ਜਲੰਧਰ/ਲੁਧਿਆਣਾ (ਪ੍ਰੀਤ)— ਫਰਜ਼ੀ ਐਕਸਪੋਰਟ ਜ਼ਰੀਏ ਐਕਸਾਈਜ਼ ਐਂਡ ਟੈਕਸੇਸ਼ਨ ਵਿਭਾਗ ਤੋਂ 1,56,76,190 ਰੁਪਏ ਦਾ ਵੈਟ ਰਿਫੰਡ ਲੈਣ ਵਾਲੇ ਲੁਧਿਆਣਾ ਦੇ ਜਲਧਾਰਾ ਐਕਸਪੋਰਟ ਦੇ ਮਾਲਕ ਰਮਨ ਕੁਮਾਰ ਗਰਗ ਨੂੰ ਮੰਗਲਵਾਰ ਇਨਫੋਰਸਮੈਂਟ ਡਾਇਰੈਕਟੋਰੇਟ ਦੀ ਟੀਮ ਨੇ ਕਾਬੂ ਕਰ ਲਿਆ ਸੀ। ਰਮਨ ਕੁਮਾਰ ਗਰਗ ਪੁੱਤਰ ਵਿਨੋਦ ਕੁਮਾਰ ਗਰਗ ਵਾਸੀ 64-ਏ ਅਮਨ ਨਗਰ ਲੁਧਿਆਣਾ ਪਿਛਲੇ ਕਾਫੀ ਸਮੇਂ ਤੋਂ ਈ. ਡੀ. ਨੂੰ ਚਕਮਾ ਦੇ ਰਿਹਾ ਸੀ। ਮੁਲਜ਼ਮ ਨੂੰ ਮੰਗਲਵਾਰ ਪੀ. ਐੱਲ. ਐੱਮ. ਏ. ਸਪੈਸ਼ਲ ਕੋਰਟ ਮੋਹਾਲੀ ਵਿਚ ਪੇਸ਼ ਕਰਕੇ ਈ. ਡੀ. ਨੇ ਪੁੱਛਗਿੱਛ ਲਈ ਤਿੰਨ ਦਿਨਾਂ ਦਾ ਰਿਮਾਂਡ ਲਿਆ ਹੈ।
ਜਾਣਕਾਰੀ ਮੁਤਾਬਕ 18 ਜੁਲਾਈ 2013 ਨੂੰ ਅਸਿਸਟੈਂਟ ਐਕਸਾਈਜ਼ ਐਂਡ ਟੈਕਸੇਸ਼ਨ ਕਮਿਸ਼ਨਰ ਲੁਧਿਆਣਾ-1 ਵੱਲੋਂ ਜਲਧਾਰਾ ਐਕਸਪੋਰਟ ਦੇ ਮਾਲਕ ਰਮਨ ਕੁਮਾਰ ਗਰਗ ਦੇ ਖਿਲਾਫ ਥਾਣਾ ਡਵੀਜ਼ਨ ਨੰਬਰ 5 ਵਿਚ ਧੋਖਾਦੇਹੀ ਦੀ ਐੱਫ. ਆਈ. ਆਰ. ਦਰਜ ਕਰਵਾਈ ਗਈ, ਜਿਸ ਵਿਚ ਰਮਨ ਕੁਮਾਰ ਗਰਗ ਨੂੰ ਗ੍ਰਿਫਤਾਰ ਕੀਤਾ ਗਿਆ ਅਤੇ ਚਲਾਨ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਇਸ ਮਾਮਲੇ ਵਿਚ ਪ੍ਰੀਵੈਂਸ਼ਨ ਆਫ ਮਨੀ ਲਾਂਡਰਿੰਗ ਐਕਟ 2002 ਦੀ ਉਲੰਘਣਾ ਕੀਤੇ ਜਾਣ 'ਤੇ ਈ. ਡੀ. ਵਲੋਂ 14 ਅਗਸਤ 2013 ਨੂੰ ਪੀ. ਐੱਮ. ਐੱਲ. ਏ. 2002 ਦੇ ਅਧੀਨ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕੀਤੀ ਗਈ।
33.36 ਕਰੋੜ ਦੇ ਰੈਡੀਮੇਡ ਗਾਰਮੈਂਟਸ ਦੀ ਦਿਖਾਈ ਬੋਗਸ ਐਕਸਪੋਰਟ
ਵਿਭਾਗੀ ਜਾਂਚ ਵਿਚ ਪਤਾ ਲੱਗਾ ਹੈ ਕਿ ਜਲਧਾਰਾ ਐਕਸਪੋਰਟ ਦੇ ਰਮਨ ਗਰਗ ਵੱਲੋਂ ਸਾਲ 2012-13 ਵਿਚ 33.36 ਕਰੋੜ ਦੇ ਰੈਡੀਮੈਡ ਗਾਰਮੈਂਟਸ ਬੰਗਲਾਦੇਸ਼ ਭੇਜਣ ਦੀ ਐਕਸਪੋਰਟ ਦੇ ਦਸਤਾਵੇਜ਼ ਪੇਸ਼ ਕੀਤੇ ਗਏ। ਵੈਸਟ ਬੰਗਾਲ ਵਿਚ ਕਸਟਮ ਅਥਾਰਟੀ ਵੱਲੋਂ ਜਦੋਂ ਸ਼ਿਪਿੰਗ ਬਿੱਲ ਦੀ ਜਾਂਚ ਕੀਤੀ ਗਈ ਤਾਂ ਸਾਰੇ ਦਸਤਾਵੇਜ਼ ਜਾਅਲੀ ਪਾਏ ਗਏ ਪਰ ਜਦੋਂ ਤੱਕ ਮਾਮਲੇ ਦਾ ਖੁਲਾਸਾ ਹੋਇਆ ਤਦ ਤੱਕ ਐਕਸਾਈਜ਼ ਵਿਭਾਗ ਦੇ ਅਧਿਕਾਰੀਆਂ ਦੀ ਕਥਿਤ ਮਿਲੀਭੁਗਤ ਨਾਲ ਰਮਨ ਕੁਮਾਰ ਗਰਗ 1,56,76190 ਰੁਪਏ ਦਾ ਵੈਟ ਰਿਫੰਡ ਡਕਾਰ ਚੁੱਕਾ ਸੀ।
ਐਕਸਾਈਜ਼ ਅਧਿਕਾਰੀਆਂ ਕੋਲੋਂ ਵੀ ਹੋਵੇਗੀ ਪੁੱਛਗਿੱਛ
ਸੂਤਰਾਂ ਨੇ ਦੱਸਿਆ ਕਿ ਵੈਟ ਰਿਫੰਡ ਘਪਲੇ ਵਿਚ ਲੁਧਿਆਣਾ ਦੇ ਐਕਸਾਈਜ਼ ਵਿਭਾਗ ਦੇ ਲੋਕਾਂ ਦੇ ਮਿਲੀਭੁਗਤ ਤੋਂ ਈ. ਡੀ. ਸੂਤਰ ਇਨਕਾਰ ਨਹੀਂ ਕਰ ਰਹੇ। ਸੂਤਰਾਂ ਨੇ ਦੱਸਿਆ ਕਿ ਈ. ਡੀ. ਵੱਲੋਂ ਰਮਨ ਕੁਮਾਰ ਗਰਗ ਕੋਲੋਂ 3 ਦਿਨ ਦੇ ਰਿਮਾਂਡ ਦੌਰਾਨ ਉਸ ਦੀ ਮੌਡੇਸ ਆਪਰੈਂਡਿੰਗ, ਫਰਜ਼ੀ ਦਸਤਾਵੇਜ਼ ਕਿੱਥੋਂ ਤਿਆਰ ਹੋਏ, ਵਿਭਾਗ ਦੇ ਕਿਨ੍ਹਾਂ ਲੋਕਾਂ ਨੇ ਉਸ ਦੀ ਮਦਦ ਕੀਤੀ ਤੇ ਉਸ ਨੇ ਹੋਰ ਕਿਹੜੀਆਂ-ਕਿਹੜੀਆਂ ਐਕਸਪੋਰਟ ਫਰਮਾਂ ਬਣਾਈਆਂ ਹਨ, ਦੀ ਡੂੰਘਾਈ ਨਾਲ ਪੁੱਛਗਿੱਛ ਹੋਵੇਗੀ।
ਰਿਸ਼ਤੇਦਾਰਾਂ ਦੇ ਨਾਂ 'ਤੇ ਬਣੀਆਂ ਕੰਪਨੀਆਂ ਦੀ ਹੋਵੇਗੀ ਜਾਂਚ
ਸੂਤਰਾਂ ਨੇ ਦੱਸਿਆ ਕਿ ਈ. ਡੀ. ਵੱਲੋਂ ਰਮਨ ਕੁਮਾਰ 'ਤੇ ਸ਼ਿਕੰਜਾ ਕੱਸਣ ਤੋਂ ਬਾਅਦ ਜਿਨ੍ਹਾਂ-ਜਿਨ੍ਹਾਂ ਫਰਮਾਂ ਵਿਚ ਰਕਮ ਟਰਾਂਸਫਰ ਹੋਈ, ਉਨ੍ਹਾਂ ਕੰਪਨੀਆਂ ਦੀ ਜਾਂਚ ਸ਼ੁਰੂ ਕੀਤੀ ਜਾ ਚੁੱਕੀ ਹੈ। ਭਰੋਸੇਯੋਗ ਸੂਤਰਾਂ ਮੁਤਾਬਕ ਇਨ੍ਹਾਂ ਫਰਮਾਂ ਵਿਚ ਸਿਰਫ ਬੋਗਸ ਐਕਸਪੋਰਟ ਦੇ ਵੈਟ ਰਿਫੰਡ ਦੀ ਰਕਮ ਖੁਰਦ-ਬੁਰਦ ਕੀਤੀ ਜਾਂਦੀ ਸੀ। ਈ. ਡੀ. ਇਨ੍ਹਾਂ ਫਰਮਾਂ ਦਾ ਰਿਕਾਰਡ ਵੀ ਫਰੋਲ ਰਹੀ ਹੈ।
ਬੋਗਸ ਰਿਫੰਡ ਲੈਣ ਵਾਲੇ ਚਿੰਤਾ 'ਚ
ਈ. ਡੀ. ਦੀ ਸਖਤ ਅਤੇ ਵੱਡੇ ਪੱਧਰ 'ਤੇ ਕੀਤੀ ਜਾ ਰਹੀ ਜਾਂਚ ਤੋਂ ਆਬਕਾਰੀ ਦੇ ਕਰ ਵਿਭਾਗ ਤੋਂ ਹੋਰ ਬੋਗਸ ਰਿਫੰਡ ਲੈਣ ਵਾਲੇ ਉੱਦਮੀ ਚਿੰਤਾ ਵਿੱਚ ਹਨ। ਉਹ ਵਾਰ-ਵਾਰ ਇਸ ਕੇਸ ਦੀ ਜਾਣਕਾਰੀ ਪ੍ਰਾਪਤ ਕਰ ਰਹੇ ਹਨ, ਕਿਉਂਕਿ ਉਨ੍ਹਾਂ ਨੂੰ ਇਸ ਗੱਲ ਦਾ ਅਹਿਸਾਸ ਹੋ ਚੁੱਕਾ ਹੈ ਕਿ ਜਲਧਾਰਾ ਐਕਸਪੋਰਟਰ ਤੋਂ ਬਾਅਦ ਜਾਂਚ ਲਈ ਉਨ੍ਹਾਂ ਨੂੰ ਵੀ ਬੁਲਾਇਆ ਜਾ ਸਕਦਾ ਹੈ। ਈ. ਡੀ. ਦੇ ਬੁਲਾਰੇ ਨੇ ਦੱਸਿਆ ਕਿ ਜੇ ਦੋਸ਼ ਸਿੱਧ ਹੋ ਜਾਂਦੇ ਹਨ ਤਾਂ ਜਲਧਾਰਾ ਐਕਸਪੋਰਟਰ ਪਿਓ-ਪੁੱਤ ਨੂੰ 7 ਸਾਲ ਦੀ ਕੈਦ ਹੋ ਸਕਦੀ ਹੈ।
ਮੋਹਾਲੀ : ਡੇਰਾਬੱਸੀ ਘੱਗਰ 'ਚੋਂ ਮਿਲਿਆ 18 ਫੁੱਟ ਲੰਬਾ ਅਜਗਰ, ਲੋਕਾਂ 'ਚ ਹੜਕੰਪ
NEXT STORY 
