ ਕਾਬੂ
NEXT STORY 
