ਲੁਧਿਆਣਾ (ਗੌਤਮ/ਰਾਜ): ਲੁਧਿਆਣਾ ਕਮਿਸ਼ਨਰੇਟ ਪੁਲਸ ਨੇ ਐਡੀਸ਼ਨਲ ਸੀ.ਪੀ. ਰੁਪਿੰਦਰ ਸਿੰਘ (IPS), ਡੀ.ਸੀ.ਪੀ. ਇਨਵੈਸਟੀਗੇਸ਼ਨ ਹਰਪਾਲ ਸਿੰਘ (PPS), ਏ.ਡੀ.ਸੀ.ਪੀ. ਇਨਵੈਸਟੀਗੇਸ਼ਨ ਅਮਨਦੀਪ ਸਿੰਘ ਬਰਾੜ (PPS), ਏ.ਡੀ.ਸੀ.ਪੀ.-1 ਸਮੀਰ ਵਰਮਾ (PPS) ਦੀ ਅਗਵਾਈ ਵਿੱਚ ਅਤੇ ਏ.ਸੀ.ਪੀ. ਇਨਵੈਸਟੀਗੇਸ਼ਨ-1 ਹਰਸ਼ਪ੍ਰੀਤ ਸਿੰਘ ਤੇ ਏ.ਸੀ.ਪੀ. ਨੌਰਥ ਕਿੱਕਰ ਸਿੰਘ ਦੀ ਨਿਗਰਾਨੀ ਹੇਠ, ਸੀ.ਆਈ.ਏ. ਸਟਾਫ਼, ਕ੍ਰਾਈਮ ਬ੍ਰਾਂਚ ਅਤੇ ਥਾਣਾ ਬਸਤੀ ਜੋਧੇਵਾਲ ਦੀਆਂ ਸਾਂਝੀਆਂ ਆਪ੍ਰੇਸ਼ਨਲ ਟੀਮਾਂ ਦੀ ਮਦਦ ਨਾਲ ਇਕ ਸੰਗਠਿਤ ਅੰਤਰ-ਜ਼ਿਲ੍ਹਾ ਏ.ਟੀ.ਐਮ. ਤੋੜਨ ਵਾਲੇ ਗਿਰੋਹ ਦਾ ਸਫ਼ਲਤਾਪੂਰਵਕ ਪਰਦਾਫਾਸ਼ ਕੀਤਾ ਹੈ।
ਇੰਸਪੈਕਟਰ ਅਵਤਾਰ ਸਿੰਘ, ਇੰਸਪੈਕਟਰ ਨਵਦੀਪ ਸਿੰਘ ਅਤੇ ਇੰਸਪੈਕਟਰ ਜਸਵੀਰ ਸਿੰਘ ਦੀ ਅਗਵਾਈ ਵਾਲੀ ਪੁਲਸ ਟੀਮਾਂ ਨੇ ਦੋ ਮੁੱਖ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਅਤੇ ਉਨ੍ਹਾਂ ਦੇ ਕਬਜ਼ੇ ਵਿਚੋਂ ਇਕ .32 ਬੋਰ ਦਾ ਪਿਸਤੌਲ ਸਮੇਤ 2 ਜ਼ਿੰਦਾ ਕਾਰਤੂਸ, ਇਕ ਇੰਡਸਟਰੀਅਲ ਗੈਸ ਕੱਟਰ ਸੈੱਟ, ਇਕ ਗੈਸ ਸਿਲੰਡਰ, ਇਕ ਪੋਰਟੇਬਲ ਕੱਟਣ ਵਾਲੀ ਮਸ਼ੀਨ ਅਤੇ ਵਾਰਦਾਤ ਵਿਚ ਵਰਤੀ ਜਾਣ ਵਾਲੀ ਮਾਰੂਤੀ ਸੁਜ਼ੂਕੀ ਅਰਟਿਗਾ ਗੱਡੀ (PB-01-D-0707) ਬਰਾਮਦ ਕੀਤੀ ਹੈ।
ਪੁਲਸ ਕਮਿਸ਼ਨਰ, ਲੁਧਿਆਣਾ, ਸਵਪਨ ਸ਼ਰਮਾ (IPS) ਨੇ ਦੱਸਿਆ ਕਿ ਇਹ ਗ੍ਰਿਫ਼ਤਾਰੀਆਂ ਨੂਰਵਾਲਾ ਰੋਡ, ਸ਼ਿਵਪੁਰੀ ਚੌਂਕ ਦੇ ਨੇੜੇ 19 ਅਤੇ 20 ਮਈ 2026 ਦੀ ਦਰਮਿਆਨੀ ਰਾਤ ਨੂੰ ਹੋਈ ਇਕ ਅਪਰਾਧਿਕ ਕੋਸ਼ਿਸ਼ ਤੋਂ ਬਾਅਦ ਅਮਲ ਵਿੱਚ ਆਈਆਂ ਹਨ। ਜਦੋਂ ਮੁਲਜ਼ਮ ਏ.ਟੀ.ਐਮ. ਦੀ ਤਿਜੋਰੀ (ਵਾਲਟ) ਨੂੰ ਕੱਟ ਰਹੇ ਸਨ, ਤਾਂ ਬਿਜਲੀ ਦੇ ਸ਼ਾਰਟ-ਸਰਕਟ ਕਾਰਨ ਅੱਗ ਲੱਗ ਗਈ, ਜਿਸ ਕਾਰਨ ਉਨ੍ਹਾਂ ਨੂੰ ਉੱਥੋਂ ਭੱਜਣਾ ਪਿਆ। ਜਦੋਂ ਪੀ.ਸੀ.ਆਰ. ਟੈਂਗੋ-6 ਦੀ ਪੈਟਰੋਲਿੰਗ ਟੀਮ ਨੇ ਉਨ੍ਹਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਤਾਂ ਮੁਲਜ਼ਮਾਂ ਨੇ ਗ੍ਰਿਫ਼ਤਾਰੀ ਤੋਂ ਬਚਣ ਲਈ ਪੁਲਸ ਮੁਲਾਜ਼ਮਾਂ 'ਤੇ ਸਿੱਧੀ ਗੋਲੀਬਾਰੀ ਕਰ ਦਿੱਤੀ।
ਇਸ ਦੇ ਸਿੱਟੇ ਵਜੋਂ, ਥਾਣਾ ਬਸਤੀ ਜੋਧੇਵਾਲ ਵਿਖੇ ਭਾਰਤੀ ਨਿਆਏ ਸੰਹਿਤਾ (BNS) ਦੀਆਂ ਸਬੰਧਤ ਧਾਰਾਵਾਂ ਤਹਿਤ ਐਫ.ਆਈ.ਆਰ. ਨੰਬਰ 88 ਮਿਤੀ 20-05-2026 ਦਰਜ ਕੀਤੀ ਗਈ ਸੀ। ਸਵਪਨ ਸ਼ਰਮਾ ਨੇ ਦੱਸਿਆ ਕਿ ਉੱਨਤ ਤਕਨੀਕੀ ਅਤੇ ਇਲੈਕਟ੍ਰਾਨਿਕ ਇੰਟੈਲੀਜੈਂਸ ਦੀ ਵਰਤੋਂ ਕਰਦਿਆਂ, ਪੁਲਿਸ ਟੀਮਾਂ ਨੇ ਪਹਿਲਾਂ 25 ਮਈ 2026 ਨੂੰ ਜਸਮਿੰਦਰ ਸਿੰਘ ਉਰਫ਼ ਜੱਸ ਨੂੰ ਵਾਰਦਾਤ ਵਿੱਚ ਵਰਤੀ ਗਈ ਗੱਡੀ ਸਮੇਤ ਗ੍ਰਿਫ਼ਤਾਰ ਕੀਤਾ। ਉਸ ਦੇ ਖੁਲਾਸੇ ਤੋਂ ਪਤਾ ਲੱਗਿਆ ਕਿ ਅੰਮ੍ਰਿਤਸਰ ਦਾ ਇੱਕ 6 ਮੈਂਬਰੀ ਗਿਰੋਹ ਏ.ਟੀ.ਐਮ. ਨੂੰ ਨਿਸ਼ਾਨਾ ਬਣਾਉਣ ਲਈ ਲੁਧਿਆਣਾ ਆਇਆ ਸੀ। ਉਸ ਦੀ ਨਿਸ਼ਾਨਦੇਹੀ 'ਤੇ ਕਾਰਵਾਈ ਕਰਦੇ ਹੋਏ, ਪੁਲਸ ਨੇ 2 ਜੂਨ 2026 ਨੂੰ ਇੱਕ ਟਿਕਾਣੇ 'ਤੇ ਛਾਪੇਮਾਰੀ ਕੀਤੀ ਅਤੇ ਦੂਜੇ ਮੁੱਖ ਮੁਲਜ਼ਮ ਦੀਪਕ ਕੁਮਾਰ ਉਰਫ਼ ਦੀਪੂ ਬਿਹਾਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ, ਅਤੇ ਪੀ.ਸੀ.ਆਰ. ਟੀਮ ਖ਼ਿਲਾਫ਼ ਵਰਤਿਆ ਗਿਆ ਹਥਿਆਰ ਸਿੱਧਾ ਉਸ ਦੇ ਕਬਜ਼ੇ ਵਿੱਚੋਂ ਬਰਾਮਦ ਕੀਤਾ ਗਿਆ।
ਕਮਿਸ਼ਨਰ ਨੇ ਅੱਗੇ ਦੱਸਿਆ ਕਿ ਇਹ ਗਿਰੋਹ ਦਿਨ ਵੇਲੇ ਸੁੰਨਸਾਨ ਏ.ਟੀ.ਐਮਜ਼ ਦੀ ਰੇਕੀ ਕਰਦਾ ਸੀ ਅਤੇ ਰਾਤ ਨੂੰ ਹਾਈ-ਟੈਂਪਰੇਚਰ ਗੈਸ ਕੱਟਰਾਂ ਦੀ ਵਰਤੋਂ ਕਰਕੇ ਉਨ੍ਹਾਂ ਨੂੰ ਨਿਸ਼ਾਨਾ ਬਣਾਉਂਦਾ ਸੀ। ਉਨ੍ਹਾਂ ਨੇ ਲੁਧਿਆਣਾ, ਜਲੰਧਰ ਅਤੇ ਪੰਜਾਬ ਦੇ ਹੋਰ ਜ਼ਿਲ੍ਹਿਆਂ ਵਿਚ ਏ.ਟੀ.ਐਮ. ਲੁੱਟ ਦੀਆਂ ਕਈ ਵਾਰਦਾਤਾਂ ਕਬੂਲ ਕੀਤੀਆਂ ਹਨ।
ਗ੍ਰਿਫ਼ਤਾਰ ਮੁਲਜ਼ਮ 'ਤੇ ਪਹਿਲਾਂ ਵੀ ਕਈ ਮਾਮਲੇ ਦਰਜ ਹਨ। ਦੀਪਕ ਕੁਮਾਰ ਉਰਫ਼ ਦੀਪੂ ਬਿਹਾਰੀ 'ਤੇ 2007 ਤੋਂ 2022 ਦਰਮਿਆਨ ਅੰਮ੍ਰਿਤਸਰ ਅਤੇ ਬਠਿੰਡਾ ਵਿਚ 21 ਮਾਮਲੇ ਦਰਜ ਹਨ, ਜਿਨ੍ਹਾਂ ਵਿਚ ਇਰਾਦਾ ਕਤਲ (ਧਾਰਾ 307 IPC), ਕਤਲ (ਧਾਰਾ 302 IPC), ਲੁੱਟ-ਖੋਹ, ਅਸਲਾ ਐਕਟ, ਪ੍ਰਿਜ਼ਨ ਐਕਟ, ਅਤੇ NDPS ਐਕਟ ਦੇ ਉਲੰਘਣ ਸ਼ਾਮਲ ਹਨ। ਉੱਥੇ ਹੀ ਜਸਮਿੰਦਰ ਸਿੰਘ ਉਰਫ਼ ਜੱਸ ਖ਼ਿਲਾਫ਼ ਇਨ੍ਹਾਂ ਲੜੀਵਾਰ ਵਾਰਦਾਤਾਂ ਤੋਂ ਪਹਿਲਾਂ ਕੋਈ ਐੱਫ.ਆਈ.ਆਰ. ਦਰਜ ਨਹੀਂ ਸੀ। ਸਵਪਨ ਸ਼ਰਮਾ ਨੇ ਪ੍ਰੈਸ ਨੂੰ ਜਾਣਕਾਰੀ ਦਿੱਤੀ ਕਿ ਮੁਢਲੀ ਪੁੱਛਗਿੱਛ ਦੌਰਾਨ ਇਸ ਗਿਰੋਹ ਨਾਲ ਸਿੱਧੇ ਤੌਰ 'ਤੇ ਜੁੜੇ 5 ਵੱਡੇ ਅੰਤਰ-ਜ਼ਿਲ੍ਹਾ BNS ਮਾਮਲਿਆਂ ਨੂੰ ਸਫ਼ਲਤਾਪੂਰਵਕ ਸੁਲਝਾ ਲਿਆ ਗਿਆ ਹੈ।
1. ਐੱਫ.ਆਈ.ਆਰ. ਨੰਬਰ 58 (05-05-2025): ਧਾਰਾਵਾਂ 309(4), 3(5), 111 BNS – ਥਾਣਾ ਕੈਂਟ, ਜਲੰਧਰ।
2. ਐੱਫ.ਆਈ.ਆਰ. ਨੰਬਰ 210 (19-07-2025): ਧਾਰਾਵਾਂ 331(4), 305(e), 324(4) BNS – ਥਾਣਾ ਰਾਮਾ ਮੰਡੀ, ਜਲੰਧਰ।
3. ਐੱਫ.ਆਈ.ਆਰ. ਨੰਬਰ 141 (27-12-2025): ਧਾਰਾਵਾਂ 331(4), 305 BNS – ਥਾਣਾ ਸਦਰ ਫਗਵਾੜਾ, ਕਪੂਰਥਲਾ।
4. ਐੱਫ.ਆਈ.ਆਰ. ਨੰਬਰ 179 (27-12-2025): ਧਾਰਾਵਾਂ 331(4), 305 BNS – ਥਾਣਾ ਜੋਧੇਵਾਲ, ਲੁਧਿਆਣਾ।
5. ਐੱਫ.ਆਈ.ਆਰ. ਨੰਬਰ 88 (20-05-2026): ਮੌਜੂਦਾ ਕੇਸ ਦੀਆਂ ਧਾਰਾਵਾਂ BNS ਤਹਿਤ – ਥਾਣਾ ਜੋਧੇਵਾਲ, ਲੁਧਿਆਣਾ।
ਉਨ੍ਹਾਂ ਦੱਸਿਆ ਕਿ ਮੁਲਜ਼ਮਾਂ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਹੋਰ ਡੂੰਘਾਈ ਨਾਲ ਪੁੱਛਗਿੱਛ, ਮਾਲ ਬਰਾਮਦਗੀ ਅਤੇ ਵਿੱਤੀ ਲੈਣ-ਦੇਣ (ਫਾਰਵਰਡ-ਲਿੰਕੇਜ) ਦਾ ਪਤਾ ਲਗਾਉਣ ਲਈ ਪੁਲਸ ਰਿਮਾਂਡ ਹਾਸਲ ਕੀਤਾ ਜਾ ਰਿਹਾ ਹੈ। ਫ਼ਰਾਰ ਚੱਲ ਰਹੇ ਬਾਕੀ ਚਾਰ ਸਾਥੀਆਂ ਨੂੰ ਗ੍ਰਿਫ਼ਤਾਰ ਕਰਨ ਲਈ ਵਿਸ਼ੇਸ਼ ਟੀਮਾਂ ਵੱਲੋਂ ਸ਼ੱਕੀ ਟਿਕਾਣਿਆਂ 'ਤੇ ਲਗਾਤਾਰ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।
ਪੰਜਾਬ 'ਚ ਨੌਜਵਾਨ ਦਾ ਬੇਰਹਿਮੀ ਨਾਲ ਕਤਲ, ਵਾਰਦਾਤ ਮਗਰੋਂ ਫਰਾਰ ਹੋਏ ਕਾਤਲ
NEXT STORY 
