ਮੋਹਾਲੀ- ਮੋਹਾਲੀ ਵਿਖੇ ਚੱਲ ਰਹੇ ਸ਼ੇਰ-ਏ-ਪੰਜਾਬ ਟੀ-20 ਕੱਪ ਵਿੱਚ ਸੋਮਵਾਰ ਨੂੰ ਇੱਕ ਵੱਡਾ ਅਤੇ ਬੇਹੱਦ ਰੋਮਾਂਚਕ ਮੁਕਾਬਲਾ ਖੇਡਿਆ ਜਾਵੇਗਾ, ਜਿੱਥੇ ਭਾਰਤੀ ਕ੍ਰਿਕਟ ਦੇ ਦੋ ਵੱਡੇ ਸਿਤਾਰੇ—ਅਭਿਸ਼ੇਕ ਸ਼ਰਮਾ ਅਤੇ ਸ਼ੁਭਮਨ ਗਿੱਲ—ਆਹਮੋ-ਸਾਹਮਣੇ ਹੋਣਗੇ। ਮੋਹਾਲੀ ਦੇ ਆਈ.ਐੱਸ. ਬਿੰਦਰਾ ਸਟੇਡੀਅਮ ਵਿੱਚ ਖੇਡੇ ਜਾਣ ਵਾਲੇ ਇਸ ਮੈਚ ਵਿੱਚ ਅੰਮ੍ਰਿਤਸਰ ਸੂਰਮਾਜ਼ ਦਾ ਸਾਹਮਣਾ ਫਾਜ਼ਿਲਕਾ ਫਾਲਕਨਜ਼ ਨਾਲ ਹੋਵੇਗਾ।
ਜਿੱਤ ਦੀ ਪਟੜੀ 'ਤੇ ਵਾਪਸੀ ਕਰਨ ਦੇ ਇਰਾਦੇ ਨਾਲ ਮੈਦਾਨ 'ਤੇ ਉਤਰ ਰਹੀ ਅੰਮ੍ਰਿਤਸਰ ਸੂਰਮਾਜ਼ ਦੀ ਟੀਮ ਲਈ ਇਸ ਮੁਕਾਬਲੇ ਨੂੰ ਪੂਰੇ ਟੂਰਨਾਮੈਂਟ ਦੇ ਸਭ ਤੋਂ ਵੱਡੇ ਆਕਰਸ਼ਣਾਂ ਵਿੱਚੋਂ ਇੱਕ ਮੰਨਿਆ ਜਾ ਰਿਹਾ ਹੈ। ਇਸ ਮੈਚ ਦੌਰਾਨ ਸਭ ਦੀਆਂ ਨਜ਼ਰਾਂ ਅੰਮ੍ਰਿਤਸਰ ਦੇ ਕਪਤਾਨ ਅਭਿਸ਼ੇਕ ਸ਼ਰਮਾ 'ਤੇ ਹੋਣਗੀਆਂ, ਜਿਨ੍ਹਾਂ ਦੀ ਨਿਡਰ ਬੱਲੇਬਾਜ਼ੀ ਕੁਝ ਹੀ ਓਵਰਾਂ ਵਿੱਚ ਮੈਚ ਦਾ ਪਾਸਾ ਪਲਟਣ ਦਾ ਦਮ ਰੱਖਦੀ ਹੈ। ਉਨ੍ਹਾਂ ਦੇ ਨਾਲ ਨਮਨ ਧੀਰ ਆਪਣੀ ਹਮਲਾਵਰ ਬੱਲੇਬਾਜ਼ੀ ਨੂੰ ਜਾਰੀ ਰੱਖਣਾ ਚਾਹੁਣਗੇ, ਜਦਕਿ ਮੱਧਕ੍ਰਮ ਵਿੱਚ ਪਾਰੀ ਨੂੰ ਸੰਭਾਲਣ ਅਤੇ ਅੰਤ ਵਿੱਚ ਤੇਜ਼ ਦੌੜਾਂ ਜੋੜਨ ਦੀ ਜ਼ਿੰਮੇਵਾਰੀ ਅਭੇ ਚੌਧਰੀ ਅਤੇ ਰਾਹੁਲ ਕੁਮਾਰ 'ਤੇ ਹੋਵੇਗੀ। ਇਸ ਤੋਂ ਇਲਾਵਾ, ਸਾਹਜ ਧਵਨ ਅਤੇ ਜਸ਼ਨਪ੍ਰੀਤ ਸਿੰਘ ਸਿੱਧੂ ਤੋਂ ਵੀ ਟੀਮ ਨੂੰ ਅਹਿਮ ਯੋਗਦਾਨ ਦੀ ਉਮੀਦ ਰਹੇਗੀ। ਗੇਂਦਬਾਜ਼ੀ ਵਿੱਚ ਅੰਮ੍ਰਿਤਸਰ ਦੀ ਟੀਮ ਆਕਾਸ਼ ਪਾਂਡੇ ਅਤੇ ਮਯੰਕ ਮਾਰਕੰਡੇ ਤੋਂ ਮੱਧ ਓਵਰਾਂ ਵਿੱਚ ਦਬਾਅ ਬਣਾਉਣ ਅਤੇ ਫਾਜ਼ਿਲਕਾ ਦੇ ਬੱਲੇਬਾਜ਼ਾਂ ਨੂੰ ਖੁੱਲ੍ਹ ਕੇ ਖੇਡਣ ਤੋਂ ਰੋਕਣ ਦੀ ਉਮੀਦ ਕਰੇਗੀ।
ਦੂਜੇ ਪਾਸੇ, ਫਾਜ਼ਿਲਕਾ ਫਾਲਕਨਜ਼ ਦੀ ਟੀਮ ਕੋਲ ਵੀ ਭਾਰਤੀ ਟੈਸਟ ਅਤੇ ਵਨਡੇ ਕਪਤਾਨ ਸ਼ੁਭਮਨ ਗਿੱਲ ਦੀ ਅਗਵਾਈ ਵਿੱਚ ਇੱਕ ਬੇਹੱਦ ਮਜ਼ਬੂਤ ਟੀਮ ਮੌਜੂਦ ਹੈ। ਸਨਵੀਰ ਸਿੰਘ, ਰਘੂ ਸ਼ਰਮਾ, ਅੰਸ਼ੁਲ ਚੌਧਰੀ, ਈਸ਼ ਰਾਓ ਅਤੇ ਪ੍ਰੇਰਿਤ ਦੱਤਾ ਵਰਗੇ ਖਿਡਾਰੀ ਉਨ੍ਹਾਂ ਦੀ ਬੱਲੇਬਾਜ਼ੀ ਨੂੰ ਹੋਰ ਵੀ ਡੂੰਘਾਈ ਦਿੰਦੇ ਹਨ, ਜਿਸ ਕਾਰਨ ਸੋਮਵਾਰ ਦਾ ਇਹ ਮੁਕਾਬਲਾ ਦੋਵਾਂ ਸਟਾਰ ਖਿਡਾਰੀਆਂ ਦੀਆਂ ਟੀਮਾਂ ਵਿਚਕਾਰ ਇੱਕ ਰੋਮਾਂਚਕ ਜੰਗ ਬਣਨ ਜਾ ਰਿਹਾ ਹੈ। ਅੰਮ੍ਰਿਤਸਰ ਸੂਰਮਾਜ਼ ਦੀ ਟੀਮ ਇਸ ਮੈਚ ਵਿੱਚ ਉਤਰਨ ਤੋਂ ਪਹਿਲਾਂ ਬਠਿੰਡਾ ਰਾਇਲਜ਼ ਵਿਰੁੱਧ ਬਾਰਿਸ਼ ਨਾਲ ਪ੍ਰਭਾਵਿਤ 11-11 ਓਵਰਾਂ ਦੇ ਮੈਚ ਵਿੱਚ 8 ਵਿਕਟਾਂ ਦੀ ਹਾਰ ਦਾ ਸਾਹਮਣਾ ਕਰ ਚੁੱਕੀ ਹੈ। ਅਜਿਹੇ ਵਿੱਚ, ਟੀਮ ਆਪਣੀ ਸਕਾਰਾਤਮਕ ਸੋਚ ਨਾਲ ਜਿੱਤ ਦਰਜ ਕਰਕੇ ਟੂਰਨਾਮੈਂਟ ਵਿੱਚ ਆਪਣੀ ਸਥਿਤੀ ਨੂੰ ਹੋਰ ਮਜ਼ਬੂਤ ਕਰਨ ਦੇ ਇਰਾਦੇ ਨਾਲ ਮੈਦਾਨ ਵਿੱਚ ਨਿੱਤਰੇਗੀ।
ਸੇਰੁੰਡੋਲੋ ਨੇ ਟੇਲਰ ਫ੍ਰਿਟਜ਼ ਨੂੰ ਹਰਾ ਕੇ ਯੂਐਸ ਓਪਨ ਤੋਂ ਕੀਤਾ ਬਾਹਰ
NEXT STORY 
