ਜਲੰਧਰ : ਪ੍ਰਦੂਸ਼ਣ ਦੀ ਸਮੱਸਿਆ ਨੂੰ ਦੇਖਦੇ ਹੋਏ ਦੁਨੀਆ ਭਰ ਦੀਆਂ ਇਲੈਕਟ੍ਰਿਕ ਵਾਹਨ ਨਿਰਮਾਤਾ ਕੰਪਨੀਆਂ ਨੇ ਆਪਣੇ ਵਾਹਨਾਂ ਨੂੰ ਹੋਰ ਬਿਹਤਰ ਤੇ ਤੇਜ਼ ਬਣਾਉਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਹੁਣੇ ਜਿਹੇ ਟੈਸਲਾ ਨੇ ਆਪਣੀ ਤੇਜ਼ ਤੇ ਇਕ ਚਾਰਜ 'ਚ 1000 ਕਿਲੋਮੀਟਰ ਤੱਕ ਚੱਲਣ ਵਾਲੀ ਰੋਡਸਟਰ ਦਾ ਖੁਲਾਸਾ ਕੀਤਾ ਹੈ। ਹੁਣ ਤਾਈਵਾਨ ਦੀ ਰਾਜਧਾਨੀ ਤਾਈਪੇ ਦੀ ਇਲੈਕਟ੍ਰਿਕ ਰੇਸਿੰਗ ਕਾਰ ਨਿਰਮਾਤਾ ਕੰਪਨੀ ਨੇ ਇਕ ਅਜਿਹੀ ਕਾਰ ਵਿਕਸਿਤ ਕੀਤੀ ਹੈ ਜੋ 1,000 ਕਿਲੋਵਾਟ (ਲਗਭਗ 1,341 hp) ਦੀ ਪਾਵਰ ਪੈਦਾ ਕਰੇਗੀ ਅਤੇ ਸਿਰਫ 1.8 ਸੈਕੰਡ 'ਚ ਹੀ 0 ਤੋਂ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ਫੜ ਲਵੇਗੀ। ਇਸ ਮਿਸ R ਸੁਪਰਕਾਰ ਨੂੰ ਸ਼ਿੰਗ ਮੋਬਿਲਿਟੀ ਨਾਂ ਦੀ ਕੰਪਨੀ ਨੇ ਬਣਾਇਆ ਹੈ।
ਕੰਪਨੀ ਮੁਤਾਬਕ ਇਸ ਇਲੈਕਟ੍ਰਿਕ ਸੁਪਰ ਕਾਰ ਨੂੰ ਖਾਸ ਤੌਰ 'ਤੇ ਲੋਕਾਂ ਦੇ ਦਿਲਾਂ 'ਚੋਂ ਇਸ ਵਹਿਮ ਨੂੰ ਦੂਰ ਕਰਨ ਲਈ ਬਣਾਇਆ ਗਿਆ ਹੈ ਕਿ ਇਲੈਕਟ੍ਰਿਕ ਵਾਹਨ ਤੇਜ਼ ਨਹੀਂ ਚੱਲ ਸਕਦੇ। ਇਸ ਕਾਰ ਨੂੰ ਟੈਸਲਾ ਦੀ 1.89 ਸੈਕੰਡ ਵਿਚ 0 ਤੋਂ 60 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਸਪੀਡ ਫੜਨ ਵਾਲੀ ਨਵੀਂ ਰੋਡਸਟਰ ਤੋਂ ਵੀ ਤੇਜ਼ ਮੰਨਿਆ ਜਾ ਰਿਹਾ ਹੈ। ਕੰਪਨੀ ਫਿਲਹਾਲ ਇਸ ਇਲੈਕਟ੍ਰਿਕ ਆਨ ਰੋਡ/ਆਫ ਰੋਡ ਸੁਪਰਕਾਰ 'ਤੇ ਟੈਸਟ ਕਰ ਰਹੀ ਹੈ ਪਰ ਇਸ ਦੇ ਪ੍ਰੋਟੋਟਾਈਪ ਦੀਆਂ ਤਸਵੀਰਾਂ ਜਾਰੀ ਕਰ ਦਿੱਤੀਆਂ ਗਈਆਂ ਹਨ, ਜਿਸ ਨੂੰ ਸਾਲ 2018 ਤੱਕ ਪੂਰੀ ਤਰ੍ਹਾਂ ਬਣਾ ਕੇ ਤਿਆਰ ਕੀਤਾ ਜਾਵੇਗਾ।
300 km/h ਦੀ ਟੌਪ ਸਪੀਡ
ਇਸ ਇਲੈਕਟ੍ਰਿਕ ਸੁਪਰਕਾਰ ਨੂੰ 300 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਟੌਪ ਸਪੀਡ ਤੱਕ ਪਹੁੰਚਾਇਆ ਜਾ ਸਕਦਾ ਹੈ। ਕੰਪਨੀ ਨੇ ਜਾਣਕਾਰੀ ਦਿੱਤੀ ਹੈ ਕਿ 200 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਟੌਪ ਸਪੀਡ ਫੜਨ 'ਚ ਇਹ ਕਾਰ ਸਿਰਫ 5.1 ਸੈਕੰਡ ਦਾ ਹੀ ਸਮਾਂ ਲਵੇਗੀ ਜੋ ਇਕ ਪੈਟਰੋਲ ਜਾਂ ਡੀਜ਼ਲ ਨਾਲ ਚੱਲਣ ਵਾਲੀ ਕਾਰ ਤੋਂ ਕਿਤੇ ਵੱਧ ਹੈ।
ਕਾਰ 'ਚ ਲਾਇਆ ਗਿਆ ਲਿਕਵਿਡ ਕੂਲਿੰਗ ਸਿਸਟਮ
ਇਸ ਮਿਸ R ਕਾਰ ਨੂੰ ਬਣਾਉਣ 'ਚ ਕੰਪਨੀ ਦੇ ਸਾਹਮਣੇ ਸਭ ਤੋਂ ਵੱਡੀ ਚੁਣੌਤੀ ਇਹ ਸੀ ਕਿ ਇੰਨੀ ਤੇਜ਼ ਸਪੀਡ ਨਾਲ ਕਾਰ ਚਲਾਉਣ 'ਤੇ ਇਸ ਦੇ ਪਾਰਟਸ ਗਰਮ ਨਾ ਹੋਣ। ਇਸੇ ਗੱਲ 'ਤੇ ਧਿਆਨ ਦਿੰਦਿਆਂ ਸ਼ਿੰਗ ਮੋਬਿਲਿਟੀ ਨੇ ਇਸ ਦੇ ਬੈਟਰੀ ਪੈਕਸ ਨੂੰ ਸੇਫ ਗਾਰਡ ਕਰਨ ਲਈ ਯੂਨਿਕ ਲਿਕਵਿਡ ਕੂਲਿੰਗ ਸਿਸਟਮ ਲਾਇਆ ਹੈ। ਕੰਪਨੀ ਨੇ ਵੱਖ-ਵੱਖ ਮਾਡਿਊਲਸ ਬਣਾਏ, ਜਿਨ੍ਹਾਂ ਵਿਚ 42 ਲਿਥੀਅਮ ਆਇਨ ਸੈੱਲਜ਼ ਲਾਏ ਗਏ ਅਤੇ ਕੁਲ ਮਿਲਾ ਕੇ 98 ਮਾਡਿਊਲਸ ਨੂੰ ਕਾਰ 'ਚ ਲਾਇਆ ਗਿਆ ਹੈ ਮਤਲਬ 4,116 ਸੈੱਲਜ਼ ਇਸ ਕਾਰ ਨੂੰ ਕੰਮ ਕਰਨ ਲਈ ਇਕੱਠੇ ਪਾਵਰ ਦੇਣਗੇ। ਇਨ੍ਹਾਂ ਮਾਡਿਊਲਸ 'ਚ 3M's Novec 7200 ਇੰਜੀਨੀਅਰਿੰਗ ਫਲੂਡ ਘੁੰਮੇਗਾ ਜੋ ਇਨ੍ਹਾਂ ਨੂੰ ਗਰਮ ਨਹੀਂ ਹੋਣ ਦੇਵੇਗਾ ਤੇ ਅੱਗ ਲੱਗਣ ਤੋਂ ਵੀ ਬੈਟਰੀਆਂ ਨੂੰ ਬਚਾਏਗਾ।
5 ਮਿੰਟ 'ਚ ਬਦਲੀਆਂ ਜਾ ਸਕਦੀਆਂ ਹਨ ਬੈਟਰੀਆਂ
ਇਸ ਇਲੈਕਟ੍ਰਿਕ ਸੁਪਰ ਕਾਰ ਦੀ ਰੇਂਜ ਨੂੰ ਟੈਸਲਾ ਦੀ ਨਵੀਂ ਰੋਡਸਟਰ (1000 ਕਿਲੋਮੀਟਰ) ਤੋਂ ਘੱਟ ਕਿਹਾ ਗਿਆ ਹੈ ਪਰ ਕੰਪਨੀ ਨੇ ਦੱਸਿਆ ਹੈ ਕਿ ਸਿਰਫ 5 ਮਿੰਟ 'ਚ ਇਸ ਵਿਚ ਲਾਈਆਂ ਗਈਆਂ ਸਾਰੀਆਂ ਬੈਟਰੀਆਂ ਨੂੰ ਫੁਲ ਚਾਰਜ ਬੈਟਰੀਆਂ ਦੇ ਨਾਲ ਬਦਲਿਆ ਜਾ ਸਕਦਾ ਹੈ, ਜਿਸ ਨਾਲ ਇਸ ਦੀ ਰੇਂਜ ਨੂੰ ਹੋਰ ਵੀ ਵਧਾਇਆ ਜਾ ਸਕੇਗਾ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਸਾਲ 2019 ਤੱਕ ਇਸ ਦੀ ਪ੍ਰੋਡਕਸ਼ਨ ਸ਼ੁਰੂ ਹੋ ਜਾਏਗੀ ਅਤੇ ਇਸ ਨੂੰ 1 ਮਿਲੀਅਨ ਡਾਲਰ ਦੀ ਕੀਮਤ 'ਚ ਮੁਹੱਈਆ ਕੀਤਾ ਜਾਵੇਗਾ।
ਹੁਣ ਵਨਪਲਸ 5 'ਚ ਵੀ ਸ਼ਾਮਿਲ ਹੋ ਸਕਦੈ ਵਨਪਲਸ 5ਟੀ ਸਮਾਰਟਫੋਨ ਦਾ ਇਹ ਖਾਸ ਫੀਚਰ !
NEXT STORY 
