ਸਪੋਰਟਸ ਡੈਸਕ- ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ ਇੱਕ ਅਜਿਹਾ ਕਾਰਨਾਮਾ ਹੋਇਆ ਹੈ ਜਿਸ ਨੇ ਪੂਰੀ ਦੁਨੀਆ ਨੂੰ ਹੈਰਾਨ ਕਰ ਦਿੱਤਾ ਹੈ। ਬ੍ਰਾਜ਼ੀਲ ਦੀ ਤੇਜ਼ ਗੇਂਦਬਾਜ਼ ਲੌਰਾ ਕਾਰਡੋਸੋ ਨੇ ਲੇਸੋਥੋ ਦੇ ਖਿਲਾਫ ਖੇਡੇ ਗਏ ਇੱਕ ਮਹਿਲਾ ਟੀ-20 ਅੰਤਰਰਾਸ਼ਟਰੀ ਮੈਚ ਵਿੱਚ 9 ਵਿਕਟਾਂ ਲੈ ਕੇ ਨਵਾਂ ਵਿਸ਼ਵ ਰਿਕਾਰਡ ਬਣਾ ਦਿੱਤਾ ਹੈ। ਕਿਸੇ ਵੀ ਟੀ-20 ਅੰਤਰਰਾਸ਼ਟਰੀ (ਮਹਿਲਾ ਜਾਂ ਪੁਰਸ਼) ਮੈਚ ਵਿੱਚ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੀ ਉਹ ਪਹਿਲੀ ਖਿਡਾਰਨ ਬਣ ਗਈ ਹੈ।
ਸੱਜੇ ਹੱਥ ਦੀ ਤੇਜ਼ ਗੇਂਦਬਾਜ਼ ਕਾਰਡੋਸੋ ਨੇ ਆਪਣੇ 3 ਓਵਰਾਂ ਦੇ ਸਪੈੱਲ ਵਿੱਚ ਮਹਿਜ਼ 4 ਦੌੜਾਂ ਦੇ ਕੇ 9 ਵਿਕਟਾਂ ਝਟਕਾਈਆਂ। ਇਸ ਦੌਰਾਨ ਉਸ ਦੀ ਗੇਂਦਬਾਜ਼ੀ ਇੰਨੀ ਘਾਤਕ ਸੀ ਕਿ ਲੇਸੋਥੋ ਦੀ ਪੂਰੀ ਟੀਮ ਸਿਰਫ 6.2 ਓਵਰਾਂ ਵਿੱਚ 13 ਦੌੜਾਂ 'ਤੇ ਹੀ ਆਲ-ਆਊਟ ਹੋ ਗਈ।
ਕਾਰਡੋਸੋ ਨੇ ਆਪਣੇ ਸਪੈੱਲ ਦੀ ਸ਼ੁਰੂਆਤ ਦੂਜੇ ਓਵਰ ਵਿੱਚ ਕੀਤੀ ਅਤੇ ਆਉਂਦੇ ਹੀ ਬੱਲੇਬਾਜ਼ਾਂ 'ਤੇ ਦਬਾਅ ਬਣਾ ਦਿੱਤਾ। ਉਸ ਨੇ ਆਪਣੇ ਪਹਿਲੇ ਓਵਰ ਦੀਆਂ ਆਖਰੀ ਤਿੰਨ ਗੇਂਦਾਂ 'ਤੇ ਵਿਕਟਾਂ ਲੈ ਕੇ ਹੈਟ੍ਰਿਕ ਪੂਰੀ ਕੀਤੀ ਅਤੇ ਫਿਰ ਅਗਲੇ ਓਵਰ ਦੀਆਂ ਪਹਿਲੀਆਂ ਦੋ ਗੇਂਦਾਂ 'ਤੇ ਵੀ ਦੋ ਵਿਕਟਾਂ ਲਈਆਂ। ਇਸ ਤਰ੍ਹਾਂ ਉਸ ਨੇ ਲਗਾਤਾਰ 5 ਗੇਂਦਾਂ 'ਤੇ 5 ਵਿਕਟਾਂ ਝਟਕਾ ਕੇ ਇਤਿਹਾਸਕ ਪ੍ਰਦਰਸ਼ਨ ਕੀਤਾ।
ਇਸ ਤੋਂ ਪਹਿਲਾਂ ਟੀ-20 ਅੰਤਰਰਾਸ਼ਟਰੀ ਵਿੱਚ ਸਭ ਤੋਂ ਵਧੀਆ ਗੇਂਦਬਾਜ਼ੀ ਦਾ ਰਿਕਾਰਡ ਭੂਟਾਨ ਦੇ ਸੋਮਨ ਯੇਸ਼ੇ ਦੇ ਨਾਮ ਸੀ, ਜਿਸ ਨੇ 2025 ਵਿੱਚ 8 ਵਿਕਟਾਂ ਲਈਆਂ ਸਨ। ਮਹਿਲਾ ਕ੍ਰਿਕਟ ਵਿੱਚ ਇਹ ਰਿਕਾਰਡ ਇੰਡੋਨੇਸ਼ੀਆ ਦੀ ਆਰ. ਰੋਹਮਲੀਆ ਦੇ ਨਾਮ ਸੀ, ਜਿਸ ਨੇ ਬਿਨਾਂ ਕੋਈ ਦੌੜ ਦਿੱਤੇ 7 ਵਿਕਟਾਂ ਲਈਆਂ ਸਨ। ਕਾਰਡੋਸੋ ਦੇ 9 ਵਿਕਟਾਂ ਦੇ ਇਸ ਪ੍ਰਦਰਸ਼ਨ ਨੇ ਹੁਣ ਨਵੇਂ ਮਾਪਦੰਡ ਸਥਾਪਿਤ ਕੀਤੇ ਹਨ।
9 ਅਪ੍ਰੈਲ 2026 ਨੂੰ ਖੇਡੇ ਗਏ ਇਸ ਮੈਚ ਵਿੱਚ ਬ੍ਰਾਜ਼ੀਲ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 8 ਵਿਕਟਾਂ 'ਤੇ 202 ਦੌੜਾਂ ਬਣਾਈਆਂ ਸਨ। ਮੋਨਨੀਕੇ ਮਚਾਡੋ ਨੇ 41 ਗੇਂਦਾਂ ਵਿੱਚ ਸ਼ਾਨਦਾਰ 69 ਦੌੜਾਂ ਦੀ ਪਾਰੀ ਖੇਡੀ। ਲੌਰਾ ਕਾਰਡੋਸੋ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੀ ਬਦੌਲਤ ਬ੍ਰਾਜ਼ੀਲ ਨੇ ਇਹ ਮੈਚ 189 ਦੌੜਾਂ ਦੇ ਵੱਡੇ ਫਰਕ ਨਾਲ ਜਿੱਤ ਲਿਆ।
ਦਿੱਗਜ ਭਾਰਤੀ ਖਿਡਾਰੀ ਦਾ ਹੋਇਆ ਦੇਹਾਂਤ, ਕ੍ਰਿਕਟ ਜਗਤ 'ਚ ਸੋਗ ਦੀ ਲਹਿਰ
NEXT STORY 
