ਸ੍ਰੀ ਮੁਕਤਸਰ ਸਾਹਿਬ (ਪਵਨ ਤਨੇਜਾ): ਪੰਜਾਬ ਅੰਦਰ ਲੁੱਟ ਖੋਹ ਅਤੇ ਗੈਂਗਸਟਰਾਂ ਵੱਲੋਂ ਫਿਰੌਤੀਆਂ ਦਾ ਸਿਲਸਲਾ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ। ਤਾਜਾ ਮਾਮਲਾ ਸ੍ਰੀ ਮੁਕਤਸਰ ਸਾਹਿਬ ਦਾ ਹੈ, ਜਿੱਥੇ ਇਕ ਆੜ੍ਹਤੀਏ ਕੋਲੋਂ ਗੈਂਗਸਟਰ ਆਰਜ਼ੂ ਬਿਸ਼ਨੋਈ ਦੇ ਨਾਂ 'ਤੇ ਕਰੋੜਾਂ ਰੁਪਏ ਦੀ ਫਿਰੌਤੀ ਮੰਗਣ ਅਤੇ ਪੂਰੇ ਪਰਿਵਾਰ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਦਾ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ। ਥਾਣਾ ਸਿਟੀ ਸ੍ਰੀ ਮੁਕਤਸਰ ਸਾਹਿਬ ਦੀ ਪੁਲਸ ਨੇ ਇਸ ਸਬੰਧੀ ਆਰਜ਼ੂ ਬਿਸ਼ਨੋਈ ਅਤੇ ਹੋਰ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਭਾਰਤੀ ਨਿਆਂ ਸੰਹਿਤਾ ਦੀਆਂ ਧਾਰਾਵਾਂ 308 ਅਤੇ 351 ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ।
ਪੁਲਸ ਨੂੰ ਦਿੱਤੇ ਬਿਆਨਾਂ ਵਿਚ ਮੁਦਈ ਤਰਸੇਮ ਕੁਮਾਰ ਬੱਤਰਾ ਪੁੱਤਰ ਮੁਕੰਦ ਲਾਲ ਬੱਤਰਾ, ਵਾਸੀ ਬਾਵਾ ਕਲੋਨੀ (ਹਾਲ ਆਬਾਦ ਬੈਂਸ ਕਲੋਨੀ ਨੇੜੇ ਬਾਲਾ ਜੀ ਮੰਦਿਰ, ਸ੍ਰੀ ਮੁਕਤਸਰ ਸਾਹਿਬ) ਨੇ ਦੱਸਿਆ ਕਿ ਉਹ ਨਵੀਂ ਦਾਣਾ ਮੰਡੀ ਵਿਖੇ 'ਐੱਮ. ਐੱਲ. ਬੱਤਰਾ ਐਂਡ ਸੰਨਜ਼' (ਦੁਕਾਨ ਨੰਬਰ 70) ਨਾਂ 'ਤੇ ਆੜ੍ਹਤ ਦਾ ਕੰਮ ਕਰਦਾ ਹੈ। 23 ਜੁਲਾਈ 2026 ਨੂੰ ਜਦੋਂ ਉਹ ਆਪਣੀ ਦੁਕਾਨ 'ਤੇ ਮੌਜੂਦ ਸੀ, ਤਾਂ ਉਸ ਦੇ ਮੋਬਾਈਲ 'ਤੇ ਇੱਕ ਵਿਦੇਸ਼ੀ ਨੰਬਰ +1(775)351-3884 ਤੋਂ ਵਟਸਐਪ 'ਤੇ ਮਿਸ ਕਾਲ ਆਈ। ਜਦੋਂ ਤਰਸੇਮ ਕੁਮਾਰ ਨੇ ਉਸ ਨੰਬਰ 'ਤੇ ਵਾਪਸ ਵਟਸਐਪ ਕਾਲ ਕੀਤੀ, ਤਾਂ ਅੱਗੋਂ ਕਾਲ ਕਰਨ ਵਾਲੇ ਨੇ ਆਪਣੀ ਪਛਾਣ ਆਰਜ਼ੂ ਬਿਸ਼ਨੋਈ ਵਜੋਂ ਦੱਸੀ। ਉਕਤ ਵਿਅਕਤੀ ਨੇ ਧਮਕਾਉਂਦਿਆਂ 2 ਕਰੋੜ ਰੁਪਏ ਦੀ ਮੰਗ ਕੀਤੀ ਅਤੇ ਪੈਸੇ ਨਾ ਦੇਣ 'ਤੇ ਉਸ ਨੂੰ ਅਤੇ ਉਸ ਦੇ ਪੂਰੇ ਪਰਿਵਾਰ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ। ਇਸ ਧਮਕੀ ਭਰੀ ਫਿਰੌਤੀ ਕਾਲ ਕਾਰਣ ਉਕਤ ਆੜਤੀ ਦੇ ਹੋਸ਼ ਉਡ ਗਏ ਅਤੇ ਇਸ ਨਾਲ ਪੂਰੇ ਸ਼ਹਿਰ ਦੇ ਵਪਾਰੀਆਂ ਵਿਚ ਸਹਿਮ ਦਾ ਮਹੌਲ ਬਣ ਗਿਆ। ਇਸ ਕਰਕੇ ਆੜਤੀ ਵੱਲੋਂ ਇਸ ਘਟਨਾ ਸਬੰਧੀ ਪੁਲਸ ਨੂੰ ਸੂਚਨਾ ਕੀਤੀ। 24 ਜੁਲਾਈ 2026 ਨੂੰ ਪੀੜਤ ਆੜ੍ਹਤੀਏ ਨੇ ਇਸ ਸਬੰਧੀ ਐੱਸ.ਐੱਸ.ਪੀ. ਸ੍ਰੀ ਮੁਕਤਸਰ ਸਾਹਿਬ ਕੋਲ ਲਿਖਤੀ ਦਰਖਾਸਤ ਦੇ ਦਿੱਤੀ।
25 ਜੁਲਾਈ ਨੂੰ ਜਦੋਂ ਤਰਸੇਮ ਕੁਮਾਰ ਆਪਣੇ ਪਰਿਵਾਰ (ਪਤਨੀ ਰੁਪਿੰਦਰ ਕੁਮਾਰੀ, ਵੱਡਾ ਲੜਕਾ ਸਨਮ ਬੱਤਰਾ ਅਤੇ ਛੋਟਾ ਲੜਕਾ ਅਰਸ਼ ਕੁਮਾਰ ਬੱਤਰਾ) ਸਮੇਤ ਘਰ ਮੌਜੂਦ ਸੀ, ਤਾਂ ਉਸ ਨੂੰ ਇੱਕ ਹੋਰ ਵਟਸਐਪ ਨੰਬਰ +(740)408-6859 ਤੋਂ ਲਗਾਤਾਰ ਤਿੰਨ ਵਾਰ ਕਾਲਾਂ ਆਈਆਂ। ਪੀੜਤ ਮੁਤਾਬਕ ਕਾਲ ਕਰਨ ਵਾਲੇ ਦੀ ਆਵਾਜ਼ ਪਹਿਲਾਂ ਵਾਲੇ ਵਿਅਕਤੀ (ਆਰਜ਼ੂ ਬਿਸ਼ਨੋਈ) ਨਾਲ ਹੀ ਮਿਲਦੀ ਸੀ। ਇਸ ਵਾਰ ਦੋਸ਼ੀ ਨੇ ਫਿਰੌਤੀ ਦੀ ਰਕਮ ਵਧਾ ਕੇ 5 ਕਰੋੜ ਰੁਪਏ ਕਰ ਦਿੱਤੀ ਅਤੇ ਮੁੜ ਗੰਭੀਰ ਸਿੱਟੇ ਭੁਗਤਣ ਦੀਆਂ ਧਮਕੀਆਂ ਦਿੱਤੀਆਂ।
ਪੀੜਤ ਦੀ ਸ਼ਿਕਾਇਤ 'ਤੇ ਕਾਰਵਾਈ ਕਰਦਿਆਂ ਥਾਣਾ ਸਿਟੀ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਮੁਕੱਦਮਾ ਨੰਬਰ 218, ਮਿਤੀ 25.07.2026 ਅੰਡਰ ਸੈਕਸ਼ਨ 308, 351 ਬੀ.ਐਨ.ਐਸ. ਤਹਿਤ ਜਬਰੀ ਫਿਰੌਤੀ ਵਸੂਲਣ ਅਤੇ ਜਾਨ ਤੋਂ ਮਾਰ ਦੇਣ ਦੀ ਧਮਕੀ ਤਹਿਤ ਆਰਜ਼ੂ ਬਿਸ਼ਨੋਈ ਅਤੇ ਉਸ ਦੇ ਅਣਪਛਾਤੇ ਸਾਥੀਆਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ। ਮਾਮਲੇ ਦੀ ਅਗਲੇਰੀ ਤਫਤੀਸ਼ ਸਹਾਇਕ ਥਾਣੇਦਾਰ ਲਖਵਿੰਦਰ ਸਿੰਘ ਵੱਲੋਂ ਕੀਤੀ ਜਾ ਰਹੀ ਹੈ। ਪੁਲਸ ਵੱਲੋਂ ਇਨ੍ਹਾਂ ਵਟਸਐਪ ਨੰਬਰਾਂ ਦੀ ਟ੍ਰੇਸਿੰਗ ਅਤੇ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
ਪੰਜਾਬ 'ਚ ਹਨ੍ਹੇਰੀ-ਤੂਫ਼ਾਨ ਮਚਾਏਗਾ ਕਹਿਰ! ਪਵੇਗਾ ਭਾਰੀ ਮੀਂਹ, 13 ਜ਼ਿਲ੍ਹਿਆਂ ਲਈ Alert ਜਾਰੀ
NEXT STORY 
