ਮੋਹਾਲੀ (ਰਾਣਾ) : ਪੰਜਾਬ ਪੁਲਸ ਦੀ ਨੱਕ ਹੇਠ ਕਾਨੂੰਨ ਦੀਆਂ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ, ਸ਼ਾਮ ਨੂੰ ਥੋੜ੍ਹਾ ਜਿਹਾ ਹਨੇਰਾ ਹੁੰਦਿਆਂ ਹੀ ਸ਼ਹਿਰ ਦੀਆਂ ਮਾਰਕੀਟਾਂ ਵਿਚ 'ਜਾਮ' ਟਕਰਾਉਣੇ ਸ਼ੁਰੂ ਹੋ ਜਾਂਦੇ ਹਨ ਤੇ 'ਜਾਮ' ਟਕਰਾਉਣ ਵਾਲੇ ਵਿਅਕਤੀਆਂ ਨੂੰ ਰੋਕਣ ਵਾਲਾ ਕੋਈ ਨਹੀਂ, ਸਗੋਂ ਪੁਲਸ ਦੀ ਪੀ. ਸੀ. ਆਰ. ਵੀ ਉਥੇ ਹੀ ਮੌਜੂਦ ਹੁੰਦੀ ਹੈ । ਇਥੇ ਹੀ ਬਸ ਨਹੀਂ, ਫੇਜ਼-5 ਦੀ ਮਾਰਕੀਟ ਵਿਚ ਤਾਂ ਲੋਕ ਟੇਬਲ-ਕੁਰਸੀਆਂ 'ਤੇ ਬੈਠ ਕੇ ਸ਼ਰਾਬ ਪੀਂਦੇ ਹਨ, ਜਦੋਂਕਿ ਇਸ ਮਾਰਕੀਟ ਤੋਂ ਲਗਭਗ 30 ਕਦਮਾਂ ਦੇ ਫਾਸਲੇ 'ਤੇ ਹੀ ਏਰੀਆ ਡੀ. ਐੱਸ. ਪੀ. ਆਲਮ ਵਿਜੈ ਦਾ ਦਫਤਰ ਹੈ ਤੇ ਡੀ. ਐੱਸ. ਪੀ. ਨੂੰ ਇਸ ਸਬੰਧੀ ਕਈ ਵਾਰ ਸ਼ਿਕਾਇਤ ਵੀ ਕੀਤੀ ਜਾ ਚੁੱਕੀ ਹੈ ।
ਸ਼ਿਕਾਇਤ ਦੇਣ ਤੋਂ ਬਾਅਦ ਵੀ ਕਾਰਵਾਈ ਨਹੀਂ ਕੀਤੀ
ਬੜੀ ਹੈਰਾਨੀ ਦੀ ਗੱਲ ਹੈ ਕਿ ਪੁਲਸ ਨੂੰ ਸ਼ਿਕਾਇਤ ਦੇਣ ਤੋਂ ਬਾਅਦ ਵੀ ਕੋਈ ਕਾਰਵਾਈ ਨਹੀਂ ਹੁੰਦੀ । ਇਸ ਦਾ ਮਤਲਬ ਕਿਤੇ ਪੁਲਸ ਦੀ ਹੀ ਦਇਆ 'ਤੇ ਇਹ ਸਭ ਕੁਝ ਤਾਂ ਨਹੀਂ ਚੱਲ ਰਿਹਾ? ਇਲਾਕਾ ਕੌਂਸਲਰ ਤਰਨਜੀਤ ਕੌਰ ਗਿੱਲ ਵਲੋਂ ਕਈ ਵਾਰ ਡੀ. ਐੱਸ. ਪੀ. ਨੂੰ ਸ਼ਿਕਾਇਤ ਦਿੱਤੀ ਜਾ ਚੁੱਕੀ ਹੈ। ਕੌਂਸਲਰ ਨੇ ਕਿਹਾ ਕਿ ਸ਼ਿਕਾਇਤ ਦੇਣ ਤੋਂ ਬਾਅਦ ਦੋ ਜਾਂ ਤਿੰਨ ਦਿਨ ਇਕ ਪੁਲਸ ਅਧਿਕਾਰੀ ਦੀ ਡਿਊਟੀ ਲਾ ਦਿੱਤੀ ਜਾਂਦੀ ਹੈ ਤੇ ਉਨ੍ਹਾਂ ਨੂੰ ਸਖਤੀ ਨਾਲ ਕਦਮ ਚੁੱਕਣ ਲਈ ਵੀ ਬੋਲਿਆ ਜਾਂਦਾ ਹੈ ਪਰ ਉਸ ਤੋਂ ਬਾਅਦ ਉਥੇ ਪੁਲਸ ਤਾਂ ਖੜ੍ਹੀ ਹੁੰਦੀ ਹੈ ਪਰ ਉਹ ਸ਼ਰਾਬ ਪੀ ਰਹੇ ਲੋਕਾਂ ਨੂੰ ਨਹੀਂ ਰੋਕਦੀ।
ਵਾਹਨਾਂ ਦੇ ਅੰਦਰ ਹੀ ਹੁੰਦੀ ਹੈ ਸਰਵਿਸ
ਫੇਜ਼-5 ਦੀ ਮਾਰਕੀਟ ਵਿਚ ਜ਼ਿਆਦਾਤਰ ਮੀਟ ਦੀਆਂ ਦੁਕਾਨਾਂ ਹਨ ਤੇ ਹਨੇਰਾ ਹੁੰਦਿਆਂ ਹੀ ਉਥੇ ਵਾਹਨਾਂ ਦੀ ਭਰਮਾਰ ਲਗ ਜਾਂਦੀ ਹੈ । ਚਾਲਕ ਸਿਰਫ ਇਕ ਵਾਰ ਆਪਣੇ ਵਾਹਨ 'ਚੋਂ ਬਾਹਰ ਨਿਕਲਦਾ ਹੈ ਤੇ ਦੁਕਾਨ ਮਾਲਕ ਨੂੰ ਕਹਿ ਕੇ ਆਉਂਦਾ ਹੈ, ਉਸ ਤੋਂ ਬਾਅਦ ਕੋਈ ਵੀ ਵਿਅਕਤੀ ਆਪਣੇ ਵਾਹਨ ਵਿਚੋਂ ਨਹੀਂ ਨਿਕਲਦਾ ਕਿਉਂਕਿ ਉਨ੍ਹਾਂ ਨੂੰ ਵਾਹਨ ਵਿਚ ਹੀ ਸਾਰਾ ਸਾਮਾਨ ਮਿਲ ਜਾਂਦਾ ਹੈ । ਖਾਣ-ਪੀਣ ਤੋਂ ਬਾਅਦ ਸਾਰੇ ਉਥੇ (ਪਾਰਕਿੰਗ) ਹੀ ਖਾਲੀ ਬੋਤਲਾਂ ਤੇ ਪਲੇਟਾਂ ਖਿਲਾਰ ਕੇ ਚਲੇ ਜਾਂਦੇ ਹਨ ।
ਔਰਤਾਂ ਦਾ ਲੰਘਣਾ ਮੁਸ਼ਕਿਲ
ਜਾਣਕਾਰੀ ਅਨੁਸਾਰ ਫੇਜ਼-5 ਦੀ ਮਾਰਕੀਟ ਵਿਚ ਹੋਰ ਵੀ ਕਈ ਦੁਕਾਨਾਂ ਹਨ, ਜਿਥੇ ਔਰਤਾਂ ਵੀ ਆਉਂਦੀਆਂ ਹਨ ਤੇ ਇਹ ਮਾਰਕੀਟ ਮੇਨ ਰੋਡ 'ਤੇ ਹੈ । ਜਿਸ ਤਰ੍ਹਾਂ ਵਾਹਨਾਂ ਵਿਚ ਸ਼ਰਾਬ ਪੀਤੀ ਜਾਂਦੀ ਹੈ, ਉਸ ਕਾਰਨ ਉਥੋਂ ਲੰਘਣ ਤੋਂ ਔਰਤਾਂ ਵੀ ਡਰਦੀਆਂ ਹਨ । ਇਸ ਕਾਰਨ ਜ਼ਿਆਦਾਤਰ ਔਰਤਾਂ ਨੇ ਸ਼ਾਮ ਤੋਂ ਬਾਅਦ ਉਥੋਂ ਇਕੱਲੇ ਜਾਣਾ ਹੀ ਬੰਦ ਕਰ ਦਿੱਤਾ ਹੈ । ਸੰਪਰਕ ਕਰਨ 'ਤੇ ਐੱਸ. ਪੀ. (ਸਿਟੀ-1) ਜਗਜੀਤ ਸਿੰਘ ਨੇ ਦੱਸਿਆ ਕਿ ਅਜਿਹੀਆਂ ਚੀਜ਼ਾਂ ਬਰਦਾਸ਼ਤ ਨਹੀਂ ਕੀਤੀਆਂ ਜਾਣਗੀਆਂ ਤੇ ਇਸ 'ਤੇ ਸਖਤ ਕਾਰਵਾਈ ਕੀਤੀ ਜਾਵੇਗੀ । ਉਨ੍ਹਾਂ ਕਿਹਾ ਕਿ ਅੱਗੇ ਤੋਂ ਮਾਰਕੀਟਾਂ ਵਿਚ ਵਾਹਨਾਂ ਦੇ ਅੰਦਰ ਤੇ ਬਾਹਰ ਕੋਈ ਸ਼ਰਾਬ ਨਹੀਂ ਪੀ ਸਕੇਗਾ । ਸੰਪਰਕ ਕਰਨ 'ਤੇ ਇਲਾਕਾ ਕੌਂਸਲਰ ਤਰਨਜੀਤ ਕੌਰ ਗਿੱਲ ਨੇ ਦੱਸਿਆ ਕਿ ਫੇਜ਼-5 ਦੀ ਮਾਰਕੀਟ ਵਿਚ ਥੋੜ੍ਹਾ ਜਿਹਾ ਹਨੇਰਾ ਹੁੰਦਿਆਂ ਹੀ ਉਥੇ ਸ਼ਰਾਬ ਦਾ ਦੌਰ ਸ਼ੁਰੂ ਹੋ ਜਾਂਦਾ ਹੈ । ਲੋਕ ਆਪਣੀਆਂ ਗੱਡੀਆਂ ਵਿਚ ਬੈਠ ਕੇ ਸ਼ਰਾਬ ਪੀਂਦੇ ਹਨ। ਉਨ੍ਹਾਂ ਵਲੋਂ ਕਈ ਵਾਰ ਡੀ. ਐੱਸ. ਪੀ. ਨੂੰ ਇਸ ਬਾਰੇ ਸੂਚਿਤ ਕੀਤਾ ਜਾ ਚੁੱਕਾ ਹੈ ਪਰ 2-3 ਦਿਨ ਸਭ ਠੀਕ ਚਲਦਾ ਹੈ ਤੇ ਫਿਰ ਪਹਿਲਾਂ ਵਾਲੀ ਸਥਿਤੀ ਬਣ ਜਾਂਦੀ ਹੈ । ਹੁਣ ਉਹ ਇਸਦੀ ਸ਼ਿਕਾਇਤ ਐੱਸ. ਐੱਸ. ਪੀ. ਨੂੰ ਕਰਨਗੇ।
ਮਜ਼ਦੂਰ ਦੇ ਬੇਟੇ ਨੇ ਦੁਬਈ 'ਚ ਗੱਡੇ ਝੰਡੇ, ਹਾਸਲ ਕੀਤੇ ਤਿੰਨ ਗੋਲਡ ਮੈਡਲ
NEXT STORY 
