ਆਕਾਰ ਪਟੇਲ
ਭੀਮਾ ਕੋਰੇਗਾਂਵ ਮਾਮਲੇ ’ਚ ਜ਼ਮਾਨਤ ਰੱਦ ਹੋ ਜਾਣ ਦੇ ਬਾਅਦ ਸਟੇਨ ਸਵਾਮੀ ਜਿਨ੍ਹਾਂ ਦੀ ਕੁਝ ਦਿਨ ਪਹਿਲਾਂ ਮੌਤ ਹੋ ਗਈ, ਇਕ ਤਮਿਲ ਪਾਦਰੀ ਸਨ ਜਿਨ੍ਹਾਂ ਨੇ ਦਹਾਕਿਆਂ ਤੱਕ ਝਾਰਖੰਡ ’ਚ ਆਦੀਵਾਸੀਆਂ ਦੇ ਨਾਲ ਕੰਮ ਕੀਤਾ। ਉਸ ਤੋਂ ਪਹਿਲਾਂ ਸਟੇਨ ਬੈਂਗਲੁਰੂ ’ਚ ਇੰਡੀਅਨ ਸੋਸ਼ਲ ਇੰਸਟੀਚਿਊਟ ’ਚ ਇਕ ਡਾਇਰੈਕਟਰ ਸਨ। ਇਸ ਕਾਰਨ ਇਕ ਘਟਨਾ ਲਈ ਉਹ ਪੁਣੇ ’ਚ ਕਿਉਂ ਜੇਲ ’ਚ ਰਹੇ?
ਭੀਮਾ ਕੋਰੇਗਾਂਵ ਮਾਮਲਾ ਪੰਜ ਵੱਖ-ਵੱਖ ਅਤੇ ਗੈਰ-ਸਬੰਧਤ ਚੀਜ਼ਾਂ ਦਾ ਮਾਮਲਾ ਹੈ। ਪਹਿਲੀ ਘਟਨਾ ਨੂੰ ਐਲਗਰ (ਜਾਂ ਯਲਗਾਰ ਜਿਸ ਦਾ ਅਰਥ ਜੰਗ ’ਚ ਉੱਚੀ-ਉੱਚੀ ਚੀਕਣਾ ਹੈ) ਪ੍ਰੀਸ਼ਦ ਹੈ ਜੋ 31 ਦਸੰਬਰ 2017 ਨੂੰ ਪੁਣੇ ’ਚ ਵਾਪਰੀ। ਸਭਾ ’ਚ ਬੋਲਣ ਵਾਲਿਆਂ ’ਚ ਹਾਈ ਕੋਰਟ ਦੇ ਸਾਬਕਾ ਜੱਜ ਬੀ. ਜੀ. ਕੋਲਸੇ-ਪਾਟਿਲ ਅਤੇ ਸੁਪਰੀਮ ਕੋਰਟ ਦੇ ਸਾਬਕਾ ਜੱਜ ਪੀ. ਬੀ. ਸਾਵੰਤ ਸ਼ਾਮਲ ਸਨ। ਓਧਰ ਗੁਜਰਾਤ ਤੋਂ ਆਜ਼ਾਦ ਵਿਧਾਇਕ ਜਿਗਨੇਸ਼ ਮਿਵਾਨੀ ਅਤੇ ਜੇ. ਐੱਨ. ਯੂ. ਤੋਂ ਵਰਕਰ ਉਮਰ ਖਾਲਿਦ ਨੇ ਵੀ ਭਾਸ਼ਣ ਦਿੱਤਾ। ਕਬੀਰ ਕਲਾ ਮੰਚ ਦੇ ਮੈਂਬਰਾਂ ਜੋ ਕਿ ਕਲਾਕਾਰ-ਵਰਕਰ ਵੀ ਹਨ, ਨੇ ਵੀ ਹਿੱਸਾ ਲਿਆ।
ਦੂਸਰੀ ਘਟਨਾ ਅਗਲੇ ਦਿਨ 1 ਜਨਵਰੀ 2018 ਨੂੰ ਹੋਈ। ਇਸ ਦਿਨ ਕੋਰੇਗਾਂਵ ਭੀਮਾ ਜੰਗ ਦੀ 200ਵੀਂ ਵਰ੍ਹੇਗੰਢ ਮਨਾਈ ਗਈ ਜੋ 11 ਜਨਵਰੀ 1818 ਨੂੰ ਭੀਮਾ ਨਦੀ ’ਤੇ ਪੁਣੇ ਦੇ ਉਪ ਨਗਰ ’ਚ ਹੋਈ। ਬ੍ਰਿਟਿਸ਼ ਨੇ ਮਰਾਠਾ ਸਾਮਰਾਜ ਦੇ ਬਾਕੀ ਹਿੱਸੇ ਨੂੰ ਹਰਾਇਆ। ਬ੍ਰਿਟਿਸ਼ ਵੱਲੋਂ ਕਈ ਦਲਿਤ ਮਾਹਿਰ ਫੌਜੀਆਂ ਨੇ ਹਿੱਸਾ ਲਿਆ ਜਿਨ੍ਹਾਂ ਨੇ ਬ੍ਰਾਹਮਣ ਪੇਸ਼ਵਾ ਦੀ ਅਗਵਾਈ ਵਾਲੀ ਇਕ ਵਿਸ਼ਾਲ ਫੌਜ ਨੂੰ ਪਛਾੜਿਆ।
1927 ਤੋਂ ਲੈ ਕੇ ਜਦੋਂ ਡਾ. ਬੀ. ਆਰ. ਅੰਬੇਡਕਰ ਨੇ ਇਸ ਜੰਗ ਦੀ ਜਿੱਤ ’ਤੇ ਬੋਲਣ ਲਈ ਪਿੰਡ ਦੀ ਯਾਤਰਾ ਕੀਤੀ ਤਾਂ ਹਜ਼ਾਰਾਂ ਦੀ ਗਿਣਤੀ ’ਚ ਦਲਿਤ ਕੋਰੇਗਾਂਵ ਭੀਮਾ ਪਹੁੰਚੇ। ਇਸ ਤਹਿਤ ਹਰੇਕ ਸਾਲ ਲੋਕ ਇਕੱਠੇ ਹੁੰਦੇ ਹਨ ਅਤੇ ਯਾਦਗਾਰੀ ਥੰਮ੍ਹ ਨੂੰ ਇੱਥੇ ਸਥਾਪਿਤ ਕੀਤਾ ਜਾਂਦਾ ਹੈ ਪਰ 2018 ’ਚ ਵਧੁ ਬੁਧਰਕ ਦੇ ਗੁਆਂਢੀ ਪਿੰਡ ’ਚ ਘਟਨਾਵਾਂ ਕਾਰਨ ਉਸ ਸਮੇਂ ਤਣਾਅ ਵੱਧ ਗਿਆ। ਇਹ ਇਸ ਕਾਰਨ ਵੀ ਸੀ ਕਿ 1689 ਨੂੰ ਕੋਰੇਗਾਂਵ ਭੀਮਾ ਦੇ ਨੇੜੇ ਮੁਗਲ ਸਮਰਾਟ ਔਰੰਗਜ਼ੇਬ ਵੱਲੋਂ ਸ਼ਿਵਾਜੀ ਦੇ ਬੇਟੇ ਸੰਭਾ ਜੀ ਦੇ ਮਾਰੇ ਜਾਣ ਦੇ ਬਾਅਦ ਸਸਕਾਰ ਕੌਣ ਕਰੇ?
ਮਾਹਿਰ ਦਾ ਦਾਅਵਾ ਹੈ ਕਿ ਉਨ੍ਹਾਂ ’ਚੋਂ ਕਿਸੇ ਨੇ ਸੰਭਾ ਜੀ ਦਾ ਸਸਕਾਰ ਕੀਤਾ ਸੀ। ਗੋਪਾਲ ਗੋਵਿੰਦ ਨੇ ਔਰੰਗਜ਼ੇਬ ਦੇ ਹੁਕਮਾਂ ਦੀ ਅਣਦੇਖੀ ਕਰ ਕੇ ਮਰਾਠਾ ਦਾ ਸਸਕਾਰ ਕੀਤਾ ਸੀ। ਇਸੇ ਗੱਲ ਨੇ ਮਰਾਠਿਆਂ ਨੂੰ ਜ਼ਲੀਲ ਕੀਤਾ ਜਿਨ੍ਹਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਦੇ ਭਾਈਚਾਰੇ ਦੇ ਦੋ ਵਿਅਕਤੀਆਂ ਨੇ ਅੰਤਿਮ ਸੰਸਕਾਰ ਕੀਤਾ। ਵਧੁ ਬੁਧਰਕ ’ਚ ਗੋਵਿੰਦ ਦੀ ਵੀ ਸਮਾਧੀ ਹੈ ਜੋ ਉਸੇ ਤਰ੍ਹਾਂ ਸੰਭਾ ਜੀ ਦੀ ਵੀ ਹੈ ਜੋ ਇਕ ਹੀ ਪਿੰਡ ’ਚ ਸਥਿਤ ਹੈ।
28 ਦਸੰਬਰ ਨੂੰ ਗੋਵਿਦ ਦੀ ਸਮਾਧੀ ’ਤੇ ਇਕ ਬੋਰਡ ਲਗਾ ਦਿੱਤਾ ਗਿਆ। ਅਗਲੇ ਹੀ ਦਿਨ ਗੋਵਿੰਦ ਦੀ ਸਮਾਧੀ ਨੂੰ ਅਪਵਿੱਤਰ ਕੀਤਾ ਗਿਆ। ਬੋਰਡ ਹਟਾ ਦਿੱਤਾ ਗਿਆ ਅਤੇ ਸਮਾਧੀ ਉਪਰ ਬਣੇ ਛਤਰ ਦੇ ਢਾਂਚੇ ਨੂੰ ਨੁਕਸਾਨ ਪਹੁੰਚਾਇਆ ਗਿਆ। ਅਨੁਸੂਚਿਤ ਜਾਤੀ/ਅਨੁਸੂਚਿਤ ਜਨਜਾਤੀ ਐਕਟ ਤਹਿਤ ਦਲਿਤਾਂ ਵੱਲੋਂ ਇਕ ਸ਼ਿਕਾਇਤ ਦਰਜ ਕਰਵਾਈ ਗਈ। ਕੋਰੇਗਾਂਵ ਭੀਮਾ ਦੀ ਪੰਚਾਇਤ ਨੇ ਆਪਣੇ ਵਸਨੀਕਾਂ ਨੂੰ 1 ਜਨਵਰੀ ਦੇ ਸਮਾਗਮਾਂ ਦਾ ਬਾਈਕਾਟ ਕਰਨ ਲਈ ਕਿਹਾ ਅਤੇ ਸਾਰੀਆਂ ਦੁਕਾਨਾਂ ਨੂੰ ਬੰਦ ਰੱਖਣ ਦਾ ਹੁਕਮ ਦਿੱਤਾ। ਉਸੇ ਸਵੇਰ ਦਲਿਤਾਂ ਦਰਮਿਆਨ ਹਿੰਸਾ ਭੜਕ ਉੱਠੀ ਜਿਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ’ਤੇ ਭਗਵਾ ਝੰਡੇ ਵਾਲੇ ਲੋਕਾਂ ਅਤੇ ਸਥਾਨਕ ਮਰਾਠਿਆਂ ਨੇ ਹਮਲਾ ਕੀਤਾ। ਇਕ ਮਰਾਠਾ ਦੀ ਹੱਤਿਆ ਹੋਈ। ਇਹ ਹਿੰਸਾ ਪੱਛਮੀ ਮਹਾਰਾਸ਼ਟਰ ਦੇ ਹੋਰਨਾਂ ਹਿੱਸਿਆਂ ’ਚ ਵੀ ਫੈਲ ਗਈ। ਕੁਝ ਬੱਚਿਆਂ ਸਮੇਤ 300 ਦਲਿਤਾਂ ਨੂੰ ਮੁੰਬਈ ਪੁਲਸ ਵੱਲੋਂ ਗ੍ਰਿਫਤਾਰ ਕੀਤਾ ਗਿਆ।
ਤੀਸਰੀ ਘਟਨਾ ਦੇ ਰੂਪ ’ਚ ਪੁਲਸ ਕੋਲ ਇਕ ਸ਼ਿਕਾਇਤ ਸੀ ਜਿਸ ਨੂੰ ਕੁਝ ਹੀ ਦਿਨਾਂ ਬਾਅਦ ਦਰਜ ਕੀਤਾ ਗਿਆ। ਇਸ ਸ਼ਿਕਾਇਤ ਨੂੰ ਇਕ ਵਿਅਕਤੀ ਨੇ ਦਰਜ ਕਰਵਾਇਆ ਜਿਸ ਅਨੁਸਾਰ ਐਲਗਰ ਪ੍ਰੀਸ਼ਦ ਦਾ ਏਜੰਡਾ ਦਲਿਤ ਭਾਈਚਾਰੇ ਨੂੰ ਭਰਮਾਉਣਾ ਸੀ। ਉਨ੍ਹਾਂ ’ਚ ਇਹ ਭਰਮ ਪਾਉਣਾ ਸੀ ਕਿ ਉਨ੍ਹਾਂ ਨੂੰ ਮਾਓਵਾਦੀ ਵਿਚਾਰਾਂ ’ਚ ਬਦਲਿਆ ਜਾ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਹਿੰਸਾ ਦੇ ਰਾਹ ’ਤੇ ਲਿਜਾਇਆ ਜਾ ਰਿਹਾ ਹੈ। ਇਹ ਸਭ ਕੁਝ ਉਨ੍ਹਾਂ ਦੇ ਪ੍ਰਕਾਸ਼ਨ, ਕਿਤਾਬਾਂ ਅਤੇ ਭਾਸ਼ਣਾਂ ਜ਼ਰੀਏ ਕੀਤਾ ਗਿਆ। ਸਮਾਜ ’ਚ ਇਸ ਨਾਲ ਵੈਰ ਵਧਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ। ਸ਼ਿਕਾਇਤ ਦਰਜ ਕਰਵਾਉਣ ਵਾਲੇ ਵਿਅਕਤੀ ਤੁਸ਼ਾਰ ਦਾਮਗੁਡੇ ਨੇ ਕਿਹਾ ਕਿ ਉਸ ਨੇ ਆਪਣੇ ਹਿੰਦੂਤਵ ਲਈ ਇਕ ਸਾਧਾਰਨ ਕਾਨੂੰਨ ਅਪਣਾਇਆ। ਅਸੀਂ ਉਹੀ ਚੀਜ਼ਾਂ ਰੱਖਾਂਗੇ ਜੋ ਹਿੰਦੂਆਂ ਲਈ ਮਦਦਗਾਰ ਹਨ ਅਤੇ ਬਾਕੀ ਦੀਆਂ ਚੀਜ਼ਾਂ ਨੂੰ ਤਿਆਗ ਦਿੱਤਾ ਜਾਵੇਗਾ।
ਇਸੇ ਸ਼ਿਕਾਇਤ ਦੇ ਆਧਾਰ ’ਤੇ ਪੁਲਸ ਨੇ ਵਰਕਰਾਂ ਨੂੰ ਗ੍ਰਿਫਤਾਰ ਕਰਨਾ ਸ਼ੁਰੂ ਕੀਤਾ ਜਿਨ੍ਹਾਂ ਦਾ ਇਸ ਦੇ ਨਾਲ ਕੋਈ ਸਬੰਧ ਹੀ ਨਹੀਂ ਸੀ ਅਤੇ ਨਾ ਹੀ ਭੀਮਾ ਕੋਰੇਗਾਂਵ ’ਤੇ ਉਹ ਹਾਜ਼ਰ ਸਨ।
ਚੌਥੀ ਘਟਨਾ ਇਕ ਰਿਪੋਰਟ ਨੂੰ ਲੈ ਕੇ ਹੈ ਜਿਸ ਨੂੰ ਆਰ. ਐੱਸ. ਐੱਸ. ਸੰਗਠਨ ਫੋਰਮ ਫਾਰ ਇੰਟੈਗ੍ਰੇਟਿਡ ਨੈਸ਼ਨਲ ਸਕਿਓਰਿਟੀ ਵੱਲੋਂ ਪੇਸ਼ ਕੀਤਾ ਗਿਆ ਜਿਸ ਦੇ ਜਨਰਲ ਸਕੱਤਰ ਸੇਸ਼ਾਧਰੀ ਚਾਰੀ ਸਨ ਜੋ ਕਿ ਭਾਜਪਾ ਦੀ ਰਾਸ਼ਟਰੀ ਕਾਰਜਕਾਰਨੀ ਕਮੇਟੀ ’ਚ ਸ਼ਾਮਲ ਸਨ। ਇਸ ਰਿਪੋਰਟ ਅਨੁਸਾਰ ਵਿਸ਼ਾਲ ਸੰਗਠਨ ’ਚ ਸ਼ਾਮਲ ਹੋਣ ਲਈ ਲੋਕਾਂ ਨੂੰ ਲੁਭਾਉਣ ਲਈ ਮਾਓਵਾਦੀ ਨੀਤੀ ਅਪਣਾਈ ਗਈ ਜੋ ਕਿ ਜਾਤੀ, ਨਿਆਂ ਅਤੇ ਬਰਾਬਰੀ ਦੇ ਮੁੱਦਿਆਂ ’ਤੇ ਆਧਾਰਿਤ ਸੀ। ਸਰਕਾਰ ਵਿਰੁੱਧ ਹਥਿਆਰਬੰਦ ਜੰਗ ਲਈ ਅਜਿਹੇ ਸੰਗਠਨ ਮਾਓਵਾਦੀਆਂ ਲਈ ਭਰਤੀ ਲਈ ਵਰਤੇ ਜਾਣਗੇ। ਇਸ ਰਿਪੋਰਟ ਨੂੰ 9 ਮਾਰਚ 2018 ਨੂੰ ਜਾਰੀ ਕੀਤਾ। ਇਸੇ ਲੇਖਕ ਵੱਲੋਂ ਇਕ ਹੋਰ ਰਿਪੋਰਟ ਮਹਾਰਾਸ਼ਟਰ ਦੇ ਤੱਤਕਾਲੀ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ ਨੂੰ ਅਪ੍ਰੈਲ ’ਚ ਪੇਸ਼ ਕੀਤੀ ਗਈ।
ਮਈ ’ਚ ਭੀਮਾ ਕੋਰੇਗਾਂਵ ਮਾਮਲੇ ’ਚ ਯੂ. ਏ. ਪੀ. ਏ. ਕਾਨੂੰਨ ਨੂੰ ਜੋੜਿਆ ਗਿਆ। 6 ਜੂਨ ਨੂੰ ਮਹਾਰਾਸ਼ਟਰ ਪੁਲਸ ਨੇ ਰਿਪਬਲਿਕਨ ਪੈਂਥਰਜ਼ ਦੇ ਕਰਤਾ-ਧਰਤਾ, ਵਕੀਲ ਅਤੇ ਦਲਿਤ ਵਰਕਰ ਸੁਰੇਂਦਰ ਗਾਡਲਿੰਗ, ਸਕਾਲਰ ਮਹੇਸ਼ ਰਾਊਤ, ਸਹਾਇਕ ਪ੍ਰੋਫੈਸਰ ਸ਼ੋਮਾ ਸੇਨ ਅਤੇ ਜੇ. ਐੱਨ. ਯੂ. ਦੀ ਰੋਨਾ ਵਿਲਸਨ ਵਰਗੇ 5 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ। ਪੁਲਸ ਵੱਲੋਂ ਇਨ੍ਹਾਂ ਲੋਕਾਂ ਦੀ ਅਰਬਨ ਮਾਓਵਾਦੀਆਂ ਦੇ ਪ੍ਰਮੁੱਖ ਅਧਿਕਾਰੀਆਂ ਦੇ ਤੌਰ ’ਤੇ ਵਿਆਖਿਆ ਕੀਤੀ ਗਈ।
ਪੁਲਸ ਨੇ ਕਿਹਾ ਕਿ ਜੁਲਾਈ 2017 ’ਚ ਵਿਲਸਨ ਦੇ ਘਰੋਂ ਇਕ ਪੱਤਰ ਬਰਾਮਦ ਕੀਤਾ ਗਿਆ ਜਿਸ ਦੇ ਅਨੁਸਾਰ ਕਾਮਰੇਡ, ਕਿਸਾਨ ਅਤੇ ਕੁਝ ਹੋਰ ਸੀਨੀਅਰ ਕਾਮਰੇਡਾਂ ਨੇ ਮੋਦੀ ਰਾਜ ਨੂੰ ਖਤਮ ਕਰਨ ਲਈ ਠੋਸ ਕਦਮ ਦੀ ਤਜਵੀਜ਼ ਰੱਖੀ। ਰਾਜੀਵ ਗਾਂਧੀ ਹੱਤਿਆਕਾਂਡ ਦੀ ਘਟਨਾ ਵਰਗੀ ਇਕ ਹੋਰ ਘਟਨਾ ਬਾਰੇ ਸੋਚਿਆ ਗਿਆ। ਇਸੇ ਦੇ ਆਧਾਰ ’ਤੇ ਪੁਲਸ ਨੇ ਸੁਧਾ ਭਾਰਦਵਾਜ, ਗੌਤਮ ਨਵਲੱਖਾ, ਆਨੰਦ ਤੇਲਤੁੰਬੇ, ਵਰਨਣ ਗੋਨਜਾਲਵਿਕਸ ਅਤੇ ਵਾਰਾਵਾਰਾ ਰਾਓ, ਹੈਨੀ ਬਾਬੂ ਅਤੇ ਕਬੀਰ ਕਲਾ ਮੰਚ ਦੇ ਤਿੰਨ ਮੈਂਬਰਾਂ ਸਾਗਰ ਗੋਰਖੇ, ਜੋਤੀ ਜਗਤਾਪ ਅਤੇ ਰਮੇਸ਼ ਗਾਓਚੋਰ ਨੂੰ ਗ੍ਰਿਫਤਾਰ ਕੀਤਾ।
ਇਸ ਦੇ ਇਲਾਵਾ 83 ਸਾਲਾ ਵੈਧਾਂਤੀ ਅਤੇ ਪਾਦਰੀ ਸਟੇਨ ਸਵਾਮੀ ਨੂੰ ਵੀ ਗ੍ਰਿਫਤਾਰ ਕੀਤਾ। ਇਨ੍ਹਾਂ ਸਾਰਿਆਂ ਦਾ ਭੀਮਾ ਕੋਰੇਗਾਂਵ ਦੀ ਹਿੰਸਾ ਨਾਲ ਕੋਈ ਲੈਣਾ-ਦੇਣਾ ਨਹੀਂ। ਇੱਥੋਂ ਤੱਕ ਕਿ ਇਹ ਸਾਰੇ ਲੋਕ ਮੌਕੇ ’ਤੇ ਹਾਜ਼ਰ ਨਹੀਂ ਸਨ। ਇਸ ਮਾਮਲੇ ਨੂੰ ਗੰਭੀਰ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਹੱਤਿਆ ਦੀ ਸਾਜ਼ਿਸ਼ ਰਚਨ ਦੇ ਦੋਸ਼ ਲੱਗੇ ਹਨ ਪਰ ਅਜੇ ਤਕ ਟ੍ਰਾਇਲ ਸ਼ੁਰੂ ਨਹੀਂ ਹੋਇਆ। ਪਿਛਲੇ ਸਾਲ ਬੀ. ਬੀ. ਸੀ. ਨੇ ਸਟੇਨ ਸਵਾਮੀ ’ਤੇ ਇਕ ‘ਭਾਰਤ ’ਚ ਅੱਤਵਾਦ ਦੇ ਲਈ ਦੋਸ਼ੀ ਸਭ ਤੋਂ ਬਜ਼ੁਰਗ ਵਿਅਕਤੀ’ ਸਿਰਲੇਖ ਤਹਿਤ ਇਕ ਰਿਪੋਰਟ ਪ੍ਰਕਾਸ਼ਿਤ ਵੀ ਕੀਤੀ।
ਚਿਤਰਕੂਟ ’ਚ ਸੰਘ ਦਾ ਚਿੰਤਨ
NEXT STORY 
