ਕਾਂਗਰਸ ਦਾ ਚਿਹਰਾ-ਮੋਹਰਾ ਬਦਲਣ ਦੀ ਕਵਾਇਦ ਸ਼ੁਰੂ ਹੋ ਚੁੱਕੀ ਹੈ। ਰਾਹੁਲ ਗਾਂਧੀ ਨੇ ਮਹੀਨਾ ਕੁ ਪਹਿਲਾਂ ਜਿਸ ਗੱਲ ਦਾ ਸੱਦਾ ਦਿੱਤਾ ਸੀ, ਹੁਣ ਥੋਕ ਦੇ ਭਾਅ 'ਚ ਕਾਂਗਰਸ ਕਮੇਟੀਆਂ ਅਤੇ ਕਾਂਗਰਸੀ ਆਗੂਆਂ ਦੇ ਅਸਤੀਫਿਆਂ ਦੇ ਦੌਰ ਸ਼ੁਰੂ ਹੋ ਗਏ ਹਨ। ਰਾਹੁਲ ਦੇ ਘਰ ਤਕ ਇਹ ਸੇਕ ਆ ਪਹੁੰਚਿਆ ਹੈ, ਉਨ੍ਹਾਂ ਦੇ ਅਤਿ ਪਿਆਰੇ ਕੇ. ਰਾਜੂ ਦੀ ਵੀ ਰਾਹੁਲ ਦਰਬਾਰ 'ਚੋਂ ਛੁੱਟੀ ਹੋ ਗਈ ਹੈ। ਕੌਸ਼ਲ ਵਿਦਿਆਰਥੀ, ਅਲੰਕਾਰ ਅਤੇ ਸੰਦੀਪ ਸਿੰਘ ਅਜੇ ਵੀ ਰਾਹੁਲ ਦੇ ਨਾਲ ਹਨ। ਰਾਹੁਲ ਅਜੇ ਵੀ ਇਸ ਗੱਲ 'ਤੇ ਅੜੇ ਹਨ ਕਿ ਪ੍ਰਧਾਨ ਦੇ ਅਹੁਦੇ ਤੋਂ ਦਿੱਤਾ ਗਿਆ ਆਪਣਾ ਅਸਤੀਫਾ ਉਹ ਵਾਪਿਸ ਨਹੀਂ ਲੈਣਗੇ। ਸੋ ਕਹਿੰਦੇ ਹਨ ਕਿ ਸੋਨੀਆ ਗਾਂਧੀ ਵਲੋਂ ਏ. ਕੇ. ਐਂਟੋਨੀ ਦੇ ਨਾਂ ਦਾ ਸੁਝਾਅ ਆਇਆ ਹੈ, ਜਿਨ੍ਹਾਂ ਬਾਰੇ ਮੰਨਿਆ ਜਾਂਦਾ ਹੈ ਕਿ ਉਹ ਮਨਮੋਹਨ ਸਿੰਘ ਵਾਂਗ ਹੀ ਗਾਂਧੀ ਪਰਿਵਾਰ ਦੇ ਬੇਹੱਦ ਵਫ਼ਾਦਾਰ ਹਨ, ਜੋ ਕਦੇ ਪਰਿਵਾਰ ਤੋਂ ਬਾਹਰ ਨਹੀਂ ਜਾ ਸਕਦੇ ਅਤੇ ਉਹ ਇੰਨੀ ਵੱਡੀ ਉਮਰ ਦੇ ਵੀ ਨਹੀਂ ਪਰ ਰਾਹੁਲ ਸਮੇਤ ਕਾਂਗਰਸ ਦੇ ਯੂਥ ਆਗੂਆਂ ਦਾ ਮੰਨਣਾ ਹੈ ਕਿ ਪਾਰਟੀ ਨੂੰ ਇਕ ਅਜਿਹਾ ਪ੍ਰਧਾਨ ਚਾਹੀਦਾ ਹੈ, ਜੋ ਨਵੇਂ ਸਿਰੇ ਤੋਂ ਕਾਂਗਰਸ ਦੀ ਸ਼ੁਰੂਆਤ ਕਰ ਸਕੇ। ਰਾਹੁਲ ਨੇ ਇਹ ਵੀ ਤੈਅ ਕੀਤਾ ਹੈ ਕਿ ਪਾਰਟੀ ਸੰਗਠਨ ਦੇ ਵੱਖ-ਵੱਖ ਅਹੁਦਿਆਂ 'ਤੇ ਅੱਧੇ ਤੋਂ ਵੱਧ ਆਗੂਆਂ ਦੀ ਉਮਰ 40 ਸਾਲ ਤੋਂ ਘੱਟ ਹੋਣੀ ਚਾਹੀਦੀ ਹੈ। ਔਰਤਾਂ ਨੂੰ ਵੀ ਪਾਰਟੀ ਸੰਗਠਨ 'ਚ ਥਾਂ ਦੇਣ ਦੀ ਗੱਲ ਹੋ ਰਹੀ ਹੈ।
ਜ਼ਮੀਨੀ ਪੱਧਰ ਦੇ ਵਰਕਰਾਂ ਤੇ ਆਗੂਆਂ ਨੂੰ ਪਾਰਟੀ ਸੰਗਠਨ 'ਚ ਸ਼ਾਮਿਲ ਕੀਤੇ ਜਾਣ 'ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਕਾਂਗਰਸ ਪਾਰਟੀ ਬੂਥ ਤੋਂ ਲੈ ਕੇ ਸੂਬਾ ਪੱਧਰ ਤਕ ਨਵਾਂ ਸੰਗਠਨ ਖੜ੍ਹਾ ਕਰਨ ਦੀ ਕਵਾਇਦ 'ਚ ਜੁਟ ਗਈ ਹੈ। ਨਵੇਂ ਸੰਗਠਨਾਂ 'ਚ ਐੱਨ. ਐੱਸ. ਯੂ. ਆਈ., ਯੂਥ ਕਾਂਗਰਸ, ਮਹਿਲਾ ਕਾਂਗਰਸ, ਸੇਵਾ ਦਲ ਵਰਗੇ ਸੰਗਠਨਾਂ 'ਚ ਕੰਮ ਕਰਨ ਵਾਲੇ ਆਗੂਆਂ ਨੂੰ ਵੀ ਮੌਕਾ ਦਿੱਤਾ ਜਾ ਰਿਹਾ ਹੈ। ਰਾਹੁਲ ਗਾਂਧੀ ਇਹ ਵੀ ਚਾਹੁੰਦੇ ਹਨ ਕਿ ਯੂਥ ਕਾਂਗਰਸ, ਸੇਵਾ ਦਲ, ਐੱਨ. ਐੱਸ. ਯੂ. ਆਈ., ਮਹਿਲਾ ਕਾਂਗਰਸ ਦੇ ਚਿਹਰੇ-ਮੋਹਰੇ ਨੂੰ ਵੀ ਬਦਲਿਆ ਜਾਵੇ ਅਤੇ ਇਨ੍ਹਾਂ ਲਈ ਨਵੇਂ ਸਿਰੇ ਤੋਂ ਮੈਂਬਰੀ ਮੁਹਿੰਮ ਚਲਾਈ ਜਾਵੇ। ਚੰਗੀ ਗੱਲ ਹੈ, ਸਿਰੇ ਚੜ੍ਹੇ ਅਤੇ ਗੱਲ ਬਣੇ।
ਇਸ ਅਫਸਰ ਕਾਰਣ ਬਚ ਗਏ ਹੁੱਡਾ
ਹਰਿਆਣਾ ਦੇ ਸਾਬਕਾ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ ਗਾਂਧੀ ਪਰਿਵਾਰ ਦੇ ਸਭ ਤੋਂ ਵੱਡੇ ਵਫਾਦਾਰਾਂ 'ਚ ਸ਼ੁਮਾਰ ਹੁੰਦੇ ਹਨ ਕਿਉਂਕਿ ਕੇਂਦਰੀ ਭਾਜਪਾ ਸਰਕਾਰ ਅਤੇ ਕੇਂਦਰੀ ਜਾਂਚ ਏਜੰਸੀਆਂ ਦੇ ਪਿਛਲੇ ਕਾਫੀ ਸਮੇਂ ਤੋਂ ਉਹ ਨਿਸ਼ਾਨੇ 'ਤੇ ਰਹੇ ਹਨ। ਕੇਂਦਰੀ ਜਾਂਚ ਏਜੰਸੀਆਂ ਨੇ ਗੁਰੂਗ੍ਰਾਮ ਅਤੇ ਇਸ ਦੇ ਨੇੜਲੇ ਇਲਾਕਿਆਂ ਦੇ ਕੋਈ 400 ਏਕੜ ਜ਼ਮੀਨ ਘਪਲਿਆਂ ਦੇ ਸਬੂਤਾਂ ਨੂੰ ਜਦੋਂ ਫਰੋਲਣਾ ਸ਼ੁਰੂ ਕੀਤਾ ਤਾਂ ਕਈ ਹੈਰਾਨ ਕਰਨ ਵਾਲੇ ਨਾਂ ਉੱਭਰ ਕੇ ਸਾਹਮਣੇ ਆਏ। ਭਰੋਸੇਯੋਗ ਸੂਤਰਾਂ ਦੀ ਮੰਨੀਏ ਤਾਂ ਹੁੱਡਾ 'ਤੇ ਕੋਈ ਕਾਰਵਾਈ ਕਰਨ ਤੋਂ ਪਹਿਲਾਂ ਈ. ਡੀ. ਅਤੇ ਸੀ. ਬੀ. ਆਈ. ਨੇ ਇਸ ਸਾਬਕਾ ਮੁੱਖ ਮੰਤਰੀ ਦੇ ਖਾਸ ਅਧਿਕਾਰੀਆਂ ਦੀ ਇਕ ਫਾਈਲ ਤਿਆਰ ਕੀਤੀ, ਇਸ ਸੂਚੀ 'ਚ ਹੁੱਡਾ ਦੇ ਸਕੱਤਰ ਰਹੇ ਛਤਰ ਸਿੰਘ, ਐੱਮ. ਐੱਲ. ਤਾਇਲ ਤੋਂ ਇਲਾਵਾ ਇਕ ਆਈ. ਐੱਸ. ਅਧਿਕਾਰੀ ਰਾਜੀਵ ਅਰੋੜਾ ਦਾ ਵੀ ਨਾਂ ਸ਼ਾਮਲ ਦੱਸਿਆ ਜਾਂਦਾ ਹੈ। ਯਾਦ ਰਹੇ ਕਿ ਰਾਜੀਵ ਅਰੋੜਾ 2005 ਦੇ ਦੌਰ 'ਚ ਐੱਸ. ਐੱਚ. ਆਈ. ਆਈ. ਡੀ. ਸੀ ਦੇ ਐੱਮ. ਡੀ. ਸਨ। ਸੂਤਰਾਂ ਦੀ ਮੰਨੀਏ ਤਾਂ ਅਰੋੜਾ ਦੇ ਐੱਮ. ਡੀ. ਰਹਿਣ ਦੌਰਾਨ ਹੀ 'ਸਪੈਸ਼ਲ ਇਕੋਨਾਮਿਕ ਜ਼ੋਨ' ਦੇ ਤਹਿਤ ਤੱਤਕਾਲੀ ਹਰਿਆਣਾ ਸਰਕਾਰ ਅਤੇ ਰਿਲਾਇੰਸ ਸਮੇਤ ਕਈ ਕੰਪਨੀਆਂ ਵਿਚਾਲੇ ਸਮਝੌਤੇ ਹੋਏ ਸਨ। ਕਹਿੰਦੇ ਹਨ ਕਿ ਇਸ ਕਰਾਰਨਾਮੇ ਨੂੰ ਤੇਜ਼ ਰਫਤਾਰ ਨਾਲ ਸਿਰੇ ਚੜ੍ਹਾਉਣ 'ਚ ਹੁੱਡਾ ਅਤੇ ਅਰੋੜਾ ਦੋਵਾਂ ਦੀ ਇਕ ਖਾਸ ਭੂਮਿਕਾ ਸੀ।
ਅਗਲਾ ਗ੍ਰਹਿ ਸਕੱਤਰ ਕੌਣ?
ਦੇਸ਼ ਦਾ ਅਗਲਾ ਗ੍ਰਹਿ ਸਕੱਤਰ ਕੌਣ ਹੋਵੇਗਾ, ਇਸ ਨੂੰ ਲੈ ਕੇ ਕਿਆਸ-ਅਰਾਈਆਂ ਦਾ ਬਾਜ਼ਾਰ ਗਰਮ ਹੈ। ਜ਼ਿਆਦਾਤਰ ਨੌਕਰਸ਼ਾਹ ਇਸ ਅਹੁਦੇ 'ਤੇ ਤਾਇਨਾਤੀ ਨੂੰ ਕੰਡਿਆਂ ਦਾ ਤਾਜ ਮੰਨਦੇ ਹਨ, ਸੋ ਭਰੋਸੇਯੋਗ ਸੂਤਰਾਂ ਦੇ ਦਾਅਵਿਆਂ 'ਤੇ ਜੇਕਰ ਯਕੀਨ ਕੀਤਾ ਜਾਵੇ ਤਾਂ ਸਰਕਾਰ ਨੇ ਇਸ ਸਬੰਧੀ ਇਕ ਸੂਚੀ ਤਿਆਰ ਕੀਤੀ ਸੀ। ਉਸ 'ਚ ਸ਼ਾਮਿਲ 3 ਬਿਊਰੋਕ੍ਰੇਟਸ ਨੇ ਗ੍ਰਹਿ ਸਕੱਤਰ ਬਣਨ 'ਚ ਆਪਣੀ ਅਸਮਰੱਥਾ ਪ੍ਰਗਟਾ ਦਿੱਤੀ। ਇਸ ਦੇ ਮਗਰੋਂ ਇਸ ਦੌੜ 'ਚ ਬੀ. ਵੀ. ਆਰ. ਸੁਬਰਾਮਣੀਅਮ ਦਾ ਨਾਂ ਸਭ ਤੋਂ ਅੱਗੇ ਚੱਲ ਰਿਹਾ ਹੈ, ਜਿਨ੍ਹਾਂ ਨੂੰ ਕਸ਼ਮੀਰ ਅਤੇ ਅੱਤਵਾਦ ਸਬੰਧੀ ਮਾਮਲਿਆਂ ਦਾ ਮਾਹਿਰ ਵੀ ਮੰਨਿਆ ਜਾਂਦਾ ਹੈ। ਫਿਲਹਾਲ ਕੇਂਦਰ ਸਰਕਾਰ ਨੂੰ ਵੀ ਅਜਿਹੇ ਹੀ ਕਿਸੇ ਅਧਿਕਾਰੀ ਦੀ ਭਾਲ ਹੈ।
ਆਂਧਰਾ 'ਚ ਖਿੜੇਗਾ ਕਮਲ
ਆਂਧਰਾ ਪ੍ਰਦੇਸ਼ 'ਚ ਬੇਸ਼ੱਕ ਭਾਜਪਾ ਇਨ੍ਹਾਂ ਚੋਣਾਂ 'ਚ ਇਕ ਵੀ ਸੀਟ ਨਹੀਂ ਜਿੱਤ ਸਕੀ ਪਰ ਆਂਧਰਾ 'ਚ ਵਾਪਸੀ ਦੀ ਭਗਵਾ ਸਕ੍ਰਿਪਟ ਲਿਖੀ ਜਾ ਚੁੱਕੀ ਹੈ। ਜਲਦ ਹੀ ਭਾਜਪਾ ਇਥੇ ਪ੍ਰਮੁੱਖ ਵਿਰੋਧੀ ਪਾਰਟੀ ਦੀ ਭੂਮਿਕਾ 'ਚ ਨਜ਼ਰ ਆ ਸਕਦੀ ਹੈ। ਭਾਜਪਾ ਅਤੇ ਜਗਨ ਦੋਵੇਂ ਹੀ ਇਸ ਗੱਲ 'ਤੇ ਸਹਿਮਤ ਹਨ ਕਿ ਆਂਧਰਾ 'ਚੋਂ ਚੰਦਰਬਾਬੂ ਅਤੇ ਤੇਦੇਪਾ ਦਾ ਸਫਾਇਆ ਹੋਣਾ ਚਾਹੀਦਾ ਹੈ। ਇਸ ਸੋਚ 'ਚ ਜਗਨ ਨੇ ਵੀ ਭਾਜਪਾ ਦਾ ਸਾਥ ਦੇਣ ਦਾ ਮਨ ਬਣਾਇਆ ਹੋਇਆ ਹੈ। ਰਾਜ ਸਭਾ 'ਚ ਜਿੱਥੇ ਤੇਲਗੂਦੇਸ਼ਮ ਪਾਰਟੀ ਦੇ 6 'ਚੋਂ 4 ਸੰਸਦ ਮੈਂਬਰਾਂ ਨੇ ਪਹਿਲਾਂ ਹੀ ਭਾਜਪਾ ਦਾ ਪੱਲਾ ਫੜ ਲਿਆ ਹੈ, ਇਸ ਤੋਂ ਉਤਸ਼ਾਹਿਤ ਹੋ ਕੇ ਭਾਜਪਾ ਨੇ ਤੇਦੇਪਾ ਵਿਧਾਇਕਾਂ 'ਤੇ ਡੋਰੇ ਪਾਉਣੇ ਸ਼ੁਰੂ ਕਰ ਦਿੱਤੇ ਹਨ। ਇਸ ਵੇਲੇ ਆਂਧਰਾ ਵਿਧਾਨ ਸਭਾ 'ਚ ਤੇਦੇਪਾ ਦੇ 23 ਵਿਧਾਇਕ ਚੁਣ ਕੇ ਪੁੱਜੇ ਹਨ।
ਸੂਤਰਾਂ ਦੀ ਮੰਨੀਏ ਤਾਂ ਇਨ੍ਹਾਂ 'ਚੋਂ 16 ਵਿਧਾਇਕ ਭਾਜਪਾ ਦੇ ਸੰਪਰਕ ਵਿਚ ਹਨ ਅਤੇ ਕਹਿੰਦੇ ਹਨ ਕਿ ਇਨ੍ਹਾਂ 'ਚੋਂ 13 ਨੇ ਭਾਜਪਾ 'ਚ ਆਉਣ ਦੀ ਸਹਿਮਤੀ ਪ੍ਰਗਟਾ ਦਿੱਤੀ ਹੈ। ਜੇਕਰ ਇੰਝ ਹੁੰਦਾ ਹੈ ਤਾਂ ਭਾਜਪਾ ਆਂਧਰਾ ਪ੍ਰਦੇਸ਼ 'ਚ ਪ੍ਰਮੁੱਖ ਵਿਰੋਧੀ ਪਾਰਟੀ ਦੇ ਤੌਰ 'ਤੇ ਉੱਭਰ ਸਕਦੀ ਹੈ। ਆਂਧਰਾ 'ਚ ਭਾਜਪਾ ਦੀ ਜ਼ਮੀਨ ਤਿਆਰ ਕਰਨ ਦੀ ਪੂਰੀ ਜ਼ਿੰਮੇਵਾਰੀ ਸੰਘ ਵਿਚਾਰਕ ਸੁਨੀਲ ਦੇਵਧਰ ਨੇ ਚੁੱਕੀ ਹੈ, ਜੋ ਪਹਿਲਾਂ ਹੀ ਕਈ ਵਰ੍ਹਿਆਂ ਤੋਂ ਤ੍ਰਿਪੁਰਾ ਵਿਚ ਸਰਕਾਰ 'ਚ ਕੁੰਡਲੀ ਮਾਰ ਕੇ ਬੈਠੇ ਮਾਣਿਕ ਸਰਕਾਰ ਨੂੰ ਉਥੋਂ ਚੱਲਦਾ ਕਰ ਚੁੱਕੇ ਹਨ। ਉਂਝ ਵੀ ਦੇਵਧਰ ਲਈ ਆਂਧਰਾ 'ਚ ਉਨ੍ਹਾਂ ਦਾ ਕੰਮ ਇਸ ਲਈ ਵੀ ਸੌਖਾ ਹੋ ਗਿਆ ਹੈ ਕਿਉਂਕਿ ਇਨ੍ਹਾਂ ਚੋਣਾਂ 'ਚ ਉਥੇ ਕਾਂਗਰਸ ਆਪਣਾ ਖਾਤਾ ਵੀ ਨਹੀਂ ਖੋਲ੍ਹ ਸਕੀ। ਭਾਜਪਾ ਜਗਨ 'ਤੇ ਲਗਾਤਾਰ ਇਹ ਦਬਾਅ ਪਾ ਰਹੀ ਹੈ ਕਿ ਉਹ ਜਲਦ ਤੋਂ ਜਲਦ ਚੰਦਰਬਾਬੂ ਦੇ ਕਥਿਤ ਘਪਲਿਆਂ ਦੀਆਂ ਫਾਈਲਾਂ ਖੋਲ੍ਹੇ। ਇਹ ਵਿਚਾਰ ਜਗਨ ਨੂੰ ਵੀ ਸੂਤ ਆਇਆ ਲੱਗਦਾ ਹੈ ਅਤੇ ਕਿਉਂਕਿ ਜਗਨ ਦਾ ਚੰਦਰਬਾਬੂ ਨਾਲ ਛੱਤੀ ਦਾ ਅੰਕੜਾ ਜਗ-ਜ਼ਾਹਿਰ ਹੈ, ਇਕ ਵਾਰ ਜੇ ਨਾਇਡੂ ਨਿੱਬੜ ਗਏ, ਅਗਲੇ ਦਿਨਾਂ 'ਚ ਭਾਜਪਾ ਲਈ ਜਗਨ ਨਾਲ ਭਿੜਨਾ ਹੋਰ ਵੀ ਸੌਖਾ ਹੋਵੇਗਾ।
ਮੋਦੀ ਪਿਆਰੇ ਜਾਵਡੇਕਰ ਅਤੇ ਫੜਨਵੀਸ
ਮਹਾਰਾਸ਼ਟਰ ਦੇ ਦੋ ਪਾਰਟੀ ਆਗੂਆਂ 'ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਖਾਸ ਮਿਹਰ ਹੈ। ਇਹ ਦੋਵੇਂ ਆਗੂ ਹਨ ਕੇਂਦਰੀ ਸੂਚਨਾ ਪ੍ਰਸਾਰਣ ਅਤੇ ਵਾਤਾਵਰਣ ਮੰਤਰੀ ਪ੍ਰਕਾਸ਼ ਜਾਵਡੇਕਰ ਅਤੇ ਮਹਾਰਾਸ਼ਟਰ ਦੇ ਨੌਜਵਾਨ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ। ਇਹ ਪ੍ਰਧਾਨ ਮੰਤਰੀ ਦੇ ਖਾਸ ਪਿਆਰ ਦਾ ਅਸਰ ਹੈ ਕਿ ਮਹਾਰਾਸ਼ਟਰ 'ਚ ਫੜਨਵੀਸ ਨੂੰ ਹੁਣ ਤਕ ਬਹੁਤ ਫਾਇਦਾ ਹੋਇਆ ਹੈ। ਲੱਗਭਗ 5 ਸਾਲ ਸੂਬੇ 'ਚ ਸੱਤਾ ਚਲਾਉਣ ਦੇ ਬਾਵਜੂਦ ਪਾਰਟੀ ਜਾਂ ਸਰਕਾਰ 'ਚ ਉਨ੍ਹਾਂ ਵਿਰੁੱਧ ਵਿਰੋਧਤਾ ਦੇ ਸੁਰ ਘੱਟ ਹੀ ਉੱਭਰੇ ਹਨ। ਸ਼ਾਂਤ, ਸਾਦੇ ਅਤੇ ਮਿੱਠਬੋਲੜੇ ਸੁਭਾਅ ਦੇ ਜਾਵਡੇਕਰ ਕੋਲ ਮੋਦੀ ਸਰਕਾਰ ਦੀਆਂ ਨੀਤੀਆਂ ਅਤੇ ਪ੍ਰਾਪਤੀਆਂ ਨੂੰ ਜਨਤਾ ਦੀਆਂ ਬਰੂਹਾਂ ਤਕ ਪਹੁੰਚਾਉਣ ਦੀ ਜ਼ਿੰਮੇਵਾਰੀ ਹੈ। ਸ਼ਾਇਦ ਇਹੀ ਕਾਰਣ ਹੈ ਕਿ ਇਸ ਵਾਰ ਉਨ੍ਹਾਂ ਨੂੰ ਸੂਚਨਾ ਤੇ ਪ੍ਰਸਾਰਣ ਮੰਤਰਾਲੇ ਦੀ ਜ਼ਿੰਮੇਵਾਰੀ ਵੀ ਮਿਲੀ ਹੈ। ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰਦਿਆਂ ਜਾਵਡੇਕਰ ਨੇ ਪਿਛਲੇ ਹਫਤੇ ਮੀਡੀਆ, ਡਿਜੀਟਲ ਮੀਡੀਆ ਅਤੇ ਆਰਥਿਕ ਮਾਮਲਿਆਂ ਨਾਲ ਜੁੜੇ 50 ਚੋਣਵੇਂ ਪੱਤਰਕਾਰਾਂ ਨੂੰ ਦਿੱਲੀ ਦੇ ਇਕ ਪੰਜ ਤਾਰਾ ਹੋਟਲ 'ਚ ਡਿਨਰ 'ਤੇ ਸੱਦਿਆ ਸੀ।
ਭਾਜਪਾ ਦਾ ਕਸ਼ਮੀਰ ਏਜੰਡਾ
ਸ਼ੁੱਕਰਵਾਰ ਨੂੰ ਸੰਸਦ 'ਚ ਜਿਹੜੇ ਲੋਕਾਂ ਨੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦਾ ਭਾਸ਼ਣ ਸੁਣਿਆ ਹੋਵੇਗਾ ਅਤੇ ਕਸ਼ਮੀਰ ਨੂੰ ਲੈ ਕੇ ਭਗਵਾਕਰਨ ਸਬੰਧੀ ਜਿਹੜੇ ਹੱਲ ਲੱਭੇ ਹੋਣਗੇ, ਉਹ ਬਾਖੂਬੀ ਸਮਝ ਚੁੱਕੇ ਹੋਣਗੇ ਕਿ ਭਾਜਪਾ ਲੀਡਰਿਸ਼ਪ ਕਸ਼ਮੀਰ ਨੂੰ ਲੈ ਕੇ ਕਿੰਨੀ ਗੰਭੀਰ ਹੈ। ਸ਼ਾਇਦ ਇਹੀ ਕਾਰਣ ਹੈ ਕਿ ਸ਼ਾਹ ਨੇ ਜਦੋਂ ਦੇਸ਼ ਦੀ ਵੰਡ ਅਤੇ ਕਸ਼ਮੀਰ ਸਮੱਸਿਆ ਦਾ ਜ਼ਿਕਰ ਕੀਤਾ ਤਾਂ ਇਕਦਮ ਹੀ ਪੰ. ਨਹਿਰੂ ਨੂੰ ਇਸ ਦਾ ਪ੍ਰਤੀਨਾਇਕ ਠਹਿਰਾ ਬੈਠੇ, ਖੂਬ ਹੰਗਾਮਾ ਹੋਇਆ ਅਤੇ ਸ਼ਾਹ ਆਪਣੇ ਤਰਕ ਅਤੇ ਕਸ਼ਮੀਰ 'ਤੇ ਸੰਘ ਤੇ ਭਾਜਪਾ ਦੀ ਲਾਈਨ ਤੋਂ ਡਿੱਗੇ ਨਹੀਂ ਅਤੇ ਨਾ ਹੀ ਇਹ ਦੱਸਣ ਤੋਂ ਹੀ ਸੰਕੋਚ ਕੀਤਾ ਕਿ ਕਸ਼ਮੀਰ 'ਚ ਧਾਰਾ-370 ਆਰਜ਼ੀ ਹੈ। ਕਸ਼ਮੀਰ ਨੂੰ ਲੈ ਕੇ ਮੋਦੀ-ਸ਼ਾਹ ਦਾ ਏਜੰਡਾ ਸਪੱਸ਼ਟ ਹੈ ਕਿ ''ਪਹਿਲਾਂ ਤਾਂ ਦੇਸ਼ ਨੂੰ ਇਹ ਸੰਦੇਸ਼ ਦੇਣਾ ਹੈ ਕਿ ਕਸ਼ਮੀਰ ਦੀ ਸਮੱਸਿਆ ਨੂੰ ਕੋਈ ਹੱਲ ਕਰ ਸਕਦਾ ਹੈ ਤਾਂ ਉਹ ਭਾਜਪਾ ਹੀ ਹੈ।'' ਸੂਤਰਾਂ ਦੀ ਮੰਨੀਏ ਤਾਂ ਭਾਜਪਾ ਦੀ ਯੋਜਨਾ ਘਾਟੀ 'ਚ ਰਾਸ਼ਟਰਵਾਦੀ ਮੁਸਲਿਮ ਨੌਜਵਾਨਾਂ ਨੂੰ ਤਿਆਰ ਕਰਨ ਦੀ ਹੈ। ਇਸ ਕੰਮ 'ਚ ਸੰਘ ਦਾ ਇਕ ਭਾਈਵਾਲ ਸੰਗਠਨ 'ਮੁਸਲਿਮ ਰਾਸ਼ਟਰੀਯ ਮੰਚ' ਪਹਿਲਾਂ ਤੋਂ ਜੁੜਿਆ ਹੋਇਆ ਹੈ। ਇਸ ਮੰਚ ਦੇ ਸੰਚਾਲਕ ਇੰਦ੍ਰੇਸ਼ ਕੁਮਾਰ ਨੂੰ ਕਸ਼ਮੀਰ ਮਾਮਲਿਆਂ 'ਚ ਮੁਹਾਰਤ ਹਾਸਿਲ ਹੈ। ਜਦੋਂ ਤੋਂ ਉਥੋਂ ਮਹਿਬੂਬਾ ਸਰਕਾਰ ਦੀ ਵਿਦਾਈ ਹੋਈ ਹੈ, ਅੱਤਵਾਦੀਆਂ ਨੂੰ ਲੈ ਕੇ ਕੇਂਦਰ ਸਰਕਾਰ ਨੇ ਆਪਣਾ ਇਰਾਦਾ ਸਪੱਸ਼ਟ ਜ਼ਾਹਿਰ ਕਰ ਦਿੱਤਾ ਹੈ ਕਿ ਜਾਂ ਤਾਂ ਆਤਮ-ਸਮਰਪਣ ਕਰੋ ਜਾਂ ਫਿਰ ਗੋਲੀ ਖਾਣ ਲਈ ਤਿਆਰ ਰਹੋ। ਨਾ ਸਿਰਫ ਵੱਖਵਾਦੀ ਸੰਗਠਨਾਂ ਦੀ ਫੰਡਿੰਗ 'ਤੇ ਰੋਕ ਲੱਗੀ ਹੈ, ਸਗੋਂ ਅਜਿਹੇ ਆਗੂਆਂ ਨੂੰ ਸੀਖਾਂ ਦੇ ਪਿੱਛੇ ਵੀ ਬੰਦ ਕੀਤਾ ਗਿਆ। ਭਾਜਪਾ ਦਾ ਇਹ ਵੀ ਮੰਨਣਾ ਹੈ ਕਿ ਜਦੋਂ ਤਕ ਕਸ਼ਮੀਰ ਆਪਣੀ ਲੀਡਰਸ਼ਿਪ ਤਿਆਰ ਨਾ ਕਰ ਲਵੇ, ਉਦੋਂ ਤਕ ਸਰਬਸੰਮਤੀ ਦਾ ਕੋਈ ਮਾਹੌਲ ਬਣ ਨਹੀਂ ਸਕੇਗਾ। ਕੇਂਦਰ ਨੇ ਭਲਾਈ ਯੋਜਨਾਵਾਂ ਦਾ ਕਸ਼ਮੀਰ 'ਚ ਹੜ੍ਹ ਲਿਆ ਦਿੱਤਾ ਹੈ। ਉਥੋਂ ਦੇ ਬੇਰੋਜ਼ਗਾਰ ਨੌਜਵਾਨਾਂ ਨੂੰ ਰੋਜ਼ਗਾਰ ਦੇਣ ਦੀਆਂ ਕੋਸ਼ਿਸ਼ਾਂ ਹੋ ਰਹੀਆਂ ਹਨ ਅਤੇ ਪੂਰੇ ਦੇਸ਼ 'ਚ ਇਹ ਮੂਡ ਬਣਾਉਣ ਦੀ ਕੋਸ਼ਿਸ਼ ਹੋ ਰਹੀ ਹੈ ਕਿ ਕਸ਼ਮੀਰ ਭਾਰਤ ਦਾ ਅਨਿੱਖੜਵਾਂ ਅੰਗ ਹੈ।
...ਅਤੇ ਅਖੀਰ 'ਚ
ਕੀ ਪ੍ਰਿਯੰਕਾ ਗਾਂਧੀ ਯੂ. ਪੀ. 'ਚ ਕਾਂਗਰਸ ਨੂੰ ਮੁੜ ਜ਼ਿੰਦਾ ਕਰਨ ਦੀਆਂ ਕੋਸ਼ਿਸ਼ਾਂ 'ਚ ਖੁੰਝ ਗਈ ਹੈ ਜਾਂ ਯੂ. ਪੀ. ਚੋਣਾਂ 'ਚ ਪਾਰਟੀ ਦੀ ਇੰਨੀ ਬੁਰੀ ਹਾਲਤ ਕਾਰਣ ਉਥੋਂ ਦੀ ਸਿਆਸਤ ਤੋਂ ਉਨ੍ਹਾਂ ਦਾ ਮੋਹ ਭੰਗ ਹੋ ਗਿਆ ਹੈ? ਨਹੀਂ ਤਾਂ ਕੀ ਕਾਰਣ ਹੈ ਕਿ ਪੂਰਬੀ ਯੂ. ਪੀ. ਦੀ ਜ਼ਿੰਮੇਵਾਰੀ ਉਨ੍ਹਾਂ ਨੇ ਆਪਣੇ ਭਰੋਸੇਮੰਦ ਅਜੇ ਲੱਲੂ ਨੂੰ ਸੌਂਪ ਦਿੱਤੀ ਹੈ। ਪਹਿਲਾਂ ਇਥੋਂ ਦੀ ਜ਼ਿੰਮਵਾਰੀ ਪ੍ਰਿਯੰਕਾ ਕੋਲ ਸੀ, ਹੁਣ ਪੂਰਬੀ ਯੂ. ਪੀ. ਦੇ ਕਾਂਗਰਸੀ ਵਰਕਰ ਲੱਲੂ ਨੂੰ ਜ਼ਿਆਦਾ ਗੰਭੀਰਤਾ ਨਾਲ ਨਹੀਂ ਲੈ ਰਹੇ, ਉਨ੍ਹਾਂ ਦਾ ਮੰਨਣਾ ਹੈ ਕਿ ਪ੍ਰਿਯੰਕਾ ਦਾ ਇਹ ਫੈਸਲਾ ਕਾਹਲੀ 'ਚ ਲਿਆ ਗਿਆ ਇਕ ਫੈਸਲਾ ਜਾਪਦਾ ਹੈ।
—ਤ੍ਰਿਦੀਬ ਰਮਨ (ਮਿਰਚ-ਮਸਾਲਾ)
‘ਬੰਜਰ ਮਨ’ ਪੰਜਾਬ ਵਿਚ ‘ਪ੍ਰਵਾਸੀ ਪਿਆਸ’ ਦਾ ਦਰਦ!
NEXT STORY 
